Dirava Ena Hesiai Gaukara Lalonai Oi Bisi Bona Oi Moale

IEHOVA ia ura do oi moale. (Sal. 100:⁠2) Oi be Iena hesiai tauna ta dainai, reana oi danu oi bisi. Dirava dekenai emu mauri oi gwauhamatalaia neganai, reana oi bisi momokani lasi, to hari moni gaukara bona emu Keristani maduna idauidau dainai oi mamia oi bisi bada. Oi ura karaia gaudia oi hagugurua lasi neganai, oi lalohisihisi diba. Edena dala ai emu maduna idauidau oi huaia namonamo bona ‘Lohiabada dainai oi moale’ diba?​​—⁠Neh. 8:​10.

Oi be nega dikana lalonai oi noho bona metau gaudia momo oi davaria, unai dainai emu nega oi gaukaralaia namonamo be gau badana. Aposetolo Paulo ena sisiba be mai anina bada, ia gwau: “Emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka. Emui nega do umui gaukaralaia namonamo, badina inai nega be nega dikana.”​​—⁠Efe. 5:​15, 16, NW.

Unai aonega sisibana dainai, edena dala ai oi karaia diba tahua gaudia haida oi atoa, bona emu nega oi gaukaralaia namonamo sibona emu stadi, ruma bese naria, haroro gaukara, moni gaukara, bona gaukara ma haida oi karaia totona?

Dirava dekenai emu mauri oi gwauhamatalaia bona oi bapatiso neganai, oi abia moalena oi laloatao, a? Iehova bona ena ura oi dibaia dainai oi moale. Unai diba bona moale oi abia totona, reana hua momo lalonai oi hekwarahi Baibel oi stadilaia namonamo totona. To unai ese anina namona ia havaraia. Unai stadi karana ese emu mauri ia haidaua momokani.

Oi moale noho totona Dirava ena hesiai gaukara idauidau lalonai oi bisi be namo. Bema oi be nega lasi Baibel oi duahia bona stadilaia totona, emu sediual oi sekea namonamo. Dina ta ta lalonai miniti haida oi gaukaralaia Baibel oi stadilaia bona oi laloa dobu neganai, Iehova kahirakahira oi lao bona unai ese emu moale do ia habadaia.

Dirava ena hesiai taudia momo be edia nega idia gaukaralaia namonamo mai anina bada gaukaradia totona, unai amo anina lasi gaudia dekenai edia nega idia haorea kava lasi. Sibona oi nanadaia, ‘Magasin idaudia bona niuspepa duahia karana, TV raraia, miusiki kamonai henia, bona gadara ta dekenai lau haorea negana ena bada be edena bamona?’ Unai bamona gaudia dekenai eda nega ita gaukaralaia namonamo neganai, do ita moale.  (1 Tim. 4:⁠8) Bema oi be emu nega gaukaralaia namonamo karana dekenai oi hekwarahi, vadaeni emu sediual oi haidaua be namo.

Adam be elda ta, mai ena adavana bona natuna toi, bona ia idia durua gaudia ia herevalaia, ia gwau: “Lau hekwarahi gau momo lau tahua lasi totona. Egu nega bada idia haorea kava moale karadia bona kohu momo tahua karana lau dadaraia. Unai ese ia hahedinaraia lasi lau be moale karadia ibounai lau dadaraia, lasi, to egu nega bona goada bada idia haorea moale karadia sibona lau dadaraia.”

Oi abia hidi gaudia ese idia havaraia namo oi laloa dobu karana ese emu moale do ia habadaia, bona oi do ia durua lalohadai maorona oi dogoatao noho totona. Hegeregere, Mariusz, elda ta mai ena natuna toi, ia gwau: “Baibel lau stadilaia matamaia neganai, lau laloa gau ibounai be do idia namo sibona. Nega ta ta ai, hekwakwanai lau davaria, bona Iehova be unai ia diba. To Iehova ena heduru dainai, Ia lau tanikiu henia bona mai moale ida vaira negana lau naria noho.”

Mariusz bamona, ena be idia vara gaudia dekenai lalohadai maorona oi abia, to unai ese emu lalohekwarahi gaudia ibounai do ia kokia lasi. To oi do ia durua emu hemami do ia namo bona mauri ena hekwakwanai idauidau oi haheaukalaia totona. Baibel ia gwau: “Iena hisihisi ia laloa noho tauna, ena mauri dinadia ibounai be dika, to kudouna dekenai ia moale tauna ese, nega ibounai iena noho ia moalelaia noho.” (Aon. 15:15) Danu, Dirava ese oi dekenai ia hahedinaraia vadaeni lalokauna oi laloa dobu be namo. Unai laloa dobu karana ese emu lalokau Iehova dekenai do ia habadaia bona Ia amo ia mai moalena do oi abia.​​—⁠Mat. 22:⁠37.

Ruma bese maurina lalonai Iehova bona ena ura atoa guna karana ese ruma bese moalena do ia habadaia. Keristani kara namodia hahedinaraia karana ese ruma bese lalonai heiriheiri ia hamaragia, bona herevahereva hebou karana ia havaraia. Oibe, unai ia vara neganai emu ruma bese taudia ibounai huanai maino bona lalotamona do ia noho.​​—⁠Sal. 133:⁠1.

Ruma bese taudia ibounai be Dirava ena hesiai gaukara idauidau idia karaia hebou neganai, do idia moale bada. Mariusz ia gwau: “Egu ruma bese ida ai gaukara hebou negadia lau laloa bada. Egu adavana be lau ia durua bada. Hegeregere haroro gaukara ai, o hebouhebou do lasi neganai steidiam ai hagoevaia, bona kongrigeisen ma ta dekenai pablik tok henia totona lau lao neganai, ia be hanaihanai lau ia bamoa. Unai ese lau ia hagoadaia bada.”

Baibel ese Keristani taudia ia hagania tauanina dalanai edia ruma bese idia naria totona. (1 Tim. 5:⁠8) To bema moni gaukara ese emu nega bona goada bada ia haorea, unai ese emu moale Dirava ena hesiai gaukara lalonai ia haboioa diba. Iehova dekenai unai oi gurigurilaia be namo. (Sal. 55:22) Haida idia mamia Dirava ena Basileia idia atoa guna totona, moni gaukara ma ta idia tahua be namo. Keristani tauna ese ena nega bona goada bada ia haorea diba moni gaukara ia tahua lasi be namo, badina unai ese ia koua diba ena hesiai gaukara idauidau ia rakatania totona.​​—⁠Aon. 22:⁠3.

Reana heduru dalana ta be inai: Hari oi karaia moni gaukara bona gabeai do oi karaia moni gaukara edia namo bona dika be pepa ta dekenai oi torea. Momokani, oi ura gaukara namona oi moalelaia bona pei namona oi abia. To, hari oi karaia moni gaukara ese oi ia durua emu ruma bese ena hetura karana Iehova ida oi habadaia totona, a? Namona be unai gaudia oi laloa namonamo, bona oi karaia abia hidi ese idia hahedinaraia emu hetura karana Iehova ida be mai anina bada.

Bema hari oi karaia moni gaukara ese emu hetura karana Iehova ida ia hadikaia, vadaeni unai gaukara oi haidaua be namo. Keristani taudia momo be edia mauri lalonai gau haida idia haidaua, unai amo nega bada ia noho hesiai gaukara idauidau idia karaia totona. Poland ai, tadikaka ta ia gwau: “Guna lau karaia moni gaukara lau rakatania, badina nega momo bisinesi gaukaradia dainai gabu momo dekenai lau lao. Bona egu nega be hegeregere lasi egu ruma bese lau durua edia hetura karana Iehova ida idia hagoadaia noho totona.” Hari unai tadikaka be ena goada bona nega bada ia haorea kava lasi moni gaukara ta ia karaia.

Ma Haida Durua Karana amo Moale Oi Davaria

Iesu ia gwau: “Henia kara ena moale be bada, abia kara ena moale be maragi.” (Kara 20:35) Keristani taudia ese dala idauidau ai henia karana idia hahedinaraia diba. Nega haida, ta be tiokratik gaukarana ta ia karaia dainai, ia oi kiri henia, ena imana oi udeudea, o ia oi tanikiu henia neganai, umui ruaosi do umui moale.

 Aposetolo Paulo ese Keristani taudia ia hagoadaia, ia gwau: “Lalometau taudia do umui hagoadaia, manoka taudia do umui durua.” (1 Tes. 5:​14, NW ) Reana lalometau taudia idia laloa idia be hegeregere lasi sibona edia goada amo hekwakwanai idia haheaukalaia totona. Unai bamona taudia oi durua diba, a? Bema oi itaia emu tadikaka ta be Iehova ena hesiai gaukara ai ia moale lasi, namona be dala oi tahua ia oi hagoadaia totona. Unai amo oi danu be goada oi abia diba. Hekwakwanai haida be taunimanima ese idia hamaoromaoroa diba lasi. To, namona be oi hahedinaraia emu tadikaka oi laloa bada bona ia oi durua Iehova ena goada dekenai ia tabekau totona. Unai bamona idia karaia taudia be nega ibounai idia moale.​​—⁠Sal. 27:10; Isa. 59:⁠1.

Dala namona ma ta be inai: Ia moale lasi tadikaka oi boiria haroro gaukara ai oi ia bamoa totona. Iesu ese ena hahediba taudia 70 be “rua rua dekena amo ia siaia.” (Luka 10:⁠1) Oibe, unai amo idia hagoadaia heheni diba. Hari, oi be unai dala oi badinaia bona emu tadikaka oi hagoadaia ena moale ia abia lou totona, a?

Hari inai negai, eda mauri lalonai lalohekwarahi gaudia be momo. To, Paulo be ita ia hagoadaia, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale.” (Fili. 4:⁠4) Dirava oi lalokau henia, oi kamonai henia, bona ia henia gaukarana be mai emu ura ida oi karaia dainai, emu mauri be mai ena anina bona unai ese oi ia hamoalea. Danu, Iehova ese oi ia durua oi lalohekwarahilaia gaudia bona hekwakwanai oi haheaukalaidia totona.​​—⁠Roma 2:​6, 7.

Ita abia dae momokani, ita be kahirakahira Iehova ese ia gwauhamatalaia tanobada matamatana ai do ita vareai. Unuseniai hahenamo momo do ita moalelaia! (Sal. 37:34) Unai dainai, hari Iehova ese ita dekenai ia henia hahenamo idauidau dainai ita abia moalena ita haboioa lasi be namo. Oibe, “Iehova ita hesiai henia mai moale ida.”​​—⁠Sal. 100:⁠2, BHğ.

[Diagram on page 8]

(For fully formatted text, see publication)

Bema oi ura oi moale noho, namona be emu nega oi gaukaralaia namonamo

LAGA-ANI bona MOALE KARADIA

RUMA bona RUMA BESE NARIA

MONI GAUKARA

KERISTANI HEBOUDIA

SIBONA EMU STADI

HARORO GAUKARA

[Pictures on page 10]

Oi ura ma haida oi durua idia haboioa moalena idia abia lou totona, a?