Emu Mauri Dinadia Oi Gaukaralaia Dirava Hanamoa Totona

SALAMO torea tauna Davida be Iehova dekenai ia guriguri, ia gwau: “Daba ibounai lau do oi durua, vadaeni oiemu noho hanaihanai lalokauna do lau laloa noho. . . . Egu lao dala namona, mani lau dekenai do oi hedinaraia.” (Sal. 143:⁠8) Dabai oi noga bona dina matamata oi itaia dainai Iehova oi tanikiu henia neganai, oi be Davida bamona, Iehova oi noia oi do ia durua abia hidi maorodia oi karaia bona dala maorona oi badinaia totona, a? Ai diba oi be unai bamona oi karaia.

Ita be Iehova ena hesiai taudia dainai, ‘ita aniani o ita inuinu, o dahaka dahaka ita karaia neganai, inai gau ibounai do ita karaia Dirava hanamoa totona.’ (1 Kor. 10:31) Ita diba dina ta ta ai eda mauri ita gaukaralaia dalana ese Iehova ena ladana do ia hanamoa o hadikaia. Danu, ita diba Baibel ia gwau Satani be “dina bona hanuaboi” Keriso ena tadikaka​​—⁠bona Dirava ena hesiai taudia ibounai tanobada ai​​—⁠ia samania noho. (Apok. 12:10) Unai dainai, namona be “dina bona hanuaboi” ai mai eda ura ida Iehova ena hesiai gaukara ita karaia, unai amo ita hahedinaraia Satani ena hereva be koikoi, bona iseda guba Tamana ena kudouna do ita hamoalea.​​—⁠Apok. 7:⁠15; Aon. 27:⁠11.

Mani dala badadia rua ita herevalaia, unai ese ita do idia durua iseda mauri dinadia ita gaukaralaia diba Dirava ita hanamoa totona. Dala ginigunana be mai anina bada gaudia do ita atoa guna, bona dala iharuana be ma haida do ita laloa bada.

Eda Gwauhamata Ita Badinaia

Iehova dekenai eda mauri ita gwauhamatalaia neganai, ita hahedinaraia ita ura dikadika ia do ita hesiai henia. Danu, Iehova ita gwauhamata henia “dina ta ta ibounai” iena dala dekenai do ita raka​​—⁠oibe, ela bona hanaihanai. (Sal. 61:​5, 8) Vadaeni edena dala ai iseda gwauhamata do ita hagugurua? Edena dala ai dina ta ta ai mai iseda kudouna ibounai ida Iehova ita lalokau henia?

Iehova ia ura do ita hagugurua maduna idauidau be Baibel ese ia hahedinaraia goevagoeva. (Deu. 10:​12, 13) Unai maduna haida be maua ladana “Dirava ese Ia Henia Maduna Idauidau,” rau 22 dekenai do oi itaia. Unai maduna ibounai be Iehova amo idia mai dainai idia be mai anina bada. To, bema mai anina bada gaudia rua o toi be nega tamona ita karaia be namo, edena do ita abia hidi guna?

Ita ese iseda hesiai gaukara idauidau ita atoa guna, idia be Baibel stadi, guriguri, Keristani heboudia, bona haroro gaukara. (Mat. 6:​33; Ioa. 4:​34; 1 Pet. 2:⁠9) To, dina ta ena hora ibounai be hesiai gaukaradia sibona do ita karaia lasi. Moni gaukara, sikuli bona ruma gaukaradia ita karaia danu be mai anina bada. To, namona be sediual namona ita karaia, unai amo moni gaukara bona unai gau ma haida ese iseda hesiai gaukara, hegeregere hebou lao henia karana idia koua lasi. Hegeregere, holide totona palani ita karaia neganai, namona be sekit naria tauna ena vadivadi, dina tamona, sekit o distrik hebouheboudia ita reaia lasi. Reana, nega haida iseda maduna haida be nega tamona ita karaia hebou diba. Hegeregere, ruma bese ita gaukara hebou diba Kingdom Hall ita hagoevaia totona, eiava laga-ani negana ai gaukara o sikuli gabunai eda turadia ita haroro henia diba. Oibe, eda mauri lalonai abia hidi ta ita ura karaia neganai​​—⁠hegeregere edena moni gaukara do ita abia dae, edena sikuli dekenai do ita lao, o daidia do ita bamoa​​—⁠namona be eda abia hidi amo ita hahedinaraia ita be iseda lalokau Tamana, Iehova tomadiho henia karana ita atoa guna.​​—⁠Had. 12:⁠13.

 Ma Haida Laloa Bada

Iehova ia ura ma haida edia namo ita laloa bada bona ita kara namo henia. To, Satani ia ura ita be sibona eda namo do ita laloa bada. Iena tanobada ai momo be ‘sibodia idia laloa bada, “moale karadia” bona“tauanina ena ura dikadia” idia ura henia bada. (2 Tim. 3:​1-5, NW; Gal. 6:⁠8, NW ) Momo be ma haida edia lalohadai idia edia kara dekenai idia laloa bada lasi. Gabu ibounai dekenai taunimanima be “tauanina ena kara” idia hahedinaraia noho.​​—⁠Gal. 5:​19-​21.

To, Iehova ena lauma helaga ese ia hakaua taudia edia kara be idau, idia be ma haida dekenai lalokau, hebogahisi, bona kara namo idia hahedinaraia! (Gal. 5:​22) Baibel be ita ia hagoadaia ita sibona eda namo ita laloa lasi, to ma haida edia namo ita laloa guna totona. Unai dainai ma haida ita laloa bada be namo, to namo lasi idia ura karaia gaudia ita biagua. (1 Kor. 10:​24, 33; Fili. 2:⁠3, 4; 1 Pet. 4:​15) Namona be iseda tadikaka taihu ita laloa bada. To, ita gaukara goada witnes lasi taudia ita durua totona. (Gal. 6:​10) Hari dina ai, dala ta do oi tahua ma ta dekenai hebogahisi karana ta oi hahedinaraia totona, a?​​—⁠Rau 23 ai, maua ladana “Idia Oi Laloa Bada” itaia.

Namo lasi mai anina bada negadia sibona ai ma haida laloa bada karana ita hahedinaraia.  (Gal. 6:2; Efe. 5:2; 1 Tes. 4:​9, 10) Lasi, to namona be dina ta ta ibounai bema ita itaia ta be gau ta dekenai ia dabu ita durua be namo, ena be nega haida unai ita karaia be auka. Ita ura ita dekenai idia noho gaudia​​—⁠iseda nega, kohu, aonega bona diba ita gaukaralaia ma haida ita durua totona. Iehova ia gwauhamata bema ita be ma haida dekenai hariharibada karana ita hahedinaraia, Ia ese ita dekenai unai bamona do ia karaia danu.​​—⁠Aon. 11:25; Luka 6:⁠38.

“Dina Bona Hanuaboi” ai Hesiai Gaukara Karaia

“Dina bona hanuaboi” ai Iehova ita hesiai henia diba, a? Oibe, bema hanaihanai Dirava tomadiho henia karadia ita goadalaia. (Kara 20:31) Iseda mauri dinadia ibounai Dirava ita hesiai henia diba, bema dina ta ta ai Baibel ita duahia bona laloa dobu, ita guriguri, hebou iboudiai dekenai ita lao bona hanaihanai dala ia kehoa neganai ma haida ita haroro henia.​​—⁠Sal. 1:2; Luka 2:​37; Kara 4:⁠20; 1 Tes. 3:​10; 5:​17.

Ita ta ta be unai bamona Iehova ita hesiai henia noho, a? Bema oibe, dina ta ta ai ita karaia gaudia ibounai amo do ita hahedinaraia ita ura Iehova ita hamoalea bena unai amo ia ese Satani ena koikoi herevana ia haere henia diba. Herevana dahaka ita karaia o dahaka ia vara, to namona be ita gaukara goada Iehova ita hanamoa totona. Namona be iena hakaua herevadia ese iseda hereva bona kara idia biagua, bona abia hidi ta ita karaia gwauraia neganai ita idia gimaia. Iehova ita abidadama henia bona eda goada ibounai ita gaukaralaia ena hesiai gaukara ita karaia neganai, ita hahedinaraia ita be iena lalokau bona heduru dalana ita laloa bada. Danu ita be kara dika taudia dainai, bema Iena hakaua daladia amo ita raka siri bona kerere ita karaia neganai, namona be iena sisiba bona matahakani ita abia dae.​​—⁠Sal. 32:​5; 119:97; Aon. 3:​25, 26; Kol. 3:​17; Heb. 6:​11, 12.

Namona be dina ta ta ai Dirava do ita hanamoa noho. Unai bamona ita karaia neganai do ita moale bona iseda guba Tamana ese ita do ia lalokau henia ela bona hanaihanai.​​—⁠Mat. 11:29; Apok. 7:​16, 17.

[Box/Pictures on page 22]

Dirava ese Ia Henia Maduna Idauidau

• Nega Ibounai ita guriguri.​​—⁠Roma 12:⁠12.

• Baibel ita duahia bona stadilaia bona ita dibaia gaudia ita badinaia.​​—⁠Sal. 1:2; 1 Tim. 4:⁠15.

• Kongrigeisen taudia ida Iehova ita tomadiho henia.​​—⁠Sal. 35:18; Heb. 10:​24, 25.

• Ruma bese be tauanina dalanai bona Dirava tomadiho henia dalanai do ita durua, bona edia hemami do ita laloa bada.​​—⁠1 Tim. 5:⁠8.

• Basileia ena sivarai namona ita harorolaia bona hahediba taudia halaoa gaukarana ita karaia.​​—⁠Mat. 24:​14; 28:⁠19, 20.

• Iseda tauanina, eda hetura karana Iehova ida bona ita laloa gaudia ita naria namonamo, anina be moale karadia namodia ita karaia be namo.​​—⁠Mar. 6:​31; 2 Kor. 7:1; 1 Tim. 4:​8, 16.

• Kongrigeisen ai iseda maduna idauidau do ita laloa bada.​​—⁠Kara 20:28; 1 Tim. 3:⁠1.

• Iseda ruma bona Kingdom Hall ita hagoevaia bona naria namonamo.​​—⁠1 Kor. 10:⁠32.

[Box/Picture on page 23]

Idia Oi Laloa Bada

• Tadikaka o taihu burukana ta.​​—⁠Lev. 19:⁠32.

• Tauanina dalanai ia gorere o ia lalometau tauna ta.​​—⁠Aon. 14:⁠21.

• Bema kongrigeisen ai tadikaka o taihu ta be gau ta dekenai ia dabu, heduru oi henia.​​—⁠Roma 12:⁠13.

• Emu ruma bese tauna ta. ​​—⁠1 Tim. 5:​4, 8.

• Ena adavana ia mase tadikaka o taihu ta.​​—⁠1 Tim. 5:⁠9.

• Emu kongrigeisen lalonai ia gaukara goada elda tauna ta. ​​—⁠1 Tes. 5:​12, 13; 1 Tim. 5:⁠17.