“Oi [Iesu] ese taravatu utua karana oi inai henia.”​—⁠HEB. 1:⁠9.

1. Iesu be ena hahediba taudia dekenai edena kara ia herevalaia?

 IESU KERISO ia diba lalokau be mai anina bada, unai dainai ena hahediba taudia dekenai ia gwau: “Umui dekenai taravatu matamata lau henia inai, do umui lalokau heheni, lau ese umui lau lalokau henia hegeregerena, umui danu do umui lalokau heheni. Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:​34, 35) Iesu be ena hahediba taudia ia haganidia, namona be sibona edia ura idia dadaraia bona ta ta dekenai lalokau do idia hahedinaraia. Unai amo taunimanima do idia diba idia be Iesu ena hahediba taudia. Ma danu, ia gwau: “Emui inai taudia do umui lalokau henia noho bona umui idia dagedage henia taudia totona do umui guriguri noho.”​—⁠Mat. 5:⁠44.

2. Iesu ena hahediba taudia ese dahaka idia inai henia be namo?

² Iesu ese ena hahediba taudia ia hadibaia ta ta do idia lalokau henia sibona lasi, to kara haida idia inai henia danu be namo. Baibel ese Iesu be inai bamona ia gwauraia: “Oi ese kara maoromaoro oi ura henia, bona taravatu utua karana [kara dika] oi inai henia.” (Heb. 1:9; Sal. 45:⁠7) Kara maoromaoro do ita ura henia sibona lasi, to kara dika o taravatu utua karadia do ita inai henia danu. Aposetolo Ioane danu ia gwau: “Kara dika ia karaia noho tauna be taravatu danu ia utua noho, unai dainai kara dika be taravatu utua karana.”​—⁠1 Ioa. 3:⁠4.

3. Inai stadi lalonai edena henanadai foa do ita herevalaia?

 ³ Namona be sibona ita nanadaia, ‘Lau be kara dika lau inai henia, a?’ Mani inai oi laloa: (1) Egu lalohadai be dahaka inuinu kekero karana dekenai? (2) Egu lalohadai be dahaka meamea o babalau karadia dekenai? (3) Egu lalohadai be dahaka matabodaga karadia dekenai? (4) Egu lalohadai be dahaka Iehova ena taravatu idia utua taudia dekenai? Mani unai henanadai foa edia haere ita tahua.

Inuinu Kekero Karana Dadaraia

4. Dahaka dainai Iesu be kekero taudia ia sisiba henia diba?

⁴ Iesu be nega ta ta wain ia inua, badina ia abia dae unai be Dirava ena harihari gauna ta. (Sal. 104:​14, 15) To, ia kekero lasi. (Aon. 23:​29-⁠33) Unai dainai, ia be kekero taudia ia sisiba henia diba. (Luka 21:34 duahia.) Bema ta ia kekero, ia laloa maoromaoro lasi dainai kara dika ma haida ia karaia diba. Unai dainai, aposetolo Paulo ia gwau: “Wain amo do umui kekero lasi, badina mauri dikana dekenai umui ia hakaua lao, to lauma helaga amo do umui honu noho.” (Efe. 5:18) Danu, Paulo ese kongrigeisen lalonai hahine badadia ia sisiba henidia, ia gwau namona be ‘wain momo inua karana ese idia do ia biagua lasi.’​—⁠Tito 2:⁠3.

5. Kekero muramura idia ura inua taudia ese edena henanadai idia laloa be namo?

⁵ Bema oi ura bia, wain o kekero muramura ma haida oi inua, namona be sibona oi nanadaia: ‘Kekero karana dekenai Iesu ena lalohadai lau abia dae, a? Ma haida lau sisiba henia be auka badina lau danu be inuinu momo tauna, a? Lau inuinu badina lau ura egu lalohekwarahi o hekwakwanai lau laloaboio, a? Wiki ta lalonai bia hida lau inua? Bema ta ia gwau lau inuinu momo, lau badu bona ia lau hereva auka henia, a?’ Kekero muramura momo inua karana ese iseda laloa maoromaoro karana do ia hadikaia, bena abia hidi kereredia ita karaia diba. Unai dainai namona be Keriso murinai idia raka taudia idia hekwarahi edia laloa maoromaoro karana idia dogoatao noho totona.​—⁠Aon. 3:​21, 22.

Meamea Bona Babalau Karadia Dadaraia

6, 7. (a) Iesu ese Satani bona ena demoni be edena bamona ia kara henidia? (b) Dahaka dainai tanobada taudia be babalau bona meamea karadia idia ura henia bada?

⁶ Iesu be tanobada ai ia noho neganai, Satani bona ena demoni ia dadaraia. Satani ese ena Dirava badinaia karana ia tohoa neganai, ia dadaraia. (Luka 4:​1-13) Danu, Satani ese hehuni daladia ai Iesu ia dibagania toho, to Iesu be unai ia diba dainai ia dadaraia. (Mat. 16:​21-23) Ma danu, Iesu ese ma haida amo lauma dikadia ia lulua.​—⁠Mar. 5:​2, 8, 12-15; 9:​20, 25-27.

⁷ Lagani 1914 ai Iesu be King ai ia lao neganai, guba ia hagoevaia bona Satani bona ena demoni be tanobada dekenai ia negedia diho. Unai dainai Satani be hari ia gaukara goada noho “tanobada ibounai ia hakaua kerere” totona. (Apok. 12:​9, 10) Unai dainai tanobada taudia be meamea bona babalau idia ura henia bada karana dekenai ita hoa lasi. To, sibona ita gimaia totona dahaka ita karaia be namo?

8. Moale karadia ita abia hidi neganai, edena henanadai ita lalodia guna be namo?

⁸ Baibel ese ita ia hadibaia babalau bona meamea karadia ese ita idia hadikaia diba.  (Deuteronomi 18:​10-12 duahia.) Hari inai negai, Satani be muvi, buka bona vidio gadara amo taunimanima edia lalona ia veria babalau bona meamea karadia idia ura henia totona. Unai dainai, ura moale karadia ita abia hidi neganai, namona be inai henanadai ita laloa guna: ‘Hua haida lalonai lau itaia muvi o tv program, vidio gadara, o lau duahia buka o komik be babalau o meamea karadia idia herevalaia, a? Lau laloparara babalau bona meamea karadia lau dadaraia be gau badana, eiava lau laloa dika ta do idia havaraia lasi? Lau abia hidi moale karadia be Iehova ese do ia moalelaia, a? Bema egu mauri lalonai Satani ese ia gaukaralaia kohu haida lau ura henia, Iehova lau lalokau henia bona ena kara maoromaoro taravatudia lau laloa bada dainai, unai gaudia do lau dadaraia vaitani, a?’​—⁠Kara 19:​19, 20.

Matabodaga Karadia Dadaraia

9. Edena dala ai ta be kudouna ai kara dika ia ura henia?

⁹ Iesu be Iehova ena taravatu mahuta hebou karana dekenai ia matauraia. Ia gwau: “Umui duahia lasi, a? Matamana negana amo, idia ia havaraia tauna ese idia ia karaia tau bona hahine, bona ia gwau: ‘Unai dainai tau ese ena tamana bona sinana do ia rakatania bona ena hahine danu do ia hakapua, bona idia ruaosi be tauanina tamona ai do idia lao.’ Vadaeni idia be rua lasi, to tauanina tamona. Unai dainai Dirava ese ia hakapua taudia be ta ese do ia hapararaia lasi be namo.” (Mat. 19:​4-6) Iesu ia diba matana amo ita itaia gaudia ese iseda kudouna idia hamiroa diba. Unai dainai, iena Ororo Harorona ai ia gwau: “Umui kamonai vadaeni idaunegai idia gwau: ‘Oi heudahanai lasi.’ To umui lau hamaoroa, bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mat. 5:​27, 28) Iesu ena sisiba idia badinaia lasi taudia be kara dika idia ura henia.

10. Ponografi raraia karana ia dadaraia tadikaka ta ena ekspiriens mani oi gwauraia.

¹⁰ Satani be ponografi ia gaukaralaia matabodaga karadia amo taunimanima edia lalona ia veria totona. Inai tanobada be matabodaga karadia amo ia honu. Ponografi idia raraia taudia ese unai laulau dikadia idia laloaboio diba lasi. Bona unai kara idia manadalaia dainai, idia rakatania be auka. Keristani tauna ta dekenai ia vara gauna mani ita laloa. Ia gwau: “Lau be hunia dalanai ponografi lau raraia. Lau laloa unai kara ese egu hetura karana Iehova ida do ia hadikaia lasi. Lau diba unai be kara dikana, to lau laloa Iehova ese egu hesiai gaukara do ia abia dae noho.” Dahaka ese unai tadikaka ia durua unai kara dikana ia rakatania totona? Ia gwau: “Ena be ia auka to egu lalona lau hadaia elda taudia dekenai egu kara dika do lau gwauraia hedinarai.” Unai tadikaka be unai kara dika ia rakatania murinai, ia gwau: “Egu mauri lau haidaua neganai, lau mamia egu lalomamina be ia goeva.” Oibe, kara dika idia dadaraia taudia ese ponografi idia inai henia be gau badana.

11, 12. Ane ita abia hidi neganai, edena dala ai ita hahedinaraia ita be kara dika ita inai henia?

¹¹ Miusiki be Dirava ena harihari gauna ta, bona idaunega amo ema bona hari, iseda tomadiho lalonai ita gaukaralaia. To, ane haida edia hereva ese iseda lalona dekenai ura dikadia idia havaraia diba. (Eso. 15:​20, 21; Efe. 5:19) Bona tanobada taudia edia miusiki momo lalonai matabodaga karadia idia herevalaia. (1 Ioa. 5:19) Edena dala amo do oi diba  bema oi kamonai anedia ese emu kara idia hadikaia o lasi?

¹² Reana sibona oi nanadaia: ‘Lau kamonai henia anedia ese ala-ala, heudahanai, matabodaga karadia, bona Dirava ena ladana hadikaia herevadia idia gwauraia, a? Bema ma ta dekenai lau ura henia anena ena hereva lau gwauraia, do ia laloa lau be kara dikadia lau inai henia, eiava lau ura henia?’ Namo lasi ita gwau ita be kara dika ita inai henia, to ita hakala henia ane ese ala-ala, heudahanai, matabodaga bona ma haida hadikaia karadia idia herevalaia. Iesu ia gwau: “Uduna amo idia raka-lasi gaudia be kudouna amo idia mai bona unai gaudia ese tau ta idia hamiroa. Hegeregere, kudouna amo idia mai gaudia be lalohadai dikadia, ala-ala, heudahanai, matabodaga karadia, henaohenao, hereva koikoi, Dirava ena ladana hadikaia herevadia.”​—⁠Mat. 15:​18, 19; Iamesi 3:​10, 11 hahegeregerea.

Iehova Ena Taravatu Idia Utua Taudia Dadaraia

13. Idia helalo-kerehai lasi taudia dekenai Iesu ena lalohadai be dahaka?

¹³ Iesu ia gwau: “Lau mai kara dika taudia lau boiria idia helalo-kerehai totona.” (Luka 5:​30-32) To idia helalo-kerehai lasi taudia dekenai Iesu ena lalohadai be dahaka? Iesu ia gwau unai bamona taudia dekenai ita naria namonamo be namo. (Mat. 23:​15, 23-26) Ma ia gwau: “Lau dekenai idia gwau, ‘Lohiabada e, Lohiabada e,’ taudia ibounai be guba Basileia lalonai do idia vareai lasi, to egu Tamana guba ai ia noho ena ura ia karaia tauna sibona be do ia vareai. Unai dina dekenai [Iehova ena hahemaoro dinana ai] momo be lau dekenai do idia gwau: ‘Lohiabada e, Lohiabada e, emu ladana dekenai ai peroveta, emu ladana dekenai demoni ai lulua, bona emu ladana dekenai siahu karadia ai karaia, ani?’ ” To, unai taravatu utua taudia dekenai Iesu be do ia gwau: “Umui lau diba lasi! Umui siri!” (Mat. 7:​21-23) Dahaka dainai unai bamona hahemaoro do ia karaia? Badina idia ese Dirava idia matauraia lasi bona ma haida idia hahisia.

14. Dahaka dainai idia helalo-kerehai lasi taudia be kongrigeisen amo idia atoa siri?

¹⁴ Baibel ia gwau idia helalo-kerehai lasi taudia be kongrigeisen amo idia atoa siri be namo. (1 Korinto 5:​9-13  duahia.) Unai bamona idia karaia ena badina badadia toi be inai: (1) Iehova ena ladana idia hadikaia lasi, (2) kongrigeisen idia gimaia ia goeva noho totona, bona (3) kara dika tauna idia durua ia helalo-kerehai totona.

15. Iehova ena kara maoromaoro taravatudia ita badinaia totona, edena henanadai ita lalodia be namo?

¹⁵ Ita be Iesu bamona, edia kara dika amo idia helalo-kerehai lasi taudia ita bamoa lasi, a? Mani inai henanadai ita laloa: ‘Lau be Keristani kongrigeisen amo idia atoa siri o ia gini siri tauna lau bamoa momo, a? Bema ia be egu varavara bona ia be ruma idauna dekenai ia noho, edena bamona ia do lau kara henia?’ Unai ia vara neganai, Dirava bona ena kara maoromaoro taravatudia ita badinaia be gau badana. a

16, 17. Taihu ta ena natuna be orea amo idia atoa siri neganai, dahaka heduru ia abia?

¹⁶ Mani taihu ta ena ekspiriens ita laloa. Unai taihu ena natuna merona be guna  Iehova ia lalokau henia, to gabeai ia kara dika bona ia helalo-kerehai lasi dainai, kongrigeisen amo idia atoa siri. Taihu be Iehova ia lalokau henia, to ena natuna ia lalokau henia danu. Unai dainai Baibel ena hakaua herevana​—⁠idia atoa siri taudia do ita bamoa lasi​—⁠ia badinaia be auka.

¹⁷ Edena dala ai unai taihu oi durua diba? Elda ta ese unai taihu ia hamaoroa, Iehova be iena lalohisihisi ia diba badina guna aneru haida ese Iehova idia gwau-edeede henia danu. Elda tauna ia gwau ena be Iehova ia diba ia helalo-kerehai lasi tauna idia atoa siri karana ese lalohisihisi ia havaraia, to Iehova ena taravatu be helalo-kerehai lasi tauna be orea amo do idia atoa siri. Unai taihu ese elda tauna ena heduru herevadia ia abia dae, bona Iehova ena taravatu ia badinaia. b Unai bamona kamonai karana ese Iehova ena kudouna ia hamoalea.​—⁠Aon. 27:⁠11.

18, 19. (a) Orea amo idia atoa siri o ia gini siri tauna ita bamoa lasi neganai, dahaka ita hahedinaraia? (b) Dirava bona ena taravatu ita badinaia neganai, dahaka namo ia havaraia diba?

¹⁸ Bema oi dekenai unai bamona ia vara, namona be oi laloatao Iehova be emu hemami ia diba. Bema idia atoa siri o orea amo ia gini siri tauna oi bamoa lasi, oi hahedinaraia ia karaia kara dika oi inai henia. To danu, oi hahedinaraia ia oi bamoa lasi badina oi ura ia be Iehova dekenai do ia giroa lou. Unai bamona oi karaia neganai, kara dika tauna be ena kerere amo do ia helalo-kerehai bona Iehova dekenai ia giroa lou diba.

¹⁹ Guna orea amo idia atoa siri, to gabeai idia abia vareai lou taihu ta ia gwau: “Lau moale badina Iehova be taunimanima ia lalokau henia dainai, ia ura iena orea be do ia goeva. Murimuri taudia idia laloa orea amo ta atoa siri karana be lalokau karana lasi, to ita diba unai ese Iehova ena lalokau ia hahedinaraia.” Bema unai taihu be orea murimurinai ia noho, to ena ruma bese bona kongrigeisen taudia be hanaihanai ia idia bamoa, unai ese ia do ia durua orea dekenai ia giroa lou totona, a? Orea amo ta idia atoa siri taravatuna ita badinaia neganai, ita hahedinaraia kara maoromaoro ita ura henia, bona ita abia dae Iehova be mai ena maoro unai taravatu ia atoa totona.

Kara Dika Inai Henia

20, 21. Dahaka dainai kara dika ita inai henia be namo?

²⁰ Aposetolo Petero ia gwau: “Do umui laloa maoromaoro bona do umui gima noho.” Dahaka dainai? Badina “emui inai tauna, Diabolo, be ia boiboi bada laiona bamona ia raka loaloa, do ia ania ore tauna ia tahua noho.” (1 Pet. 5:⁠8) Oi be unai laiona ese do ia ania tauna, a? Oi dekenai unai ia vara lasi totona, namona be kara dika oi inai henia momokani.

²¹ Momokani, ita be kara dika ai ita vara bona tauanina ena ura dikadia sibona idia laloa bada taudia huanai ita noho, unai dainai kara dika ita dadaraia be mai ena hekwarahi. (1 Ioa. 2:​15-17) To, Iesu Keriso ita tohotohoa bona Iehova Dirava lalokau henia karana ese ita do ia durua kara dika ita inai henia totona. Namona be eda lalona ita hadaia kara dika do ita inai henia, badina ita diba Iehova ese “ia idia abidadama henia taudia edia mauri ia gimaia noho, bona kara dika taudia edia siahu dekena amo, ia ese iena taudia ia hamauria noho.”​—⁠Sal. 97:⁠10.

[Footnotes]

Edena Bamona Do Oi Haere?

• Dahaka ese ita do ia durua kekero muramura dekenai lalohadai maorona ita abia totona?

• Edena dala ai meamea o babalau karadia ita dadaraia diba?

• Dahaka dainai ponografi ese dika ia havaraia diba?

• Bema iseda lalokau tauna ta be orea amo idia atoa siri, edena dala ai ita be Iehova ena taravatu ita badinaia?

[Study Questions]

[Picture on page 29]

Bema oi ura kekero muramura oi inua, dahaka oi laloatao be namo?

[Picture on page 30]

Satani ese ia gaukaralaia kohu inai henia

[Picture on page 31]

Ponografi ia raraia tauna be ena kudouna ai kara dika ia ura henia