SEL maragidia ela bona galaksi badadia mai edia hisiu oreadia momo ese idia hamomokania, Iehova ese gau ibounai be edia gabu korikori ai ia atoa bona idia gaukara namonamo. Unai be hoa gauna lasi, badina Havaraia Tauna be “gau ibounai ia karaia namonamo.” (1 Kor. 14:33) Iehova ita tomadiho henia totona ia hegaegaelaia dalana be hoa gauna danu. Iehova ese ia karaia gaudia haida mani ita laloa. Ia ese orea tamona lalonai taunimanima bona aneru milioni momo ia haboua, idia be mai edia ura kwalimu bona lalotamona ai Ia idia tomadiho henia. Unai be hoa gauna!

Idaunega Israela ai, Dirava ena tanobada oreana be Ierusalema ese ia laulaulaia, badina unuseniai Iehova ena dubu helaga bona ia horoa pavapava ia noho. Babulonia ai ia noho igui hesiai tauna ta be unai hanua helagana ia laloa, bona ia gwau: “Bema oi lau laloaboio neganai, bona oi be egu moale gauna momokani do lau halaoa lasi neganai, namona be egu malana do ia dika, vadaeni ane do lau abia lou lasi.”​—⁠Sal. 137:⁠6.

Dirava ena orea be unai bamona oi laloa, a? Iehova ena orea ena gaukara dalana oi laloa bada, a? Emu natudia be Dirava ena orea ena histori bona gaukara dalana idia diba, a? Iehova ena Witnes taudia edia tanobada hegegemadai oreana lalonai idia noho dainai idia moale, a? (1 Pet. 2:17) Emu natudia be Iehova ena orea ena gaukara dalana idia diba totona, henunai idia noho daladia umui gaukaralaia diba.

Guna Gaudia Herevalaia

Lagani ta ta ai, Israela ruma besedia be Pasova idia karaia totona idia hebou. Unai aria idia karaia matamaia neganai, Mose ese Israela taudia ia hamaoroa: “Vaira neganai, sedira emui natudia tau ese do idia nanadaia umui dekenai, do idia gwau, ‘Inai kara ena anina be dahaka?’ Do umui haere, umui gwau, ‘Lohiabada ese mai ena siahu bada, Aigupito, gaukara idia metau gabuna, dekena amo ai ia hakaua siri.’ ” (Eso. 13:14) Israela taudia be Iehova ese ia karaia karadia do idia laloaboio lasi. Oibe, Israela tama momo ese Mose ena hahegani idia badinaia. Lagani momo murinai, Israela tauna ta ia guriguri, ia gwau: “Dirava e, ai be aiemai taiana dekena amo sivarai ai kamonai. Aiemai tamadia ese ai idia hamaoroa vadaeni. Idia edia nega dekenai dahaka dahaka oi karaia, be ai dekenai idia gwauraia.”​—⁠Sal. 44:⁠1.

Idia hanaia lagani 100 lalonai Iehova ena Witnes taudia edia histori be matamata taudia ese idia laloa bada lasi. Edena dala ai emu natudia oi durua Iehova ena orea lalonai idia vara gaudia idia laloa bada totona? Tama sina haida be Jehovah’s Witnesses​—⁠Proclaimers of God’s Kingdom, Yearbook, Awake! bona Gima Kohorona lalonai idia noho mauri sivaraidia, tiokratik ripoti haida, bona hari Dirava ena taunimanima edia sivarai idia hahedinaraia DVD matamatadia idia gaukaralaia edia natudia idia hadibaia totona. Vidio haida be guna Soviet Union bona Nazi Germany dekenai tadikaka taihu ese idia davaria dagedage sivaraidia idia hahedinaraia. Unai ese ruma bese idia hagoadaia hekwakwanai negadiai Iehova dekenai idia tabekau totona. Emui Ruma Bese Ena Tomadiho negana ai unai gaudia umui gaukaralaia diba. Unai ese emu natudia do ia durua, hahetoho negadiai, idia gini goada totona.

Natu momo be idia ura lasi guna gaudia edia sivarai idia kamonai. Unai dainai, namona be emu natudia dekenai gaukara haida oi henia diba. Hegeregere, natuna mero oi hamaoroa ia ura henia tanona ta do ia abia hidi, ena tiokratik histori do ia tahua, bona ruma  bese taudia dekenai do ia herevalaia. Emui ruma bese ena tomadiho dinana ta ai, lagani momo Iehova ia hesiai henia tadikaka o taihu ta oi boiria diba. Reana, emu natuna kekeni ese ia inteviu henia bona ena ekspiriens ia gwauraia diba. Eiava emui natuna oi durua idia vara gau badadia haida, hegeregere brens haginia gaukarana, intenesenel hebouhebou, eiava guna haroro gaukara ai idia gaukaralaia rekodi masini edia laulau idia torea.

Ta Ta Edia Gaukara Dibaia

Paulo ia gwau Keristani kongrigeisen be tauanina ta bamona: “Ta ta idia hakapua namonamo bona idia gaukara hebou bona edia gaukara ta ta idia karaia namonamo neganai, tauanina ibounai be lalokau dekena amo ia tubu daekau diba.” (Efe. 4:16) Tauanina ena kahana ta ta edia gaukara dalana ita diba neganai, iseda Havaraia Tauna ita laloa bada bona matauraia. Unai hegeregerena, tanobada hegegemadai kongrigeisen idia gaukara hebou dalana ita diba neganai, Dirava ena aonega ita hoalaia.​—⁠Efe. 3:⁠10.

Iehova be ena guba bona tanobada oreana edia gaukara dalana ia herevalaia. Hegeregere, Iesu Keriso dekenai hunia herevana ta ia henia, bena “ena aneru ia siaia bona ia amo unai hunia herevana be toa amo ena igui hesiai tauna Ioane dekenai ia hahedinaraia.” (Apok. 1:​1, 2) Dirava ese ena guba oreana ena gaukara dalana be ita dekenai ia hahedinaraia hegeregerena, ia ura ena tanobada oreana ena “gaukara ta ta” ita diba danu.

Hegeregere, sekit naria tauna do ia vadivadi neganai, namona be iena maduna bona ia davaria hahenamo idauidau be emui ruma bese ida umui kikilaia. Edena dala ai ia ese ita ta ta ia durua? Umui herevalaia henanadai ma haida be: Dahaka dainai haroro ena ripoti ita henia be gau badana? Dirava ena orea be edena dala ai moni idia abia edia gaukara idia karaia totona? Hakaua Oreana ena gaukara be edena bamona ia karaia, bona edena dala ai taunimanima dekenai Dirava ena hereva ia hadibaia?

Iehova ena orea ena gaukara dalana ita lalopararalaia neganai, dala toi ai ita ia durua: Ita idia durua totona idia gaukara goada tadikaka ita lalodia bada. (1 Tes. 5:​12, 13) Ita ia hagoadaia tiokratik dalana ita badinaia totona. (Kara 16:​4, 5) Danu, ita idia gunalaia tadikaka be Baibel ena hakaua herevadia hegeregerena edia gaukara bona abia hidi idia karaia neganai, iseda abidadama idia dekenai ia goada.​—⁠Heb. 13:⁠7.

“Iena Ruma Aukadia Do Umui Itaia”

“Dirava ena taudia e, Siona ena kahana ibounai do umui raka lao, bona iena kohoro ibounai do umui duahia. Siona ena magu do umui itaia, bona iena ruma aukadia do umui itaia loaloa. Vadaeni Siona ena namo, be gabeai idia vara uru taudia do umui hamaoroa.” (Sal. 48:​12, 13) Salamo torea tauna ese Israela taudia ia hamaoroa Ierusalema do idia vadivadi henia. Oibe, Israela ruma besedia be lagani ta ta ai aria totona Ierusalema dekenai idia lao neganai, dubu helaga ena hairai idia itaia bona idia moalelaia bada. Idia itaia gaudia be “gabeai idia vara uru taudia” dekenai idia gwauraia.

Sieba tano ena kwini oi laloa, matamanai ia ese Solomona ena lohia dalana bona ena aonega ena sivarai ia hamomokania lasi. To, dahaka ese ena lalona ia haidaua? Ia gwau: “Unai sivarai lau hamomokania lasi ia mai bona hari lau mai, lau sibona egu matana dekenai lau itaia.” (2 Siv. 9:⁠6) Oibe, ‘sibona eda matana dekenai ita itaia’ gaudia ese eda lalona ia hamarerea diba.

Edena dala ai emui natudia oi durua diba Iehova ena orea ena gaukara namodia be ‘sibona edia matana dekenai idia itaia’ totona? Bema emui noho gabunai Iehova ena Witnes taudia edia brens opesi ta ia noho, namona be umui vadivadi henia. Hegeregere, Mandy bona Bethany edia noho gabuna ena daudau  Betele amo be kilomita 1,500 bamona. To, idia maragi negana amo edia tama sina be hanaihanai palani idia karaia Betele idia vadivadi totona. Idia gwau: “Betele ai do itaia lasi neganai, ai laloa ia be buruka taudia bona gaukara idia laloa bada taudia sibona idia noho. To, matamata taudia ai itaia bona idia be Iehova ena gaukara idia moalelaia! Betele ai vadivadi neganai, ai laloparara Iehova ena orea be orea maragina lasi, to ia be orea badana ta. Betele ai vadivadi negadia ta ta ai, ai ia hagoadaia Iehova kahirakahira ai lao bona ia ai hesiai henia totona.” Mandy bona Bethany be Dirava ena orea ena gaukara dalana idia diba dainai, painia gaukara idia hamatamaia bona nega haida Betele dekenai volantia gaukara idia karaia.

Dala ma ta ai Iehova ena orea ita “itaia” diba. Iehova ena orea ena gaukara be vidio bona DVD idauidau amo ia halasia, hegeregere: Jehovah’s Witnesses​—⁠Organized to Share the Good News, Our Whole Association of Brothers, To the Ends of the Earth, bona United by Divine Teaching. Betele taudia, volantia taudia, misinari taudia, bona hebouhebou idia hegaegaelaia tadikaka edia gaukara umui itaia neganai, unai ese umui do ia durua tanobada hegegemadai idia noho tadikaka umui laloa bada totona.

Kongrigeisen iboudiai be mai anina bada sivarai namona harorolaia gaukarana idia karaia bona tadikaka taihu idia hagoadaia. Namona be oi bona emu ruma bese umui hekwarahi “Keristani varavara taudia tanobada kahana ibounai dekenai” umui diba totona. Unai ese oi bona emui natudia do ia durua “emui abidadama dekenai do umui gini goada” bona umui moale totona.​—⁠1 Pet. 5:​9, BH.

 [Box/​Picture on page 18]

Dirava Ena Orea Ita Stadilaia Diba

Iseda buka bona magasin momo amo Iehova ena orea ia hamatamaia dalana bona ena gaukara ita dibaia diba. Henunai idia noho henanadai oi gaukaralaia diba:

☞ Loaloa naria taudia edia gaukara be edena bamona ia matamaia?​—⁠Gima Kohorona, November 15, 1996, rau 10-​15.

☞ Lagani 1941 ai Tiokratik Hebouhebou dekenai “Natudia Edia Dina” ai dahaka ia vara, bona dahaka dainai ia be mai anina bada?​—⁠Gima Kohorona, July 15, 2001, rau 8.

☞ Hari inai negai Hakaua Oreana edia gaukara be edena bamona idia karaia?​—⁠Gima Kohorona, November 1, 1990, rau 17-23.