Taunimanima Do Idia Itaia Oi be Lo Keristani Tauna
Taunimanima Do Idia Itaia Oi be Lo Keristani Tauna
“Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.”—1 TIM. 4:15.
1, 2. Timoteo ena sivarai dekenai dahaka ita diba, bona ena mauri lagani be 19 o 20 bamona neganai dahaka hahenamo ia abia?
TIMOTEO be mero maragi neganai, Roma ena provinsi ta ladana Galatia, hari idia gwauraia Turkey dekenai ia noho. Iesu ena mase murinai, lagani momo lalodiai unuseniai Keristani kongrigeisen haida idia haginia. Timoteo, ena sinana bona tubuna hahine be Keristani tomadiho idia abia dae bona unai kongrigeisen ta idia bamoa. (2 Tim. 1:5; 3:14, 15) Mero matamata Timoteo be mai moale ida unai kongrigeisen lalonai ia hebou. To, Timoteo be hahenamo haida do ia abia.
2 Aposetolo Paulo be unuseniai ena misinari loaloa iharuana ia karaia neganai, Timoteo be unai hahenamo ia abia. Unai nega ai, Timoteo ena mauri lagani be reana 19 o 20 bamona. Paulo be reana Lusitera ia vadivadi neganai, ia kamonai tadikaka “idia gwau Timoteo be tau namona.” (Kara 16:2) Mero matamata Timoteo be lo Keristani tauna ena kara ia hahedinaraia. Vadaeni, lauma helaga ena hakaua dalana hegeregerena, Paulo bona elda taudia ese Timoteo ena kwarana dekenai edia imana idia atoa, bona idia abia hidi kongrigeisen lalonai gaukara haida ia karaia totona.—1 Tim. 4:14; 2 Tim. 1:6.
3. Timoteo be dahaka hahenamo badana ta ia abia?
3 Timoteo be hahenamo badana ta ia abia—aposetolo Paulo ia ura Timoteo ese do ia bamoa! (Kara 16:3) Timoteo be ia hoa bona ia moale bada herea! Gabeai, lagani momo lalodiai, ia be Paulo bona tadikaka ma haida ida ia loaloa, aposetolo bona tau badadia edia gaukara idauidau idia karaia totona. Paulo bona Timoteo be edia loaloa gaukara amo tadikaka bona taihu idia durua bona hagoadaia bada. (Kara 16:4, 5 duahia.) Unai dainai, tadikaka taihu momo idia diba Timoteo be lo Keristani tauna. Aposetolo Paulo be lagani 10 bamona Timoteo ida ia gaukara hebou murinai, Filipi kongrigeisen dekenai inai ia torea: “Lau dekenai ta ia noho lasi Timoteo hegeregerena, iena laloa bona lauegu laloa be tamona. Bona ia ura bada umui do ia durua. . . .Timoteo ena kara namona umui diba. Mero ese iena tamana ia durua bamona, ia ese lau ia durua vadaeni. Sivarai Namona dainai ai ruaosi ai gaukara hebou vadaeni.”—Fili. 2:20-22.
4. (a) Paulo ese Timoteo dekenai dahaka maduna ia henia? (b) Paulo ena hereva 1 Timoteo 4:15 ai ese ita ia hagoadaia dahaka henanadai ita henia totona?
4 Paulo be Filipi kongrigeisen ia tore henia negana ai, Timoteo dekenai maduna badana ta ia henia—Timoteo be elda bona hesiai taudia do ia abia hidi. (1 Tim. 3:1; 5:22) Unai ese ia hahedinaraia Timoteo be Keristani elda tauna ena maduna idauidau ia huaia namonamo diba. To, unai revareva tamona lalonai, Paulo ese Timoteo ia sisiba henia mai ena lalona ibounai ida ena diba bona goada do ia gaukaralaia, unai amo ‘taunimanima ibounai ese iena goada do idia itaia, ia bada lao noho.’ (1 Tim. 4:15) To, Timoteo be ia hahedinaraia vadaeni ia be lo Keristani tauna, ani? Vadaeni, Paulo ena hereva ena anina be dahaka, bona ena sisiba ese edena dala ai ita ia durua diba?
Keristani Kara Namodia Hahedinaraia
5, 6. Efeso kongrigeisen ena goeva karana be dahaka ese ia hadikaia toho, bona Timoteo be dahaka do ia karaia unai ia koua totona?
5 Mani 1 Timoteo 4:15 ena badina siridia ma haida ita tahua. (1 Timoteo 4:11-16 duahia.) Paulo be unai hereva ia do torea lasi lalonai, Makedonia dekenai ia lao, to Timoteo ia noia Efeso dekenai do ia noho. Dahaka dainai? Badina Efeso dekenai haida ese hahediba hereva koikoidia idia hadibaia bona kongrigeisen idia hapararaia noho. Timoteo be kongrigeisen ena goeva karana do ia gimaia. Edena bamona unai do ia karaia? Ia ese haheitalai namona do ia hahedinaraia, tadikaka taihu ese idia tohotohoa totona.
6 Paulo ese Timoteo ia hamaoroa: “Oiemu noho mauri dekenai, Keriso ena kara do oi hedinaraia. Vadaeni oiemu hereva namona, kara namona, lalokau, abidadama bona laloa goevagoeva idia itaia neganai, oiemu kara bamona do idia karaia.” Paulo ma ia gwau: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.” (1 Tim. 4:12, 15) Namo lasi taunimanima idia itaia Timoteo be iena dagi dainai ia goada ia lao. To, namona be idia itaia ia goada ia lao badina ia be Keristani kara namodia ia hahedinaraia. Keristani taudia ibounai ese unai bamona kara namodia idia hahedinaraia be namo.
7. Kongrigeisen lalonai ita ibounai ese dahaka ita hahedinaraia diba?
7 Timoteo ena nega bamona, hari danu kongrigeisen lalonai maduna idauidau idia noho. Haida be elda o hesiai taudia edia gaukara idia karaia. Haida be painia gaukara idia karaia. Ma haida be loaloa naria gaukara, Betele o misinari gaukara idia karaia. Elda taudia be hahediba gaukara idauidau idia karaia danu, hegeregere hebouhebou maragidia bona badadia dekenai. To, Keristani taudia ibounai—tatau, hahine, matamata taudia—be idia hegeregere Keristani kara namodia idia hahedinaraia totona. (Mat. 5:16) Momokani, Timoteo hegeregerena, maduna badadia idia huaia Keristani taudia ese Keristani kara namodia do idia hahedinaraia be gau badana.
Hereva Dalana Ai Haheitalai Namona Hahedinaraia
8. Iseda tomadiho karana dekenai edena dala ai eda hereva dalana be mai anina bada?
8 Timoteo ese ena hereva dalana ai haheitalai namona do ia hahedinaraia. Edena dala ai ita danu be eda hereva dalana ai ita hahedinaraia ita be lo Keristani taudia? Eda hereva dalana amo taunimanima be do idia diba ita be edena bamona taudia. Unai dainai, Iesu ia gwau: “Kudouna dekenai idia honu gaudia be uduna ese ia gwauraia.” (Mat. 12:34, NW ) Iesu ena tadina Iamesi ia laloparara tomadiho karana dekenai eda hereva dalana be mai anina bada. Ia gwau: “Tau ta bema ia laloa ia be Keristani tauna namona, to iena malana ia naria diba lasi neganai, ia ese sibona ena lalona ia koia noho. Unai tau ena Keristani kara be anina lasi.”—Iam. 1:26.
9. Edena dala ai eda hereva dalana amo haheitalai namona ita hahedinaraia diba?
9 Kongrigeisen lalonai eda hereva dalana amo ma haida do idia diba, ita be lo Keristani taudia eiava lasi. Unai dainai, lo Keristani taudia be hemataurai lasi herevadia, ma haida hadikaia o hahisia herevadia idia gwauraia lasi, to ma ta ena lalona hagoadaia, hamoalea bona durua herevadia idia gwauraia. (Aon. 12:18; Efe. 4:29; 1 Tim. 6:3-5, 20) Ita ura ma haida dekenai ita hahedinaraia ita be Dirava ena kara maoromaoro taravatudia ita badinaia, bona Dirava ena taravatu goevadia ita abia isi karana ese ia hahedinaraia ita be Dirava ita badinaia taudia. (Roma 1:15, 16) Kudou-maoro taudia ese iseda hereva dalana idia itaia bona do idia ura iseda haheitalai idia tohotohoa.—Fili. 4:8, 9.
Laloa Goevagoeva Bona Kara Maoromaoro Hahedinaraia
10. Bema ita ura lo Keristani tauna ai ita lao, edena bamona abidadama ita hahedinaraia be namo?
10 Keristani tauna be haheitalai namona ia hahedinaraia totona, hereva namodia ia gwauraia sibona be hegeregere lasi. Bema tau ta be hereva maorodia ia gwauraia, to kara maorodia ia karaia lasi neganai, ia be koikoi tauna. Paulo be Farisea taudia edia koikoi hereva bona kara ia diba bona ia diba idia be dika do idia davaria. Unai dainai, nega momo ia ese Timoteo ia sisiba henia unai bamona kara do ia karaia lasi. (1 Tim. 1:5; 4:1, 2) To, Timoteo be koikoi tauna lasi. Paulo be Timoteo dekenai revareva iharuana ia torea neganai, ia gwau: “Oiemu abidadama lau laloa, ia be abidadama momokani.” (2 Tim. 1:5) Ena be Timoteo be kara momokani tauna, to ma haida dekenai do ia hahedinaraia ia be lo Keristani tauna korikorina. Oibe, namona be ia ese Keristani kara namodia do ia hahedinaraia.
11. Moni bona kohu tahua karana dekenai, Paulo be Timoteo dekenai dahaka sisiba ia henia?
11 Paulo ese Timoteo dekenai ia torea revareva rua lalonai, ia sisiba henia kara haida dekenai do ia naria namonamo. Hegeregere, Timoteo be moni bona kohu do ia tahua momo lasi. Paulo ia gwau: “Moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.” (1 Tim. 6:10) Bema ta be moni bona kohu ia ura henia dikadika, unai ese ia hahedinaraia ia be lo Keristani tauna lasi. To, bema Keristani taudia idia abia dae idia dekenai ia noho aniani bona dabua be hegeregere, bona moni idia laloa momo lasi, idia moale bona unai ese ia hamomokania idia be lo Keristani taudia.—1 Tim. 6:6-8; Fili. 4:11-13.
12. Edena dala ai dina ta ta lalonai ita hahedinaraia ita be lo Keristani taudia?
12 Paulo ese Timoteo ia hadibaia, Keristani hahine be “mai manau bona mai mataurai danu edia dabua do idia kwatua” be gau badana. (1 Tim. 2:9) Edia dabua ena toana bona edia mauri lalonai idia karaia gaudia ma haida dekenai, manau bona hemataurai idia hahedinaraia hahine be haheitalai namodia. (1 Tim. 3:11) Unai hakaua herevana be Keristani tatau ese do idia badinaia danu. Paulo ese Timoteo ia hamaoroa namona be elda tauna be ia “inua momo lasi tauna, mai ena aonega, bona lalo namo.” (1 Tim. 3:2) Unai kara idauidau be dina ta ta ai ita hahedinaraia neganai, taunimanima ibounai do idia itaia ita be lo Keristani taudia.
13. Timoteo bamona, edena dala ai laloa goevagoeva bona kara maoromaoro ita hahedinaraia diba?
13 Danu, Timoteo be laloa goevagoeva karana dekenai haheitalai namona do ia hahedinaraia. Paulo be unai bamona ia hereva neganai, ia ese matabodaga karadia ia herevalaia. Timoteo be taihu ia kara henidia neganai, ena kara ia goeva be namo. Paulo ese ia sisiba henia, ia gwau: “Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.” (1 Tim. 4:12; 5:2) Haida idia laloa hunia dekenai idia karaia matabodaga karadia be ta ia diba lasi, to Dirava ia itaia diba bona gabeai tadikaka taihu danu do idia diba. To, Keristani tauna ena kara namodia be ibounai ese idia itaia diba. (1 Tim. 5:24, 25) Kongrigeisen lalonai ibounai be edia laloa goevagoeva bona kara maoromaoro amo idia hahedinaraia diba idia be lo Keristani taudia.
Lalokau Bona Abidadama be Gau Badadia
14. Baibel ese ta ta lalokau henia karana be edena bamona ia herevalaia?
14 Keristani tomadiho korikorina ena kara badana ta be lalokau. Iesu ese ena hahediba taudia ia hamaoroa: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:35) Edena dala ai unai bamona lalokau ita hahedinaraia diba? Dirava ena Hereva ese ita ia sisiba henia, ‘ibounai ta ta do ita durua, bona ibounai ta ta do ita hebogahisi henia’ bona ma haida ‘do ita lalokau henia noho’ bona ‘idau taudia eda ruma lalonai do ita abia dae.’ (Efe. 4:2, 32; Heb. 13:1, 2) Aposetolo Paulo ia gwau: “Umui ta ta do umui lalokau henia, tadikaka edia lalokau ta ta dekenai bamona.”—Roma 12:10.
15. Dahaka dainai elda taudia ese lalokau idia hahedinaraia be gau badana?
15 Bema Timoteo be mai badu ida ena tadikaka taihu ia kara henidia, unai ese iena hadibaia bona elda gaukara namona do ia hadikaia. (1 Korinto 13:1-3 duahia.) To, Timoteo ia hahedinaraia iena tadikaka ia lalokau henidia bada, idia dekenai kara namodia ia karaia bona ena heabidae karana ese ia hamomokania ia be lo Keristani tauna. Oibe, aposetolo Paulo ese Timoteo ia tore henia neganai, ena revareva ta lalonai Timoteo ia hamaoroa lalokau karana dekenai haheitalai namona do ia hahedinaraia.
16. Dahaka dainai Timoteo ena abidadama ia goada be namo?
16 Timoteo be Efeso dekenai ia noho neganai, hahetoho ia davaria. Haida be hereva momokani ida ia hegeregere lasi hadibaia hereva koikoidia idia gwauraia. Ma haida be sivarai koikoidia o taunimanima edia lalohadai idia tahua momo, bona unai ese kongrigeisen ia durua lasi. (1 Timoteo 1:3, 4 duahia.) Paulo ia gwau: ‘Unai taudia be hekokoroku taudia, gau ta idia diba lasi bona idia ese hepapahuahu bona heai sibona idia ura henia.’ (1 Tim. 6:3, 4) Timoteo ese unai bamona lalohadai dikadia ia abia dae be namo, a? Lasi, badina Paulo ese Timoteo ia hagoadaia ‘mai ena goada ibounai danu abidadama ena heau helulu do ia heaulaia’ bona ‘hereva kavakava, Dirava ena laloa idia badinaia lasi taudia edia hepapahuahu dekena amo do ia raka siri.’ (1 Tim. 6:12, 20, 21) Ita daradara lasi Timoteo ese Paulo ena sisiba ia badinaia.—1 Kor. 10:12.
17. Hari inai negai, dahaka ese iseda abidadama ia tohoa diba?
17 Danu, Paulo ese Timoteo ia hamaoroa, “nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.” (1 Tim. 4:1) Kongrigeisen lalonai idia noho taudia ibounai, maduna badadia idia huaia taudia danu, be Timoteo bamona edia abidadama ia goada be gau badana. Bema ita gini goada bona iseda lalona ita hadaia aposteit hahediba herevadia ita dadaraia, vadaeni ita hahedinaraia ita be abidadama lo Keristani taudia.
Oi Gaukara Goada Lo Tauna Ai Oi Lao Totona
18, 19. (a) Edena dala ai ma haida dekenai do oi hahedinaraia oi be lo Keristani tauna? (b) Stadi gabena ai dahaka do ita herevalaia?
18 Ia hedinarai goevagoeva, Keristani tauna korikorina be lo tauna ai ia lao totona, ena toana, diba, eiava dagi be gau badana lasi. Bona ena be lagani momo lalonai kongrigeisen dekenai hesiai maduna ta ia huaia, to do ita gwau lasi ia be lo Keristani tauna. To, lo Keristani tauna korikorina be ena lalohadai, hereva bona kara amo ia hahedinaraia ia be Iehova ia badinaia tauna. (Roma 16:19) Namona be ta ta do ita lalokau henia ena hahegani ita badinaia bona iseda abidadama do ita hagoadaia. Oibe, namona be Paulo ena sisiba Timoteo dekenai ita laloa dobu, unai amo taunimanima ibounai do idia itaia ita be lo Keristani taudia.
19 Lo Keristani tauna ai ita lao neganai, Keristani kara namona ma ta do ita hahedinaraia danu. Unai be moale, Dirava ena lauma helaga ena huahua ta. (Gal. 5:22, 23) Stadi gabena ai, do ita tahua edena dala ai hekwakwanai ita davaria negadia ai ita moale noho diba.
Edena Bamona Do Oi Haere?
• Eda hereva dalana amo, ma haida dekenai dahaka ita hahedinaraia?
• Edena dala ai iseda laloa goevagoeva bona kara maoromaoro amo ita hahedinaraia ita be lo Keristani taudia?
• Dahaka dainai Keristani taudia ese lalokau bona abidadama idia hahedinaraia be namo?
[Study Questions]
[Picture on page 11]
Timoteo be mero matamata to ia hahedinaraia ia be lo Keristani tauna
[Pictures on page 13]
Taunimanima idia itaia oi be lo Keristani tauna, a?