Tadikaka Lalokau Henia Karana Habadaia Noho
Tadikaka Lalokau Henia Karana Habadaia Noho
“Lalokau ena dala dekenai do umui mauri noho, Keriso ese ita ia lalokau henia bamona.”—EFE. 5:2.
1. Iesu ia gwau ena murinai idia raka taudia edia kara badana ma ta be dahaka?
IEHOVA ENA WITNES TAUDIA edia kara ta be, ruma-ta-ruma-ta ai Dirava ena Basileia ena sivarai namona idia harorolaia. To, Keriso Iesu ese ena murinai idia raka taudia edia kara ma ta ia herevalaia neganai, ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioa. 13:34, 35.
2, 3. Edena dala ai iseda tadikaka lalokau henia karana ese kongrigeisen heboudia idia mai taudia edia lalona ia veria diba?
2 Keristani tadikaka orea korikorina ena lalokau be idau momokani. Magenta be auri momorudia ia veria kahirakahira hegeregerena, lalokau be Iehova ena hesiai taudia ia veria kahirakahira bona kudou-maoro taudia ia veria tomadiho momokani lalonai idia vareai totona. Haheitalai be inai: Marcelino be Cameroon tauna, bona gaukara gabunai aksiden ta ia vara murinai ena matana ia dika. Unai aksiden murinai, haida idia gwau Marcelino ena matana ia dika badina ia be meamea tauna. Iena dubu ena pasto bona dubu taudia ma haida be iena lalona idia hagoadaia lasi bona edia dubu ena lista amo ena ladana idia kokia. Iehova ena Witnes tauna ta be Marcelino ia boiria kongrigeisen ena hebou ta dekenai ia mai totona, to Marcelino ia daradara sisina. Oibe, ia ura lasi dubu ma ta be ia idia dadaraia lou.
3 Marcelino be Kingdom Hall ai idia vara karadia dainai ia hoa. Tadikaka taihu ese ia idia hedavari henia, bona hebou ai ia kamonai Baibel herevadia ese ena lalona ia hagoadaia. Kongrigeisen hebou ibounai ia lao henia matamaia, ena stadi ia goadalaia, bona lagani 2006 ai bapatiso ia abia. Hari, ia be ena ruma bese taudia bona dekena taudia dekenai hereva momokani ia harorolaia, bona haida ia stadi henia. Marcelino be Dirava ena taunimanima edia lalokau karana ia mamia dainai, ia ura ia stadi henia taudia be unai idia mamia danu.
4. Paulo ia gwau “lalokau ai do umui raka noho”; dahaka dainai unai sisiba ita badinaia be namo?
4 Iseda tadikaka lalokau henia karana ita hahedinaraia noho be namo, badina unai ese momo ia veria mai diba. Mani oi laloa: Hanuaboi ai lahi ia araia noho neganai, taunimanima idia ura unai lahi kahirakahira idia helai, idia siahu totona. To, unai lahi do ia bodo bema au ma haida idia atoa lasi. Unai hegeregerena, bema tadikaka taihu ta ta idia gaukara goada edia lalokau idia hagoadaia totona, kongrigeisen ai unai lalokau do ia goada. To, edena bamona unai ita karaia diba? Paulo ia haere: “Lalokau ai do umui raka noho, Keriso ese umui ia lalokau henia bamona bona ia ese umui totona Dirava dekenai sibona ia henia, bonana namona boubou gauna ta bamona.” (Efe. 5:2, NW ) Ita ura inai henanadai ita laloa: Edena dala ai lalokau ai do ita raka noho?
“Umui Danu, Emui Lalokau Umui Habadaia”
5, 6. Dahaka dainai Paulo ese Korinto tadikaka ia hagoadaia ‘edia lalokau idia habadaia’ totona?
5 Paulo be Korinto tadikaka dekenai ia gwau: “Korinto tadikaka e, umui dekenai gau ibounai ai gwauraia hedinarai, gau ta lau hunia lasi, bona umui totona emai kudouna ai ia noho lalokauna ai habadaia. Ai ese emai lalokau umui totona be ai hahedinaraia, to umui ese emui lalokau umui hahedinaraia lasi. Unai dainai ai karaia bamona do umui karaia, umui be egu natudia bamona lau hereva henia, umui danu, emui lalokau umui habadaia.” (2 Kor. 6:11-13, NW ) Dahaka dainai Paulo be Korinto tadikaka ia hagoadaia edia lalokau idia habadaia totona?
6 Korinto ai kongrigeisen ia matamaia dalana mani ita laloa. Lagani 50 C.E. ena keru matamaia negana ai, Paulo be Korinto ai ia ginidae. Paulo be unuseniai haroro gaukara ia karaia matamaia neganai, haida ese idia dagedage henia, to ena haroro gaukara ia hadokoa lasi. Daudau lasi murinai, unai hanua taudia momo be sivarai namona idia abia dae. “Lagani ta bona hua 6” lalonai, Paulo be unai kongrigeisen matamatana ia hadibaia bona ia hagoadaia. Unai ese ia hahedinaraia, Paulo be Korinto tadikaka ia lalokau henia bada. (Kara 18:5, 6, 9-11) Unai dainai, idia danu be Paulo idia lalokau henia bona matauraia. To, kongrigeisen ai haida be Paulo idia dadaraia. Reana haida be iena sisiba idia ura lasi kamonai. (1 Kor. 5:1-5; 6:1-10) Eiava ma haida be “aposetolo taudia namo herea” edia maumau hereva idia kamonai. (2 Kor. 11:5, 6) Paulo ia ura ena tadikaka bona taihu be ia idia lalokau henia. Unai dainai, ia noinoi idia be ia bona ena tadikaka kahirakahira idia mai, unai amo ‘edia lalokau idia habadaia.’
7. Edena dala ai tadikaka lalokau henia karana o ‘eda lalokau ita habadaia’ diba?
7 Ita be edena bamona? Edena dala ai tadikaka lalokau henia karana o ‘iseda lalokau ita habadaia’ diba? Haida idia ura edia mauri lagani tamona taudia o hanua tamona taudia sibona idia bamoa. Eiava haida idia bamoa momo badina idia ida moale karadia idia karaia hebou. Bema ita be unai bamona, vadaeni ‘iseda lalokau ita habadaia’ o tadikaka taihu ma haida ita bamoa be namo. Ita sibona ita nanadaia: ‘Haroro gaukara o moale karadia dekenai, hanaihanai tadikaka o taihu tamona sibona lau bamoa badina ia sibona lau diba o manada, a? Kingdom Hall ai, nega ginigunana hebou idia mai taudia lau hereva henia momo lasi, badina lau laloa idia be egu turana ai do idia lao haraga lasi, a? Kongrigeisen dekenai, lau be buruka taudia bona matamata taudia lau hedavari henia, a?’
8, 9. Edena dala ai Paulo ena sisiba, Roma 15:7 ai ese ita ia durua ma haida dekenai hanamoa hereva ita gwauraia bona unai ese iseda tadikaka lalokau henia karana ia habadaia diba?
8 Paulo ena hereva Roma taudia dekenai be, “umui ta ta do umui abia dae”; unai hereva ese ita ia durua diba iseda tadikaka taihu dekenai lalohadai maorona ita abia totona. (Roma 15:7 duahia.) Unai siri ai idia hahanaia Greek herevana, “abia dae” ena anina be “ta oi welkam henia o heabidae karana oi hahedinaraia, iena turana ai oi lao.” Baibel negadiai, heabidae tauna ta be ena ruma ai ena turana haida ia boiria neganai, ia gwau: ‘Lau moale umui lau itaia dainai.’ Laulau dalanai, Keriso be ita ia abia dae, bona Baibel ese ita ia hagoadaia iseda tadikaka ita abia dae, Iesu ia karaia bamona.
9 Kingdom Hall bona gabu ma haida ai tadikaka ita hedavari henia neganai, hebou ai ita itaia momo lasi taudia o ita do hereva henia lasi taudia ita tahua danu. Reana miniti haida lalonai idia ida ita herevahereva be namo. Hebou gabena ma ta ai, ma haida dekenai unai bamona ita karaia diba. Ena be nega sisina ita henia, to eda tadikaka taihu momo ida do ita herevahereva namonamo. To bema unai dina ai tadikaka o taihu haida ita hereva henia bona ma haida be lasi, unai ita laloa momo be anina lasi. Danu, ita hedavari henia lasi taudia idia lalohisihisi be anina lasi.
10. Dahaka dala ia kehoa kongrigeisen taudia ibounai ese idia karaia totona? Edena dala ai unai kara ita habadaia diba?
10 Ma haida abia dae kara ginigunana be inai: Hedavari eiava hanamoa hereva ita gwauraia. Unai ese dala ia kehoa idia ita hereva henia bona edia turana ai ita lao totona. Hegeregere, hebouhebou ai idia lao taudia be ma haida idia hedavari henia bona idia herevahereva dainai, idia ura dikadika gabeai idia hedavari lou. Kingdom Hall konstraksen volantia taudia bona nega dikadia ai heduru idia henia taudia be nega momo tura namodia idia davaria, badina edia gaukara hebou amo edia kara namodia idia diba. Iehova ena orea lalonai tura namodia ita davaria diba. Bema tomadiho momokani lalonai ita ia hatamonaia ‘lalokau ita habadaia,’ turana momo do ita davaria.
Nega Ita Atoa Ma Haida Totona
11. Mareko 10:13-16 hegeregerena, Iesu be dahaka haheitalai ia hahedinaraia?
11 Iesu bamona, Keristani taudia ibounai idia hekwarahi ma haida edia turana ai idia lao totona. Iesu ena hahediba taudia ese tama sina idia koua edia natuna be Iesu dekenai idia mailaia lasi neganai, Iesu ena haere be dahaka? Ia gwau: “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia.” Bena “maragidia ia rosia, bona iena imana ia atoa edia latanai, ia hanamoa.” (Mar. 10:13-16) Mani oi laloa: Reana unai matamata taudia idia moale dikadika badina Hadibaia Tauna be idia ia laloa bada bona lalokau henia!
12. Dahaka ese ma haida ida ita herevahereva karana ia hadikaia diba?
12 Namona be Keristani taudia be ta ta sibona idia nanadaia, ‘Lau be mai egu nega ma haida ida lau herevahereva totona, o nega momo lau hahedinaraia lau bisi, a?’ Nega haida ita karaia karadia be kerere lasi, to idia be eda herevahereva karana idia hadikaia diba. Hegeregere, bema haida vairanai mobael fon ita gaukaralaia momo o taia fon amo miusiki ita kamonai, reana do idia laloa idia ita ura henia lasi. Bema haida vairanai kompiuta dekenai ita bisi bada, reana do idia laloa ita ura lasi idia ida ita herevahereva. Momokani, “regerege lasi dekenai ita noho be mai ena nega.” To haida idia noho neganai, nega momo unai be ‘herevahereva ena nega.’ (Had. 3:7) Reana haida do idia gwau, “Lau ura lau sibona lau noho” eiava “Lau ura lasi dabai haida lau hereva henia.” Herevana ita ura lasi haida ita hereva henia, to ma haida hereva henia be lalokau karana bona Baibel ia gwau, “Lalokau be sibona ena gau ia tahua lasi.”—1 Kor. 13:5.
13. Paulo ese Timoteo ia hagoadaia tadikaka bona taihu be edena bamona ia laloa totona?
13 Paulo ese tau matamata Timoteo ia hagoadaia, kongrigeisen taudia ibounai ia matauraia totona. (1 Timoteo 5:1, 2 duahia.) Ita danu, namona be buruka tadikaka bona taihu be eda tamana bona sinana bamona ita hereva henia bona kara henia, bona matamata taudia be eda natudia, kakana o tadina bamona ita hereva henia o kara henia. Unai bamona ita karaia neganai, iseda tadikaka taihu namodia be ita dekenai do idia gari lasi, to eda turana ai do idia lao.
14. Ma haida ida gau namodia ita herevalaia hebou ena namo be dahaka?
14 Ma haida ida gau namodia ita herevalaia hebou neganai, idia ita durua Iehova idia badinaia noho bona idia moale. Betele tadikaka ta be Betele ai guna idia gaukara taudia haida ia do laloatao noho, badina nega ginigunana Betele ai ia vareai neganai, nega momo unai taudia be nega idia atoa ia ida idia herevahereva totona. Edia hagoadaia hereva dainai, tadikaka ia mamia Betele taudia be ia idia lalokau henia. Hari ia be unai bamona ia karaia, nega ia atoa Betele taudia ma haida ida ia herevahereva totona.
Manau Karana ese Ita Ia Durua Ma Haida ida Maino Ita Karaia Totona
15. Dahaka ese idia hahedinaraia iseda huanai hepapahuahu idia vara diba?
15 Idaunegai Filipi dekenai idia noho Keristani taihu rua, Euodia bona Sunutuke, huanai be hepapahuahu ta ia vara bona idia hamaoromaoroa be auka. (Fili. 4:2, 3) Paulo bona Banaba be haida vairanai idia hepapahuahu bona idia parara. (Kara 15:37-39) Unai sivarai ese idia hahedinaraia, Iehova idia tomadiho henia taudia huanai hepapahuahu ia vara diba. Iehova be heduru ia henia unai hepapahuahu ita hamaoromaoroa bona ita hetura lou totona. To Ia ura dahaka ita karaia be namo?
16, 17. (a) Edena dala ai manau karana ese ita ia durua hepapahuahu ita hamaoromaoroa totona? (b) Iakobo be Esau dekenai dahaka ia karaia dainai, ia hahedinaraia manau karana be mai anina bada?
16 Inai haheitalai mani oi laloa: Oi bona emu turana be motuka ai umui guia bona umui ura gabu ta umui lao. To, motuka ia stat bona ia heau totona, ki amo ensini oi stat guna be namo. Unai hegeregerena, hepapahuahu ita hamaoromaoroa totona, namona be ki bamona gauna ta ita gaukaralaia. Unai be manau. (Iamesi 4:10 duahia.) Henunai ai torea Baibel ena sivarai haida ese idia hahedinaraia, haida be idia manau bona Baibel ena hakaua herevadia idia badinaia matamaia.
17 Iakobo be vara guna ahuna ia abia dainai, Esau ese lagani 20 lalodiai ia badu henia bona ia ura ia alaia mase. Unai lagani murinai unai hekapa ruaosi be kahirakahira do idia hedavari neganai, “Iakobo be ia gari dikadika, iena kudouna danu ia hekwarahi bada.” Ia diba Esau ese ia do ia tuari henia. To idia hedavari neganai, Iakobo be kara idauna ta ia karaia bona Esau ia hoa. Iakobo be ena kakana kahirakahira dekenai ia ginidae bona “iena kwarana ia atoa diho tano dekenai.” Bena dahaka ia vara? “Esau ese ia dekenai ia heau lao, ia rosia, bona ia kisi henia. Ruaosi idia taitai noho.” Bena idia tuari lasi. Iakobo ena manau karana ese Esau ia durua ena badu noho karana ia hadokoa totona.—Gen. 27:41; 32:3-8; 33:3, 4.
18, 19. (a) Hepapahuahu ia vara neganai, dahaka dainai oi o lau ese Baibel ena sisiba ita badinaia guna be namo? (b) Bema ta ia ura lasi ia ida maino ita karaia, ita hesiku be namo, a?
18 Baibel dekenai be sisiba namodia momo idia noho, bona unai ese ita idia durua diba hepapahuahu ita hamaoromaoroa totona. (Mat. 5:23, 24; 18:15-17; Efe. 4:26, 27) * Mai manau ida unai sisiba ita badinaia neganai, maino do ita karaia be auka lasi. Namo lasi ita naria ela bona haida ese manau karana idia hahedinaraia guna bena hekwakwanai do ita hamaoromaoroa; lasi, ita danu ita manau be namo.
19 Bema ita lao ta ida maino ita karaia toho totona, to badina haida dainai ia ura lasi, namona be ita hesiku lasi. To nega ita henia ma ta ena badu siahuna ia keru o maragi totona. Iosepa ena kakadia be ia dekenai idia kara dika. Lagani momo murinai, idia be Iosepa idia vadivadi henia bona ia be Aigupito ena praiminista vadaeni. To, unai negai edia kara idia haidaua bona idia noinoi Iosepa ese edia dika ia gwauatao totona. Iosepa ese edia dika ia gwauatao, bona Iakobo ena natuna be bese badana ta ai idia lao bona hahenamo hereadaena be Iehova ena ladana idia huaia. (Gen. 50:15-21) Bema eda tadikaka bona taihu ida maino ita karaia, kongrigeisen lalonai lalotamona bona moale do ia noho.—Kolose 3:12-14 itaia.
Mai Momokani ida Iseda Kara amo Lalokau Ita Hahedinaraia
20, 21. Iesu ese ena aposetolo taudia edia aena ia huria karana amo dahaka ita dibaia?
20 Iesu ena mase negana ia kahirakahira neganai, ia ese ena aposetolo taudia ia hamaoroa: “Dala lau hedinaraia vadaeni umui dekenai, vadaeni umui ese danu lau karaia bamona do umui karaia.” (Ioa. 13:15) Ia be aposetolo taudia 12 edia aena ia huria neganai, unai hereva ia gwauraia. Iesu be kastom eiava kara namona ta dainai unai ia karaia, a? Lasi. Ioane be aena huria ena sivarai ia do kikilaia lasi neganai, ia gwau: “Iesu be tanobada ai ia murinai idia raka taudia ia lalokau henidia ela bona dokona.” (Ioa. 13:1, NW ) Oibe, Iesu be ena aposetolo taudia ia lalokau henia dainai, hesiai tauna ta bamona edia aena ia huria. Namona be aposetolo taudia ese mai manau bona lalokau ida ma haida dekenai kara namodia idia karaia. Oibe, tadikaka lalokau henia karana ese ita ia durua eda tadikaka bona taihu ibounai ita naria o laloa bada totona.
21 Dirava ena Natuna ese ena aena ia huria tauna ta, aposetolo Petero, be Iesu ena kara ena anina ia lalopararalaia. Ia gwau: “Umui ese hereva momokani umui badinaia karana amo umui sibona umui hagoevaia vadaeni. Unai dainai mai momokani ida tadikaka lalokau henia karana umui hahedinaraia, bona mai emui kudouna ibounai ida ta ta umui lalokau henia.” (1 Pet. 1:22, NW ) Lohiabada ese ena aena ia huria tauna ma ta, aposetolo Ioane, ia gwau: “Lauegu natuna e, iseda lalokau be hereva gauna sibona lasi. Namo ita lalokau henia, hereva sibona dekena amo lasi, to mai kara, bona mai momokani danu.” (1 Ioa. 3:18) Namona be mai eda kudouna ibounai ida iseda kara amo tadikaka lalokau henia karana ita hahedinaraia.
[Footnote]
^ par. 18 Iehova Ena Ura Ia Karaia Orea bukana, rau 144-150 itaia.
Oi Laloatao, A?
• Edena dala idauidau ai ma haida dekenai “eda lalokau ita habadaia” diba?
• Dahaka ese ita do ia durua nega ita atoa ma haida totona?
• Maino ita karaia totona, dahaka dainai manau be mai anina bada?
• Dahaka ese ita do ia durua eda tadikaka taihu ita naria o laloa bada totona?
[Study Questions]
[Picture on page 21]
Iseda tadikaka taihu ita abia dae
[Picture on page 23]
Nega ita atoa ma haida totona