“Lohiabada e, oi ese kara maoromaoro taudia oi hanamoa noho. Oiemu lalokau ese kesi bamona, kara maoromaoro taudia ia gimaia noho.”​—⁠SAL. 5:⁠12.

1, 2. Elia ese vabu amo dahaka ia noia, bona ia dekenai dahaka ia gwauhamatalaia?

 SAREPATA hanua ai ia noho vabu ta bona ena natuna mero be idia hitolo; Iehova ena peroveta tauna Elia danu be ia hitolo. Unai vabu be lahi ia karaia gwauraia neganai, Elia ese ia amo ranu bona paraoa totona ia noinoi. Ranu sisina ia henia, to ia dekenai ia noho aniani be “paraoa sisina sibona, mereki dekenai, bona olive dehoro sisina kapusi lalonai.” Elia ia hamaoroa ena aniani be hegeregere lasi dainai, do ia durua lasi.​—⁠1 Kin. 17:​8-12.

² To Elia ese vabu ia hamaoroa: “Beredi maragina ta oiemu paraoa bona olive dehoro dekena amo do oi gabua, lau dekenai do oi mailaia. Unai murinai, oi bona oiemu natuna ena do oi gabua. Badina be Lohiabada, Israela ena Dirava, be inai bamona ia hereva, ia gwau, ‘Paraoa, mereki dekenai ia noho gauna be do ia ore lasi, bona olive dehoro, kapusi dekenai ia noho gauna danu be do ia ore lasi.’ ”​—⁠1 Kin. 17:​13, 14.

3. Dahaka abia hidi badana ita karaia be namo?

³ Vabu be dahaka abia hidi badana ta do ia karaia? Do ia abia dae Iehova ese ia bona ena natuna ia hamauria diba, a? Eiava, aniani ia laloa bada dainai Dirava ena lalonamo bona hetura karana do ia laloa maragi? Ita danu be dahaka abia hidi badana ta do ita karaia? Kohu bona moni ita laloa bada dainai, Iehova ena lalonamo do ita laloa maragi, a? Badina idauidau idia noho Iehova ita abidadama henia bona hesiai henia totona, to iena lalonamo ita abia totona, gau haida ita karaia be namo.

Iehova be Hegeregere Momokani, Ita Tomadiho Henia Totona

4. Dahaka dainai Iehova sibona ita tomadiho henia be maoro?

⁴ Iehova ia ura taunimanima be ia sibona do idia tomadiho henia. Guba anerudia ese unai idia hamomokania, idia gwau: “Iehova, aiemai  Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia bona oiemu ura dainai idia noho bona oi havaradia.” (Apok. 4:11) Iehova be iseda Havaraia Tauna dainai, ia ita tomadiho henia be maoro.

5. Dahaka dainai Dirava ena lalokau ese ita ia doria ia ita tomadiho henia totona?

⁵ Iehova ita tomadiho henia ena badina ma ta be ia ese ita ta ta ia lalokau henia bada. Baibel ia gwau: “Vadaeni Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia.” (Gen. 1:27) Taunimanima be mai edia ura kwalimu dainai, abia hidi idia karaia diba Dirava do idia hesiai henia o lasi. Iehova be ita dekenai mauri ia henia dainai, ia be taunimanima ibounai edia Tamana. (Luka 3:38) Tama namona ta bamona, Iehova ese ena natuna iboudiai dekenai gau namodia ia henia idia moale totona. ‘Dina ena diari bona medu ia henia’ dainai, ita be tanobada mai hairaina ai ita noho bona aniani be momo.​—⁠Mat. 5:⁠45.

6, 7. (a) Adamu ese taunimanima ibounai dekenai dahaka dika ia mailaia? (b) Keriso ena boubou gauna dainai Iehova ena lalonamo idia abia taudia ese dahaka hahenamo do idia abia?

⁶ Danu, Iehova ese kara dika ena igui amo ita ia ruhaia. Kasi momo tauna ta be ena ruma bese amo moni ia henaoa bona kasi gadara dekenai ia haorea dainai ruma bese ena mauri ia hadikaia. Unai hegeregerena, Adamu ia kara dika bona gwau-edeede neganai, ena natudia ese mauri hanaihanai do idia abia helarona ia hadikaia. Adamu be sibona ena ura ia atoa guna dainai, taunimanima ibounai be kara dika ena igui hesiai taudia ai idia lao. Unai dainai taunimanima idia lalohisihisi, idia gorere, bona idia mase. Hesiai tauna idia ruhaia totona davana idia henia be namo; unai hegeregerena Iehova be kara dika ena igui amo ita ia ruhaia totona davana ia henia. (Roma 5:21 duahia.) Iesu Keriso be Tamana ena ura ia badinaia “bona ena mauri ia henia, taunimanima momo edia mauri davana karaia totona.” (Mat. 20:28) Kahirakahira, Iehova ese ia lalonamo henia taudia ibounai be Iesu ena boubou gauna amo namo do idia davaria.

⁷ Iseda Havaraia Tauna, Iehova be gau momo ia henia iseda mauri ita moalelaia totona. Bema Dirava ena lalonamo ita abia, taunimanima edia hisihisi ibounai do ia haorea negana do ita itaia. Iehova be ita ta ta dekenai do ia hahedinaraia, “mai momokani ida ia idia tahua taudia edia davana do ia henia.”​—⁠Heb. 11:⁠6.

‘Emu Orea Taudia be Mai Ura Kwalimu ida Oi Do Idia Durua’

8. Isaia ena haheitalai amo dahaka ita dibaia?

⁸ Dirava ena lalonamo ita abia totona namona be iseda ura kwalimu ita gaukaralaia namonamo. Badina Iehova ese taunimanima ia doria lasi ia idia tomadiho henia totona. Isaia ena negai Iehova ia henanadai: “Daika do lau siaia? Daika be ai totona do ia lao?” Iehova be unai henanadai ia henia neganai, ia hahedinaraia ia be Isaia ia matauraia bona Isaia be mai ena maoro abia hidi ia karaia totona. Isaia be mai moale ida ia haere, ia gwau: “Lau be inai, do lau lao! Lau do oi siaia!”​—⁠Isa. 6:⁠8.

9, 10. (a) Edena dala ai Dirava ita tomadiho henia be namo? (b) Dahaka dainai mai eda kudouna ibounai ida Dirava ita tomadiho henia be namo?

⁹ Taunimanima be mai edia maoro Dirava do idia tomadiho henia eiava lasi ena abia hidi idia karaia totona. Iehova ia ura mai iseda lalona ibounai ida ia ita tomadiho henia. (Iosua 24:15 duahia.) To, mai edia lalona ibounai ida Dirava idia tomadiho henia lasi taudia dekenai Dirava be ia moale lasi. Bona Dirava idia lalokau henia lasi, to idia ura taunimanima idia hamoalea taudia be Iehova ese ia dadaraidia. (Kol. 3:22) Bema tanobada gaudia ese ita idia veria dainai ‘mai iseda kudouna ibounai’ ida Dirava ita tomadiho henia lasi, ita do ia lalonamo henia lasi. (Sal. 119:⁠2) Iehova ia diba mai iseda kudouna ibounai ida ia ita tomadiho henia be mai ena namo. Mose ese Israela taudia ia hamaoroa, bema ‘Dirava idia lalokau henia bona iena hereva idia kamonai, bona ia idia badinaia namonamo’ mauri do idia davaria.​—⁠Deu. 30:​19, 20.

¹⁰ Israela ena King Davida be Iehova dekenai  ane ia abia: “Oi ese oi dekenai idia dagedage taudia, be do oi tuari henidia dinana dekenai, oiemu orea taudia ese oi dekenai do idia haboua, bona mai edia ura kwalimu danu oi do idia durua. Daba maragi neganai paripari ia hedinarai bamona, oiemu durua taudia be oi dekenai do idia haboua, ororo helagana dekenai.” (Sal. 110:⁠3) Hari inai negai, momo be moni bona moale karadia idia laloa bada. To, Iehova idia lalokau henia taudia be ia tomadiho henia karana idia laloa bada. Sivarai namona idia harorolaia goadagoada karana amo unai idia hahedinaraia, bona idia diba momokani Iehova be dina ta ta ai edia dabu gaudia do ia henia.​—⁠Mat. 6:​33, 34.

Iehova ese Ia Abia Dae Boubou Gaudia

11. Israela taudia be Iehova dekenai boubou gaudia namodia idia henia neganai, dahaka namo idia davaria?

¹¹ Taravatu Gwauhamatana henunai Israela taudia ese boubou gaudia namodia idia henia neganai, Dirava ese ia lalonamo henidia. Levitiko 19:5 ia gwau: “Maino karaia bouboudia Lohiabada dekenai umui henidia neganai, kara ibounai taravatu hegeregerena do umui karaia, vadaeni unai boubou do lau abia dae.” Levitiko bukana lalonai siri ma ta ia gwau: “Lohiabada hanamoa totona boubouna umui henia neganai, boubou henia taravatuna do umui badinaia namonamo, Lohiabada ese umui do ia abia dae totona.” (Lev. 22:29) Israela taudia be Iehova ena boubou patana ai animal namodia idia bouboulaia neganai, ia daekau kwalahu be “bonana namona” Dirava momokanina dekenai. (Lev. 1:​9, 13) Iena taunimanima be unai boubou gaudia amo edia lalokau idia hahedinaraia neganai, ia moale. (Gen. 8:21) Israela taudia ese Iehova idia henia boubou gaudia amo gau ta ita dibaia. Iehova be ia dekenai boubou gaudia namodia idia henia taudia ia lalonamo henidia. To, Dirava be edena bamona boubou gaudia ia abia dae? Mani gau rua ita herevalaia: Iseda kara bona hereva dalana.

12. Edena kara idauidau dainai Dirava ese iseda boubou gaudia do ia abia dae lasi?

¹² Aposetolo Paulo be Roma taudia ia tore henia neganai, ia gwau: “Emui tauanina do umui henia, ia be boubou gauna bamona mai mauri, mai helaga, bona Dirava ese ia moalelaia, unai amo mai emui darana ida unai hesiai gaukara helagana do umui karaia.” (Roma 12:⁠1) Ta be Dirava ena lalonamo ia abia totona, tauanina dalanai ia goeva be namo. Bema kuku, buatau, o drag ia ania, o ia kekero momo, ia be ena tauanina ia hadikaia bona ena boubou gauna be anina lasi. (2 Kor. 7:⁠1) Baibel ia gwau “heudahanai karadia ia karaia tauna ese sibona ena tauanina ia hadikaia noho.” Unai dainai, matabodaga karadia ia karaia tauna ena boubou gauna be Iehova ese do ia abia dae lasi. (1 Kor. 6:​18, BH) Oibe, Iehova ita hamoalea totona, ‘iseda kara ibounai lalonai ita helaga’ be namo.​—⁠1 Pet. 1:​14-16.

13. Dahaka dainai Iehova ita hanamoa be namo?

¹³ Iehova ese ia moalelaia boubou gauna ma  ta be, iseda hereva dalana. Iehova idia lalokau henia taudia be taunimanima vairadiai bona sibona idia noho neganai, edia hereva amo Iehova idia hanamoa. (Salamo 34:​1-3 duahia.) Mani Salamo karoa 148 ia lao 150 oi duahia, bona oi itaia inai hereva “Lohiabada do umui hanamoa” be nega hida idia gaukaralaia, bona edena dala ai ita idia hagoadaia Iehova ita hanamoa totona. Momokani, “Dirava idia kamonai henia taudia ese, ia dekenai idia hanamoa be namo.” (Sal. 33:⁠1) Danu, iseda haheitalai namona Iesu Keriso, ese ita ia hagania sivarai namona harorolaia gaukarana amo Iehova ena ladana do ita hanamoa.​—⁠Luka 4:​18, 43, 44.

14, 15. Hosea ese Israela taudia ia hamaoroa dahaka do idia karaia, bona Iehova ena haere be dahaka?

¹⁴ Haroro gaukara ita karaia goadagoada neganai, ita hahedinaraia Iehova ita lalokau henia bona ita ura iena lalonamo ita abia. Hegeregere, Israela taudia ese tomadiho koikoi idia badinaia bona Dirava ena lalonamo idia haboioa neganai, Hosea ese idia ia hereva henia dalana mani ita laloa. (Hos. 13:​1-3) Hosea ese Israela taudia ia hamaoroa inai dala ai Iehova do idia guriguri henia: “Lohiabada e, aiemai kara dika ibounai do oi gwauatao, bona aiemai guriguri do oi abia dae, vadaeni ai ese oi do ai hanamoa momokani, aiemai gwauhamata gunana hegeregerena.”​—⁠Hos. 14:​1, 2.

¹⁵ Iehova ese edia guriguri bona hanamoa herevadia ia abia dae, a? Iehova ia haere: “Lau ese idia do lau lalokau henia, mai egu kudouna ibounai danu.” (Hos. 14:⁠4) Israela taudia be mai edia kudouna ibounai ida Iehova idia guriguri henia bona hanamoa dainai, edia kara dika ia gwauatao, ia lalonamo henidia bona ia tura henidia.

16, 17. Ta be Dirava ia abidadama henia dainai sivarai namona ia harorolaia neganai, Iehova ese unai tauna be edena bamona ia laloa?

¹⁶ Ma haida vairanai Iehova hanamoa karana be tomadiho momokani ena kahana badana ta. Salamo torea tauna be Dirava hanamoa karana ia laloa bada dainai ia gwau: “Lohiabada e, lau be oi dekenai lau guriguri, bona oi dekenai lau tanikiu henia.” (Sal. 119:108) Hari iseda nega be edena bamona? Isaia be iseda negai idia noho hutuma bada taudia ia perovetalaia neganai, ia gwau: “Inai taunimanima ese, Lohiabada ia karaia vadaeni kara badadia, ena sivarai do idia gwauraia hedinarai. . . . Boubou patana dekenai [edia harihari gaudia] do idia atoa, Lohiabada do ia moalelaia totona.” (Isa. 60:​6, 7) Unai peroveta herevana be ia guguru, badina taunimanima milioni momo be ‘boubou gauna bamona edia uduna idia gaukaralaia, ma haida dekenai Dirava ena ladana idia gwauraia totona.’​—⁠Heb. 13:⁠15.

¹⁷ Oi be edena bamona? Dirava dekenai boubou gaudia namodia oi henia, a? Bema lasi, namona be emu kara oi haidaua bona Iehova ena kara namodia be mai haida dekenai oi herevalaia. Iehova oi abidadama henia dainai haroro gaukara oi hamatamaia neganai, emu “kara ese Lohiabada do ia hamoalea bada.” (Salamo 69:​30, 31 duahia.) Iehova dekenai emu haroro gaukara be “bonana namo boubou gauna” bamona, bona oi do ia lalonamo henia. (Ese. 20:41) Unai neganai moale bada do oi davaria.

‘Iehova ese Kara Maoromaoro Taudia Do Ia Hanamoa’

18, 19. (a) Dirava hesiai henia karana dekenai momo edia lalohadai be dahaka? (b) Iehova ena lalonamo ita haboia neganai, ita dekenai dahaka do ia vara?

¹⁸ Hari momo edia lalohadai be Malaki ena negai idia noho taudia bamona, idia gwau: “Dirava ena hesiai gaukara ita karaia be anina lasi. Iena hereva do ita badinaia ena [namo] be dahaka?”  (Mal. 3:14) Kohu idia laloa bada dainai, idia laloa Dirava ena ura bona taravatu idia badinaia be anina lasi. Danu, haroro gaukara idia moalelaia lasi bona idia laloa edia nega idia haorea kava.

¹⁹ Hari inai negai, Satani ia ura taunimanima do idia abia dae, Dirava idia hesiai henia neganai, gau namona ta do idia davaria lasi. Unai bamona gwau-edeede lalohadai be Eden umana ai ia matamaia. Satani ese Heva ia dibagania Iehova ese ia henia mauri hereadaena ia dadaraia totona, unai amo Iehova ena lalonamo ia haboioa. To, Adamu bona Heva idia laloparara Iehova ena lalonamo idia haboioa dainai, do idia mase. Edia kara idia tohotohoa taudia dekenai kahirakahira unai do ia vara danu.​—⁠Gen. 3:​1-7, 17-19.

20, 21. (a) Sarepata ena vabu be dahaka ia karaia, bona dahaka hahenamo ia abia? (b) Edena dala ai Sarepata ena vabu ita tohotohoa be namo, bona dahaka dainai?

²⁰ Adamu bona Heva be Dirava idia gwau-edeede henia dainai dika idia davaria. To Sarepata ena vabu be Iehova ia abidadama henia dainai Iehova ese ia hanamoa. Elia ena hagoadaia herevadia ia kamonai murinai, vabu ese paraoa sisina ia gabua bona peroveta tauna ia henia guna. Bena Iehova ese Elia amo ia gwauraia gwauhamatana ia hagugurua. Baibel ia gwau: “Vabu be ia lao, Elia ena hereva hegeregere ia karaia. Vadaeni Lohiabada ese Elia dekena amo ia gwauhamata hegeregere, unai paraoa be mereki dekenai ia ore lasi, bona unai olive dehoro be kapusi dekenai ia ore lasi.”​—⁠1 Kin. 17:​15, 16.

²¹ Hari inai negai haida sibona be Sarepata ena vabu ese ia karaia karana idia tohotohoa. Unai vabu be hahemauri Diravana ia abidadama henia dainai, Dirava ese ia rakatania lasi. Unai bona Baibel lalonai idia noho sivarai ma haida ese idia hamomokania Iehova ita abidadama henia diba. (Iosua 21:​43-45; 23:14 duahia.) Hari inai negai idia noho Iehova ena Witnes taudia momo ese idia hamomokania Iehova ese ia lalonamo henia taudia do ia rakatania lasi.​—⁠Sal. 34:​6, 7, 17-19. a

22. Dahaka dainai Dirava ena lalonamo ita tahua be mai anina bada?

²² Kahirakahira Dirava ena hahemaoro dinana “be tanobada dekenai idia noho taudia ibounai latanai do ia ginidae.” (Luka 21:​34, 35) Iena hahemaoro amo ita komu diba lasi. Moni o kohu momo ese ta do ia hamauria diba lasi. To, do ita moale bada bema Dirava ese ia abia hidi Hahemaoro Tauna be ita dekenai ia gwau: “Lauegu Tamana ese ia hanamoa taudia e, umui mai, taunimanima be tanobada ai idia vara negana amo umui totona idia hegaegaelaia vadaeni Basileiana do umui abia.” (Mat. 25:34) Oibe, ‘Iehova ese kara maoromaoro taudia do ia hanamoa noho. Iena lalokau be kesi bamona, kara maoromaoro taudia do ia gimaia noho.’ (Sal. 5:12) Momokani, Iehova ena lalonamo ita tahua be gau badana, ani?

[Footnote]

Inai Oi Laloatao, A?

• Dahaka dainai mai iseda kudouna ibounai ida Iehova ita tomadiho henia be maoro?

• Hari, Iehova be edena bamona boubou karadia ia abia dae?

• Dahaka dainai haroro gaukara amo Iehova ena ladana ita hanamoa be namo?

• Dahaka dainai Iehova ena lalonamo ita tahua be gau badana?

[Study Questions]

[Picture on page 13]

Ia hitolo vabu be dahaka abia hidi badana ta do ia karaia?

[Picture on page 15]

Haroro gaukara amo Iehova ita hanamoa neganai, dahaka hahenamo do ita abia?

[Picture on page 17]

Iehova oi abidadama henia neganai, oi do ia rakatania lasi