Mesia! Dirava Ena Hahemauri Dalana
Mesia! Dirava Ena Hahemauri Dalana
“Taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.”—1 KOR. 15:22.
1, 2. (a) Andrea bona Filipo be Iesu idia itaia neganai dahaka idia karaia? (b) Dahaka dainai ita gwau hari inai negai gau momo amo ita diba Iesu be Mesia?
ANDREA ese ena kakana Petero ia hamaoroa: “Ai be Mesia ai davaria vadaeni.” Unai ese ia hahedinaraia, Andrea ia abia dae momokani Nasareta tauna Iesu be Dirava ena Horoa Tauna. Filipo danu be unai bamona ia laloa dainai, ia lao bona ena turana Natanaela ia davaria neganai, ia gwau: “Mose ena taravatu lalonai bona peroveta taudia edia buka lalonai idia herevalaia tauna ai davaria vadaeni. Ia be Iesu, Nasareta tauna, Iosepa ena natuna.”—Ioa. 1:40, 41, 45.
2 Oi danu oi abia dae momokani, Iesu be gwauhamata Mesiana, Iehova ese eda “Hamauria Tauna korikori, bona gunalaia tauna momokani” ai ia halaoa, a? (Heb. 2:10) Hari inai negai gau momo amo ita diba Iesu be Mesia; aposetolo edia negai idia noho taudia be unai bamona lasi. Iesu ena mauri—ena vara negana amo ela bona ena mase negana—ena sivarai ibounai be Baibel ese ia gwauraia, bona unai buka ese ia hamomokania Iesu be Keriso. (Ioane 20:30, 31 duahia.) Danu, Baibel ese ia hahedinaraia guba amo Iesu be Mesia ena maduna do ia hagugurua noho. (Ioa. 6:40; 1 Korinto 15:22 duahia) Baibel ai oi dibaia gaudia dainai, oi danu oi gwau diba hari ‘Mesia oi davaria vadaeni.’ To guna, ita itaia dahaka dainai aposetolo taudia idia gwau idia be Mesia idia davaria vadaeni.
Mesia Ena ‘Hunia Hereva Helagadia,’ be Metairametaira Idia Hedinarai
3, 4. (a) Edena dala ai aposetolo taudia be ‘Mesia idia davaria’? (b) Dahaka dainai oi gwau diba Iesu sibona be Mesia idia perovetalaia herevadia ia hagugurua diba?
3 Dahaka dainai aposetolo taudia idia gwau diba Iesu be Mesia? Peroveta taudia amo, Iehova be metairametaira ia hahedinaraia edena dala ai taunimanima be Mesia do idia itaia. Baibel ia diba bada tauna ta ia gwau, unai kara be hegeregere tatau haida ese nadi maragimaragidia ta ta idia haboua bena stetiu namona ta idia karaia. Mani oi laloa: Unai tatau ta ta be nega ta idia herevahereva heheni lasi o diba heheni lasi; idia ta ta ese unai nadi ta ta be daiutu tamona lalonai idia vareailaia. Bema idia be unai nadi ta ta idia atoa hebou bena stetiu namona ta idia karaia, dahaka do oi gwau? Reana do oi gwau, tau ta be unai stetiu ia utua maragimaragi bena kahana ta ta be unai tatau dekenai ia siaia, ani? Unai stetiu ena nadi ta ta hegeregerena, Mesia idia perovetalaia herevadia ta ta be mai anina bada Mesia ita diba totona.
4 Oi laloa tau tamona be Mesia idia perovetalaia herevadia ibounai ia hagugurua kava sibona, a? Diba bada tauna ta ia gwau, Mesia idia perovetalaia herevadia be tau ta ese hoa dalanai ia hagugurua diba lasi.” To, “Iesu—taunimanima ibounai huanai Iesu sibona—be unai bamona ia karaia.”
5, 6. (a) Edena dala ai Iehova ese Satani do ia kota henia? (b) Edena dala ai Dirava ese gwauhamata “garana” ena bese be metairametaira ia hahedinaraia?
5 Mesia idia perovetalaia herevadia be ‘hunia hereva helagadia,’ edia anina be idauidau bona mai anina bada guba bona tanobada taudia ibounai dekenai. (Kol. 1:26, 27, NW; Gen. 3:15, NW ) Unai hunia hereva ta be inai: Dirava ese Satani Diabolo, “idaunegai gaigaina,” do ia kota henia; ia ese taunimanima ia hakaua kerere dainai idia kara dika bona idia mase. (Apok. 12:9) Edena dala ai Iehova be unai kota do ia karaia? Iehova ia peroveta, “hahine” ta ese “garana” ta do ia havaraia; unai “garana” ese Satani ena kwarana do ia haberoa. Unai ia vara neganai, gwau-edeede, gorere bona mase do idia ore. To, unai peroveta herevana dekenai Dirava be gwaumaoro ia henia, Satani ese hahine ena “garana” ena aena geduna ia haberoa guna totona.
6 Iehova ese metairametaira ia hahedinaraia daika be gwauhamata “garana” ai do ia lao. Dirava ese Aberahamo ia gwauhamata henia, ia gwau: “Oiemu garana dainai tanobada besedia ibounai be sibodia do idia hanamoa.” (Gen. 22:18, NW ) Mose ia gwau, unai garana be “peroveta tauna ta” bona Mose ia hereaia. (Deu. 18:18, 19) Natana ese Davida ia hamaoroa—gabeai peroveta taudia momo ese idia hamomokania danu—Mesia be iena bese tauna ta bona Davida ena terona latanai do ia helai ela bona hanaihanai.—2 Sam. 7:12, 16; Ier. 23:5, 6.
Iesu ese Ia Hamomokania Ia be Mesia
7. Edena dala ai Dirava ese ena “hahine” amo Iesu ia siaia?
7 Dirava ese ena adavana bamona guba oreana amo ena Natuna—Iehova ese ia havaraia mauri gauna ginigunana—ia siaia, gwauhamata “garana” ai ia lao totona. Unai bamona ia karaia totona, Dirava ena Natuna tamona be guba dekenai ena “dagi badana ia negea” bona taunimanima goevadaena ta bamona ia vara. (Fili. 2:5-7; Ioa. 1:14) Dirava be ena lauma helaga amo Maria ia durua dainai, Iesu ia vara neganai, ia be “mero helagana” bona “Dirava ena Natuna do idia gwauraia.”—Luka 1:35.
8. Iesu be bapatiso ia abia murinai, edena dala ai Mesia idia perovetalaia herevadia ia hagugurua?
8 Danu, Mesia idia perovetalaia herevadia be Iesu do ia vara gabuna bona negana idia gwauraia hedinarai. Peroveta herevana hegeregerena, Iesu be Betelehema ai ia vara. (Mika 5:2) Aposetolo edia negai, Iuda taudia idia ura bada Mesia idia itaia. Unai dainai, haida idia henanadai: “Ioane be Keriso o?” To Ioane ia haere: “Tau ta be ia mai noho, iena siahu ese egu siahu ia hanaia.” (Luka 3:15, 16) Lagani 29 C.E. ai, Iesu ena mauri lagani be 30 neganai, ia be Ioane dekenai ia lao bapatiso ia abia totona—idia perovetalaia negana unai. (Dan. 9:25) Iesu be ena haroro gaukara ia hamatamaia neganai, ia gwau: “Abia hidi negana be ia ginidae vadaeni, bona Dirava ena basileia be kahirakahira.”—Mar. 1:14, 15, NW.
9. Ena be gau momo idia do hedinarai namonamo lasi, to aposetolo taudia be dahaka idia abia dae momokani?
9 To, taunimanima ese edia lalohadai idia hamaoromaoroa be namo. Idia ese Iesu idia gwauraia King, to idia diba lasi gauna be inai: Iesu be vaira neganai guba amo do ia lohia. (Ioa. 12:12-16; 16:12, 13; Kara 2:32-36) Unai dainai, Iesu ia henanadai, “Umui be dahaka umui gwau, lau be daika?” Karaharaga Petero ia haere: “Oi be Keriso, mauri Diravana ena Natuna.” (Mat. 16:13-16) Danu Petero be unai bamona ia haere, ena be momo be Iesu ena hadibaia herevana ta dainai Iesu idia rakatania.—Ioane 6:68, 69 duahia.
Mesia Ena Hereva Ita Kamonai
10. Dahaka dainai Dirava ia gwau ena Natuna ena hereva ita kamonai be gau badana?
10 Guba ai, Dirava ena Natuna be lauma tauna mai goadana. Tanobada ai, ia be ena “Tamana ena gwaukau tauna bamona.” (Ioa. 16:27, 28, NW ) Ia gwau: “Lauegu hadibaia herevadia be lauegu lasi, to lau ia siaia Diravana ena.” (Ioa. 7:16) Iesu ena toana ia idau neganai Iehova ese ia hamomokania Iesu be Mesia, ia gwau: “Iena hereva umui kamonai.” (Luka 9:35) Oibe, Dirava ese ia Abia Hidi Tauna ena hereva ita kamonai bona badinaia. Unai bamona ita karaia totona, namona be Iesu ita abidadama henia bona kara namodia ita karaia—unai dala badadia rua amo Dirava ita hamoalea bona mauri hanaihanai ita abia diba.—Ioa. 3:16, 35, 36.
11, 12. (a) Dahaka dainai aposetolo edia negai Iuda taudia haida ese Mesia Iesu idia dadaraia? (b) Daidia be Iesu idia abidadama henia?
11 Ena be gau momo ese idia hamomokania Iesu be Mesia, to aposetolo edia negai Iuda taudia momo be Iesu idia dadaraia. Dahaka dainai? Badina idia be sibona edia lalohadai idia abia dae, hegeregere idia laloa politikol mesia ta do ia mai bona Roma ena dagedage karadia amo Israela taudia do ia ruhaia. (Ioane 12:34 duahia.) Unai dainai, Iesu idia dadaraia—ena be peroveta herevadia momo ia hagugurua, hegeregere taunimanima ese ia idia ura henia lasi, ia idia rakatania, ia lalohisihisi, hisihisi momo ia abia, bona dokonai idia alaia mase. (Isa. 53:3, 5) Hahediba taudia namodia haida danu idia moale lasi, badina Iesu ia ura lasi politikol gaukaradia amo taunimanima ia hamauria. To, idia ese Iesu idia rakatania lasi, bona gabeai, lalohadai maorona idia abia.—Luka 24:21.
12 Taunimanima ese gwauhamata Mesiana, Iesu, idia dadaraia ena badina ma ta be inai: Iena hahediba hereva haida idia abia dae be ia auka. Hegeregere, ia gwau bema ta ia ura Basileia lalonai ia vareai, sibona ‘ena namo do ia laloa lasi,’ Iesu ena ‘tauanina do ia ania,’ “ia vara lou,” bona ia be “tanobada ena lasi.” (Mar. 8:34; Ioa. 3:3; 6:53; 17:14, 16) Hekokoroku taudia, kohu momo taudia bona koikoi taudia idia laloa unai bamona hereva idia badinaia be auka. To, manau Iuda taudia idia abia dae Iesu be Mesia; Samaria taudia haida idia laloa bamona, idia gwau: “Hari ai diba ia be momokani tanobada ena Hamauria Tauna.”—Ioa. 4:25, 26, 41, 42; 7:31.
13. Edena dala ai gaigai ese Iesu ena aena haberoa ena peroveta herevana ia hagugurua?
13 Iesu ia peroveta, ia be dubu biagudia ese do idia kota henia bona Idau Bese taudia ese do idia hasatauroa, to dina toi murinai, do ia toreisi lou. (Mat. 20:17-19) Iesu be Sanhedrin taudia vairanai ia hahedinaraia ia be “Keriso, Dirava ena Natuna”; to unai hereva dainai idia ese Iesu idia kota henia idia gwau, “Dirava dekenai hadikaia hereva ia gwauraia vadaeni.” (Mat. 26:63-66) Pilato ia gwau, “Inai tauna be kerere ta ia karaia lasi ia mase totona,” to Iuda taudia idia gwau, Iesu be “taunimanima edia lalona ia veria idia gwau-edeede totona”; unai dainai, Pilato be ‘edia ura hegeregerena, Iesu be idia dekenai ia henia.’ (Luka 23:13-15, 25, NW ) Unai taudia ese Iesu idia “dadaraia” bona dala idia karaia unai “mauri Gunalaia Tauna” idia hamasea totona, ena be gau momo ese idia hamomokania Iesu be Dirava ese ia siaia. (Kara 3:13-15, NW ) Peroveta herevana hegeregerena, Pasova dinana 33 C.E. ai, unai taudia ese Iesu be au ta ai idia hasatauroa bena idia hamasea. (Dan. 9:26, 27; Kara 2:22, 23) Unai amo Genese 3:15, (NW ) ena peroveta herevana ia guguru—Satani ese Iesu ena “aena geduna” ia haberoa unai.
Mesia Ia Mase Ena Badina
14, 15. (a) Iehova ese Iesu ena mase ia koua lasi ena badina rua be dahaka? (b) Iesu ia toreisi lou neganai, dahaka ia karaia?
14 Iehova ese Iesu ena mase ia koua lasi ena badina rua idia noho. Ginigunana be inai: Iesu be Dirava ia badinaia ela bona ia mase, unai amo “hunia gauna badana” ta ia hamaoromaoroa. Ia hamomokania Satani ena hahetoho lalonai, goevadae tauna be Iehova ena ‘dala ia badinaia’ bona Dirava ena lohia siahuna ia abia isi noho diba. (1 Tim. 3:16) Iharuana be inai: Iesu ia gwau, “Taunimanima ena Natuna bamona, ia mai . . . iena mauri do ia atoa diho, taunimanima momo edia dika davana karaia totona.” (Mat. 20:28) Iesu be ena “mauri davana” amo Adamu ena bese edia kara dika davana ia karaia, bona dala ia kehoa Dirava ena hahemauri dalana, Iesu unai, ia abia dae tauna ese mauri hanaihanai ia abia totona.—1 Tim. 2:5, 6, NW.
15 Keriso be guria gabunai ia noho ela bona dina toi murinai ia toreisi lou, bona dina 40 lalonai aposetolo taudia dekenai ia hedinarai momo, unai amo ia hamomokania ia mauri noho bona hahediba herevadia ma haida ia henia. (Kara 1:3-5) Bena guba dekenai ia daekau ena dava bada boubou gauna be Iehova dekenai ia henia, bona ia naria ela bona nega korikori ai Mesia King ai ia lao totona. Ia naria noho lalonai, ia be gaukara momo ia karaia.
Mesia Ena Gaukara Ia Hagugurua
16, 17. Iesu be guba dekenai ia daekau murinai ia karaia gaudia haida oi kikilaia.
16 Iesu ia toreisi lou negana amo ema bona hari, ia be Keristani kongrigeisen ia lohiaia noho bona gaukara momo ia gunalaia. (Kol. 1:13) Nega korikori ai, Dirava ena Basileia lalonai Iesu be ena King ena siahu do ia gaukaralaia. Peroveta herevadia bona tanobada dekenai idia vara gaudia ese idia hamomokania Iesu be lagani 1914 ai King dagina ia abia—unai lagani ai “tanobada dokona” ia matamaia danu. (Mat. 24:3; Apok. 11:15) Unai dagi ia abia murinai, ia bona ena aneru helagadia ese Satani bona ena demoni be guba amo idia negea diho.—Apok. 12:7-10.
17 Iesu ese lagani 29 C.E. ai ia hamatamaia haroro bona hadibaia gaukaradia be kahirakahira do idia ore. Kahirakahira, ia be mauri gaudia ibounai do ia kota henia. Ia ese Iehova ena hahemauri dalana idia abia dae mamoe bamona taudia do ia hamaoroa, “Basileia umui abia, tanobada ia karaia neganai, ia ese ia karaia hegaegae umui emui.” (Mat. 25:31-34, 41) King Iesu mai ena guba tuari oreana ida be kara dika kokia totona idia mai neganai, Iesu idia dadaraia taudia ibounai be dika bada do idia davaria. Bena Iesu ese Satani bona ena demoni do ia guidia bena “guri dobu masemase” lalonai do ia negedia diho.—Apok. 19:11-14; 20:1-3.
18, 19. Iesu be Mesia ena maduna ia hagugurua neganai, unai ese dahaka ia hamomokania? Bona ena hereva idia kamonai noho taudia ese dahaka namo do idia abia?
18 Lagani 1,000 Lohia Negana lalonai, Iesu ese ena dagi ladadia ma haida do ia hagugurua, hegeregere “ ‘Sisiba Henia Tauna Namo Herea,’ ‘Siahu Bada Dirava,’ ‘Hanaihanai Noho Tamana,’ bona ‘Maino ena Lohia.’ ” (Isa. 9:6, 7) Iesu ena Basileia ia lohia neganai, taunimanima ibounai—mase amo do idia toreisi lou taudia danu—be do idia goevadae. (Ioa. 5:26-29) Mesia ese taunimanima do ia hakaua lao “mauri ranuna, ia lohilohi gauna” dekenai ranu idia inua totona, unai amo kamonai taudia be Iehova do idia tura henia, mai moale bona mai maino danu. (Apokalupo 7:16, 17 duahia.) Hahetoho ginigabena ia ore neganai, Dirava ese gwau-edeede taudia ibounai, Satani bona ena demoni danu, be “lahi bona salipa gohuna lalonai” do ia negea diho—Iesu ese “gaigai” ena kwarana ia haberoa bona ia hamasea unai.—Apok. 20:10, NW.
19 Iesu be Mesia ena maduna ia hagugurua namonamo! Ena boubou gauna amo ia hoia taudia be tanobada paradaisona ai do idia noho namonamo bona do idia moale ela bona hanaihanai. Ta be Iehova ena ladana helagana do ia hadikaia lou lasi, bona do ia hamomokania ia sibona ese guba bona tanobada ia lohiaia be maoro. Dirava Ena Horoa Tauna ena hereva idia kamonai noho taudia ese unai hahenamo do idia abia be moale gauna!
Mesia Oi Davaria Vadaeni, A?
20, 21. Dahaka dainai ma haida dekenai Mesia ena sivarai ita herevalaia be namo?
20 Lagani 1914 amo, ita be Keriso ena pa·rou·siʹa, o noho negana lalonai ita noho. Ena be taunimanima be edia matana amo Dirava ena Basileia ena King ia noho idia itaia lasi, to ita be peroveta herevadia idia guguru karana amo unai ita diba. (Apok. 6:2-8) Aposetolo edia negai idia noho Iuda taudia bamona, hari ena be gau momo ese idia hamomokania Mesia ia noho vadaeni, to momo be unai idia abia dae lasi. Idia danu be politikol mesia tauna o taunimanima ese idia haginia gavamani ida ia gaukara hebou tauna idia ura. To, oi be oi diba vadaeni hari Iesu be Dirava ena Basileia dekenai ia lohia noho. Unai dainai oi moale, a? Aposetolo taudia bamona, oi gwau diba: “Ai be Mesia ai davaria vadaeni.”
21 Hari, ma haida dekenai hereva momokani oi herevalaia neganai, oi be Mesia Iesu ena maduna oi herevalaia, a? Unai bamona oi karaia neganai, unai ese oi do ia durua Iesu ese hari bona vaira neganai oi totona ia karaia gaudia oi moalelaia totona. Andrea bona Filipo idia karaia bamona, reana emu varavara o turadia dekenai Mesia oi kikilaia vadaeni, ani? Namona be mai emu ura bada ida idia oi lou henia bona idia dekenai oi hahedinaraia, Iesu Keriso be gwauhamata Mesiana bona Iehova ena hahemauri dalana.
Anina Oi Gwauraia Diba, A?
• Edena dala ai aposetolo taudia be Mesia idia davaria?
• Dahaka badina badadia rua dainai Iesu ia mase?
• Iesu be dahaka do ia karaia ena Mesia maduna ia hagugurua totona?
[Study Questions]
[Pictures on page 21]
Edena dala ai aposetolo edia negai idia noho taudia idia diba Iesu be Mesia?
[Picture on page 23]
Ma haida oi hereva henia neganai, Mesia Iesu ena maduna oi herevalaia danu, a?