“Kara maoromaoro oi ura henia noho.”​—⁠SAL. 45:⁠7.

1. Dahaka ese ita do ia durua “kara maoromaoro daladia” ai ita raka totona?

 IEHOVA ese ena Hereva bona lauma helaga amo iena taunimanima be “kara maoromaoro daladia dekenai” ia hakaudia noho. (Sal. 23:⁠3) To, ita be goevadae lasi taudia dainai, nega momo iena kara maoromaoro daladia ita badinaia lasi. Kara maoromaoro ita karaia totona, ita hekwarahi be namo. Dahaka ese ita do ia durua? Iesu bamona, namona be mai eda kudouna ibounai ida kara maoromaoro ita ura henia.​—⁠Salamo 45:7 duahia.

2. “Kara maoromaoro daladia” ena anina be dahaka?

² “Kara maoromaoro daladia” ena anina be dahaka? Anina be eda mauri lalonai Dirava ena kara maoromaoro taravatudia ita badinaia. Heberu bona Greek gado ai inai hereva “kara maoromaoro” ena anina ma ta be “goeva,” bona Baibel ena hakaua herevadia badinaia momokani karana ia hahedinaraia. Iehova be kara maoromaoro ena badina dainai, iena taunimanima be “kara maoromaoro dalana” ai ia hakaudia bona idia be mai moale ida iena taravatu idia badinaia.​—⁠Sal 5:⁠8.

3. Edena dala ai Dirava ena kara maoromaoro ita dibaia diba?

³ Mai iseda kudouna ibounai ida ita hekwarahi Iehova ena kara maoromaoro taravatudia ita badinaia neganai, ia do ita hamoalea. (Deu. 32:⁠4) Unai ita karaia totona Baibel do ita stadilaia, unai amo Iehova Dirava do ita dibaia namonamo. Dina ta ta ai unai ita karaia neganai, Iehova kahirakahira do ita lao bona iena kara maoromaoro taravatudia do ita ura henia. (Iam. 4:⁠8) Danu, eda mauri lalonai abia hidi badadia ita ura karaia neganai, Baibel ena sisiba ita badinaia be namo.

Dirava Ena Kara Maoromaoro Tahua

4. Dirava ena kara maoromaoro ita tahua anina be dahaka?

⁴ Mataio 6:​33 duahia. Iehova ena kara maoromaoro ita tahua totona, Basileia sivaraina ita harorolaia sibona be hegeregere lasi. Iehova ese iseda hesiai gaukara ia abia dae totona, namona be dina ta ta ibounai iena kara maoromaoro taravatudia ita badinaia. Iehova ena kara maoromaoro idia tahua taudia ese dahaka idia karaia be namo? Namona be idia ese ‘kara matamata idia atoa. Unai kara be Dirava ena ura hegeregerena ia vara, ia be maoromaoro momokani bona abidadama dalana ia badinaia.’​—⁠Efe. 4:⁠24.

5. Kerere ita karaia dainai ita lalohisihisi neganai, dahaka ese ita ia durua diba?

⁵ Nega haida ita lalohisihisi badina ena be ita ura kara maoromaoro ita badinaia, to kerere ita karaia. Dahaka ese ita ia durua unai lalohisihisi ita hanaia bona kara maoromaoro ita ura henia bona badinaia noho totona? (Aon. 24:10) Namona be hanaihanai “mai iseda kudou maorona ida, bona abidadama momokani ida” Iehova ita guriguri henia. (Heb. 10:​19-⁠22) Herevana ita be horoa taudia o hutuma bada taudia, to Iesu Keriso ena mauri davalaia boubouna ita abidadama henia dainai, ita diba ia be iseda Hahelaga Tauna Badana bona eda kara dika do ia kokia. (Roma 5:8; Heb. 4:​14-16) Aposetolo Ioane ia gwau: “Iesu ena rara ese kara dika ibounai amo ita ia hagoevaia.” (1 Ioa. 1:​6, 7) Baibel ia gwau, ena be iseda ‘dika be bada, rara ia kakakaka momokani bamona, to . . . do ita goeva, sinou ia kurokuro bamona.’ Oibe, Iehova ese ena lalokau  Natuna ena boubou gauna amo iseda kara dika ia gwauatao diba!​—⁠Isa. 1:⁠18.

Emu Lauma Tuari Dabua Oi Sekea

6. Dahaka dainai lauma tuari dabuana ita hahedokilaia be gau badana?

⁶ Dirava ese ita dekenai lauma tuari dabuana ia henia. Namona be nega ibounai, “kemena dekenai kara maoromaoro ena auri dabua” ita hahedokilaia. (Efe. 6:​11, 14) Herevana vanegai sibona ita bapatiso o lagani momo lalonai Iehova ita hesiai henia vadaeni, to gau badana be dina ta ta ai iseda lauma tuari dabua ita sekea loulou. Dahaka dainai? Badina Satani bona ena demoni be Iehova ese tanobada dekenai ia negea diho. (Apok. 12:​7-12) Satani ia badu bona ia diba ena nega be kwadogi dainai, Dirava ena taunimanima dekenai hahetoho momo ia henia noho. Momokani, iseda “kemena dekenai kara maoromaoro ena auri dabua” ita hahedokilaia be gau badana!

7. Iseda “kemena dekenai kara maoromaoro ena auri dabua” ita hahedokilaia totona, dahaka ita karaia be namo?

⁷ Kemena ena auri dabua ese tuari tauna ena kudouna ia gimaia. Ita be goevadae lasi taudia dainai, iseda kudouna be mai ena koikoi bada. (Ier. 17:⁠9) Unai dainai, iseda kudouna ita hadibaia namonamo be gau badana. (Gen. 8:21) Bema “kemena dekenai kara maoromaoro ena auri dabua” hahedokilaia karana ita laloa bada, Iehova ese ia inai henia moale karadia do ita dadaraia, bona kara dikana ta do ita laloa loulou lasi. Danu, nega bada be TV raraia karana dekenai do ita haorea kava lasi. To, do ita gaukara goada Iehova ita hamoalea totona. Danu, ena be nega haida ita moru bona lalohadai kereredia ita abia, to Iehova ena heduru amo ita goada lou diba.​—⁠Aonega Herevadia 24:16 duahia.

8. Dahaka dainai “abidadama ena kesi badana” ita hahedokilaia be gau badana?

⁸ Lauma ena tuari dabua ena kahana ta be “abidadama ena kesi badana.” Unai kesi ese ita ia durua ‘Dika Tauna ena peva ibounai mai ena lahi ita habodoa’ totona. (Efe. 6:16) Danu, Iehova ita abidadama henia bona lalokau henia dainai, kara maoromaoro ita badinaia bona mauri hanaihanai dalana ai do ita raka noho. Iseda lalokau Iehova dekenai ia goada neganai, iena kara maoromaoro taravatudia do ita laloa bada. To, iseda lalomamina be edena bamona? Edena dala ai ita do ia durua kara maoromaoro ita ura henia totona?

Lalomamina Ia Goeva Noho be Namo

9. Iseda lalomamina ia goeva ena namo be dahaka?

⁹ Ita bapatiso neganai, Dirava ita noia “lalomamina namona” ita abia totona. (1 Pet. 3:21) Iesu ena boubou gauna ita abidadama henia dainai, ena rara ese iseda dika ibounai ia kokia bona Dirava vairanai ita goeva. To, Dirava ese ita ia lalonamo henia totona, iseda lalomamina ia goeva noho be gau badana. Bema kerere ta ita karaia bona iseda lalomamina be ita ia hahemaoro henia, unai ese ia hahedinaraia iseda lalomamina be ia gaukara namonamo noho, bona Iehova ena kara maoromaoro taravatudia ita laloa bada. (1 Tim. 4:⁠2) To, iseda lalomamina ese dala ma ta ai ita ia durua diba.

10, 11. (a) Dahaka dainai eda lalomamina ita badinaia be namo? Ekspiriens gwauraia. (b) Dahaka dainai kara maoromaoro ura henia karana ese moale ia havaraia?

 ¹⁰ Kerere ta ita karaia neganai, iseda lalomamina ese ita ia hahemaoro henia bona ita lalohisihisi diba. Witnes matamata ta be ‘kara maoromaoro dalana’ amo ia raka oho. Ponografi laulaudia ia itaia momo bona mariuana ia ania. Hebou dekenai ia lao bona ia haroro negadiai ia mamia ia be sibona ia koia bamona, unai dainai hebou bona haroro gaukara ia rakatania. Ia gwau: “Lagani foa lalonai unai kara mirodia lau karaia. To, egu lalomamina ese lau ia hahemaoro henia.” Gabeai, ia laloparara Iehova dekenai ia giroa lou be namo. Ena be ia laloa Iehova ese ena guriguri do ia kamonai lasi, to Iehova ia noia ena kara dika do ia gwauatao. Miniti haida murinai ena sinana ese ia vadivadi henia bona ia hagoadaia hebou dekenai do ia lao. Kingdom Hall dekenai ia lao bona elda ta ia noia ia stadi henia totona. Daudau lasi murinai ia bapatiso, bona Iehova ia tanikiu henia badina ena dika ia gwauatao.

¹¹ Oibe, kara maoromaoro ita badinaia neganai, ita moale, ani? Kara maoromaoro daladia ita dibaia bona ita badinaia neganai, iseda guba Tamana ia ura henia karadia do ita karaia. Bona mani oi laloa: Nega ta do ia mai taunimanima ibounai be edia lalomamina ese do ia hahemaoro henidia lasi, badina idia ese Iehova ena kara do idia hahedinaraia goevagoeva. Unai dainai, namona be mai iseda kudouna ibounai ida kara maoromaoro ita ura henia, unai amo Iehova do ita hamoalea.​—⁠Aon. 23:​15, 16.

12, 13. Edena dala ai eda lalomamina ita hadibaia namonamo diba?

¹² Edena dala ai iseda lalomamina ita hadibaia diba? Baibel ia gwau: “Kara maoromaoro taudia ese, haere idia henia neganai idia laloa namonamo guna.” (Aon. 15:28) Oibe, Baibel idia herevalaia bukadia ita stadilaia bona laloa dobu neganai, eda lalomina ita hadibaia namonamo diba. Hegeregere, moni gaukara ta ita ura abia hidi neganai, unai hakaua herevana be mai anina bada. Bema moni gaukara ta be Baibel ena hakaua herevadia hegeregerena lasi, ita momo be hesiai tauna mai ena kamonai bona kara maoromaoro ese idia henia sisiba ita badinaia. To, bema ita daradara, Baibel ena hakaua hereva ma haida ita tahua bona ita gurigurilaia be namo. a Unai be mai anina bada badina ita ura lasi iseda abia hidi ese ma haida ia hahekwakwanaia. (1 Kor. 10:​31-33) Iseda hetura karana Dirava ida idia gimaia hakaua herevadia ita laloa bada be namo. Bema Iehova be iseda turana namona, sibona ita nanadaia: ‘Bema inai moni gaukara lau karaia, Iehova ena lalona do lau hahisia, a?’​—⁠Sal. 78:​40, 41.

¹³ Gima Kohorona eiava Kongrigeisen Baibel Stadi totona ita hegaegae neganai, namona be ita stadilaia gauna ita laloa dobu. Nega momo ita be haere ita makaia haraga sibona bena paragraf ma ta dekenai ita hanaia, a? Unai bamona stadi dalana ese ita do ia durua  lasi kara maoromaoro ita ura henia bona eda lalomamina ita hadibaia namonamo totona. Kara maoromaoro ita ura henia totona, namona be Baibel ita stadilaia namonamo bona ita duahia gaudia ita laloa dobu. Mai eda kudouna ibounai ida kara maoromaoro ita ura henia totona, stadi bona laloa dobu karana ita goadalaia be namo!

Kara Maoromaoro Ura Henia Bada

14. Iehova Dirava bona Iesu Keriso idia ura iseda hesiai gaukara be edena bamona ita laloa?

¹⁴ Iehova Dirava bona Iesu Keriso idia ura eda hesiai gaukara ita moalelaia. Dahaka ese ita do ia durua? Kara maoromaoro ita ura henia neganai, iseda hesiai gaukara do ita moalelaia! Iesu be ena Ororo Harorona ai ia gwau: “Kara maoromaoro totona idia hitolo bona ranu mase taudia be idia moale, badina Dirava ese edia ura gauna do ia henia.” (Mat. 5:⁠6) Kara maoromaoro idia ura henia taudia dekenai unai hereva ena anina be dahaka?

15, 16. Edena dala ai Dirava ese kara maoromaoro idia ura henia taudia “edia ura gauna do ia henia”?

¹⁵ Ita noholaia tanobadana be dika tauna ese ia lohiaia. (1 Ioa. 5:19) Herevana edena tano ai ita noho, to niuspepa ita duahia neganai ita itaia hisihisi bona dagedage karadia idia bada idia lao noho. Kara maoromaoro ia ura henia tauna ia itaia kara dika taudia ese ma haida idia hahisia neganai, ia lalohisihisi bada. (Had. 8:⁠9) Ita Witnes taudia ita diba, Dirava idia tahua bona iena kara maoromaoro idia ura henia taudia be Iehova sibona ese do ia durudia. Dirava ese kahirakahira kara dika taudia do ia haoredia. Bona kara maoromaoro idia ura henia taudia be taravatu utua taudia ese do idia hahisidia lou lasi. (2 Pet. 2:​7, 8) Unai nega do ita moalelaia bada!

¹⁶ Ita be Iehova ita hesiai henia bona Iesu Keriso murinai ita raka dainai, ita diba Dirava ese kara maoromaoro idia ura henia taudia “edia ura gauna do ia henia.” Mai moale ida do idia noho badina Dirava ese guba bona tanobada matamata ia karaia neganai, “kara maoromaoro sibona do ia noho.” (2 Pet. 3:13) Unai dainai Satani ena tanobada ai idia vara lalohisihisi bona lalometau karadia ita itaia neganai, namona be ita hoa lasi. (Had. 5:⁠8) Atai Momokani Diravana, Iehova be idia vara gaudia ibounai ia itaia noho, bona kahirakahira kara maoromaoro idia ura henia taudia do ia hamauridia.

Kara Maoromaoro Ura Henia Ena Namo

17. Kara maoromaoro ita ura henia ena namo haida be dahaka?

¹⁷ Salamo 146:8 ese kara maoromaoro dalana badinaia karana ena namo ia gwauraia. Ia gwau: “[Iehova ese] ena kara maoromaoro taudia ia lalokau henidia noho.” Mani unai oi laloa: Guba bona tanobada ibounai ena lohiabada Iehova ese ita ia lalokau henia badina kara maoromaoro ita ura henia! Iehova ese ita ia lalokau henia dainai ita diba bema iseda mauri lalonai Basileiai ita atoa guna, ia ese ita do ia naria. (Salamo 37:25; Aonega Herevadia 10:3 duahia.) Kahirakahira inai tanobada ibounai be kara maoromaoro taudia sibona ese do idia noholaia. (Aon. 13:22) Dirava ena taunimanima be paradaiso ai mauri hanaihanai do idia moalelaia badina idia ese kara maoromaoro idia ura henia. Unai be hahenamo badana! Hari danu, kara maoromaoro idia ura henia taudia be Dirava ena lalomaino idia abia dainai, edia ruma bese bona kongrigeisen lalonai lalotamona ai idia noho.​—⁠Fili. 4:​6, 7.

18. Iehova ena dina ita naria noho lalonai, dahaka ita karaia be namo?

 ¹⁸ Iehova ena dina badana ita naria noho lalonai, namona be kara maoromaoro ita badinaia noho. (Sep. 2:​2, 3) Unai dainai, Iehova Dirava ena kara maoromaoro daladia do ita ura henia bada be namo. Unai ena anina be iseda kudouna ita gimaia totona, nega ibounai iseda “kemena dekenai kara maoromaoro ena auri dabua” do ita hahedokilaia. Danu, iseda lalomamina ia goeva noho be namo, unai amo ita do ia hahemaoro henia lasi bona Iehova do ita hamoalea diba.​—⁠Aon. 27:⁠11.

19. Iseda lalona ita hadaia dahaka ita karaia totona, bona stadi gabena ai dahaka do ita herevalaia?

¹⁹ Iehova “ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:⁠9) Ena be inai tanobada be dagedage bona kara dikadia amo ia honu, to unai siri ese ita ia hagoadaia badina ita be kara maoromaoro ita badinaia noho! Momokani, unai ita karaia dainai, Dirava idia diba lasi taudia idia daradara. To, Iehova ena kara maoromaoro taravatudia ita badinaia dainai, namo ita davaria. (Isa. 48:17; 1 Pet. 4:⁠4) Oibe, namona be eda lalona ita hadaia mai iseda kudouna ibounai ida kara maoromaoro do ita ura henia bona ita badinaia noho. To, mai eda kudouna ibounai ida Dirava ita badinaia ena anina ma ta be, kara dika do ita inai henia momokani. Stadi gabena ai unai do ita herevalaia.

[Footnote]

Edena Bamona Do Oi Haere?

• Kara maoromaoro ita ura henia totona dahaka dainai Iesu ena boubou gauna ita laloa bada be namo?

• Dahaka dainai iseda “kemena dekenai kara maoromaoro ena auri dabua” ita hahedokilaia be gau badana?

• Edena dala ai eda lalomamina ita hadibaia loulou diba?

[Study Questions]

[Picture on page 26]

Emu lalomamina oi hadibaia namonamo neganai, abia hidi maorona oi karaia diba