Iesu ese aposetolo taudia 12 ia siaia neganai, ia gwau itotohi bona tamaka do idia abia kau, a?

Haida idia gwau Evanelia bukadia toi lalonai Iesu ena hereva idia torea dalana be idauidau. Bema unai buka toi edia hereva ita hahegeregerea, edia hereva ena anina be tamona. Mani Mareko bona Luka edia toretore ita hahegeregerea guna. Mareko ia gwau: “[Iesu ese] idia ia hamaoroa edia laolao totona gau ta do idia abia lasi, hegeregere paraoa, aniani puse, bona moni, to itotohi ta sibona do idia abia. Tamaka do idia karaia, to dabua rua do idia hahedokilaia lasi.” (Mar. 6:​7-9) Luka ia gwau: “Laolao totona gau ta do umui abia lasi, hegeregere itotohi ta, aniani puse, paraoa, siliva moni eiava dabua ma ta umui abia lasi.” (Luka 9:​1-3) Oibe, ita itaia edia hereva be idia idau sisina. Mareko ia gwau, aposetolo taudia be itotohi ta do idia abia bona tamaka do idia karaia, to Luka ia gwau, idia be gau ta do idia abia kau lasi, itotohi danu do idia abia lasi. Danu, Mareko be tamaka ia herevalaia, to Luka be unai ia herevalaia lasi.

Iesu ena hereva ita lalopararalaia totona, mani Evanelia bukadia toi edia hereva ita laloa. Ataiai idia noho siridia bona Mataio 10:​5-10 ai, Iesu ese aposetolo taudia ia hamaoroa “dabua rua” do idia hahedokilaia lasi. Aposetolo taudia ta ta be dabua idia karaia vadaeni, unai dainai edia laolao ai dabua ma ta do idia abia kau lasi. Unai hegeregerena, Mareko ia gwau “tamaka do idia karaia” neganai, ia be edia aena dekenai ia noho vadaeni tamaka ia herevalaia. To, itotohi be edena bamona? Buka ta (The Jewish Encyclopedia) ia gwau: “Toana be idaunegai Heberu taudia be vaia edia laolao negadiai, itotohi idia abia.” (Gen 32:10) Mareko bukana ai Iesu ena hahegani be “gau ta do idia abia lasi,” to itotohi sibona do idia abia. Unai dainai, Mareko bona Luka be Iesu ena hereva idia torea neganai, idia hahedinaraia aposetolo taudia be edia laolao totona kohu ma haida do idia abia kau lasi.

Iesu be unai hahegani ia gwauraia neganai, Mataio ia kamonai bona ia torea danu. Iesu ia gwau: “Emui moni beleta lalonai golo, siliva eiava kopa umui udaia lasi, eiava laolao totona aniani puse, dabua rua, tamaka, itotohi umui abia lasi, badina gaukara tauna be mai ena maoro aniani ia abia totona.” (Mat. 10:​9, 10) Vadaeni, idia karaia tamaka, dabua, bona idia dogoatao itotohi be edena bamona? Do idia negea, a? Lasi. Iesu ena hereva anina be edia laolao ai kohu ma haida do idia abia kau lasi. Dahaka dainai? “Badina gaukara tauna be mai ena maoro aniani ia abia totona.” Unai be Iesu ena hereva badana, bona Ororo Harorona ai ia gwauraia herevana ida ia hegeregere. Kamonai taudia ia hamaorodia, dahaka do idia inua, dahaka do idia ania, bona dahaka dabua do idia atoa do idia lalohekwarahilaia lasi be namo.​—⁠Mat. 6:​25-32.

Reana nega ginigunana Evanelia bukadia oi duahia neganai, do oi laloa edia hereva be idauidau, to gau tamona idia herevalaia. Aposetolo taudia edia kohu be hegeregere, bona edia laolao totona kohu ma haida idia abia kau totona nega bada do idia halusia lasi. Dahaka dainai? Badina Iehova ese idia do ia naria.

New World Translation ai Hadibaia Tauna 2:8 be “hahine badana ta, eiava hahine badadia momo” ia herevalaia, bona Baibel momo ai unai idia torea. Unai hahine be daidia?

Idia be daika be ita diba namonamo lasi. To, reana idia be Solomona idia vadivadi henia dagi bada hahinedia.

Hadibaia Tauna karoa 2 be Solomona ese ia karaia gaudia bona ia haginia ruma badadia haida ia herevalaia. Ia gwau: “Siliva bona golo momo lau haboua, king bona provinsi momo edia kohu idauidau danu. Ane abia tatau bona hahine danu ese lau totona ane idia abia. Hahine badana ta, eiava hahine badadia momo lau hedavari henia danu, taunimanima ese idia ura henia bada gaudia.”​—⁠Had. 2:​8, NW.

Momo idia laloa inai hereva “hahine badadia momo” be Solomona ese ia adavaia hahinedia​—⁠idau bese hahine bona hahine iharuana ena dagi idia abia hahinedia​—⁠ia herevalaia. Idia ese Solomona idia veria Dirava ia rakatania totona. (1 Kin. 11:​1-4) To, unai be maoro lasi. Solomona be unai hereva ia torea neganai, ia be “hahine badana ta, eiava hahine badadia momo” ia diba vadaeni. Bona unai nega ai, Iehova ese ia do lalonamo henia, badina ena siahu amo Baibel bukadia haida ia torea. Ita diba Solomona ia buruka neganai, Baibel bukadia ia torea lasi, badina unai nega ai ia be idau bese hahine bona hahine iharuana ena dagi idia abia hahinedia ia adavaia bona kaivakuku ia tomadiho henidia.

Hadibaia Tauna bukana lalonai Solomona ia gwau, ia be “taunimanima hagoadaia herevadia ia tahua, bona ia torea herevadia be momokani, bona maoromaoro.” (Had. 12:10) Solomona ese ia torea buka haida lalonai inai hereva “adavana,” “lohia edia hahine,” “king edia hahine” bona “hesiai hahine” ia gaukaralaia. (Aon. 5:18; 12:4; 18:22; Had. 9:9; Sol. 6:​8, 9) To, Hadibaia Tauna 2:8 ai unai bamona hereva ta ia torea lasi.

Taunimanima momo be Solomona idia diba. Dirava ese ia do lalonamo henia neganai, dagi bada hahinedia ese ia idia vadivadi henia. Sieba tano ena kwini danu be Solomona ena sivarai ia kamonai dainai, ia vadivadi henia neganai, ia itaia gaudia dekenai ia hoa. (1 Kin. 10:​1, 2) Unai sivarai ese ia hamomokania Solomona ese “hahine badana ta, eiava hahine badadia momo” ia torea neganai, ia be dagi bada hahinedia ia herevalaia.