Ita Be Iehova Ena​​—⁠Hebogahisi Karana

“Ita be Lohiabada ena.”​​—⁠ROMA 14:⁠8.

1, 2. (a) Dahaka hahenamo ita abia? (b) Edena henanadai do ita lalodia?

IEHOVA ese Israela besena dekenai hahenamo badana ia henia, ia gwau: “Bese ibounai edia huanai umui be lauegu abia hidi besena.” (Eso. 19:⁠5) Hari inai negai, kongrigeisen taudia danu be Iehova ena. (1 Pet. 2:9; Apok. 7:​9, 14, 15) Unai be hahenamo badana bona unai ese idia do ia durua ela bona hanaihanai.

² Ita be Iehova ena be hahenamo ta sibona lasi, to danu, mai ena maduna. Reana haida idia henanadai: ‘Lau be hegeregere Iehova ena ura lau karaia totona, a? Bema kara dika ta dekenai lau moru, ia ese lau do ia dadaraia, a? Bema lau be Iehova ena, unai ese egu ura kwalimu do ia hadikaia, a?’ Unai bamona henanadai ita laloa be mai anina bada. To, inai henanadai ita laloa namonamo guna be namo: Bema ita be Iehova ena, unai ena namo haida be dahaka?

Ita be Iehova Ena​—⁠Moale Gauna

3. Rahaba be Iehova hesiai henia karana ia abia hidi dainai, dahaka namo ia abia?

³ Bema ta be Iehova ena, ia be namo ia davaria, a? Ieriko ai ia noho ariara hahinena Rahaba ena sivarai mani oi laloa. Ia be Kanana edia dirava koikoidia idia tomadiho henia taudia huanai ia tubu daekau. To, Rahaba be Iehova ese Israela besena ia durua idia kwalimu ena sivarai ia kamonai neganai, ia laloparara Iehova be  Dirava momokanina. Unai dainai, ena mauri ia laloa lasi, to Dirava ese ia abia hidi taudia ia gimaia bona ena mauri be edia imana dekenai ia atoa. Baibel ia gwau: “Ariara hahine Rahaba be iena kara dainai Dirava ena vairanai ia maoromaoro. Badina be ia ese Israela ena hesiai taudia iena ruma dekenai ia abidia dae, bona dala idauna dekena amo ia siaidia lao, vadaeni idia heau mauri.” (Iam. 2:​25) Ia abia hahenamodia mani ita laloa: Ia be Israela besena ena kahana ta ai ia lao​—⁠unai bese goevana be Dirava ena Taravatu idia diba dainai, idia be lalokau idia hahedinaraia bona kara maoromaoro idia karaia. Ita gwau diba Rahaba be ena mauri gunana ia rakatania dainai ia moale! Ia be Israela tauna ta ia adavaia bona ena natuna mero, Boasi, ia durua Dirava ena ura ia karaia totona.​​—⁠Ios. 6:​25; Ruta 2:​4-​12; Mat. 1:​5, 6.

4. Ruta be Iehova hesiai henia karana ia abia hidi dainai, dahaka namo ia abia?

⁴ Moaba hahinena Ruta danu be Iehova hesiai henia karana ia abia hidi. Ia maragi neganai, reana ia be Kemoso bona Moaba edia dirava ma haida ia tomadiho henidia, to gabeai Dirava momokanina, Iehova, ia diba bona ena tano ai ia noho Israela tauna ta ia adavaia. (Ruta 1:​1-6 duahia.) Gabeai, Ruta bona Oropa be edia ravana hahinena, Naomi, ida Betelehema dekenai idia lao noho lalonai, Naomi ese ia hamaorodia edia hanua dekenai idia giroa be namo. Idia rua be hegeregere lasi Israela ai idia noho totona. Oibe, Oropa be “iena bese taudia bona iena dirava dekenai ia giroa lou,” to Ruta be lasi. Iena abidadama ia goada bona ia diba ia be daika ena. Ia ese Naomi ia hamaoroa: “Lau do oi oda lasi, oi do lau rakatania totona. Badina be do oi lao gabuna, be lau danu do lau lao, bona do oi noho gabuna dekenai lau danu do lau noho. Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:​15, 16) Ruta be Iehova hesiai henia karana ia abia hidi dainai, Dirava ena Taravatu amo namo ia abia​—⁠unai Taravatu be vabu, ogogami taudia, bona tano lasi taudia naria karana ia herevalaia. Ruta be Iehova ese ia naria dainai, ia moale bona noho namona ia davaria.

5. Iehova idia hesiai henia goadagoada taudia dekenai dahaka oi itaia?

⁵ Reana oi be tadikaka o taihu haida oi diba​—⁠idia be Iehova dekenai gwauhamata idia karaia murinai, lagani momo lalonai Iehova idia hesiai henia. Idia oi nanadaia edena dala ai Iehova hesiai henia karana amo namo idia abia. Momokani, ita ibounai be hekwakwanai ita abia, to gau momo ese idia hahedinaraia salamo torea tauna ena hereva be momokani, ia gwau: “Edia Dirava be Lohiabada, ena bese taudia be idia moale noho.”​​—⁠Sal. 144:⁠15.

Iehova Ena Laloa Maoromaoro Karana

6. Dahaka dainai ita gari lasi to Iehova ena ura ita karaia?

⁶ Reana oi henanadai: ‘Lau be hegeregere Iehova ena ura lau karaia totona, a?’ Nega haida ita laloa ita be hegeregere lasi Dirava ena hesiai tauna ai ita lao, iena taravatu ita badinadia, bona ena ladana ita harorolaia totona. Hegeregere, Mose ia laloa ia be hegeregere lasi Israela  taudia bona Aigupito ena king ia hereva henia totona. To Dirava be laloa maoromaoro ia abia dainai, Mose ena hekwakwanai ia lalopararalaia. Iehova ese Mose ia ‘hadibaia dahaka do ia karaia’ totona. (Esodo 3:​11; 4:​1, 10, 13-​15 duahia.) Mose be Iehova ena heduru ia abia dae bona Dirava ena ura ia hagugurua dainai ia moale. Unai hegeregerena, Iehova be laloa maoromaoro ia abia dainai, iseda hekwakwanai ia lalopararalaia. Ia diba ita be goevadae lasi bona ia ura ita ia durua. (Sal. 103:14) Iesu ena murinai ita raka bona Dirava ita hesiai henia neganai, unai ese ita ia hagoadaia badina unai bamona gaukara ese ma haida ia durua bona Iehova ia hamoalea. Iesu ia gwau: “Lau dekenai umui mai, lau ese laga-ani do lau henia umui dekenai. . . . Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna.”​​—⁠Mat. 11:​28, 29.

7. Dahaka dainai oi abia dae Iehova ese oi do ia durua ena ura oi karaia totona?

⁷ Iehova ese hanaihanai ita do ia hagoadaia bema Ia ita noia goada ia henia totona. Hegeregere, Ieremia be haroro dekenai ia gari. Unai dainai, Iehova ese ena peroveta tauna ai ia halaoa neganai, Ieremia ia gwau: “Lohiabada Dirava e, lau be hereva dalana lau diba lasi, lau be mero sibona.” Gabeai, ia gwau: “Iena ladana dekenai do lau hereva lasi.” (Ier. 1:6; 20:⁠9) To, Iehova ena hagoadaia herevana dainai, Ieremia be lagani 40 lalonai taunimanima ese idia moalelaia lasi herevana ia harorolaia. Iehova ese Ieremia ia hagoadaia lou: “Lau be oi dekenai lau noho, bona oi do lau durua.”​​—⁠Ier. 1:​8, 19; 15:⁠20.

8. Edena dala ai ita hahedinaraia ita be Iehova ita abidadama henia?

⁸ Iehova ese Mose bona Ieremia ia hagoadaia hegeregerena, hari inai negai Ia ese ita do ia durua ena ura ita karaia totona. Gau badana be Dirava dekena ita tabekau. Baibel ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aon. 3:​5, 6) Bema Baibel bona orea amo idia mai heduru gaudia ita abia dae, unai amo ita hahedinaraia ita be Iehova ita abidadama henia. Bema eda mauri lalonai Iehova be ita ia hakaua, gau ta ese eda abidadama do ia hadikaia lasi.

Iehova be Ena Taunimanima Ta Ta Ia Laloa Bada

9, 10. Daika ena gimaia karana be Salamo 91 ese ia gwauhamatalaia?

⁹ Haida idia daradara Iehova gwauhamata henia karana do idia abia hidi o lasi. Reana idia laloa momo gaudia be inai: Kerere badana ta idia karaia eiava, edia ladana do ia dika eiava, bona Iehova ese idia do ia dadaraia eiava. To namona be ita moale badina Iehova ese gau idauidau ia henia, Ia ita tura henia karana ita gimaia totona. Salamo 91 ese unai ia herevalaia dalana mani ita itaia.

¹⁰ Salamo torea tauna ia gwau: “Atai Momokani Lohiabada ena hehuni gabuna ai ia noho tauna, Siahu Ibounai Diravana ena ikerukeruna ai ia noho tauna ese Iehova do ia hereva henia, do ia gwau, ‘Egu roho mauri gabuna bona egu kohoro; egu Dirava, lau abidadama henia.’ Ia ese manu tahua tauna ena tarapu amo lau do ia harohoa mauri.” (Sal. 91:​1-3, BHğ) Mani oi laloa: Dirava ia gwauhamata ia be ia idia lalokau henia bona abidadama henia taudia do ia gimaia. (Salamo 91:​9, 14 duahia.) Edena dala ai idia do ia gimaia? Idaunegai, Iehova ese ena hesiai taudia haida ia gimaia, reana badina idia haida be gwauhamata Mesiana do idia havaraia. To ma haida be Dirava idia badinaia noho dainai, dibura ruma ai idia atoa, idia hahisia bona hamasea. (Heb. 11:​34-​39) Iehova ese idia ia gimaia bona idia gini goada dainai, gau ta ese edia abidadama ia hadikaia lasi. Momokani, ita gwau diba Salamo 91 be Iehova ese ita ia gimaia gwauhamatana ia herevalaia.

11. “Atai Momokani Lohiabada ena hehuni gabuna” be dahaka, bona unai gabu dekenai Dirava be daidia ia gimaia?

¹¹ Salamo torea tauna ese ia herevalaia “Atai Momokani Lohiabada ena hehuni gabuna” be Dirava ese ena hesiai taudia ia gimaia gabuna ia laulaulaia. Unai gabu dekenai idia noho taudia  edia abidadama bona lalokau karana Dirava dekenai be gau ta o tau ta ese ia hadikaia diba lasi. (Sal. 15:​1, 2; 121:⁠5) Unai be hehuni gabuna badina abidadama lasi taudia be unai gabu idia diba lasi. Inai hereva, ‘iseda Dirava, ita abidadama henia’ idia gwauraia taudia be Iehova ese do ia gimaia. Bema unai heau mauri gabuna dekenai ita noho, Satani, “manu tahua tauna” ena tarapu lalonai do ita moru lasi bona Dirava ena lalonamo do ita haboioa lasi.

12. Dahaka gaudia ese eda hetura karana Dirava ida idia hadikaia diba?

¹² Dahaka gaudia ese eda hetura karana hereadaena Dirava ida idia hadikaia diba? Salamo torea tauna ese unai gaudia ia gwauraia, bona idia haida be inai: “Dibura neganai idia vara gorere dikadia” bona “dina neganai idia toreisi haraga dika badadia.” (Sal. 91:​5, 6) “Manu tahua tauna” ena tarapu ta be inai: Momo be sibona edia namo idia laloa bada. (2 Kor. 11:⁠3) Ia ese mataganigani, hekokoroku, bona moni o kohu laloa bada karana ia habadaia, unai amo ma haida edia lalona ia veria. Danu, ia ese lalohadai kavakavadia amo ma haida ia koia o hakaua kerere dainai, idia ese bese abia isi karana, evolusen, bona tomadiho koikoi idia abia dae. (Kol. 2:⁠8) Ma danu, ia ese momo ia koia matabodaga karadia ena tarapu lalonai idia moru totona. Unai dika gaudia dainai, taunimanima milioni momo be Dirava lalokau henia karana idia haboioa vadaeni.​​—⁠Salamo 91:​7-​10 duahia; Mat. 24:⁠12.

Dirava Lalokau Henia Karana Oi Gimaia

13. Edena dala ai Iehova ese ita be unai dika gaudia amo ia gimaia?

¹³ Edena dala ai Iehova ese ena taunimanima be unai dika gaudia amo ia gimaia? Salamo torea tauna ia gwau: “Dirava ese iena aneru oi dekenai do ia siaia, idia ese oi do idia naria, oiemu loaloa gabudia ibounai dekenai.” (Sal. 91:11) Aneru ese ita idia gimaia dainai, sivarai namona ita harorolaia diba. (Apok. 14:⁠6) Danu, elda taudia be Baibel ena hakaua herevadia idia hadibaia namonamo dainai, idia ese ita idia gimaia hereva koikoidia ita dadaraia totona. Elda taudia ese ita ta ta idia durua diba tanobada ena lalohadai kavakavadia ita dadaraia totona. (Tito 1:9; 1 Pet. 5:⁠2) Danu, “hesiai tauna mai ena kamonai, bona mai ena kara maoromaoro” ese hakaua herevadia ia henia, unai amo evolusen hahediba herevana, ura dikadia, kohu bona ladana bada tahua karana, bona kara dikadia ma haida amo ita ia gimaia diba. (Mat. 24:45) Dahaka ese oi ia durua unai bamona dika gaudia oi dadaraia totona?

14. Dirava ese ita ia gimaia totona ia henia gaudia be edena bamona ita gaukaralaia diba?

¹⁴ Dahaka ita karaia Dirava ena “hehuni gabuna” ai ita noho totona? Nega momo eda tauanina ita gimaia o naria namonamo badina ita ura lasi aksiden ita davaria, raskol ese ita idia hadikaia, o gorere ta ita davaria, unai hegeregerena eda hetura karana Dirava ida ita gimaia o naria namonamo badina ita ura lasi gau ta o tau ta ese unai hetura karana ia hadikaia. Unai dainai, hanaihanai eda buka, bona hebou badadia bona maragidia lalonai Iehova ese ia halasia hakaua herevadia ita badinaia. Elda taudia edia heduru ita tahua. Danu, eda tadikaka taihu edia  kara namodia amo namo ita abia, ani? Oibe, kongrigeisen taudia ita bamoa karana ese ita do ia durua aonega taudia ai ita lao totona.​​—⁠Aon. 13:20; 1 Petero 4:​10 duahia.

15. Dahaka dainai oi diba momokani Iehova ese oi do ia gimaia bona do ia lalonamo henia noho?

¹⁵ Ita diba momokani Iehova ese ita do ia gimaia bona do ia lalonamo henia noho. (Roma 8:​38, 39) Ena be tomadiho bona politikol taudia mai goadadia edia ura gauna badana be ita do idia alaia lasi, to eda Dirava helagana amo ita do idia hapararaia​—⁠to Iehova be ena kongrigeisen ia gimaia. Iehova ena gwauhamata ia hamomokania, ia gwau: “Tuari gauna ta ese oi do ia hadikaia diba lasi.”​​—⁠Isa. 54:⁠17.

Daika ese Ita Dekenai Ura Kwalimu Ia Henia?

16. Dahaka dainai inai tanobada ese ita dekenai ura kwalimu ia henia diba lasi?

¹⁶ Bema ita be Iehova ena, eda ura kwalimu do ita haboioa lasi. To, bema ita be tanobada ena, eda ura kwalimu ita haboioa diba. Inai tanobada be Iehova amo ia daudau bona taunimanima ia guidia noho dirava dikana ese ia lohiaia. (Ioa. 14:30) Hegeregere, Satani ena tanobada ese taunimanima ia veria kohu momo idia hoia totona, unai kara ese idia ia guia bamona. (Apokalupo 13:​16, 17, hahegeregerea.) Danu, kara dika ese taunimanima ia guidia diba. (Ioa. 8:​34; Heb. 3:​13) Unai dainai, ena be tanobada taudia idia gwau edia mauri dalana be mai ena ura kwalimu, to unai be Iehova ena hadibaia herevadia hegeregerena lasi. Edia hereva idia kamonai taudia be kara dika bona matabodaga maurina ena hesiai taudia ai do idia lao.​​—⁠Roma 1:​24-​32.

17. Iehova ese edena bamona ura kwalimu ia henia?

¹⁷ Momokani, bema eda mauri be Iehova dekenai ita atoa, ia ese hadikaia gaudia ibounai amo ita do ia ruhaia. Haheitalai be inai: Mase ia havaraia gorerena ia abia tauna ta ese ena mauri be mai ena diba bada doketa ta ena imana dekenai ia atoa, badina ia diba unai doketa ese ia hamauria diba. Ita ibounai be mase ia havaraia gorere dikana ta ita abia bamona​​—⁠kara dika unai. Bema Iehova bona Keriso ena boubou gauna ita abidadama henia, ita diba kara dika ese ia havaraia gaudia do ita hanaia bona mauri hanaihanai do ita abia. (Ioa. 3:​36) Doketa ta ena gaukara namodia ita dibaia neganai, ia do ita abidadama henia. Unai hegeregerena, Iehova ita dibaia noho lalonai, iseda abidadama Ia dekenai do ita habadaia. Unai dainai, Baibel ita stadilaia noho, badina unai ese ita do ia durua Dirava ita lalokau henia, bona ita gari lasi badina ita be Ia ena.​​—⁠1 Ioa. 4:​18.

18. Bema ta be Iehova ena, vadaeni dahaka namo do ia abia?

¹⁸ Iehova be taunimanima ibounai dekenai ura kwalimu ia henia, idia sibona ese abia hidi idia karaia totona. Baibel ia gwau: “Mauri do umui abia hidi, vadaeni umui bona emui natudia do umui mauri noho. Lohiabada emui Dirava do umui lalokau henia.” (Deu. 30:​19, 20) Ia ura ita sibona ese Ia hesiai henia karana ita abia hidi, unai amo ita hahedinaraia ita be Ia ita lalokau henia. Ita be Dirava ena dainai, ita noho namonamo bona ita moale.

19. Dahaka dainai ita be Iehova ena be hebogahisi karana?

¹⁹ Ita be kara dika taudia dainai, Dirava goevadaena ena taunimanima ai ita lao totona be hegeregere lasi. To Dirava ena hebogahisi hereadaena dainai, iena taunimanima ai ita lao. (2 Tim. 1:⁠9) Paulo ia gwau: “Bema ita mauri, be Lohiabada dekenai ita mauri, bona bema ita mase, be Lohiabada dekenai do ita mase. Unai dainai ita mauri noho o do ita mase, ita be Lohiabada ena.” (Roma 14:⁠8) Do ita lalohisihisi lasi bema ita abia hidi gauna be inai: Ita be Iehova ena.

Edena Bamona Do Oi Haere?

• Iehova ena taunimanima ai idia lao taudia ese dahaka namo idia abia?

• Dahaka dainai ita be hegeregere Dirava ia ura do ita karaia gaudia ita karaia totona?

• Edena dala ai Iehova be ena hesiai taudia ia naria?

[Study Questions]

[Pictures on page 8]

Ma haida oi nanadaia, idia be Iehova ena dainai, unai ese edena bamona idia ia durua

[Picture on page 10]

Edena dala haida amo Iehova ese ita ia gimaia?