Hekwakwanai Negadiai Oi Moale Noho
Hekwakwanai Negadiai Oi Moale Noho
“[Iehova] dekenai idia abidadama henia taudia, be do idia moale, do idia moale momokani ela bona hanaihanai.”—SAL. 5:11.
1, 2. (a) Hari inai negai dahaka gaudia ese lalohisihisi idia havaraia? (b) Keristani taudia momokanidia be taunimanima ese idia davaria hekwakwanai idia mamia, to dahaka hisihisi idia davaria danu?
TAUNIMANIMA ibounai ese idia davaria hekwakwanai be Iehova ena Witnes taudia ese idia davaria danu. Raskol karadia, tuari bona kara gageva ma haida be idia dekenai ia vara. Danu tano mareremarere bamona gaudia, hitolo, gorere bona mase dainai idia lalohisihisi bada. Aposetolo Paulo ena hereva be momokani, ia gwau: “Ita diba Dirava ese ia karadia gaudia ibounai be idia hisihisi noho, hahine ese natuna ia havaraia noho ena hisihisi bamona. Oibe, idia tai noho, guna, ia mai bona harihari.” (Roma 8:22) Unai sibona lasi, to ita be goevadae lasi taudia dainai, ita sibona eda kara dika dainai ita lalohisihisi danu. King Davida bamona, reana ita gwau: “Egu kerere bada ese, egu kwarana idia koua vadaeni, abata ese taunimanima ia koua bamona. Egu kerere ena metau be bada herea, lau huaia diba lasi.”—Sal. 38:4.
2 Keristani taudia momokanidia be unai hekwakwanai idauidau bona Keriso ena hahediba taudia ai idia lao dainai hisihisi idia davaria danu. (Luka 14:27) Oibe, Iesu hegeregerena, iena hahediba taudia be haida ese idia dagedage bona inai henidia. (Mat. 10:22, 23; Ioa. 15:20; 16:2) Unai dainai, Keriso ena murinai ita raka anina be tanobada matamata ena hahenamo ita naria noho lalonai do ita hekwarahi bona haheauka noho.—Mat. 7:13, 14, NW; Luka 13:24.
3. Edena bamona ita diba Dirava ia ura lasi lalohisihisi bona lalometau ai ita noho?
3 Vadaeni, anina be Keristani momokani taudia be edia mauri lalonai idia moale diba lasi, a? Eda mauri lalonai lalohisihisi bona lalometau sibona do ita mamia ela bona dokona ia ginidae, a? Ia hedinarai goevagoeva, Dirava ena gwauhamata do idia guguru negana ita naria noho lalonai, Ia ura do ita moale. Nega momo Baibel ia gwau Dirava korikorina idia tomadiho henia taudia be do idia moale. (Isaia 65:13, 14 duahia.) Salamo 5:11 ia gwau: “Oi dekenai idia abidadama henia taudia, be do idia moale, do idia moale momokani ela bona hanaihanai.” Oibe, ena be hekwakwanai ita davaria, to moale, maino bona noho namo ita davaria diba. Mani ita tahua Baibel be edena dala ai ita ia durua hahetoho ita haheaukalaia bona ita moale noho totona.
Iehova—“Moale Diravana”
4. Ta ese Dirava ena ura ia dadaraia neganai, Iena hemami be edena bamona?
4 Mani Iehova ita laloa. Ia be Siahu Ibounai Diravana bona tanobada bona guba ia biagua. Ia be gau ibounai dekenai ia hegeregere bona tau ta ia hegeregere lasi Dirava do ia durua totona. Ena be Iehova ena siahu be bada herea, to iena natuna ta be ia gwau-edeede bona Satani ai ia lao neganai, Ia lalohisihisi bada. Gabeai, aneru ma haida be unai gwau-edeede karana lalonai idia vareai neganai, Dirava ia lalohisihisi. Mani oi laloa, Dirava ese ia havaraia tau bona hahine goevadia, Adamu bona Heva, be Ia idia dadaraia neganai, Ia lalohisihisi bada danu. Unai nega amo ema bona hari, Adamu bona Heva edia natudia momo ese Iehova ena siahu idia dadaraia.—Roma 3:23.
5. Dahaka dainai Iehova ia lalohisihisi bada?
5 Satani ese ia hamatamaia gwau-edeede karana be hari ia do vara noho. Lagani 6,000 mai kahana lalonai, Iehova be kaivakuku tomadiho henia karadia, dagedage, ala-ala, bona matabodaga karadia ia itaia vadaeni. (Gen. 6:5, 6, 11, 12) Unai sibona lasi, to danu koikoi bona hadikaia herevadia ia kamonai. Oibe, nega haida Dirava idia tomadiho henia taudia danu be iena lalona idia hahisia. Baibel ese unai bamona sivarai ta ia gwauraia: “Nega momo, taunimanima idia noho lasi tano dekenai, iena bese taudia ese Dirava idia kamonai henia lasi, mai dagedage danu. Io, nega momo tano kaukau dekenai, idia ese Dirava ena lalona idia hisihisi henia. Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua.” (Sal. 78:40, 41) Iehova ena taunimanima be ia idia dadaraia neganai, Ia lalohisihisi bada. (Ier. 3:1-10) Oibe, ia hedinarai goevagoeva, hekwakwanai idauidau idia vara neganai, Iehova ia lalohisihisi bada.—Isaia 63:9, 10 duahia.
6. Dirava be edena dala ai hekwakwanai ia haheaukalaia noho?
6 Ena be Iehova ia lalohisihisi, to unai ese Ia ia koua lasi kara ta ia karaia totona. Hekwakwanai idia vara neganai, Iehova be karaharaga gau ta ia karaia, unai amo ia vara dika ia hamaragia diba. Danu, Ia be kara haida ia karaia vadaeni, unai amo dokona negana ai iena ura ibounai do ia guguru. Iehova be unai kara namodia ia karaia dainai, ena lohia siahuna do ia abia isi negana bona Ia idia tomadiho henia taudia be hahenamo do idia abia negana, be mai moale ida ia naria noho. (Sal. 104:31) Oibe, ena be Iehova ia lalohisihisi bada, to ia moale noho.—1 Tim. 1:11, NW; Sal. 16:11.
7, 8. Hekwakwanai idia vara neganai, edena dala ai Iehova ita tohotohoa diba?
7 Momokani, hekwakwanai hamaoromaoroa karana dekenai ita be Iehova bamona lasi. To, hekwakwanai idia vara neganai, Iehova ita tohotohoa diba. Hekwakwanai ita davaria neganai vaia ita lalohisihisi, to ita ura lasi nega daudau lalonai ita lalohisihisi noho. Ita be Iehova ena toana dekenai ia karaia dainai, ita be mai eda aonega bona ita laloa maoromaoro diba. Unai dainai, unai hekwakwanai do ita tahua namonamo bona kara haida ita karaia diba ita hamaoromaoroa totona.
8 Ita do ia durua gauna ta be inai: Do ita laloparara hekwakwanai haida be ita hamaoromaoroa diba lasi. Unai hekwakwanai ita lalohisihisilaia momo neganai, ita lalometau bada bona Dirava tomadiho henia karana ena moale do ita haboioa. Hekwakwanai ta hamaoromaoroa totona kara haida ita karaia murinai, namona be ita laloa momo lasi, to eda nega bada do ita gaukaralaia gaukara namodia ma haida ita karaia totona. Baibel ena sivarai ta ese unai point ia hahedinaraia.
Laloa Maoromaoro Karana be mai Anina Bada
9. Edena dala ai Hana be laloa maoromaoro karana ia hahedinaraia?
9 Hana, gabeai peroveta tauna Samuela ia havaraia hahinena ena haheitalai mani ita laloa. Ia be gabani bona Penina ese ia kirikirilaia dainai ia lalohisihisi bada. Nega haida, ia daradoko dainai ia taitai bona ia aniani lasi. (1 Sam. 1:2-7) Dina ta Hana be Iehova ena dubu helaga dekenai ia lao bona “ena lalona ia hisihisi bada, vadaeni Lohiabada dekenai ia guriguri, mai taitai bada danu.” (1 Sam. 1:10) Hana be Iehova dekenai ena lalohisihisi ibounai ia gurigurilaia murinai, hahelaga tauna Eli, ese ia hereva henia ia gwau: “Mai oiemu maino danu do oi lao, bona Israela ena Dirava ese oiemu noinoi gauna oi dekenai do ia henia.” (1 Sam. 1:17) Unai nega ai, Hana ia laloparara ia ese gau ibounai ia karaia vadaeni unai hekwakwanai hamaoromaoroa totona. To, ia be gabani bona unai hekwakwanai be ia ese ia hanamoa diba lasi. Hana be laloa maoromaoro karana ia hahedinaraia. Bena ia be “dala dekenai ia lao, ia aniani, bona iena lalohisihisi ia ore.”—1 Sam. 1:18.
10. Paulo be iena hekwakwanai ia hanamoa diba lasi neganai, dahaka lalohadai maorona ia hahedinaraia?
10 Aposetolo Paulo be hekwakwanai ia davaria neganai, lalohadai maorona ia hahedinaraia danu. Ia be mai ena hekwakwanai ta o “ginigini ta” dainai, ia lalohisihisi bada. (2 Kor. 12:7) Ita diba lasi Paulo ena hekwakwanai be dahaka, to ia be gau ibounai ia karaia unai ia hanamoa totona bona Iehova dekenai ia gurigurilaia. Paulo be nega hida Iehova ia noia unai ginigini ia kokia totona? Nega toi. Nega ihatoina murinai, Dirava ese Paulo ia hamaoroa unai “ginigini” be hoa dalanai do ia kokia lasi. Paulo ese unai ia abia dae bona nega bada ia gaukaralaia Iehova ia hesiai henia totona.—2 Korinto 12:8-10 duahia.
11. Iehova ita noia bona guriguri henia karana ese edena bamona ita ia durua diba?
11 Vadaeni, namo lasi ita laloa Iehova dekenai eda lalohekwarahi gauna do ita gurigurilaia lou lasi. (Sal. 86:7) Lasi, Dirava ena Hereva ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” Iehova ese unai bamona noinoi bona guriguri ia kamonai neganai, dahaka do ia karaia? Baibel ia gwau: “Dirava ena maino, lalohadai ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7, NW ) Oibe, reana Iehova ese iseda hekwakwanai do ia kokia lasi, to ia ese iseda lalona do ia gimaia. Ita guriguri murinai, reana ita laloparara unai hekwakwanai ita laloa momo karana ese lalometau ia havaraia diba.
Dirava Ena Ura Oi Karaia Bona Moalelaia
12. Dahaka dainai nega daudau lalonai ita lalohisihisi noho karana ese dika ia havaraia diba?
12 Aonega Herevadia 24:10 ia gwau: “Bema hekwakwanai neganai oi manoka neganai, oiemu goada be maragimaragi momokani.” Aonega herevana ma ta ia gwau: “Lalohisihisi ese, unai tau ena lauma ia hamanokaia noho.” (Aon. 15:13) Tadikaka taihu haida be idia lalohisihisi bada dainai, edia Baibel duahiduahi bona laloa dobu karana idia karaia lasi. Edia guriguri be idia gwauraia kava sibona bona hebou dekenai idia lao lasi. Ia hedinarai goevagoeva, nega daudau lalonai ita lalohisihisi noho karana ese iseda hetura karana Dirava ida ia hadikaia diba.—Aon. 18:1, 14.
13. Edena gaukara idauidau ese ita idia durua lalohisihisi ita hanaia bona ita moale totona?
13 To, lalohadai maorona ese ita ia durua, eda mauri lalonai kara namodia ita laloa bada bona ita moale totona. Davida ia gwau: “Lauegu Dirava e, lau ura dikadika oiemu ura do lau karaia.” (Sal. 40:8) Iseda mauri lalonai hekwakwanai ita davaria neganai, namo lasi Iehova tomadiho henia karadia ita rakatania. Oibe, ita idia hamoalea gaukara idauidau ita karaia be lalohisihisi koua dalana namona. Iehova ia gwau moale ita davaria diba bema hanaihanai iena Hereva ita duahia bona ita stadilaia. (Sal. 1:1, 2; Iam. 1:25, NW ) Buka Helaga bona Keristani hebou amo “hereva namodia” ita abia, bona unai ese iseda lalona idia hamoalea diba.—Aon. 12:25; 16:24.
14. Hari inai negai ita moale totona Iehova be edena bamona ita ia hagoadaia?
14 Dirava be kara namodia momo ia karaia dainai ita moale diba. Iena hahemauri gwauhamatana amo moale bada ita davaria diba. (Sal. 13:5) Ita diba herevana hari inai negai ita dekenai dahaka ia vara, to dokonai Dirava idia tahua goadagoada taudia be ia ese ahuna namona do ia henia. (Hadibaia Tauna 8:12 duahia.) Peroveta tauna Habakuku ese unai bamona abidadama ia herevalaia: “Bema fig auna ese huahua idia atoa lasi, bona vain huahua idia vara lasi, bona bema olive audia ese anina idia atoa lasi, bona uma ese koni idia hatubua lasi, ma bema mamoe ibounai idia mase ore, bona boromakau ena ruma danu, be anina lasi do ia noho, to lau be Lohiabada Dirava dekenai, do lau moale bada noho, badina ia be lauegu Hamauria Tauna.”—Hab. 3:17, 18.
Iehova Ena Bese Taudia be Idia Moale Noho
15, 16. Vaira negana ena hahenamo ita naria noho lalonai, edena harihari gaudia ita moalelaia diba?
15 Vaira negana ai do idia vara hahenamo ita naria noho lalonai, namona be Iehova ese ita ia henia gau namodia ita moalelaia. Baibel ia gwau: “Lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.” (Had. 3:12, 13) Inai hereva “kara namodia do idia karaia” ena anina be ita ese ma haida do ita durua. Iesu ia gwau, henia kara ena moale be bada, to abia kara ena moale be maragi. (Kara 20:35) Bema iseda adavana, natudia, tama sina bona varavara ma haida dekenai kara namodia ita hahedinaraia, vadaeni moale do ita davaria. (Aon. 3:27) Iseda tadikaka taihu dekenai hebogahisi, heabidae bona kara dika gwauatao karana ita hahedinaraia neganai, do ita moale bona unai ese Iehova do ia hamoalea. (Gal. 6:10; Kol. 3:12-14; 1 Pet. 4:8, 9) Bona mai iseda ura ida haroro gaukara ita karaia neganai, moale korikorina do ita davaria.
16 Hadibaia Tauna bukana ese eda mauri lalonai ita moalelaia gaudia, hegeregere aniani bona inuinu karana ia herevalaia. Oibe, ena be hekwakwanai ita davaria, to Iehova amo idia mai harihari gaudia ita moalelaia diba. Danu, dina ia diho ena hairai, gabu mai ena hairai, animal edia natudia idia gadara hebou, bona gau namodia ma haida ita itaia neganai, ita moale—unai gaudia be davana lasi. Unai bamona gaudia ita laloa neganai, Iehova do ita lalokau henia bada. Ia be gau namodia ibounai ia Henia Tauna.
17. Dahaka ese ita do ia durua inai goevadae lasi maurina amo ita roho mauri totona, to hari dahaka ese ita ia hagoadaia?
17 To gau badana be, Dirava ita lalokau henia, iena taravatu ita badinaia, bona Iesu ena boubou gauna ita abidadama henia noho. Unai gaudia ese ita do ia durua inai goevadae lasi maurina ai ita davaria hekwakwanai amo do ita roho mauri bona mauri hanaihanai do ita moalelaia. (1 Ioa. 5:3) To unai ia do vara lasi lalonai, goada ita abia badina Iehova be ita davaria hekwakwanai ibounai ia diba. Davida ia gwau: “Do lau moale bada, oiemu noho hanaihanai lalokauna dainai do lau moale, badina oi ese egu laloa hekwarahi oi itaia, bona egu lauma ena hisihisi oi diba.” (Sal. 31:7) Iehova be ita ia lalokau henia dainai, lalohisihisi amo ita do ia hamauria.—Sal. 34:19.
18. Dahaka dainai Dirava ena taunimanima idia moale be namo?
18 Iehova ena gwauhamata idia guguru negana ita naria noho lalonai, namona be Iehova, “Moale Diravana” do ita tohotohoa. Namona be lalohisihisi ese ita ia koua lasi Dirava ena hesiai gaukara ita karaia noho totona. Hekwakwanai idia vara neganai, namona be ita aonega bona ita laloa maoromaoro. Iehova ese ita do ia durua iseda lalona ita biagua totona, unai amo kara namodia ita karaia diba hekwakwanai ita hamaoromaoroa totona. Ita ia henia tauanina gaudia bona eda abidadama idia hagoadaia gaudia dainai, ita moale be namo. Dirava kahirakahira ita noho neganai do ita moale, badina “edia Dirava be [Iehova], ena bese taudia be idia moale noho.”—Sal. 144:15.
Dahaka Gaudia Oi Dibaia?
• Hekwakwanai ita davaria neganai, edena dala ai Iehova ita tohotohoa diba?
• Edena dala ai laloa maoromaoro karana ese ita ia durua hekwakwanai ita hamaoromaoroa totona?
• Lalohisihisi negadiai, edena dala ai mai moale ida Dirava ena ura ita karaia noho diba?
[Study Questions]
[Pictures on page 16]
Iehova be idia vara kara dika dainai ia lalohisihisi bada
[Credit Line]
© G.M.B. Akash/Panos Pictures
[Pictures on page 18]
Iehova be ita dekenai moale ita davaria daladia ia hadibaia