HEVA be taravatu auna ena huahua ia ania murinai, Dirava ese ia nanadaia: “Dahaka oi karaia vadaeni?” Heva ia haere: “Gaigai ese lau dekenai ia koikoi, bona lau ania.” (Gen. 3:13) Heva ia koia tauna, Satani, ena ladana ma ta be “idaunegai gaigaina, . . . tanobada ibounai ia hakaua kerere noho.”​—⁠Apok. 12:⁠9.

Genese bukana ena sivarai ese ia hahedinaraia, Satani be mai aonega ida idia gima lasi taudia ia koia. Heva be Satani ena koikoi herevana ia abia dae, to namo lasi ita laloa Satani sibona ese ita ia koia diba. Baibel ia gwau ‘lalohadai koikoi amo ita sibona ita koia’ diba danu.​—⁠Iam. 1:22.

Reana ita laloa sibona ita koia diba lasi, to badina ta dainai Baibel ese unai sisiba ia henia. Mani ita itaia edena dala ai lalohadai koikoidia o kereredia ese ita idia koia diba. Mani Iuda taudia dekenai ia vara gauna ita itaia.

Sibona Idia Koia Taudia Haida

Lagani 537 B.C.E. ai, Parasa tauna, Kurese Badana ese Babulonia ai idia noho igui Iuda taudia ia oda henidia Ierusalema dekenai do idia giroa, bona dubu helaga do idia haginia lou. (Esr. 1:​1, 2) Lagani ta murinai, Iehova ena ura hegeregerena iena taunimanima be dubu helaga ena badina nadidia idia haginia. Iehova ese dubu helaga haginia matamaia gaukarana ia hanamoa dainai, idia moale. (Esr. 3:​8, 10, 11) To daudau lasi murinai, edia inai taudia ese edia gaukara idia koua dainai idia lalomanoka. (Esr. 4:⁠4) Babulonia amo idia lou mai bona lagani 15 murinai, Parasa ena gavamani ese dubu helaga haginia gaukarana ia taravatua. Gavamani taudia be Ierusalema dekenai idia lao bona “mai siahu bona goada danu Iuda taudia edia gaukara idia hadokoa.”​—⁠Esr. 4:​21-24.

Unai hekwakwanai badana ia vara neganai, Iuda taudia be lalohadai kererena idia abia. Idia gwau: “Lohiabada ena Dubu Helaga haginia negana be ia do ginidae lasi.” (Hag. 1:⁠2) Idia laloa Iehova ia ura lasi ena dubu helaga be unai nega ai do idia haginia. Unai dainai, Dirava ena gaukara idia rakatania bona sibodia edia ruma namodia idia haginia. Dirava ena peroveta tauna Hagai ese idia ia nanadaia: “Egu bese taudia e, badina dahaka umui be ruma namo herea edia lalonai umui noho, to [Iehova ena] Dubu Helaga be ia do dika noho?”​—⁠Hag. 1:⁠4.

Unai sivarai amo dahaka ita dibaia? Reana, do ita laloa Dirava ena ura do ia guguru lasi bona ena hesiai gaukara ita rakatania be namo. Unai lalohadai kererena dainai sibona eda ura do ita tahua matamaia. Mani inai haheitalai oi laloa. Oi diba emu turadia haida be do idia mai bona emu ruma ai do idia noho. Idia oi naria noho lalonai, emu ruma gaukaradia oi karaia haragaharaga bona oi hegaegae. To, bema oi kamonai emu turadia be do idia ginidae haraga lasi, dahaka do oi karaia? Emu gaukara do oi rakatania, a?

Namona be ita laloatao, Hagai bona Sekaraia ese Iuda taudia idia hagoadaia lalohadai maorona idia abia totona, badina Iehova ena ura be dubu helaga be unai nega ai do idia haginia. Hagai ia gwau: “Umui tano taudia ibounai e, do umui goada, bona gaukara do umui karaia.” (Hag. 2:⁠4) Dubu helaga hagania lou gaukarana idia karaia be namo, badina Dirava ena lauma helaga ese idia do ia durua. (Sek. 4:​6, 7) Unai sivarai ese ita ia durua ita daradara lasi, to ita abia dae Iehova  ena dina be kahirakahira momokani.​—⁠1 Kor. 10:⁠11.

Lalohadai Maorona Abia

Aposetolo Petero ena revareva iharuana ai ia hahedinaraia Iehova be “guba matamata bona tanobada matamata” do ia mailaia negana ia makaia vadaeni. (2 Pet. 3:13) To ia hahedinaraia danu, hevaseha taudia ese daradara do idia havaraia, badina idia gwau reana Dirava be kara ta do ia karaia lasi. Idia gwau: “Iseda tubuna idia mase vadaeni, to tanobada ia karaia negana ia mai bona harihari gau ta be idau lasi.” (2 Pet. 3:​4, BH) Petero ia ura unai lalohadai kererena ia hamaoromaoroa dainai, ia gwau: “Umui dekenai gau haida lau ura herevalaia lou, unai amo do umui laloa goevagoeva.” Keristani taudia ia hamaorodia unai hevaseha taudia edia lalohadai be maoro lasi, badina idia laloaboio guna Dirava ese abata amo kara dika taudia ia haorea.​—⁠2 Pet. 3:​1, 5-7.

Lagani 520 B.C.E. ai, Hagai ese idia lalomanoka Iuda taudia ia hagoadaia, ia gwau: “Emui mauri dalana do umui laloa.” (Hag. 1:⁠5) Edia lalohadai ia hamaoromaoro totona, ia ese Iehova ena ura bona gwauhamata idauidau be idia dekenai ia gwauraia lou. (Hag. 1:8; 2:​4, 5) Ena be matamanai edia gaukara idia koua, to Hagai ese Iuda taudia ia hagoadaia murinai dubu helaga haginia gaukarana idia hamatamaia lou. Edia inai taudia idia ura edia gaukara idia koua lou, to idia kwalimu lasi. Taravatu idia kokia bena lagani faiv murinai, dubu helaga haginia gaukarana idia haorea.​—⁠Esr. 6:​14, 15; Hag. 1:​14, 15.

Iseda Mauri Dalana Do Ita Laloa

Hekwakwanai ita davaria neganai, Hagai ena negai idia noho Iuda taudia bamona ita lalomanoka, a? Iseda haroro gaukara do ita rakatania, a? To, dahaka dainai ita lalomanoka? Inai tanobada dikana ai ita noho dainai, reana haida ese ita idia hahisia bona ita lalometau. Mani Habakuku ita laloa, ia gwau: “Edena negai lauegu boiboi do oi kamonai, bona oi ese ai do oi durua, vadaeni inai dagedage dainai dika do ai davaria lasi?” (Hab. 1:⁠2) Reana, Keristani tauna ia laloa Dirava ena dina be do daudau dainai, ena hesiai gaukara do ia rakatania bona sibona ena noho dalana ia hanamoa guna. Oi be unai bamona oi laloa danu, a? Bema eda lalohadai be unai bamona, ita be sibona ita koia unai. Unai dainai, Baibel ena sisiba hegeregerena ‘iseda mauri dalana do ita laloa’ bona ‘ita laloa goevagoeva’ be namo! Bona sibona ita nanadaia, ‘Dirava ena dina be ia do mai haraga lasi dainai lau daradara, a?’

Baibel ese Ia Perovetalaia Negana

Iesu be inai tanobada dokona totona ia gwauraia herevana mani ita laloa. Mareko bukana ai Iesu be nega dokona ia perovetalaia neganai, do ita gima noho herevana ia gwauraia loulou. (Mar. 13:​33-37) Apokalupo bukana ese Iehova ena dina badana Aramagedono ia perovetalaia neganai, gima noho karana  ia herevalaia danu. (Apok. 16:​14-16) Dahaka dainai gima noho karana idia herevalaia loulou? Badina taunimanima be nega daudau idia gima noho neganai, idia hesiku diba.

Iesu be haheitalai ta amo ia hahedinaraia inai tanobada dokona ita naria noho lalonai, ita gima noho be namo. Haheitalai lalonai Iesu ia gwau henaohenao taudia be tau ta ena ruma lalonai idia vareai, bona ena kohu idia henaoa. Kohu idia henaoa lasi totona, ruma tauna be dahaka do ia karaia? Hanuaboi ibounai lalonai ia noga be namo. Haheitalai dokonai Iesu be inai sisiba ia gwauraia: “Do umui noho hegaegae, badina umui laloa lasi horana ai, taunimanima ena Natuna do ia mai.”​—⁠Mat. 24:​43, 44.

Unai haheitalai ese ia hahedinaraia ita gima noho be namo, herevana nega daudau lalonai ita naria. Ena be Dirava ese inai tanobada dikana ia do haorea lasi, bona nega daudau ita naria vadaeni, to namo lasi ita daradara. Namo lasi sibona ita koia bona ita laloa, ‘Iehova ena dina be do ia mai haraga lasi.’ Unai bamona lalohadai ita abia neganai, do ita hesiku Basileia ena sivarai namona ita harorolaia totona.​—⁠Roma 12:⁠11.

Lalohadai Kerere Ragaia

Galatia 6:7 ena hereva mani ita laloa: “Umui laloa kerere lasi, . . . Tau ta ese ia hadoa gauna, unai gauna sibona do ia abia.” Bema uma gabu ena kahana ta ai gau ta oi hadoa lasi, ava dikadia do idia tubu. Unai hegeregerena, bema lalohadai maorona ita abia lasi, lalohadai kereredia be iseda lalona ai idia tubu diba. Reana do ita laloa, ‘Lau diba Iehova ena dina be do ia mai, to sedira do ia mai haraga lasi.’ Unai bamona ita laloa neganai, eda tiokratik maduna do ita laloa maragi. Unai sibona lasi, Iehova tomadiho henia karana do ita laloa bada lasi, bena Iehova ena dina ia ginidae neganai, do ita hoa.​—⁠2 Pet. 3:⁠10.

Bema ita abia dae momokani “edena kara be namo, edena kara Dirava ia ura henia, bona edena kara be goeva momokani,” lalohadai kereredia be eda lalona ai do idia tubu lasi. (Roma 12:​2, BH) Hanaihanai Baibel ita duahia karana ese ita do ia durua. Oibe, Baibel amo ita hamomokania Iehova be ia palania gauna be nega maorona ai do ia karaia.​—⁠Hab. 2:⁠3.

Sibona eda stadi, guriguri, hebou lao henia, haroro gaukara ita karaia, bona ma haida dekenai hebogahisi-mai-lalokauna ita hahedinaraia neganai, unai ese ita do ia durua ‘Iehova ena dina ia mai negana ita naria bona ita laloa noho.’ (2 Pet. 3:​11, 12) Iehova do ia itaia, herevana dahaka idia vara ita be iena dina ita naria noho. Aposetolo Paulo be ita ia hagoadaia, ia gwau: “Ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.”​—⁠Gal. 6:⁠9.

Namo lasi lalohadai kererena ita abia bona ita laloa Iehova ena dina be gabeai do ia ginidae. To, gau badana be iseda abidadama ia goada noho, badina Iehova ena dina be ia kahirakahira vadaeni.

[Picture on page 4]

Hagai bona Sekaraia ese Iuda taudia idia hagoadaia dubu helaga idia haginia totona

[Picture on page 5]

Dahaka ia vara bema henaoa tauna ena mai negana idia diba?