Iehova Ena Lohia Dalana Ia Kwalimu!
Iehova Ena Lohia Dalana Ia Kwalimu!
“Atai Momokani Diravana ese taunimanima edia basileia ia lohiaia.”—DAN. 4:17, BHğ.
1, 2. Dahaka dainai taunimanima edia lohia dalana ia kwalimu lasi?
TAUNIMANIMA edia lohia dalana ia kwalimu lasi! Unai ena badina ita daradaralaia lasi. Idia kwalimu lasi ena badina badana be, idia be taunimanima lohiaia dalana idia diba namonamo lasi. Hari inai negai ita itaia, lohia taudia momo be ‘edia ura sibona idia tahua, moni idia mataganigani henia, idia hekokoroku bona heagi. Bona helaga karadia idia negea. Idia bogahisihisi lasi, haida edia ladana idia hadikaia kava, idia lebulebu, idia dagedage, kara namodia idia ura henia lasi. Edia turana idia samania henia.’—2 Tim. 3:2-4.
2 Idaunegai, Adamu bona Heva be Dirava ena lohia dalana idia dadaraia. Reana idia laloa, unai dala amo idia sibona be edia raka dalana idia abia hidi diba. To lasi, idia be Satani ena lohia dalana idia badinaia. Lagani 6,000 lalonai, taunimanima be kavakava karadia idia karaia—“inai tanobada ena lohia,” Satani, ena siahu henunai—dainai, ita noho namonamo lasi. (Ioa. 12:31) Buka ta (The Oxford History of the Twentieth Century) ese taunimanima edia mauri ia kikilaia neganai, ia gwau, “tanobada goevadaena ta idia tahua” be anina lasi. Ma ia gwau: “[Unai bamona tanobada] idia davaria diba lasi, bona [unai bamona tanobada] idia havaraia toho taudia ese dika bada, hekokoroku, bona tuari dikadia idia havaraia.” Oibe, taunimanima edia lohia dalana idia kwalimu lasi!
3. Bema Adamu bona Heva idia kara dika lasi, oi laloa Dirava ena lohia dalana be edena bamona?
3 Madi, eda tama sina ginigunadia be lohia dalana namona—Dirava ena lohia dalana—idia dadaraia! To bema idia be Iehova idia kamonai henia noho, Dirava ese tanobada lohiaia dalana do ia haidaua eiava lasi be ita diba namonamo lasi. To ita diba gauna be inai: Bema matamanai, taunimanima ibounai be Dirava ena lohia dalana idia abia dae, lalokau do ia noho to kopi idauidau taudia inai henia karana be lasi. (Kara 10:34; 1 Ioa. 4:8) Dirava ena aonega be bada herea dainai, ita diba bema taunimanima ibounai be Iehova ena lohia sibona henunai idia noho, kerere ta do idia karaia lasi bona sibona do idia lohiaia lasi. Eiava Dirava ena lohia dalana, tiokratik dalana unai, do ia heau namonamo bona ‘mauri gaudia ibounai edia ura ia hagugurua noho.’ (Sal. 145:16) Dirava ena lohia dalana be namo momokani. (Deu. 32:4) To madi, momo be unai lohia dalana idia dadaraia!
4. Satani be do ia lohia hanaihanai, a?
4 Danu, ita laloaboio lasi: Ena be Iehova be taunimanima edia lohia dalana ia koua lasi, to Ia ese ia havaraia gaudia ia lohiaia noho be maoro. Unai dainai, Babulonia ena king mai siahu badana danu be gabeai ia laloparara “Atai Momokani Diravana ese taunimanima edia basileia ia lohiaia.” (Dan. 4:17) Gabeai, Dirava ena Basileia ese iena ura do ia hagugurua. (Mat. 6:10) Momokani, Iehova be nega kwadogina ia henia Satani be “inai tanobada ena dirava” ai ia lao totona, bena Iehova ese Satani ena hepapahuahu herevana do ia hamaoromaoroa. (2 Kor. 4:4; 1 Ioa. 5:19) Ia ese Satani ena hahetoho karadia dekenai maka ia atoa danu, Satani ese unai maka ia hanaia lasi totona. (2 Siv. 20:6; Iobu 1:11, 12; 2:3-6.) To, taunimanima haida be hanaihanai Dirava idia badinaia, ena be inai tanobada be Iehova ena Inai Tauna badana ese ia lohiaia.
Israela Taudia be Dirava Ena Lohia Siahuna Henunai Idia Noho
5. Israela taudia be Dirava dekenai dahaka gwauhamata idia karaia?
5 Abela ena negai ela bona Israela taudia edia negai, abidadama taudia haida be Iehova idia tomadiho henia bona ena taravatu idia badinaia. (Heb. 11:4-22) Mose ena negai, Iehova be Iakobo ena bese ida gwauhamata ta idia karaia, bona gabeai Israela besena ai ia lao. Lagani 1513 B.C.E. ai, Israela taudia idia gwauhamata idia bona edia natudia bona tubudia idia abia dae Iehova be edia King, ma idia gwau: “Ai be Lohiabada ena hereva ibounai do ai karaia.”—Eso. 19:8.
6, 7. Iehova ese Israela ia lohiaia dalana ese dahaka kara ia hahedinaraia?
6 Badina namodia dainai, Iehova ese Israela taudia be ena taunimanima ai ia halaoa. (Deuteronomi 7:7, 8 duahia.) Iehova ia ura idia ia durua idia noho namonamo sibona lasi, to idia ese gau ma haida idia karaia be namo. Idia ese Dirava ena ladana bona ena lohia siahuna idia laloa bada be namo danu—unai gaudia be mai anina bada. Israela taudia edia maduna be, Iehova ena witnes taudia ai idia lao bena idia hahedinaraia Iehova be Dirava momokani tamona. (Isa. 43:10; 44:6-8) Unai dainai, Iehova be unai bese ia hamaoroa: “Umui be Lohiabada emui Dirava ena bese helagana. Lohiabada ese tanobada dekenai idia noho taudia ibounai dekena amo umui ia abia hidi, iena bese korikori do umui lao totona.”—Deu. 14:2.
7 Dirava be Israela taudia ia lohiaia neganai, ia diba idia be goevadae lasi. Danu, Iena taravatu be goevadae bona ena kara idia hahedinaraia. Mose ena Taravatu ese idia hahedinaraia Iehova be helaga, mai lalokau ida hahemaoro ia karaia, mai ena ura ida dika ia gwauatao, bona ia haheauka. Gabeai, Iosua bona ena negai idia noho taudia be Iehova ena taravatu idia badinaia dainai, idia noho namonamo bona Dirava ena hahenamo idia moalelaia. (Ios. 24:21, 22, 31) Unai negai, Israela edia noho dalana ese ia hahedinaraia, Iehova ena lohia dalana ia kwalimu hanaihanai.
Tanobada Ena King ese Dika Idia Havaraia
8, 9. Israela taudia be dahaka noinoi kavakavana idia karaia, bona dahaka ia vara?
8 To gabeai, Israela taudia be Dirava ena lohia dalana idia dadaraia momo bona Iehova be idia ia gimaia lasi dainai, idia be dika idia davaria. Israela taudia ese peroveta tauna Samuela idia noia goadagoada, idia ura tanobada tauna ta be edia king ai ia lao. Iehova ese Samuela ia hamaoroa edia noinoi do ia kamonai henia totona. To danu, ia gwau: “Idia ese oi idia negea lasi, to lau sibona idia negea inai. Idia ura lasi lau idia abia, edia King.” (1 Sam. 8:7) Ena be Iehova ese Israela taudia dekenai gwaumaoro ia henia edia tanobada king ta idia abia hidi totona, to idia ia hadibaia tanobada ena king ese dika idia havaraia.—1 Samuela 8:9-18 duahia.
9 Gabeai idia vara gaudia ese idia hamomokania Iehova ena hadibaia herevana be momokani. Oibe, Israela ena king dikadia ese hekwakwanai momo idia havaraia. Israela taudia edia haheitalai amo ita laloparara dahaka dainai hari inai negai Iehova idia diba lasi taudia edia gavamani be noho namona idia mailaia lasi. Momokani, politikol ena lohia taudia haida be Dirava idia noia goadagoada idia ia durua maino bona noho namo idia havaraia totona, to ita diba Dirava be iena lohia dalana idia dadaraia taudia ia durua diba lasi.—Sal. 2:10-12.
Bese Matamatana be Dirava Ena Lohia Siahuna Henunai Ia Noho
10. Dahaka dainai Dirava ese Israela besena ia dadaraia bena bese matamata ma ta ia abia hidi?
10 Gabeai, Israela besena be ena kara amo ia hamomokania ia ura lasi Iehova ia hesiai henia. Ia ese Dirava ena abia hidi Mesiana ia dadaraia dainai, Iehova ese ia dadaraia bona bese matamata ma ta ia abia hidi. Hoa gauna be, lagani 33 C.E. ai, Iehova idia tomadiho henia horoa taudia be Keristani kongrigeisen idia haginia. Unai kongrigeisen be Iehova ena bese matamata ai ia lao bona Iehova ena lohia dalana henunai ia noho. Unai dainai, Paulo ese unai bese ia gwauraia “Dirava ena Israela.”—Gal. 6:16.
11, 12. Edena dala ai kongrigeisen naria karana dekenai, idaunegai Israela besena bona “Dirava ena Israela” matamatana dekenai gau haida be idia hegeregere?
11 Israela besena ginigunana bona “Dirava ena Israela” matamatana dekenai, gau haida be hegeregere to ma haida be lasi. Hegeregere, idaunegai Israela besena be tanobada king ta idia abia hidi bona kara dika taudia totona animal idia bouboulaia, to Keristani kongrigeisen taudia be unai bamona idia karaia lasi. Israela besena dekenai gunalaia taudia idia noho hegeregerena, Keristani kongrigeisen dekenai be elda taudia idia noho danu. (Eso. 19:3-8) Elda taudia be kongrigeisen ena mamoe taudia idia lohiaia lasi. To, idia ese kongrigeisen taudia idia naria bona mai edia goada ida tiokratik gaukara idauidau idia hakaua. Idia be mai edia lalokau bona hemataurai ida kongrigeisen taudia ibounai o ta ta idia kara henia.—2 Kor. 1:24; 1 Pet. 5:2, 3.
12 “Dirava ena Israela” bona “mamoe idaudia” be Dirava ese Israela taudia ia kara henia dalana idia laloa dobu dainai, idia be Iehova ena lohia dalana idia moalelaia. (Ioa. 10:16) Hegeregere: Idaunegai sivaraidia ese idia hahedinaraia Israela ena king ese idia lohia taudia dekenai namo o dika idia mailaia. Unai bamona king taudia edia sivarai ese elda taudia idia durua dalana be inai: Herevana idia be idaunegai king taudia bamona lasi, to hanaihanai Iehova abidadama henia karana dekenai haheitalai namona idia hahedinaraia be namo.—Heb. 13:7.
Hari Inai Negai Iehova Ia Lohia Dalana
13. Lagani 1914 ai, dahaka mai anina bada gauna ia gini vadaeni?
13 Hari inai negai, Keristani taudia idia gwau taunimanima edia lohia dalana be kahirakahira do ia ore. Lagani 1914 ai, Iehova ese ena Basileia be guba ai ia haginia bona Iesu Keriso be King ai ia halaoa. Unai negai, Iehova ese Iesu dekenai gwaumaoro ia henia, “mai goada danu ia lao, do ia kwalimu totona.” (Apok. 6:2) Ia ese King matamata ia hamaoroa: “Oi dekenai idia tuari henia taudia do oi biagua.” (Sal. 110:2) To, hanaihanai bese momo be Iehova ena lohia dalana idia dadaraia. Edia kara amo idia hahedinaraia “Dirava be ia noho lasi” bamona.—Sal. 14:1.
14, 15. (a) Edena dala ai Dirava ena Basileia be ita ia lohiaia, bona dahaka henanadai ita henia be namo? (b) Edena dala ai ita itaia hari Dirava ena lohia dalana ese taunimanima edia lohia dalana ia hanaia?
14 “Dirava ena Israela” ena horoa taudia haida sibona be tanobada ai idia do noho, bona idia be Iesu ena tadikaka dainai, hanaihanai ‘gwaukau taudia bamona Keriso ena gabu idia abia.’ (2 Kor. 5:20, NW ) Idia be hesiai tauna mai ena kamonai bona mai ena kara maoromaoro oreana—unai orea be Iesu ese ia abia hidi, lauma aniani idia henia bona horoa taudia bona tanobada ai mauri hanaihanai do idia abia hutuma bada taudia idia naria totona. (Mat. 24:45-47; Apok. 7:9-15) Hari inai negai, Iehova idia tomadiho henia taudia momokanidia be mauri namona idia davaria noho, bona unai ese ia hamomokania Iehova be edia gaukara ia hanamoa noho.
15 Ita sibona ita nanadaia: ‘Kongrigeisen ai do lau huaia maduna idauidau edia anina lau lalopararalaia namonamo, a? Iehova ena lohia dalana lau durua namonamo, a? Lau moale badina Iehova ia lohiaia Basileia henunai lau noho, a? Egu lalona lau hadaia egu noho dalana hegeregerena nega ibounai ma haida dekenai Dirava ena Basileia lau harorolaia totona, a?’ Namona be ita ibounai be mai eda ura ida Hakaua Oreana ena hakaua herevadia ita badinaia bona kongrigeisen elda taudia ida ita gaukara hebou. Unai bamona dala amo ita hahedinaraia ita be Dirava ena lohia dalana ita abia dae. (Heberu 13:17 duahia.) Ena be tanobada taudia idia parara noho, to mai eda ura ida Dirava ena lohia dalana ita badinaia neganai, unai ese ita do ia durua tanobada ibounai tadikaka oreana ida ita lalotamona totona. Danu, maino ai do ita noho, kara namodia do ita karaia, bona Iehova ena ladana do ita hanamoa—unai ese do ia hahedinaraia Iehova ena lohia dalana sibona be hereadae.
Iehova Ena Lohia Dalana Ia Kwalimu
16. Hari, taunimanima ese dahaka abia hidi idia karaia be namo?
16 Eden ai ia vara hepapahuahu hamaoromaoroa negana ia kahirakahira noho. Unai dainai, hari be nega namona taunimanima ese lohia dalana ta idia abia hidi haraga totona. Idia ta ta be ena lalona do ia hadaia Iehova ena lohia dalana do ia abia dae eiava taunimanima edia lohia dalana do ia abia dae. Eda maduna hereadaena be, manau taudia ita durua Iehova ena lohia dalana idia abia dae totona. Kahirakahira, Aramagedono ai, Iehova ena lohia dalana ese Satani ena siahu henunai idia noho gavamani edia gabu do ia abia. (Dan. 2:44; Apok. 16:16) Taunimanima edia lohia dalana ia ore dainai, Dirava ena Basileia ese tanobada ibounai do ia lohiaia. Momokani, Iehova ena lohia dalana do ia kwalimu.—Apokalupo 21:3-5 duahia.
17. Dahaka gaudia ese manau tauna do ia durua lohia dalana maorona idia abia hidi totona?
17 Bema ta be Iehova ena lohia dalana ia do abia hidi lasi, namona be unai ia gurigurilaia bona Dirava ena lohia dalana ese taunimanima totona do ia havaraia gaudia ia laloa. Taunimanima edia lohia dalana ese raskol, terorist karadia, bona hekwakwanai ibounai idia haorea lasi. To Dirava ena lohia dalana ese tanobada amo dika ibounai do ia kokia. (Sal. 37:1, 2, 9) Taunimanima edia lohia dalana be tuari ia havaraia, to Dirava ena lohia dalana ese tanobada ibounai dekenai tuari do ia hadokoa. (Sal. 46:9) Danu, Dirava ena lohia dalana be taunimanima bona animal huanai maino do ia havaraia! (Isa. 11:6-9) Taunimanima edia lohia dalana henunai taunimanima be nega ibounai idia hitolo, to Dirava ena lohia dalana henunai taunimanima do idia hitolo lasi. (Isa. 65:21) Danu, taunimanima edia lohia dalana be gorere bona mase ia haorea diba lasi, to Dirava ena lohia dalana henunai, buruka taudia bona gorere taudia be uhau ena goada dinadia do idia davaria lou. (Iobu 33:25; Isa. 35:5, 6) Momokani, tanobada be paradaiso ai do ia lao bona mase taudia do idia toreisi lou.—Luka 23:43; Kara 24:15.
18. Edena dala ai ita hahedinaraia diba Dirava ena lohia dalana be hereadae?
18 Oibe, ena be Satani be eda tama sina ginigunadia edia lalona ia ania bena edia Havaraia Tauna idia rakatania dainai dika idia vara, to Dirava ena lohia dalana ese unai dika ibounai do ia kokia. Danu ita laloatao: Lagani 6,000 mai kahana lalonai, Satani be dika bada ia havaraia noho, to lagani 1,000 lalonai, Dirava ese Keriso amo unai dika ibounai do ia kokia! Unai ese ia hamomokania Dirava ena lohia dalana ia kwalimu! Ita be Iehova ena Witnes taudia dainai, iseda Dirava ena lohia dalana ita abia dae. Unai dainai, dina ibounai bona hora ibounai lalonai, namona be eda mauri lalonai ita hahedinaraia, ita be Iehova ita tomadiho henia, ena Basileia henunai ita noho, bona ita moale badina ita be iena Witnes taudia. Danu, nega bona gabu idauidau ai kamonai taudia ita hadibaia Iehova ena lohia dalana sibona be hereadae.
Dirava ena lohia dalana amo dahaka ita dibaia bema inai siri ita duahia . . .
• Deuteronomi 7:7, 8?
• 1 Samuela 8:9-18?
• Heberu 13:17?
• Apokalupo 21:3-5?
[Study Questions]
[Pictures on page 29]
Iehova be nega ibounai ena lohia dalana ia hagoadaia
[Picture on page 31]
Iehova ena lohia dalana badinaia karana ese ita ia durua tanobada ibounai tadikaka oreana ida ita lalotamona totona