Baibel Ia Ginidae Madagascar Motumotu Dekenai

MADAGASCAR motumotu be Africa ena sautist konena amo ena daudau be kilomita 400 bamona, bona ia be tanobada hegegemadai ai motumotu badana namba foa. Malagasy taudia be idaunegai amo inai ladana Iehova idia diba, badina Malagasy gado ai idia hahanaia Baibel lalonai Dirava ena ladana ia noho, bona lagani 170 mai kahana lalonai idia gaukaralaia. Malagasy gado ai Baibel idia hahanaia taudia be idia gaukara goadagoada.

Malagasy gado ai Baibel hahanaia gaukarana be Mauritius motumotu dekenai idia hamatamaia. Lagani 1813 ai, Mauritius ena British gavana, Sir Robert Farquhar, ese Malagasy gado ai Evanelia bukadia hahanaia gaukarana ia hamatamaia. Gabeai, ia ese Madagascar ena King Radama 1 ia hagoadaia, London Missionary Society (LMS) amo tisa haida do ia boiria Madagascar motumotu dekenai idia lao totona.

August 18, 1818 ai, Welsh ena misinari rua, David Jones bona Thomas Bevan, be Mauritius amo idia lao Toamasina dekenai. Unuseniai idia noho taudia be tomadiho idia laloa bada, to edia sene tubudia idia tomadiho henia bona idia gwauraia taravatudia be edia mauri lalonai idia badinaia danu. Malagasy taudia edia gado be namo herea, unai gado be Malayo⁠-⁠Polynesian amo ia mai.

Jones bona Bevan be sikuli maragina ta idia kehoa, unai murinai edia adavadia bona natudia be Mauritius amo idia abia lao Toamasina dekenai. To madi, lagani 1818 December ai, idia ibounai be malaria idia davaria, Jones ena adavana bona natuna be unai nega ai idia mase. Hua rua murinai, Bevan bona ena ruma bese ibounai be malaria dainai idia mase. David Jones sibona ia mauri.

Jones ia lalometau to unai ese ia koua lasi. Ia ura dikadika Madagascar taudia be edia gado ai Dirava ena Hereva idia duahia, unai dainai ia gaukara goada. Jones be gorere amo ia namo lou totona, Mauritius dekenai ia lao, unuseniai Malagasy gado ia dibaia matamaia. Unai murinai, Ioane ena Evanelia bukana ia hahanaia matamaia.

October 1820 ai, Jones be Madagascar dekenai ia giroa lou. Taoni ladana, Antananarivo dekenai ia ginidae, bona misinari sikuli matamata ta ia haginia. Sikuli gabuna be ia namo momokani lasi. Stadi bukadia, blakbod, o gaukara patadia be lasi. To sikuli ena program be namo herea, bona natudia idia ura bada diba idia abia.

Hua seven bamona lalonai Jones be sibona ia gaukara, unai murinai Bevan ena gabu ia abia misinari tauna, David Griffiths be iena gaukara turana ai ia lao. Idia ruaosi be edia nega bona goada idia henia, Malagasy gado ai Baibel idia hahanaia totona.

Baibel Idia Hahanaia Matamaia

Lagani 1820 bamona ai, Malagasy gado ai idia torea buka tamona sibona ena ladana be sorabe​​—⁠unai be Arabic leta ai idia torea. Taunimanima haida sibona be unai buka idia duahia diba. Unai dainai, unai misinari rua be King Radama 1 ida idia hereva murinai, king ese gwaumaoro ia henidia sorabe ena toretore idia haidaua, bona Roma ena alfabet do idia gaukaralaia.

September 10, 1823 ai, gado hahanaia  gaukarana idia hamatamaia. Jones be Genese bona Mataio ia hahanaia, bona Griffiths be Esodo bona Luka ia hahanaia. Idia ruaosi idia gaukara goada unai hahanaia gaukara idia karaia totona. Unai gaukara sibona idia karaia lasi, to danu dabai bona adorahi ai sikuli dekenai tisa gaukara idia karaia. Danu idia be dubu gaukaradia idia hegaegaelaia bona gado toi ai idia naria. Ena be unai gaukara idauidau idia karaia, to idia dekenai gado hahanaia gaukarana be mai anina bada.

Student taudia 12 ese unai misinari taudia rua idia durua, bona hua 18 lalonai Greek Revarevadia bona Heberu Revarevadia edia kahana haida idia hahanaia ore. Lagani ta murinai, Baibel ibounai idia hahanaia ore. To, kerere haida idia hamaoromaoroa be namo. Unai dainai gado stadilaia taudia, David Johns bona Joseph Freeman be England amo idia lao heduru idia henia totona.

Hekwakwanai Haida Idia Haheaukalaia

Malagasy gado ai Baibel hahanaia gaukarana idia haorea neganai, London Missionary Society ese Charles Hovenden idia siaia, Madagascar ena printa masini ginigunana ia karaia totona. Hovenden be November 21, 1826 ai ia ginidae. To, unai hua lalonai ia be malaria ia davaria bona ia mase, bona masini gaukaralaia dalana be ta dekenai ia hadibaia lasi. Unai lagani murinai, Scotland amo James Cameron idia siaia, ia be masini gaukaralaia dalana ia diba. Ia ese masini ena buka maragina ia gaukaralaia unai masini ia karaia totona. Cameron be masini ia gaukaralaia neganai ia hekwarahi bona kerere momo ia karaia, to December 4, 1827 ai, Genese karoa 1 ena kahana ta ia printaia ore. *

July 27, 1828 ai, King Radama 1 ia mase murinai gau ma ta ia vara. King Radama be gado hahanaia gaukarana ia durua bada. David Jones ia gwau: “King Radama be unai gaukara ia matauraia bona ia durua. Ia be edukeisen ia laloa bada, bona ia ura bada iena taunimanima be diba namona idia abia, ia dekenai unai be golo bona siliva ia hereaia.” To, king ia mase neganai, iena adavana, Ranavalona 1 ese ena gabu ia abia, to ia be King Radama ena ura ia badinaia lasi. Badina Ranavalona ia ura lasi gado hahanaia gaukarana ia durua.

Ranavalona 1 be kwini ai ia lao murinai, England amo vadivadi tauna ta ia mai bona ia ura kwini ida gado hahanaia gaukarana idia herevalaia. To ia idia abia dae lasi. Nega ta, misinari taudia be kwini idia hamaoroa, idia ura iena taunimanima dekenai gau momo idia hadibaia, Greek bona Heberu gado danu, to kwini ia gwau: “Greek bona Heberu gado lau laloa bada lasi, to lau ura lau diba bema egu taunimanima dekenai sopu karaia dalana umui hadibaia diba.” Misinari taudia idia diba reana Malagasy Baibel do idia haorea lasi neganai, kwini ese do ia siaidia lou, unai dainai Cameron be kwini ia noia wiki ta do ia henia iena ura gauna ia lalohadailaia totona.

Wiki ta murinai, Cameron ese unai hanua ai idia noho gaudia amo sopu ia karaia, bona rua be kwini ena hesiai taudia dekenai ia henia. Misinari taudia be unai gaukara bona gaukara ma haida idia karaia kwini idia hamoalea totona, unai dainai nega ia noho Greek Revarevadia bona Heberu Revarevadia ena kahana haida idia printaia haorea totona.

Taravatu Ta Ia Atoa, To Gabeai Ia Haidaua

Ena be matamanai kwini be misinari taudia ia dadaraia, to gabeai May 1831 ai taravatu ta ia atoa. Gwaumaoro ia henia iena taunimanima be bapatiso do idia abia, Keristani taudia ai idia lao totona! To, unai taravatu ia noho daudau lasi. Buka ta (A History of Madagascar) ia gwau: “Taunimanima momo idia bapatiso dainai kwini ena gaukara taudia idia laloa momo, unai dainai kwini idia hamaoroa, bema momo be bapatiso idia abia, idia be British ena gavamani ese do ia biagudia.” Unai dainai, lagani 1831 ena dokonai, kwini be bapatiso abia karana ia taravatua. Unai be gwaumaoro ia henia bona hua siks sibona murinai unai taravatu ia atoa.

 Kwini be ia daradara, bona gavamani taudia idia ura edia hanua karadia do idia badinaia, unai dainai nega ia noho misinari taudia be Baibel printaia gaukarana idia haorea totona. Keristani Greek Revarevadia be idia haorea vadaeni, bona kopi tausen momo idia halasia vadaeni. To, March 1, 1835 ai, Kwini Ranavalona 1 ese Keristani ena tomadiho karana ia taravatua bona oda ia atoa Keristani bukadia be gavamani dekenai idia abia lao totona.

Danu kwini ia atoa taravatu ese ia hahedinaraia Malagasy taudia be printa gaukara do idia durua lasi. Unai dainai unai gaukara idia haorea totona, misinari taudia haida sibona be unai gaukara idia karaia. Dina bona hanuaboi ai idia gaukara ela bona June 1835 ai, Baibel ibounai idia printaia ore. Oibe, Baibel be Malagasy gado ai idia halasia!

Keristani bukadia idia taravatua dainai, karaharaga Baibel idia hariharilaia bona kopi 70 be tano dekenai idia guria, unai amo gavamani taudia ese do idia hadikaia lasi. Unai idia karaia haraga be namo, badina lagani tamona lalonai misinari taudia idia siaidia lou edia gabu dekenai, to rua sibona be motumotu ai idia noho. To Madagascar dekenai Dirava ena hereva be ia bada ia lao noho.

Malagasy Taudia be Baibel Idia Ura Henia Bada

Madagascar taudia be edia gado ai Baibel idia duahia diba dainai idia moale! Unai Baibel lalonai kerere momo idia davaria bona idia hahanaia gadona be gado gunana. To, ruma momo dekenai Baibel ia noho, bona Malagasy taudia momo be Baibel idia duahia hanaihanai. Gau namona ta be inai: Idia hahanaia Baibel ena Heberu Revarevadia lalonai Dirava ena ladana, Iehova idia gaukaralaia momo. Idaunegai toretore haida lalonai, Dirava ena ladana be Greek Revarevadia ai idia gaukaralaia danu. Unai dainai, Malagasy taudia momo be Dirava ena ladana idia diba.

To, printa masini ia gaukaralaia tauna, Mr. Baker be Greek Revarevadia ena kopi ginigunadia ia printaia neganai, ia itaia Malagasy taudia idia moale bada bona ia gwau: “Lau be lau peroveta lasi, to lau diba momokani Dirava ena hereva be inai tano dekenai do idia kokia diba lasi!” Iena hereva be ia momokani. Ena be hahanaia taudia be malaria idia davaria, hanua ena gado idia dibaia totona be mai ena hekwarahi, bona gavamani ese taravatu idia atoa danu, to unai ese Dirava ena Hereva ia koua lasi Malagasy taudia ese idia dibaia totona.

Hari gau namodia momo idia vara. Edena dala ai? Lagani 2008 ai, Malagasy gado ai New World Translation of the Holy Scriptures Baibel idia halasia. Unai Baibel ese taunimanima momo do ia durua, badina hari idia gaukaralaia bona idia lalopararalaia haraga diba gadona ai idia hahanaia. Unai dainai, Madagascar motumotu ai Dirava ena Hereva be taunimanima momo ese idia dibaia noho.​​—⁠Isa. 40:⁠8.

[Footnote]

[Picture on page 31]

Malagasy gado ai “New World Translation” Baibel ese Dirava ena ladana, Iehova ia abia isi