“[Iehova] do oi abidadama henia hanaihanai.”​—⁠ISA. 26:⁠4.

1. Edena dala ai Dirava ena hesiai taudia be tanobada taudia amo idia idau?

 INAI tanobada ai taunimanima milioni momo be ma haida ese idia hahisia dainai, idia diba lasi daika o dahaka do idia abidadama henia. To Iehova ena hesiai taudia be idau! Dirava amo ia mai aonega ese idia ia hakaua dainai, inai tanobada o “king taudia” idia abidadama henia lasi. (Sal. 146:⁠3) Idia diba Iehova ese idia ia lalokau henia bona ena hereva ibounai do ia hamomokania, unai dainai ia idia abidadama henia bona vaira nega idia lalohekwarahilaia lasi.​—⁠Roma 3:4; 8:​38, 39.

2. Dahaka dainai Iosua be Dirava ia abidadama henia diba?

² Iosua ese ia hamomokania Dirava ita abidadama henia diba. Ia do mase lasi neganai, Israela taudia ia hamaorodia: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi.”​—⁠Ios. 23:⁠14.

3. Dirava ena ladana ena anina be dahaka?

³ Iehova be ena hesiai taudia ia lalokau henia dainai ena gwauhamata ia hagugurudia. To, unai ia karaia ena badina badana be ena ladana ena anina ia hamomokania totona. (Eso. 3:14; 1 Sam. 12:22) J.  B. Rotherham ese ia torea Baibel ta (The Emphasized Bible) ena matamana kahana ai Dirava ena ladana ena anina ia  hahedinaraia, ia gwau ena gwauhamata ia hagugurudia totona Dirava be gau idauidau ai ia lao diba. Iena ladana ita kamonai neganai, ita diba ia ese ia gwauraia gaudia be do ia hamomokania. Nega bona gabu idauidau ai iena ura ia hagugurua diba. Ia dekenai gau ta ia auka lasi. Dirava be hanaihanai ena ladana ena anina ia hamomokania.

4. (a) Isaia 26:4 ese ita ia hagoadaia dahaka ita karaia totona? (b) Inai stadi lalonai, dahaka gau toi do ita herevalaia?

⁴ Sibona oi nanadaia: ‘Iehova lau diba namonamo dainai ia lau abidadama henia, a? Vaira nega ai herevana dahaka ia vara, to lau abia dae momokani Dirava ese lau do ia naria, a?’ Isaia 26:4 ia gwau: “Lohiabada do oi abidadama henia hanaihanai, badina Iehova, Lohiabada, be iseda noho hanaihanai nadi goadana.” Momokani, Baibel negadiai Dirava be hoa dalanai ena taunimanima ia durua, to hari unai ia karaia lasi. To, nega ibounai ia ita abidadama henia badina ia be iseda “noho hanaihanai nadi goadana.” Vadaeni, hari Dirava be edena dala ai ia idia abidadama henia taudia ia durua? Mani gau toi ita herevalaia: (1) Hedibagani ita hanaia totona iena heduru ita tahua neganai, ia ese ita do ia durua. (2) Ita haroro neganai taunimanima be idia kamonai lasi o idia dagedage neganai, ita ia durua unai ita haheaukalaia totona. (3) Ita lalometau neganai ita ia hagoadaia. Unai gau toi ita herevalaia neganai, emu abidadama Iehova dekenai oi hagoadaia diba daladia oi lalohadailaia be namo.

Hedibagani Ita Davaria Neganai

5. Dahaka ese iseda abidadama ia tohoa diba?

⁵ Iehova ena gwauhamata, tanobada be paradaiso ai do ia lao bona toreisi lou helarona ita abidadama henia be auka lasi. To, reana Dirava ena kara maoromaoro taravatudia edia namo ita daradaralaia. Ita laloa ena kara maoromaoro taravatudia ita badinaia be anina lasi, eiava ita badinaia neganai, do ita moale lasi. To, King Solomona be inai sisiba namona ia torea: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aon. 3:​5, 6) Unai siri dekenai inai hereva “karaia gaudia ibounai” bona “dala” idia noho. Namo lasi mauri hanaihanai bona toreisi lou helarona dainai, Iehova ita abidadama henia. To iseda kara ibounai lalonai do ita hahedinaraia ia ita abidadama henia momokani. To, hedibagani ita davaria neganai, edena dala ai ita hahedinaraia Iehova ita abidadama henia?

6. Lalohadai dikadia ita abia lasi totona dahaka ita karaia diba?

⁶ Kara dika ita dadaraia totona, iseda laloa dalana ia goeva be namo. (Roma 8:5; Efeso 2:3 duahia.) Lalohadai dikadia oi abia lasi totona dahaka oi karaia diba? Mani inai dala faiv oi laloa: (1) Guriguri amo Dirava ena heduru oi noia. (Mat. 6:​9, 13) (2) Baibel lalonai Dirava idia kamonai henia bona ia idia dadaraia taudia edia sivarai oi duahia, bona idia dekenai ia  vara gauna oi laloa dobu. a (1 Kor. 10:​8-11) (3) Oi karaia kara dika ese oi bona emu lalokau taudia dekenai do ia havaraia lalohisihisi oi laloa. (4) Dirava ena hesiai tauna ta be kara dika badana ta ia karaia neganai, Dirava ese ia mamia hisihisi oi laloa. (Salamo 78:​40, 41 duahia.) (5) Herevana, Keristani tauna ta be sibona ia noho o ma haida ida ia noho, to ia be kara dika ia dadaraia neganai, Iehova ia moale. (Sal. 15:​1, 2; Aon. 27:11) Kara maoromaoro oi badinaia neganai, Iehova oi abidadama henia unai.

Idia Kamonai Lasi O Dagedage Neganai

7. Ieremia be dahaka hahetoho ia davaria, bona ia lalomanoka dainai dahaka ia gwau?

⁷ Iseda tadikaka idia haroro gabudia haida ai momo idia ura lasi kamonai o idia dagedage henidia. Peroveta tauna Ieremia ena nega danu be unai bamona. Unai negai Iuda basileiana be ia ore gwauraia, badina momo be Iehova idia rakatania bona dirava koikoidia idia tomadiho henia. Dina ta ta ai Ieremia be Dirava ena hahemaoro herevadia ia harorolaia, unai dainai ena abidadama idia tohoa gaudia be momo. Nega ta iena seketere Baruku be hesiku dainai ia maumau. (Ier. 45:​2, 3) Ieremia ia lalomanoka, a? Oibe, nega haida ia lalomanoka. Ia gwau: “Lauegu vara dinana, be Dirava ese ia hadikaia namo! Badina dahaka sinagu ese lau ia havaraia? Hekwarahi bona lalohisihisi do lau abia totona lau vara, a? Bona egu mauri dinadia be hemarai dekenai do lau haorea, a?”​—⁠Ier. 20:​14, 15, 18.

8, 9. Ieremia 17:​7, 8 bona Salamo 1:​1-3 edia hereva bamona, huahua namodia ita havaraia totona dahaka do ita karaia?

⁸ To, Ieremia ia gini goada bona Iehova ia abidadama henia noho. Unai dainai, Iehova ena gwauhamata be Ieremia dekenai ia guguru, ia gwau: “To, lau Lohiabada ia abidadama henia noho tauna be namo. Iena laloa goada be lau dekena amo ia abia tauna, be do lau hanamoa. Ia be ranu ena badinai idia hadoa auna bamona. Iena ramuna be ranu dekenai ia siaidia noho, bona dina siahu negana ia ginidae neganai, do ia gari lasi. Badina be iena rauna, be do idia mauri noho. Medu ia diho lasi neganai danu, iena lalona do ia hekwarahi lasi, badina iena huahua idia vara namonamo noho.”​—⁠Ier. 17:​7, 8.

⁹ “Sinavai badinai idia hadoa” au huahua bamona, Ieremia be huahua namodia momo ia havaraia. Ia ura lasi hevaseha taudia ese iena kara namodia do idia hadikaia. To, Iehova, mauri ranuna ena Badina, dekenai ia tabekau bona iena hereva ibounai ia badinaia. (Salamo 1:​1-3 duahia; Ier. 20:⁠9) Teritori aukadia ai idia haroro taudia dekenai Ieremia be haheitalai namona! Bema emu teritori be unai bamona, namona be Iehova dekenai oi tabekau, badina oi do ia durua mai haheauka ida ‘ma haida dekenai iena ladana oi gwauraia totona.’​—⁠Heb. 13:⁠15.

10. Iseda hahenamo haida be dahaka bona edena henanadai ita laloa be namo?

¹⁰ Inai nega dokona ai hekwakwanai idauidau ita haheaukalaia totona, Iehova be heduru gaudia momo ia henia. Idia ta be Baibel bona ia be gado idauidau ai idia hahanaia. Igui hesiai tauna mai ena kamonai bona kara maoromaoro oreana amo, hakaua herevadia be nega korikori ai ita ia henia. Hebou badadia bona maragidia ai ia ese tadikaka taihu edia hebamo karana amo ita ia hagoadaia. Unai gaudia oi laloa bada, a? Unai gaudia idia laloa bada taudia ese “ane do idia abia, edia moale be bada dainai.” To, Dirava idia kamonai henia lasi taudia be ‘do idia taitai, mai boiboi bada danu, badina edia laumadia be do idia laloa hekwarahi momokani.’​—⁠Isa. 65:​13, 14.

Ita Lalometau Negadiai

11, 12. Tanobada ena hekwakwanai idia bada idia lao dainai, aonega karana be dahaka?

¹¹ Baibel ena peroveta herevana bamona, hari taunimanima be hekwakwanai momo dainai idia lalometau. (Mat. 24:​6-8; Apok.  12:12) Hegeregere, abata ia vara neganai, nega momo ororo ita heau henia eiava ruma ta ena guhi dekenai ita daekau. Unai hegeregerena, hekwakwanai idia bada idia lao dainai, taunimanima milioni momo be moni momo oreadia, politikol oreadia, bona tomadiho oreadia idia heau henia, eiava saiens taudia edia aonega herevadia idia abidadama henia. To, unai gaudia ese taunimanima do idia hamauria lasi. (Ier. 17:​5, 6) To, Iehova ena hesiai taudia be idau, idia ese “noho hanaihanai nadi goadana” Iehova, do idia heau henia. (Isa. 26:⁠4) Salamo torea tauna ia gwau: “[Iehova] sibona be egu Nadi Badana, bona egu mauri davaria dalana. Ia be egu kohoro.” (Salamo 62:​6-9 duahia.) Edena dala ai unai Nadi Badana be iseda roho mauri gabuna ai ita halaoa diba?

¹² Ita be Iehova ena Hereva ita abidadama henia, badina ia be taunimanima edia aonega herevadia bamona lasi. (Sal. 73:​23, 24) Hegeregere, taunimanima idia gwau: ‘Iseda mauri be kwadogi, unai dainai ita moalelaia be namo.’ ‘Moni gaukara namona ta oi abia.’ ‘Moni momo oi haboua.’ ‘Inai oi hoia, unai oi hoia.’ ‘Oi loaloa, tanobada oi itaia.’ To, Dirava amo ia mai aonegana be idau. Baibel ia gwau: “Inai tanobada gaudia idia gaukaralaia taudia be unai gaudia idia gaukaralaia guguru lasi taudia bamona do idia noho. Badina inai tanobada ena toana be ia idau ia lao noho.” (1 Kor. 7:31) Unai dainai, Iesu be ita ia sisiba henia, nega ibounai Basileia do ita atoa guna, bona iseda kohu be guba dekenai do ita haboua, badina unuseniai gau ta ese do ia hadikaia lasi.​—⁠Mat. 6:​19, 20.

13. Ioane Ginigunana 2:​15-17 ena hereva ita laloa neganai, edena henanadai ita lalodia be namo?

¹³ Emu lalohadai “tanobada bona ia lalonai idia noho gaudia” dekenai ese idia hahedinaraia Dirava oi abidadama henia, a? (1 Ioa. 2:​15-17) Emu hahenamo bona emu hesiai gaukara oi laloa bada, eiava inai tanobada gaudia oi laloa bada? (Fili. 3:⁠8) Oi hekwarahi emu matana be ‘gau tamona sibona ia raraia’ totona, a? (Mat. 6:22) Momokani bema oi be mai emu ruma bese, Dirava ia ura emu ruma bese oi naria. (1 Tim. 5:⁠8) Bona Iehova ena ura be iena hesiai taudia be ia sibona do idia abidadama henia, bona Satani ena tanobada lasi.​—⁠Heb. 13:⁠5.

14-16. ‘Gau tamona sibona idia raraia’ bona Basileia idia tahua guna taudia be dahaka hahenamo idia davaria?

¹⁴ Richard, Ruth bona edia natudia toi edia sivarai mani ita laloa. Richard ia gwau: “Lau diba Iehova ena hesiai gaukara lalonai gaukara momo lau karaia diba. Mauri namona lau moalelaia, to lau mamia lau be mai egu lalona ibounai ida Iehova lau hesiai henia lasi. Lau bona egu adavana be unai ai gurigurilaia bona ai herevalaia murinai, ai lalotamona, lau be egu bosi do lau noia wiki ta lalonai dina 4 sibona do lau gaukara. Ena be emai tano dekenai moni hekwakwanai be bada, to unai abia hidi ai karaia. Bosi ese egu noinoi ia abia dae bona hua ta murinai egu sediual matamata lau badinaia.” Hari, Richard ena hemami be edena bamona?

¹⁵ Ia gwau: “Ena be egu pei be bada lasi, to egu nega be bada egu ruma bese lau bamoa bona natudia lau hadibaia totona. Egu haroro horadia lau habadaia, Baibel stadi taudia momo lau davaria bona kongrigeisen ai  gaukara momo lau karaia. Bona danu emai natudia lau naria, unai amo Ruth be hua haida lalonai heduru painia ia karaia diba. Egu sediual lau moalelaia bona lau ura nega daudau lalonai do lau badinaia.”

¹⁶ Roy, Petina bona edia natuna kekeni edia sivarai mani ita laloa. Idia ruaosi idia ura edia haroro gaukara idia habadaia dainai, edia moni gaukara horadia idia hamaragia. Roy ia gwau: “Lau be wiki ta lalonai dina toi lau gaukara bona Petina be dina rua ia gaukara. Danu emai ruma badana ai rakatania bona ruma maragina ta ai hoia. Emai natudia rua idia do vara lasi neganai, ai painia, bona painia urana ai do haboioa lasi. Unai dainai emai natudia idia bada neganai, painia gaukara ai karaia lou. Ai davaria hahenamo idauidau ena moale ese moni momo maurina ena moale ia hereaia.”

“Dirava Ena Maino” ese Emu Kudouna Do Ia Gimaia

17. Ita diba lasi kerukeru be dahaka do ia vara, to Baibel ena hagoadaia herevana be dahaka?

¹⁷ Ita diba lasi kerukeru dahaka do ia vara, badina ita ibounai be idia “vara kava” dika ita davaria noho. (Had. 9:11) Dirava idia diba lasi taudia be kerukeru do idia vara gaudia idia laloa momo. To, ita be idia bamona lasi, badina Dirava be iseda turana bona ita abidadama henia. (Mat. 6:34) Aposetolo Paulo ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia.”​—⁠Fili. 4:​6, 7.

18, 19. Dirava be edena dala ai ita ia hagoadaia? Ekspiriens gwauraia.

¹⁸ Tadikaka taihu momo be nega aukadia ai, Iehova ese lalomaino ia henidia. Taihu ta ia gwau: “Doketa ta be hanaihanai lau ia hagaria bona doria rara lau abia totona. Lau ia kirikirilaia bona ia gwau, ‘Dahaka dainai oi ura lasi rara oi abia, oi kavakava, o?’ Unai bamona negadia ai, Iehova lau noia bona ia ese lau dekenai lalomaino bona goada ia henia. Ena be egu rara be bada lasi dainai lau manoka, to Baibel amo rara lau dadaraia ena badina lau hahedinaraia diba.”

¹⁹ Nega haida Dirava ese iseda tadikaka taihu amo ita ia hagoadaia, eiava nega korikori ai ita abia buka o magasin ena hereva ta amo ita ia hagoadaia. Reana, oi kamonai ta ia gwau: “Inai magasin be lau totona idia torea, badina lau ia hagoadaia bada!” Oibe, herevana iseda hekwakwanai o iseda dabu gaudia be dahaka, to Iehova ita abidadama henia neganai ia ese ita do ia durua. Badina ita be iena “mamoe” bona iena ladana ita abia taudia.​—⁠Sal. 100:3; Ioa. 10:16; Kara 15:​14, 17.

20. Dahaka dainai Iehova ena hesiai taudia be do idia noho namonamo?

²⁰ Iehova be ena “badu dinana” ai, inai tanobada ena kohu idia abidadama henia taudia ibounai do ia haorea. Golo, siliva bona dava bada kohudia ma haida ese taunimanima do idia hamauria diba lasi. (Sep. 1:18; Aon. 11:⁠4) Roho mauri gabuna tamona be Iehova, “iseda noho hanaihanai nadi goadana.” (Isa. 26:⁠4) Unai dainai, Iehova ita abidadama henia bona ena kara maoromaoro taravatudia ita badinaia be namo. Ena be haida idia ura lasi ita harorolaia sivaraina idia kamonai bona idia dagedage, to ita haroro noho bona iseda lalometau gaudia be Iehova dekenai ita gwauraia hedinarai. Unai ita karaia neganai, ‘do ita noho namonamo, gari ta lasi.’​—⁠Aon. 1:⁠33.

[Footnote]

Anina Oi Gwauraia Diba, A?

Edena dala ai ita hahedinaraia Dirava ita abidadama henia

• hedibagani ita davaria neganai?

• sivarai namona idia kamonai lasi o idia dagedage neganai?

• ita lalometau neganai?

[Study Questions]

[Picture on page 13]

Dirava ena taravatu ita badinaia neganai ita moale

[Picture on page 15]

Iehova be “iseda noho hanaihanai nadi goadana”