Oi Hamomokania Oi be Keriso Murinai Oi Raka Tauna Momokanina
Oi Hamomokania Oi be Keriso Murinai Oi Raka Tauna Momokanina
“Au namona ena huahua be ia namo, to au dikana ena huahua be ia dika.”—MAT. 7:17.
1, 2. Inai nega dokona lalonai, edena dala ai Keriso ena murinai idia raka taudia momokanidia be Keristani taudia koikoidia amo idia idau?
IESU ia gwau ia murinai idia raka taudia momokanidia edia toana bona ia idia hesiai henia taudia koikoidia edia toana be edia huahua—edia hahediba herevadia bona kara—amo do ita diba. (Mat. 7:15-17, 20) Momokani, taunimanima be edia kudouna bona lalona dekenai idia abia vareai gaudia ese idia ia biagua. (Mat. 15:18, 19) Hahediba hereva koikoidia idia dibaia taudia be huahua dikana idia havaraia. To, hahediba hereva momokanidia idia abia dae taudia ese huahua namona idia havaraia.
2 Inai nega dokona ai, unai huahua rua edia toana be idia hedinarai goevagoeva. (Daniela 12:3, 10 duahia.) Keristani taudia koikoidia be Dirava idia diba namonamo lasi, unai dainai nega momo mai koikoi ida Dirava idia tomadiho henia. To, Dirava idia diba namonamo taudia be mai “lauma bona momokani” dekena amo Dirava idia tomadiho henia. (Ioa. 4:24; 2 Tim. 3:1-5) Bona idia gaukara goada Keriso ena kara idia hahedinaraia totona. To, ita ta ta be edena bamona? Inai stadi lalonai tomadiho momokani ena toana faiv oi stadilaia neganai, namona be sibona oi nanadaia: ‘Egu kara bona ma haida dekenai lau hadibaia herevadia be Dirava ena Hereva ida idia hegeregere, a? Egu kara bona hahediba dalana amo ma haida edia lalona lau veria hereva momokani idia ura henia totona, a?’
Dirava Ena Hereva Badinaia
3. Dahaka kara ese Iehova ia hamoalea, bona Keristani taudia momokanidia dekenai unai ena anina be dahaka?
3 Iesu ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.” (Mat. 7:21) Oibe, tau ta be ena hereva sibona lasi, to ena kara amo ia hahedinaraia ia be Keriso murinai ia raka tauna momokanina, bona unai ese Iehova ia hamoalea. Keriso murinai idia raka taudia momokanidia be moni dekenai, moni gaukara, moale karadia, tanobada ena kastom o aria idauidau, headava bona taunimanima kara henia daladia dekenai, Dirava ena lalohadai idia badinaia. To, Keristani taudia koikoidia be tanobada ena kara bona lalohadai idia abia dae, bona inai nega dokona ai Dirava badinaia lasi karadia be idia bada idia lao.—Sal. 92:7.
4, 5. Edena dala ai Iehova ena hereva Malaki 3:18 ai be iseda mauri lalonai ita badinaia diba?
4 Peroveta tauna Malaki ia gwau: “Umui ese kara maoromaoro tauna bona dika momokani tauna, Dirava ia hesiai henia tauna bona Dirava ia hesiai henia lasi tauna, edia idau do umui itaia lou momokani.” (Mal. 3:18, NW ) Unai siri oi laloa dobu neganai, sibona oi nanadaia: ‘Lauegu kara be tanobada taudia edia kara hegeregerena, eiava lau be idia amo lau idau? Nega ibounai lau ura egu gaukara turadia o sikuli turadia edia ura lau badinaia, a? Eiava lau ese Baibel ena hakaua herevadia lau badinaia bona idia dekenai Baibel ena taravatu lau gwauraia hedinarai, a?’ (1 Petero 3:16 duahia.) Momokani, namo lasi ita laloa ita be kara maoromaoro taudia bona haida ita hereaia. Lasi, to namona be ita hahedinaraia goevagoeva, ita be Iehova idia lalokau henia lasi bona hesiai henia lasi taudia amo ita idau.
5 Bema oi itaia oi sibona emu kara ta oi hamaoromaoroa be namo, vadaeni unai oi gurigurilaia. Bona Baibel stadi, guriguri bona hebou lao henia karana amo goada oi abia emu kara oi hanamoa totona. Emu mauri lalonai Dirava ena Hereva oi badinaia neganai, oi ese huahua namodia do oi havaraia, hegeregere ‘emu uduna do oi gaukaralaia, ma haida dekenai Dirava ena ladana oi gwauraia’ totona.—Heb. 13:15.
Dirava Ena Basileia Kahanai Oi Gini
6, 7. Basileia harorolaia gaukarana dekenai, Keristani momokani taudia bona Keristani taudia koikoidia be edena bamona idia idau?
6 Iesu ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.” (Luka 4:43) Dahaka dainai Iesu be Dirava ena Basileia harorolaia gaukarana ia laloa bada? Badina ia diba ia be unai Basileia ena king; bona ia bona ena toreisi lou vadaeni horoa tadikaka ese taunimanima dekenai dika idia havaraia gaudia—kara dika bona Diabolo—do idia haorea vaitani. (Roma 5:12; Apok. 20:10) Unai dainai, iena murinai idia raka taudia ia oda henidia unai Basileia do idia harorolaia ela bona inai tanobada dikana ena dokona ia ginidae. (Mat. 24:14) Sibodia idia gwau idia be Keriso murinai idia raka taudia be unai gaukara idia karaia lasi—oibe, idia diba lasi edena bamona unai gaukara do idia karaia. Dahaka dainai? Badina be toi: (1) Idia diba lasi gaudia be ma haida dekenai idia harorolaia diba lasi. (2) Basileia ena sivarai idia harorolaia dainai taunimanima ese idia dagedage henidia o kirikirilaidia neganai, idia manau lasi o boga auka diba lasi. (Mat. 24:9; 1 Pet. 2:23) Bona (3) Keristani taudia koikoidia taudia be Dirava ena lauma helaga idia abia lasi.—Ioa. 14:16, 17.
7 To, Keriso murinai idia raka taudia momokanidia idia laloparara, Dirava ena Basileia be dahaka bona dahaka do ia karaia. Danu, idia ese edia mauri lalonai Basileia ena gaukara idia atoa guna, bona Iehova ena lauma helaga ena siahu amo idia ese tanobada hegegemadai Basileia ena sivarai idia harorolaia. (Sek. 4:6) Oi be hanaihanai unai gaukara oi karaia, a? Oi hekwarahi noho haroro tauna namona ai oi lao totona, bona nega bada oi atoa haroro gaukara oi karaia o emu haroro dalana oi hanamoa totona, a? Haida idia hekwarahi haroro gaukara lalonai, Baibel gaukaralaia dalana idia hanamoa totona. Aposetolo Paulo be nega ibounai ena haroro lalodiai Baibel ia gaukaralaia bona ia gwau: “Dirava ena hereva be ia mauri noho, bona ia be mai ena siahu.”—Heb. 4:12; Kara 17:2, 3.
8, 9. (a) Edena ekspiriens ese idia hahedinaraia haroro gaukara lalonai Baibel ita duahia be mai anina bada? (b) Edena dala ai Baibel ita gaukaralaia karana ita manadalaia diba?
8 Ruma-ta-ruma-ta gaukara lalonai, tadikaka ta be Katolik tauna ta dekenai Daniela 2:44 ia duahia bona ia hahedinaraia edena dala ai Dirava ena Basileia ese maino bona noho namo do ia mailaia. Unai ruma tauna ia gwau: “Oi be lau dekenai oi kiki kava lasi, to Baibel oi kehoa bona siri ena hereva be lau dekenai oi hahedinaraia karana lau ura henia.” Tadikaka ta be Greek Otodoks hahine ta dekenai siri ta ia duahia neganai, unai ruma hahine be mai ena ura ida henanadai namodia momo ia henia. Inai ekspiriens lalonai danu, tadikaka bona ena adavana be Baibel amo unai henanadai idia haerelaidia. Gabeai, unai hahine ia gwau: “Oi diba dahaka dainai lau ura umui ida lau herevahereva, a? Oi be mai emu Baibel ida egu iduara dekenai oi mai bona lau dekenai oi duahia.”
9 Momokani, iseda buka bona magasin be mai anina bada bona kamonai taudia dekenai ita hariharilaia be namo. To, eda tulu badana be Baibel. Unai dainai, bema oi be haroro gaukara lalonai emu Baibel oi gaukaralaia momo lasi, reana namona be oi hekwarahi unai bamona oi karaia totona, ani? Reana, siri haida oi abia hidi bona unai siri ese idia hahedinaraia Dirava ena Basileia be dahaka bona edena dala ai emu teritori dekenai idia vara hekwakwanai haida do ia hamaoromaoroa. Bena oi hegaegae ruma-ta-ruma-ta haroro gaukara lalonai oi duahidia totona.
Mai Moale ida Dirava Ena Ladana Ita Abia
10, 11. Dirava ena ladana gaukaralaia karana dekenai, Iesu ena kara bona Keristani taudia koikoidia edia kara be edena bamona ia idau?
10 “Umui be lauegu hereva hamomokania taudia, umui gwauraia noho, lau be Dirava.” (Isa. 43:12) Iehova ena Witnes tauna badana, Iesu Keriso, ia laloparara Dirava ena ladana ia abia bona ia harorolaia be mai anina bada. (Salamo 83:18; Ioane 17:6; Heberu 2:12 duahia.) Oibe, Iesu be iena Tamana ena ladana ia harorolaia dainai, Baibel ia gwau ia be “Dirava ena hereva ia gwauraia maoromaoro tauna namona.”—Apok. 1:5; Mat. 6:9.
11 To, taunimanima momo edia kara be idau. Idia gwau idia be Dirava bona iena Natuna ena gaukara idia karaia, to Dirava ena ladana gaukaralaia totona idia hemarai bona edia Baibel amo idia kokia. Unai bamona lalohadai be vanegai Katolik ena dubu ese ia hahedinaraia. Edia bisop taudia dekenai oda idia henia idia gwau edia tomadiho lalonai “Dirava ena ladana leta foa ai idia torea, YHWH do idia gwauraia lasi.” * Unai be kara dika rohorohona!
12. Edena dala ai lagani 1931 ai, Dirava ena hesiai taudia idia hamomokania edia Dirava be Iehova?
12 Keristani taudia momokanidia be Keriso bona “witnes orea badana” idia tohotohoa bona Dirava ena ladana idia gaukaralaia. (Heb. 12:1, NW ) Oibe, lagani 1931 ai, Dirava ena hesiai taudia idia hahedinaraia edia Dirava be Iehova dainai, inai ladana ‘Iehova ena Witnes taudia’ idia abia. (Isaia 43:10-12 duahia.) Unai amo, Keriso murinai idia raka taudia momokanidia be ‘Dirava ena ladana idia abia’ taudia ai idia lao.—Kara 15:14, 17.
13. Edena dala ai ita ta ta ese ita hamomokania diba ita be Iehova ena Witnes taudia?
13 Edena dala ai ita ta ta ese ita hamomokania diba ita be Iehova ena Witnes taudia? Gau ta be, ita ese Dirava ena ladana do ita harorolaia. Paulo ia gwau: “Dirava ena ladana idia noinoi henia taudia ibounai, be mauri do idia davaria. To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai? Bona haida bema idia siaidia lasi, haroro taudia be edena bamona do idia haroro?” (Roma 10:13-15) Danu, tomadiho koikoi ena hahediba herevadia momo, hegeregere hel lahina ena hahediba herevana ese eda Havaraia Tauna idia hadikaia. Idia gwau iseda lalokau Diravana ena kara be dagedage tauna Diabolo ena kara bamona. Unai dainai, namona be ita hahedinaraia unai bamona hahediba herevadia be koikoi.—Ier. 7:31; 1 Ioa. 4:8; Mareko 9:17-27 hahegeregerea.
14. Haida be Dirava ena ladana idia diba neganai, dahaka idia karaia?
14 Oi be emu guba Tamana ena ladana oi abia dainai oi moale, a? Ma haida oi durudia unai ladana helagana idia diba totona, a? Paris, France dekenai, hahine ta ia kamonai Iehova ena Witnes taudia be Dirava ena ladana idia diba. Unai dainai, Witnes hahine ma ta ia davaria neganai, ia nanadaia: ‘Mani emu Baibel amo Dirava ena ladana oi hahedinaraia.’ Witnes hahine ese Salamo 83:18 ia duahia neganai, unai hahine ia hoa bada. Baibel ia stadilaia matamaia bona hari ia be tano ma ta ai hesiai gaukara ia karaia noho. Australia dekenai, Katolik hahine ta be nega ginigunana Baibel lalonai Dirava ena ladana ia itaia neganai, ia moale bada bona ia tai. Lagani momo vadaeni, unai hahine be regula painia gaukara ia karaia noho. Vanegai, Jamaica dekenai Witnes haida be hahine ta dekenai iena Baibel amo Dirava ena ladana idia hahedinaraia neganai, ia danu ia moale bona ia tai. Momokani, Iehova ena ladana oi abia dainai oi moale be namo, danu namona be Iesu oi tohotohoa bona ma haida dekenai unai ladana oi hadibaia.
“Tanobada Do Umui Ura Henia Lasi”
15, 16. Keristani taudia momokanidia edia lalohadai tanobada dekenai be dahaka, bona ita ta ta be edena henanadai ita laloa dobu be namo?
15 “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai.” (1 Ioa. 2:15) Tanobada taudia bona edia lalohadai be Iehova bona ena lauma helaga idia tuari henia bamona. Unai dainai, Keriso murinai idia raka taudia momokanidia be tanobada idia dadaraia sibona lasi, to edia lalona ibounai ida idia inai henia momokani. Idia diba aposetolo Iamesi ia gwau: “Ta ia ura tanobada ena turana ai ia lao, ia sibona be Dirava ena inai tauna ai ia halaoa.”—Iam. 4:4.
16 Iamesi ena hereva ita badinaia be mai ena hekwarahi, badina inai tanobada ai hahetoho gaudia be momo. (2 Tim. 4:10) Unai dainai, Iesu be iena murinai idia raka taudia totona ia guriguri neganai, ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” (Ioa. 17:15, 16) Namona be sibona oi nanadaia: ‘Lau hekwarahi tanobada ena kara lau dadaraia totona, a? Taunimanima idia laloparara dahaka dainai lau be tanobada gaudia o Baibel ese ia gwauraia lasi karadia, tomadiho koikoi edia aria, bona kastom karadia lau dadaraia, a?’—2 Kor. 6:17; 1 Pet. 4:3, 4.
17. Dahaka ese kudou-maoro taudia do ia veria Iehova kahirakahira idia lao totona?
17 Momokani, ita be Baibel ena taravatu ita badinaia dainai, tanobada taudia ese ita do idia dadaraia, to kudou-maoro taudia be do idia ura diba dahaka dainai iseda kara be idau. Oibe, unai taudia idia itaia iseda mauri ibounai lalonai ita be Baibel ita abidadama henia bona ita badinaia neganai, idia be horoa taudia dekenai do idia gwau: “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.”—Sek. 8:23.
Keristani Lalokau Korikorina Hahedinaraia
18. Edena dala ai Iehova bona dekena taudia dekenai lalokau ita hahedinaraia?
18 Iesu ia gwau: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai” bona “oiemu badibadinai tauna dekenai oi lalokau henia, oi sibona oi lalokau henia bamona.” (Mat. 22:37, 39) Unai bamona lalokau (Greek gado ai a·gaʹpe) ia hahedinaraia tauna be taravatu maoromaorodia ia badinaia bona ena maduna ia huaia namonamo. Iena kara ibounai be hakaua hereva maorodia ese idia biagua, bona nega ibounai ia be mai ena hebogahisi ida ia kara. (1 Pet. 1:22) Ia be sibona ena ura ia tahua lasi, to iena hereva bona kara amo ma haida dekenai lalokau ia hahedinaraia.—1 Korinto 13:4-7 duahia.
19, 20. Keristani lalokau ena siahu ia hahedinaraia ekspiriens haida mani oi gwauraia.
19 Lalokau be Dirava ena lauma helaga ena huahua ta dainai, Keristani taudia momokanidia ia durua politikol heai lalodiai idia vareai lasi bona idau bese o idau gado taudia idia abia dae totona. (Ioane 13:34, 35 duahia; Gal. 5:22) Mamoe bamona taudia be unai lalokau karadia idia itaia neganai, unai ese edia lalona ia veria. Hegeregere, Israel dekenai Jew tau matamata ta be nega ginigunana kongrigeisen hebouna dekenai ia lao neganai, ia hoa badina ia itaia Jew bona Arab tadikaka taihu be Iehova idia tomadiho henia hebou. Unai ia itaia dainai, hebou ia lao hanaihanai bena Baibel stadi ia abia dae. Oi danu be emu tadikaka dekenai unai bamona lalokau oi hahedinaraia, a? Kingdom Hall ai kamonai matamata taudia idia mai neganai, herevana idia be tano idau, gado idau, taga o ogogami taudia, to idia ibounai oi welkam henia, a?
20 Ita be Keristani taudia momokanidia dainai, ita ura taunimanima ibounai dekenai lalokau do ita hahedinaraia. El Salvador ai, pablisa matamata ta be Katolik hahine ta ena mauri lagani 87 ia stadi henia, bona unai hahine be hanaihanai ena dubu dekenai ia lao. Dina ta ai, unai hahine buruka be ia gorere bada herea bona hospital dekenai ia noho. Ena ruma dekenai ia giroa lou neganai, Witnes taihu ese ia idia vadivadi henia bona ena aniani idia mailaia. Hua ta lalonai unai bamona idia karaia. Hahine buruka ena dubu taudia ta be ia idia vadivadi henia lasi. Vadaeni, dahaka ia vara? Ena kaivakuku ia negedia, ena dubu amo ia risain bona ena Baibel stadi ia karaia lou. Oibe, Keristani lalokau be mai ena siahu! Reana, taunimanima be iseda haroro herevana idia ura lasi kamonai, to Keristani lalokau karadia ese taunimanima edia lalona ia veria diba.
21. Edena dala ai eda vaira negana be nadi latanai ita haginia bamona?
21 Kahirakahira, Iesu be ia idia hesiai henia koikoi taudia dekenai do ia gwau: “Umui be lau diba lasi momokani. Idau gabuna dekenai umui lao, umui dika karaia taudia.” (Mat. 7:23) Unai dainai, namona be ita ese kara namodia ita hahedinaraia, unai amo Tamana bona Natuna ita matauraia. Iesu ia gwau: “Lauegu hereva inai ia kamonai, bona ia karaia tauna be aonega tauna ta bamona, ia ese iena ruma nadi latanai ia haginia.” (Mat. 7:24) Oibe, bema ita hamomokania ita be Keriso murinai ita raka taudia momokanidia, Dirava ese ita do ia lalonamo henia bona eda vaira negana be do ita lalohekwarahilaia lasi, badina eda helaro be nadi latanai ita haginia bamona!
[Footnote]
^ par. 11 Katolik taudia ese idia torea English gado buka haida, hegeregere The Jerusalem Bible lalonai be inai ladana “Yahweh” idia torea.
Oi Laloatao, A?
• Edena dala ai Keriso murinai idia raka taudia momokanidia be Keristani taudia koikoidia amo idia idau?
• Keristani taudia momokanidia edia “huahua” haida oi gwauraia.
• Keristani taudia momokanidia edia huahua oi hahedinaraia totona, emu tahua gaudia be dahaka?
[Study Questions]
[Picture on page 13]
Oi be haroro gaukara lalonai Baibel gaukaralaia momo karana oi manadalaia, a?
[Picture on page 15]
Taunimanima idia diba dahaka dainai Baibel ese ia gwauraia lasi aria lalonai oi vareai lasi, a?