JAROSŁAW bona ena adavana Beata a idia gwau: “Lagani ten lalonai bisinesi idauidau bona taga maurina ai moalelaia. Ena be Iehova ena orea lalonai ai bada, to nega daudau ai hebou lasi dainai, ai manoka bona ai giroa lou be auka.”

Tadikaka ma ta Marek ia gwau: “Poland ai gavamani idia haidaua neganai, mauri ia auka. Egu moni gaukara amo lau idia hadokoa dainai lau lalohisihisi. Lau gari sibona egu bisinesi lau hamatamaia totona, badina bisinesi karaia dalana lau diba lasi. To, gabeai lau laloa bema bisinesi ta lau hamatamaia, unai ese egu famili do ia durua bona egu abidadama do ia hadikaia lasi. To, lau davaria egu abia hidi be maoro lasi.”

Gau ibounai edia davana idia bada bona moni gaukara davaria be auka dainai, momo idia lalohekwarahi bona abia hidi kereredia idia karaia. Tadikaka haida be ovataim gaukara idia karaia, haida be moni gaukara rua idia karaia, eiava bisinesi idia hamatamaia ena be bisinesi karaia dalana idia diba lasi. Idia laloa idia abia monina ese edia famili do ia durua bona edia hetura karana Iehova ida do ia goada  noho. Ena be ta ia hekwarahi ena hetura karana Iehova ida ia hagoadaia totona, to idia vara kava dika bona moni ena hekwakwanai dainai ia manoka diba. Unai dainai, haida be kohu bona moni idia ura henia bada dainai, edia hesiai gaukara idia laloa bada lasi.​—⁠Had. 9:​11, 12.

Tadikaka taihu haida be tanobada gaudia idia laloa bada dainai, idia be nega lasi sibona edia stadi, hebou o haroro gaukara idia karaia totona. Unai dainai, edia hesiai gaukara idia laloa lasi bona edia hetura karana Iehova ida ia goada lasi. Danu, edia hebamo karana edia tadikaka taihu ida idia laloaboio. (Gal. 6:10) Ma haida be Keristani kongrigeisen idia rakatania. Mani unai hekwakwanai ita herevalaia.

Tadikaka Taihu Ita Durua

Ita be tadikaka taihu dainai, dala idauidau ai lalokau ita hahedinaraia diba. (Roma 13:⁠8) Reana emu kongrigeisen ai “ogogami taudia idia tai” oi itaia. (Iobu 29:12) Haida be tauanina dalanai idia dabu. Aposetolo Ioane ia gwau unai bamona taudia ita durua be namo: “Bema tau ta be mai ena tanobada kohudia, bona ia itaia ena tadikaka be ia dabu, to ia hebogahisi henia lasi, Dirava ena lalokau be edena bamona ia lalonai ia noho diba?”​—⁠1 Ioa. 3:⁠17.

Reana unai bamona taudia oi durua bona edia dabu gaudia oi henia. To, tauanina dalanai ita durudia sibona be hegeregere lasi. Reana haida be sibona idia noho o hekwakwanai dainai idia lalohisihisi. Idia laloa Iehova ena matanai idia be anina lasi, idia gorere o edia lalokau tauna ta ia mase. Idia ida ita herevahereva bona edia lalohisihisi herevadia ita kamonai neganai, ita hahedinaraia idia ita laloa bada, unai amo ita durudia Iehova idia tabekau henia totona. (1 Tes. 5:14) Unai ese tadikaka taihu huanai ia noho lalokauna ia hagoadaia.

Elda taudia be lalohisihisi taudia edia hereva idia kamonai neganai idia hebogahisi, bona Baibel amo idia durudia. (Kara 20:28) Unai amo idia be Paulo idia tohotohoa, ia be ena Keristani tadikaka taihu ia “lalokau henia.”​—⁠1 Tes. 2:​7, 8.

To, bema Keristani tauna ta be kongrigeisen ia rakatania, edena dala ai iena tadikaka taihu ia durua o hagoadaia diba? Elda taudia be moni bona kohu tahua momo ena hahetoho idia davaria danu. Bema elda ta be unai hahetoho dekenai ia moru, dahaka do ia vara?

Lalohekwarahi Gaudia be Momo

Ruma bese ena maduna idauidau ese lalohekwarahi ia havaraia, unai dainai nega haida Keristani kara namodia ita laloaboio diba. (Mat. 13:22) Mareko ia gwau: “Egu bisinesi ia moru neganai, lau laloa tano ma ta dekenai  moni gaukara namona lau tahua be namo. Unai tano dekenai hua toi lau noho, wiki haida sibona lau giroa egu ruma bese ida lau noho, bena lau giroa lou ma hua toi lau gaukara totona​—⁠nega daudau unai bamona lau karaia. Egu Witnes lasi adavana be ia moale lasi.”

To unai sibona lasi, Mareko ma ia gwau: “Dina siahu ai hora momo lau gaukara, gaukara taudia be hereva mirodia idia gwauraia momo, bona ma haida idia kara dika henidia. Idia be raskol taudia bamona. Lau idia biagua auka dainai lau lalometau. Lau laga-ani namonamo lasi dainai, lau laloa lau be hegeregere lasi ma haida lau durua totona.”

Mareko ena sivarai ese ita ia durua diba abia hidi maorona ita karaia totona. Reana, tano ma ta dekenai moni gaukara ita karaia bona moni momo ita abia, to hekwakwanai ma haida ita davaria diba. Hegeregere, tama, ena adavana bona natudia edia hetura karana do ia goada, a? Bona edia hetura karana Iehova ida do ia goada, a? Tama be tano ma ta ai ia noho dainai, Keristani kongrigeisen bamoa karana ia hadikaia diba, a? Ena tadikaka taihu do ia durua bona hagoadaia diba, a?​—⁠1 Tim. 3:​2-5.

To reana oi itaia, haida be edia tano idia rakatania lasi, to edia moni gaukara dekenai nega bada idia haorea. Mani Jarosław bona Beata ita laloa. Jarosław ia gwau: “Ai headava murinai, emai painia gaukara durua totona paraoa mai ena sosisi (hot-dog) bisinesi ai hamatamaia. Moni momo ai abia dainai, emai bisinesi ai habadaia. To nega be lasi Keristani heboudia ai lao totona. Daudau lasi murinai, egu painia gaukara bona hesiai tauna ena maduna lau rakatania. Moni momo ai haboua dainai ai moale, bona murimuri tauna ta ida sitoa badana ta ai kehoa. Bena tano ma haida dekenai lau lao bisinesi lau karaia totona. Lau be nega momo egu adavana bona natuna kekeni ida lau noho lasi dainai, emai hetura karana ia dika ia lao. Emai bisinesi ia bada dainai, Iehova bona emai tadikaka taihu ai lalodia boio.”

Unai sivarai amo dahaka ita dibaia? Bema Keristani tauna ta be mauri namona ia ura henia dainai, ruma badana ia haginia bona kohu momo ia haboua, vadaeni do ia laloa ia be hegeregere bona Dirava tomadiho henia karana do ia laloaboio. “Iena dabua” o Keristani toana ia haboioa unai. (Apok. 16:15) Unai ia vara neganai, guna ia durua tadikaka taihu be do ia durua lasi.

Sibona Eda Kara Ita Tahua

Reana ita laloa: ‘Lau dekenai unai do ia vara lasi.’ Sibona ita nanadaia: ‘Egu mauri lalonai dahaka gaudia be mai anina bada?’ Paulo ia gwau: “Ita be tanobada dekenai gau ta ita abia mai lasi, bona gau ta danu do ita abia lao lasi. Unai dainai, bema ita be mai iseda aniani, dabua bona noho gabuna, unai be hegeregere.” (1 Tim. 6:​7, 8) Momokani, tano ta ta edia mauri dalana be idauidau. Kohu momo tanodia ai taunimanima be mai edia ruma, aniani, ranu, paua bona motuka, to tano momo ai taunimanima be unai gaudia dekenai idia dabu.

Herevana edeseni ita noho Paulo ena sisiba ita laloatao be namo: “Idia ura idia taga taudia be hedibagani do idia davaria, tarapu lalonai do idia moru, ura dikadia do idia abia bona kavakava karadia do idia karaia, unai dala ai do idia ore momokani.” (1 Tim. 6:⁠9) Labana tauna be tarapu ia hunia, unai amo ia gima lasi animal ia tarapua diba. Vadaeni, “ura dikadia” ena tarapu lalonai ita moru lasi totona, dahaka ita karaia be namo?

Mai anina bada gaudia ita atoa guna neganai, nega do ia noho Iehova ena hesiai gaukara, hegeregere sibona eda stadi ita karaia totona. Unai amo do ‘ita hegeregere momokani, bona ita noho hegaegae’ ma haida ita durua totona.​—⁠2 Tim. 2:15; 3:⁠17.

Lagani haida lalonai, elda taudia be mai lalokau ida Jarosław idia durua. Unai dainai  ena mauri lalonai gau haida ia haidaua bona ia gwau: “Elda taudia ese Baibel amo kohu momo tauna ena sivarai idia herevalaia. Unai tauna ia ura mauri hanaihanai ia abia to ia ura lasi ena kohu be ma haida dekenai ia henia. Bena elda taudia be mai hemataurai ida lau idia nanadaia bema lau laloa unai sivarai be lau ia herevalaia. Unai ese egu matana ia kehoa bona lau diba gau haida lau haidaua be namo!”​—⁠Aon. 11:28; Mar. 10:​17-22.

Jarosław be sibona ena kara ia tahua bona ena lalona ia hadaia ena bisinesi do ia koua. Lagani rua lalonai, ia bona ena ruma bese idia goada lou. Hari ia be elda ta bona ena tadikaka taihu ia durudia noho. Jarosław ia gwau: “Tadikaka haida be edia bisinesi idia laloa bada bona Dirava idia laloaboio neganai, egu sivarai be idia dekenai lau gwauraia bona lau hahedinaraia murimuri taudia ida bisinesi idia karaia be aonega karana lasi. Momokani, moni momo ia havaraia bisinesi bona koikoi karadia ita dadaraia be mai ena hekwarahi, to ita gini auka be namo.”​—⁠2 Kor. 6:⁠14.

Mareko danu be gau haida ia dibaia. Ena be tano ma ta ai moni gaukara ia karaia bona ena ruma bese ia durua, to unai ese Dirava bona tadikaka taihu tura henia karana ia hagoadaia lasi. Lagani haida murinai, ia atoa guna gaudia ia haidaua. Mareko ia gwau: “Unai lagani lalodiai, lau be Baibel ese ia herevalaia tauna Baruku bamona, ia be ‘gau namo herea, ia sibona totona’ ia tahua. Iehova dekenai egu lalohekwarahi ibounai lau gwauraia, bona hari lau mamia egu hetura karana Iehova ida be ia goada.” (Ier. 45:​1-5) Hari Mareko ia gaukara goada noho kongrigeisen lalonai elda tauna ai ia lao totona.​—⁠1 Tim. 3:⁠1.

Idia ura tano ma ta dekenai moni gaukara idia karaia tadikaka dekenai Mareko ena heduru herevana be inai: “Tano ma ta dekenai oi lao neganai, inai tanobada dikana ena tarapu idauidau lalonai oi moru diba. Unai gabu ena gado oi diba lasi dainai ma haida ida oi herevahereva be auka. Reana moni momo do oi abia, to emu hetura karana Iehova ida ia dika bona nega daudau do oi hekwarahi oi hanamoa totona.”

Bema iseda moni gaukara ita karaia bona tadikaka taihu ita durua danu, Iehova ita hamoalea. Bona iseda haheitalai amo ma haida ita durua diba abia hidi maorona idia karaia totona. Iseda haheitalai namona ese idia lalometau tadikaka bona taihu ia durua bona hagoadaia diba. Elda taudia bona lo tadikaka taihu ese kongrigeisen taudia idia durua diba, abia hidi maorona idia karaia bona mauri ena lalohekwarahi gaudia idia hanaia totona.​—⁠Heb. 13:⁠7.

Oibe, namo lasi iseda moni gaukara ita laloa bada dainai, iseda tadikaka taihu ita laloaboio. (Fili. 1:10) Namona be iseda mauri lalonai Basileia ena gaukara ita atoa guna, unai amo ‘Dirava vairanai do ita taga.’​—⁠Luka 12:​21, BHğ.

[Footnote]

[Pictures on page 21]

Emu moni gaukara oi laloa bada dainai hebou oi reaia, a?

[Pictures on page 23]

Tadikaka bona taihu oi durua diba daladia oi laloa bada, a?