Ia Ore Diba Lasi Lalokauna Hahedinaraia
Ia Ore Diba Lasi Lalokauna Hahedinaraia
‘Lalokau be gau ibounai ia haheaukalaia. Lalokau be do ia ore diba lasi.’ —1 KOR. 13:7, 8, NW.
1. (a) Edena dala ai taunimanima ese lalokau idia hahedinaraia? (b) Momo be daika bona dahaka idia lalokau henia o ura henia?
BUKA, televisen bona reidio ai taunimanima be lalokau idia herevalaia momo. Haida ese unai kara idia hanamoa bona edia ane lalonai idia anelaia. Ita ibounai ita ura ma haida ese ita dekenai unai kara idia hahedinaraia. To buka bona muvi momo idia hedinarai lalokau sivaraidia be momokani lasi, bona unai bamona buka bona muvi momo be sitoa dekenai idia hoihoilaia. Madi, taunimanima momo be Dirava bona dekena taudia lalokau henia karana idia hahedinaraia lasi. Ita itaia Baibel ese ia perovetalaia gaudia be inai nega dokona ai idia vara noho. Hegeregere, taunimanima be “sibodia do idia laloa bada, moni do idia ura henia bada, . . . moale karadia do idia ura henia bada, to Dirava do idia lalokau henia lasi.”—2 Tim. 3:1-5, NW.
2. Lalokau gaukaralaia kerere karana dekenai Baibel be dahaka sisiba ia henia?
2 Taunimanima be lalokau idia hahedinaraia diba, to Baibel ese ita ia sisiba henia iseda lalokau ita gaukaralaia namonamo totona. Danu, Baibel ese ia hahedinaraia bema eda lalokau ita gaukaralaia kerere, dika do ita davaria. (1 Tim. 6:9, 10) Aposetolo Paulo be Dema totona ia torea herevana oi laloatao, a? Ena be Dema be Paulo ia bamoa, to ia be tanobada gaudia ia lalokau henia bada. (2 Tim. 4:10) Aposetolo Ioane be Keristani taudia ia sisiba henia, unai idia dadaraia totona. (1 Ioane 2:15, 16 duahia.) Tanobada bona ia lalonai idia noho gaudia ia lalokau henia tauna be Dirava bona Ia amo idia mai gaudia ia lalokau henia diba lasi.
3. Namona be ita hekwarahi dahaka ita karaia totona? Dahaka henanadai idia vara?
3 Ena be ita be inai tanobada ai ita noho, to ita be inai tanobada ena lasi. Unai dainai, namona be ita hekwarahi tanobada ena lalohadai kereredia ita dadaraia totona, namo lasi unai ese ita ia koia lalokau ita gaukaralaia kerere totona. Vadaeni, daika dekenai lalokau ita hahedinaraia be namo? Dahaka ese ita idia durua diba gau ibounai ia haheaukalaia bona ia ore diba lasi lalokauna ita hahedinaraia totona? Edena dala ai unai ese hari inai negai bona vaira negana ai ita do ia durua? Namona be Dirava amo haere ita abia, unai amo dala maorona ita badinaia diba.
Iehova Lalokau Henia Karana Habadaia
4. Edena dala ai Dirava lalokau henia karana ia tubu diba?
4 Biru tauna mani oi laloa: Ia be ia gaukara goada tano ia hegaegaelaia bona uhe ia hadoa. Ia ura ia hadoa uhe do idia tubu. (Heb. 6:7) Unai hegeregerena, namona be iseda lalokau Dirava dekenai ia tubu. Unai ia vara totona, dahaka ita karaia be namo? Namona be eda kudouna ita hegaegaelaia bona Basileia ena hereva momokani ena uhe ita hadoa. Unai ita karaia totona, Baibel ita stadilaia namonamo be namo, unai amo iseda diba Dirava dekenai ita habadaia. (Kol. 1:10) Hanaihanai hebou dekenai ita lao bona ena kahana idauidau ita durua karana amo iseda diba ita habadaia. Ita ta ta be ita gaukara goada iseda diba ita habadaia totona, a?—Aon. 2:1-7.
5. (a) Edena dala ai Iehova ena kara badadia ita dibaia diba? (b) Dirava ena hahemaoro goeva, aonega bona siahu be edena bamona oi gwauraia diba?
5 Baibel ai, Iehova ese ena kara ia hahedinaraia. Baibel ita stadilaia bona iseda diba Iehova dekenai ita habadaia noho neganai, iena kara badadia—hahemaoro goeva, siahu, aonega bona kara hereadaena lalokau—do ita lalopararalaia. Iehova be ena dala o iena taravatu goevadaena lalonai hahemaoro goeva ia hahedinaraia. (Deu. 32:4; Sal. 19:7) Iehova ese ia havaraia gaudia ita stadilaia namonamo, bona ena aonega bada ita hoalaia diba. (Sal. 104:24) Guba bona tanobada ai idia noho gaudia ese idia hahedinaraia danu, Iehova be siahu bona goada ena badina.—Isa. 40:26.
6. Edena dala ai Dirava ese ita dekenai ena lalokau ia hahedinaraia, bona edena dala ai unai be mai anina bada oi dekenai?
6 Dirava ena lalokau be edena bamona ita gwauraia diba? Unai lalokau be davana bada herea gauna ta bamona, bona unai amo ita ibounai be namo ita davaria diba. Dirava ese unai lalokau ia hahedinaraia dalana be inai: Mauri davalaia boubouna amo taunimanima ia hoia lou. (Roma 5:8 duahia.) Ena be unai mauri davalaia boubouna be taunimanima ibounai totona, to Dirava ena lalokau idia abia dae bona iena Natuna idia abidadama henia taudia sibona be unai boubou gauna amo namo do idia davaria. (Ioa. 3:16, 36) Dirava ese Iesu ena boubou gauna amo iseda kara dika ia gwauatao dainai, Dirava ita lalokau henia be namo.
7, 8. (a) Dirava dekenai iseda lalokau ita hahedinaraia totona, dahaka ita karaia be namo? (b) Dahaka hekwakwanai lalonai Dirava ena taunimanima be ena taravatu ibounai idia badinaia?
7 Dirava ese ita totona ia karaia gaudia ibounai dainai, edena dala ai iseda lalokau ita hahedinaraia diba? Baibel ese unai henanadai ena haere ia henia: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioa. 5:3) Oibe, Iehova Dirava ita lalokau henia dainai iena taravatu ita badinaia. Momokani, unai badina dainai, iena ladana bona Basileia ita harorolaia, unai amo ma haida be namo idia davaria. Mai eda kudouna ibounai ida unai gaukara ita karaia neganai, ita hahedinaraia ita be mai laloa maorona ida Dirava ena taravatu ita badinaia.—Mat. 12:34.
8 Tanobada hegegemadai, ena be iseda tadikaka be ma haida ese idia dagedage henidia bona Basileia ena sivarai dainai taunimanima ese idia dadaraidia, to idia ese Dirava ena taravatu idia badinaia. Momokani, idia gaukara goada edia haroro gaukara idia hagugurua totona. (2 Tim. 4:5) Unai dainai, ita ura bada Dirava ena taravatu ibounai ita badinaia bona Dirava amo ita abia dibana be ma haida dekenai ita harorolaia.
Iseda Lohiabada Iesu Keriso Ita Lalokau Henia Ena Badina
9. Keriso be dahaka ia haheaukalaia, bona dahaka ese ena lalona ia doria?
9 Dirava ita lalokau henia sibona lasi, to badina ma haida dainai, Dirava ena Natuna dekenai iseda lalokau ita habadaia. Ena be Iesu ita itaia lasi, to ia amo gau momo ita dibaia neganai, iseda lalokau ia dekenai ia bada ia lao. (1 Pet. 1:8) Iesu be dahaka gau haida ia haheaukalaia? Iesu be ena Tamana ena ura ia karaia neganai, taunimanima ese idia inai henia kava, dagedage henia, samania koikoi, bona idia hahemaraia. (Ioane 15:25 duahia.) Iesu be ena guba Tamana ia lalokau henia dainai, unai ese ia doria hahetoho idauidau ia haheaukalaia totona. Danu, ena lalokau dainai, taunimanima momo totona ena mauri ia bouboulaia.—Mat. 20:28.
10, 11. Keriso ese ita totona ia karaia gauna dainai, ita ura dahaka ita karaia?
10 Iesu ena kara ese ita ia hagoadaia ia ita tohotohoa totona. Keriso ese ita totona ia karaia gauna ita laloa neganai, iseda lalokau ia dekenai ia habadaia. Ita be Iesu ena murinai ita raka taudia dainai, namona be ia hahedinaraia lalokauna ita hahedinaraia, unai amo ena hereva ibounai do ita badinaia noho, hegeregere Basileia do ita harorolaia bona taunimanima be hahediba taudia ai do ita halaoa.—Mat. 28:19, 20.
11 Keriso ese taunimanima dekenai ia hahedinaraia lalokauna ita laloa dainai, ita ura dikadika inai nega dokona lalonai iseda gaukara ita hagugurua. (2 Korinto 5:14, 15 duahia.) Unai lalokau dainai ia ese Dirava ena ura taunimanima totona ia hagugurua. Danu, Keriso be ita dekenai haheitalai namona ia hahedinaraia, unai amo ita ta ta be Dirava ena ura ita karaia diba. Unai ena anina be mai eda lalona ibounai, mai eda lauma ibounai, bona mai eda kudouna ibounai ida Dirava ita lalokau henia be namo. (Mat. 22:37) Iesu ena hahediba herevadia bona iena oda ita badinaia neganai, ita hahedinaraia ia ita lalokau henia bona Iesu bamona iseda lalona ita hadaia dala idauidau ai Dirava ena lohia siahuna ita abia isi totona, herevana dahaka do ia vara.—Ioa. 14:23, 24; 15:10.
Lalokau Dalana Hereadaena Badinaia
12. Paulo be inai hereva, “dala namo herea momokani” ia gwauraia neganai, unai ena anina be dahaka?
12 Aposetolo Paulo be Keriso ia tohotohoa. Unai dainai, ena tadikaka ia hamaoroa: “Lau karaia bamona do umui karaia, Keriso ena kara lau karaia bamona.” (1 Kor. 11:1) Ena be Paulo ese Korinto Keristani taudia ia hagoadaia harihari gaudia—gorere hanamoa karana bona gado idauidau ai hereva karana—do idia tahua goadagoada, to danu ia hahedinaraia lalokau ese unai ibounai ia hereaia. Ia be 1 Korinto 12:31 ai ia gwau: “To dala namo herea momokani be harihari umui dekenai do lau hedinaraia.” Siri gabedia ese idia hahedinaraia unai dala namo herea momokani be lalokau. Edena dala ai lalokau be “dala namo herea momokani”? Paulo be ena hereva ena anina ia gwauraia hedinarai. (1 Korinto 13:1-3 duahia.) Bema ia be mai ena aonega bona gaukara badadia ia karaia to lalokau be lasi be edena bamona? Unai ibounai be anina lasi! Dirava ena lauma helaga ese ia hakaua dainai unai point badana ia hahedinaraia, unai amo ita laloparara diba.
13. (a) Lagani 2010 ena siri badana be dahaka? (b) Edena dala ai lalokau be ia ore diba lasi?
13 Gabeai Paulo ese lalokau ena anina be ita dekenai ia gwauraia. (1 Korinto 13:4-8 duahia.) Namona be sibona emu mauri oi tahua, hegeregere oi be lalokau tauna ena kara oi karaia o lasi. Gau badana be 1 Korinto karoa 13 siri 7 ena sentens ginigabena bona siri 8 ena sentens ginigunana ita laloa bada, badina unai siri be inai bamona ia gwau: Lalokau be gau ibounai ia haheaukalaia. Lalokau be do ia ore diba lasi—unai be lagani 2010 ena siri badana. 1 Korinto karoa 13 Siri 8 ai, Paulo ia gwau lauma helaga ena harihari gaudia haida, hegeregere peroveta hereva be do idia ore bona idau momokani gadodia danu do idia doko—unai kara be Keristani kongrigeisen ginigunadia dekenai idia karaia. To lalokau be do ia noho hanaihanai. Iehova be lalokau ena badina bona ia noho hanaihanai. Unai dainai lalokau be do ia ore diba lasi. Unai lalokau be iseda noho hanaihanai Diravana ena kara badana dainai, unai kara be do ia noho ela bona hanaihanai.—1 Ioa. 4:8.
Lalokau be Gau Ibounai Ia Haheaukalaia
14, 15. (a) Edena dala ai lalokau ese ita ia durua diba hahetoho ita haheaukalaia totona? (b) Dahaka dainai matamata tadikaka ta ia ura lasi ena abidadama ia rakatania totona?
14 Ena be Keristani taudia be hahetoho, metau eiava hekwakwanai idauidau idia davaria, to dahaka ese idia ia durua idia haheauka totona? Lalokau ese idia ia durua. Unai lalokau dainai, ita be iseda kohu sibona lasi to gau ma haida ita dadaraia. Hegeregere, ita ura Dirava ita badinaia noho bona Keriso dainai iseda mauri ita atoa diho. (Luka 9:24, 25) Tanobada Tuarina Iharuana lalonai, dibura rumadia ai idia atodia kamonai Witnes taudia mani oi laloa.
15 German Witnes mero matamata ta, Wilhelm dekenai unai ia vara. Ena be Nazi ena ami taudia vairanai ia gini idia pidia mase totona, to unai tadikaka be ena abidadama ia rakatania lasi. Ena bamahuta revarevana be ena ruma bese dekenai ia torea, ia gwau: “Gau ibounai dekenai Dirava ita lalokau henia be namo, iseda King Iesu Keriso ese ita ia hagania bamona. Bema iena kahanai ita gini, ita dekenai davana namona do ia henia.” Gabeai, Gima Kohorona ta ai, ena ruma bese tauna ta ia gwau: “Unai nega dikana lalonai, egu ruma bese taudia ida ai be nega ibounai Dirava lalokau henia karana ai atoa guna.” Hari inai negai danu Armenia, Eritrea, South Korea, bona tano ma haida dekenai tadikaka momo be dibura ruma dekenai idia atoa bona idia haheauka noho. Unai tadikaka be Iehova ena lalokau lalonai idia gini goada noho.
16. Iseda tadikaka Malawi dekenai be dahaka idia haheaukalaia?
16 Tano momo dekenai, hahetoho ma haida ese iseda tadikaka edia abidadama bona haheauka karana idia tohoa. Lagani 26 lalonai, Malawi ai Iehova ena Witnes taudia ese gavamani ena taravatu, dagedage karadia, bona kara dika badadia idia haheaukalaia. To, edia haheauka karana dainai ahuna namona idia abia. Dagedage ia matamaia neganai, unai tano dekenai Witnes taudia be 18,000 bamona. Lagani 30 murinai, unai namba be nega rua ia bada daekau 38,393 dekenai. Tano ma haida dekenai be unai bamona ia vara danu.
17. Ruma bese haida lalonai Witnes taudia haida dekenai dahaka ia vara, bona dahaka dainai unai idia haheaukalaia?
17 Dirava ena hesiai taudia be dagedage idia abia neganai, dika idia davaria. To Keristani taudia ta ta be edia famili taudia ese idia dagedage henia neganai, dika bada herea idia davaria. Emu ruma bese eiava varavara be oi dekenai lalometau idia havaraia diba. Iesu be unai ia perovetalaia, ani? Oibe, momo be unai idia mamia. (Mat. 10:35, 36) Matamata taudia be edia Witnes lasi tama sina ese idia dagedage henidia. Haida be edia bese taudia ese edia ruma amo idia lulua, to Witnes taudia be mai hebogahisi ida unai taudia be edia ruma dekenai idia abia dae. Ma haida be edia ruma bese taudia ese idia ura henia lasi. Dahaka ese unai bamona taudia ia durua idia haheauka totona? Edia tadikaka, Iehova bona iena Natuna idia lalokau henia.—1 Pet. 1:22; 1 Ioa. 4:21.
18. Edena dala ai headava Keristani taudia be gau ibounai ia haheaukalaia lalokauna ese idia ia durua diba?
18 Dala ma haida ai gau ibounai ia haheaukalaia lalokauna ita hahedinaraia diba. Headava lalonai, lalokau ese tau bona hahine ia durua Iesu ena hereva idia matauraia totona, ia gwau: “Dirava ese ia hakapua taudia, be taunimanima ese do idia hapararaia lasi.” (Mat. 19:6) Headava taudia be ‘metau bada idia abia’ neganai, namona be idia laloatao Iehova be edia headava lalonai ia noho bona unai be mai anina bada. (1 Kor. 7:28) Baibel ia gwau ‘lalokau be gau ibounai ia haheaukalaia’ dainai, bema tau bona hahine be unai kara idia hahedinaraia idia ruaosi do idia noho namonamo bona edia headava do ia goada.—Kol. 3:14.
19. Dika badadia idia vara neganai, Dirava ena taunimanima be dahaka idia karaia?
19 Lalokau ese ita ia durua tano mareremarere bamona gaudia idia vara neganai, gau ibounai dekenai ita haheauka totona. Peru ena saut kahana dekenai tano mareremarere ia vara bona Hurricane Katrina be United States ena kahana haida ia hadikaia neganai, lalokau ese eda tadikaka idia durua gau ibounai idia haheaukalaia totona. Unai dika lalonai, tadikaka momo be edia ruma bona kohu momo idia haboioa. Tanobada hegegemadai, kongrigeisen taudia be lalokau karana ese ia doria dainai, aniani o heduru gaudia ma haida idia henia, bona volantia taudia be ruma idia haginidia lou bona Kingdom Hall idia hanamodia. Unai ese ia hahedinaraia nega bona dala idauidau ai iseda tadikaka be tadikaka ma haida idia lalokau henia bona idia laloa bada.—Ioa. 13:34, 35; 1 Pet. 2:17.
Lalokau be Ia Ore Diba Lasi
20, 21. (a) Dahaka dainai lalokau be mai anina bada? (b) Dahaka dainai emu lalona oi hadaia lalokau ena dala namo hereana oi badinaia totona?
20 Hari inai negai, Iehova ena taunimanima be lalokau ena dala namo hereana idia badinaia bona ita itaia unai be aonega karana. Momokani, unai kara ia kwalimu diba, herevana dahaka ia vara. Aposetolo Paulo ese unai hereva momokani ia kikilaia dalana ita laloa. Matamanai, ia gwau lauma helaga ena harihari gaudia do idia ore to Keristani kongrigeisen do ia goada. Bena dokonai, ia gwau: “Vadaeni, inai gau toi idia noho hanaihanai: Abidadama, bona Dirava ena gwauhamata ita naria noho kara, bona lalokau. To namo herea momokani gauna be lalokau!”—1 Kor. 13:13.
21 Momokani, ita abidadama henia gaudia idia guguru momokani neganai, unai gaudia abidadama henia karana do ia ore. Ena be Dirava ena gwauhamata ita naria noho, to gau ibounai idia matamata neganai, eda naria karana do ia ore. To lalokau be edena bamona? Ia be do ia ore diba lasi, to do ia noho hanaihanai. Mauri hanaihanai ita abia neganai, ita be Dirava ena lalokau karana do ita itaia bona lalopararalaia namonamo. Dirava ena ura ita karaia bona do ia ore diba lasi lalokauna ena dala namo herea ita badinaia dainai, reana do ita noho hanaihanai.—1 Ioa. 2:17.
Edena Bamona Do Oi Haere?
• Dahaka dainai ita naria namonamo, lalokau ita gaukaralaia kerere garina?
• Lalokau ese ita ia durua diba dahaka ita haheaukalaia totona?
• Edena dala ai lalokau be ia ore diba lasi?
[Study Questions]
[Blurb on page 27]
Lagani 2010 ena siri badana be: Lalokau be Gau Ibounai Ia Haheaukalaia. Lalokau Ia Ore Diba Lasi —1 Kor. 13:7, 8.
[Picture on page 25]
Dirava ita lalokau henia dainai, unai ese ita ia doria ita haroro totona
[Picture on page 26]
Ia ore diba lasi lalokauna dainai, Malawi ai eda tadikaka be hahetoho idia haheaukalaia diba