Dirava Ena Laga-ani be Dahaka?
Dirava Ena Laga-ani be Dahaka?
“Dirava ena taunimanima totona sabati ena laga-ani ia do noho.”—HEB. 4:9.
1, 2. Genese 2:3 amo dahaka ita dibaia? Edena henanadai do ita herevalaidia?
GENESE ena karoa ginigunana amo ita dibaia, dina siks lalonai Dirava ese tanobada ia karaia taunimanima ese idia noholaia totona. To, unai dina ta ta edia lata be hora 24 lasi, idia be lagani tausen momo. Baibel ese dina ta ta be inai bamona ia gwauraia: “Adorahi ia ore, bona daba ia mai.” (Gen. 1:5, 8, 13, 19, 23, 31) To dina namba 7 be idau, Baibel ia gwau: “Dirava ese dina namba 7 ia hanamoa, bona dina helaga ia halaoa, badina be unai dina dekenai Dirava ese iena gau ibounai karaia gaukara ia rakatania, ia laga-ani.”—Gen. 2:3.
2 Genese bukana ia gwau Dirava be dina namba 7 ai ia laga-ani, ena anina be unai dina amo ema bona hari ia do laga-ani noho. Unai dainai ita gwau diba lagani 1513 B.C.E ai Mose ese Genese bukana ia torea neganai, Dirava ia do laga-ani noho. Danu, Baibel ia gwau taunimanima be Dirava ena laga-ani lalonai idia vareai diba. Hari, Dirava ia do laga-ani noho, a? Bema oibe, edena dala ai iena laga-ani lalonai ita vareai diba? Unai henanadai edia haere ita diba be mai anina bada.
Iehova Ia Do Laga-Ani Noho, A?
3. Iesu be edena dala amo ia hahedinaraia ena nega be do dina namba 7?
3 Badina rua dainai ita diba Iesu ena nega bona Keristani ginigunadia edia nega be do dina namba 7. Badina ta be Iesu ese ena inai taudia dekenai ia gwauraia herevadia amo unai ita dibaia. Iesu idia badu henia badina Sabati dinana ai gorere taudia ia hanamoa. Idia laloa unai ia karaia be kerere, badina Mose ena Taravatu ia gwau, Sabati dinana ai gau ta do idia karaia lasi. To Iesu ia gwau: “Lauegu Tamana be ia gaukara noho ema bona hari, bona lau danu lau gaukara noho.” (Ioa. 5:16, 17) Ena hereva ena anina be dahaka? Anina be: “Lau bona egu Tamana emai gaukara be hegeregere. Egu Tamana be lagani tausen momo ia gaukara, bona ia do gaukara noho, unai dainai lau be Sabati dinana ai lau gaukara noho.” Unai ese ia hahedinaraia, Iesu ena nega be do dina namba 7, unai be Dirava ena laga-ani dinana, badina unai dina ia do ore lasi. *
4. Paulo ena hereva amo edena bamona ita diba Keristani ginigunadia edia nega be do dina namba 7?
4 Dina namba 7 ia do ore lasi ena badina ma ta be, Paulo ese Heberu taudia dekenai ia torea revarevana lalonai ia noho. Paulo be Genese 2:2 ena hereva ia do gwauraia lasi neganai, ia gwau: “Ita, abidadama ita hahedinaraia taudia be unai laga-ani lalonai ita vareai.” (Heb. 4:3, 4, 6, 9) Unai ese ia hahedinaraia Paulo ena nega be do dina namba 7. Vadaeni, dina namba 7 be edena nega ai do ia ore?
5. Dina namba 7 ai Iehova be dahaka ia karaia? Edena nega ai Dirava ena ura do ia guguru?
5 Unai henanadai ita haerelaia totona, Iehova ese dina namba 7 ia abia hidi ena badina ita laloatao be namo. Genese 2:3 ia gwau: “Dirava ese dina namba 7 ia hanamoa, bona dina helaga ia halaoa.” Iehova ese unai dina be dina helagana ai ia halaoa badina ia ura tanobada ai ia karaia gaudia do ia hagugurua. Bona ia ura ia idia badinaia taudia ese tanobada do idia noholaia bona naria. (Gen. 1:28) Unai ia hagugurua totona, Iehova Dirava bona Iesu Keriso, “Sabati ena Lohiabada,” be idia “gaukara noho ema bona hari.” (Mat. 12:8) Unai amo ita diba, Dirava ena laga-ani dinana be do ia ore lasi ela bona ena ura ibounai ia hagugurua. Unai be Keriso ena lohia lagani 1,000 ena dokonai do ia ore.
‘Edia Gwau-Edeede Karana Tohotohoa Lasi’
6. Daidia be haheitalai dikadia? Bona edia kara amo dahaka ita dibaia?
6 Dirava ese ena ura Adamu bona Heva dekenai ia gwauraia, to idia gwau-edeede. Adamu bona Heva sibona lasi, to taunimanima milioni momo idia gwau-edeede danu. Hegeregere, Israela taudia danu be Iehova idia gwau-edeede henia lou lou. Bona Paulo ese ena negai idia noho Keristani taudia ia hadibaia bema Dirava idia badinaia lasi, Israela taudia edia kara idia tohotohoa unai. Ia gwau: “Unai dainai namona be ita gaukara goada unai laga-ani lalonai ita vareai, unai amo ita ta ese edia gwau-edeede karana do ia tohotohoa lasi.” (Heb. 4:11) Paulo ese ia hahedinaraia gwau-edeede taudia be Dirava ena laga-ani lalonai do idia vareai lasi. Ita dekenai unai ena anina be dahaka? Bema Dirava ena ura ita badinaia lasi, Dirava ena laga-ani lalonai ita vareai diba, a? Unai henanadai edia haere ita diba be mai anina bada, bona inai stadi ai unai do ita herevalaia. To Israela taudia edia kara ita herevalaia guna, bona Dirava ena laga-ani lalonai idia vareai lasi ena badina do ita herevalaia danu.
“Egu Laga-Ani Lalonai Do Idia Vareai Lasi”
7. Iehova ese Aigupito amo Israela taudia ia hamauria neganai, iena ura be dahaka? Israela taudia be dahaka idia karaia be namo?
7 Lagani 1513 B.C.E. ai, Iehova ese ena ura Israela taudia totona be Mose dekenai ia gwauraia. Dirava ia gwau: “Lau diho mai inai, Aigupito taudia edia imana dekena amo do lau hamauridia totona. Unai tano dekena amo dohore lau hakaudia, ia lao bona tano namo herea dekenai. Tano badana dekenai dohore idia ginidae. Unai tano be aniani namodia gabuna.” (Eso. 3:8) Iehova ese Aigupito amo Israela taudia ia hamauridia ena badina be, ia ura idia be iena taunimanima ai ia halaoa, Aberahamo ia gwauhamata henia hegeregerena. (Gen. 22:17) Dirava ese idia dekenai taravatu ia henia, unai amo idia be Dirava ida maino ai idia noho bona ena turana ai idia lao diba. (Isa. 48:17, 18) Israela taudia ia hamaoroa: “Bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena.” (Eso. 19:5, 6) Unai dainai, Israela taudia be Dirava ena taunimanima ai idia lao diba, bema iena taravatu idia badinaia.
8. Bema Israela taudia be Dirava idia kamonai henia, dahaka hahenamo idia abia diba?
8 Israela taudia ese idia abia diba hahenamo mani oi laloa! Iehova ia gwauhamata bema ia idia kamonai henia, ia ese edia tano, vain uma, bona edia animal do ia hanamoa. Danu, ia gwauhamata edia inai taudia amo do ia gimadia. (1 King Taudia 10:23-27 duahia.) Iesu ena nega ai danu, ena be Roma taudia ese bese momo idia lohiaia, to Iehova be Israela besena ena lohia dainai, bese ma haida ese idia do ia lohiaia lasi. Iehova ia ura Israela besena be bese ma haida dekenai haheitalai namona do idia hahedinaraia. Ia ura ibounai do idia diba ia be Dirava momokanina, bona iena hereva idia kamonai taudia ibounai be ia amo hahenamo idia abia diba.
9, 10. (a) Dahaka dainai Israela taudia be Aigupito dekenai idia giroa lou lalohadai be maoro lasi? (b) Bema idia giroa lou, Iehova do idia tomadiho henia diba, a?
9 Iehova ese ena ura be Israela taudia amo ia hagugurua be hahenamo badana. Bema ena ura idia badinaia, Iehova ese idia bona tanobada besedia ibounai ia hanamodia diba. (Gen. 22:18) To, Israela taudia be Iehova amo idia abia diba hahenamo—Dirava ena bese ai idia lao bona haheitalai namona ai idia lao karana—idia laloa bada lasi. To, idia ura Aigupito dekenai idia giroa lou! (Numera 14:2-4 duahia.) Bema idia giroa lou, Iehova ena ura dalanai ia do idia tomadiho henia lasi, bona idau bese dekenai haheitalai namona idia hahedinaraia diba lasi. Bema Aigupito dekenai igui hesiai taudia ai idia lao lou, do ia auka Dirava ena Taravatu idia badinaia bona edia dika ia gwauatao totona. Edia lalohadai ese ia hahedinaraia idia be sibodia edia namo idia laloa, to Dirava bona ena ura idia laloa bada lasi. Unai dainai Iehova ia gwau: “Unai uru taudia lau badu henia bona lau gwau, ‘Nega ibounai edia kudouna ai egu hereva idia dadaraia, bona egu dala idia dibaia lasi.’ Unai dainai egu badu lalonai lau gwauhamata, lau gwau, ‘Idia be egu laga-ani lalonai do idia vareai lasi.’ ”—Heb. 3:10, 11; Sal. 95:10, 11.
10 Aigupito dekenai idia ura giroa lou karana ese ia hahedinaraia Iehova amo idia abia hahenamodia idia laloa bada lasi. To, unai gwau-edeede taudia be Aigupito ena aniani namodia idia laloa bada. (Num. 11:5) Idia be Esau bamona, aniani mereki tamona dainai, ena vara guna ahuna ia hoihoilaia.—Gen. 25:30-32; Heb. 12:16.
11. Ena be Israela taudia be Iehova idia abidadama henia lasi, to ena ura ia haidaua, a?
11 Ena be Aigupito idia rakatania Israela taudia be Iehova idia abidadama henia lasi, to iena ura idia totona be ia idau lasi. To, gabeai idia vara uru be Iehova ena hereva idia kamonai bona Iehova ena hahegani idia badinaia dainai, Gwauhamata Tanona dekenai idia vareai. Iosua 24:31 ia gwau: “Iosua ena mauri dinadia ibounai lalonai Israela taudia ese Lohiabada ena hesiai gaukara idia karaia. Bona Iosua ia mase murinai danu idia ese Lohiabada idia badinaia noho. Oibe, Israela taudia ese Lohiabada idia badinaia noho, ela bona edia gunalaia taudia, tau badadia, idia mase ore. Taudia unai, Iosua danu Lohiabada ese Israela ia durua karadia ibounai edia matana dekenai idia itaia.”
12. Edena bamona ita diba Keristani taudia be Dirava ena laga-ani lalonai idia vareai diba?
12 To, Iehova idia badinaia Israela taudia be idia buruka bena idia mase. Gabeai ia vara uruna be “Lohiabada idia diba lasi, bona Lohiabada ena durua kara Israela taudia dekenai danu idia laloaboio momokani.” Unai dainai “Lohiabada ena vairanai kara dika idia karaia” bona dirava koikoidia idia tomadiho henia. (Gun. 2:10, 11) Israela taudia idia gwau-edeede dainai, Dirava ese ia lalonamo henidia lasi. Unai dainai Gwauhamata Tanona be edia “laga-ani” gabuna lasi. Paulo ese Israela taudia ia herevalaia, ia gwau: “Bema Iosua ese laga-ani gabuna lalonai idia ia hakaua vareai vadaeni, unai murinai Dirava ese dina ma ta do ia gwauraia lasi.” Bena ia gwau: “Unai dainai Dirava ena taunimanima totona sabati ena laga-ani ia do noho.” (Heb. 4:8, 9) Paulo ese ia herevalaia “Dirava ena taunimanima” be Keristani taudia. Haida be Keristani taudia ai idia do lao lasi neganai, Mose ena Taravatu idia badinaia, bona haida be Mose ena Taravatu idia diba lasi taudia. Paulo ena hereva ena anina be, hari idia noho Keristani taudia be Dirava ena laga-ani lalonai idia vareai diba.
Dirava Ena Laga-Ani Lalonai Idia Vareai Lasi
13, 14. (a) Israela taudia be Dirava ena laga-ani lalonai idia vareai totona, dahaka idia karaia be namo? (b) Keristani taudia be Dirava ena laga-ani lalonai idia vareai totona, dahaka idia karaia be namo?
13 Paulo ese Heberu Keristani taudia ia tore henia badina haida be Dirava ena ura idia badinaia lasi. (Heberu 4:1 duahia.) Dahaka idia karaia? Mose ena Taravatu ese ia gwauraia gaudia haida idia do badinaia noho. Lagani 1,500 lalonai, Dirava ena taunimanima be iena lalonamo idia abia totona, Mose ena Taravatu idia badinaia be namo. To Iesu ia mase murinai, Mose ena Taravatu idia badinaia be anina lasi. Keristani taudia haida be unai idia lalopararalaia lasi, unai dainai Taravatu ena kahana haida idia badinaia noho. *
14 Paulo ese Heberu Keristani taudia ia hamaoroa Iesu be hahelaga tauna badana, bona ia ese goevadae lasi hahelaga taudia ibounai ia hereaia. Bona ia gwau kontraka matamata ese kontraka gunana ia hereaia. Danu, ia gwau Iehova ena dubu helaga be “badana bona hereadaena” bona “taunimanima ese edia imana amo idia karaia” gauna ia hereaia. (Heb. 7:26-28; 8:7-10; 9:11, 12) Paulo ese Sabati dinana ena haheitalai ia herevalaia Keristani taudia be Iehova ena laga-ani lalonai idia vareai dalana ia hahedinaraia totona. Ia gwau: “Dirava ena taunimanima totona sabati ena laga-ani ia do noho. Badina Dirava ena laga-ani lalonai ia vareai tauna be ena gaukara amo ia laga-ani danu, Dirava be sibona ena gaukara amo ia laga-ani hegeregerena.” (Heb. 4:8-10) Heberu Keristani taudia dekenai Paulo ia gwau, namo lasi idia ta ia laloa “ena gaukara,” unai be Mose ena Taravatu badinaia karana amo Dirava ena lalonamo do ia abia. Pentekoste 33 C.E. dinana ai ema bona hari, Iesu Keriso idia abidadama henia taudia be Iehova ese ia lalonamo henidia, unai be iena hariharibada karana.
15. Iehova ena laga-ani lalonai ita vareai totona, dahaka ita karaia be namo?
15 Dahaka dainai Mose ena negai, Israela taudia haida be Gwauhamata Tanona ai idia vareai lasi? Badina Iehova idia kamonai henia lasi. Dahaka dainai Paulo ena negai, Keristani taudia haida be Dirava ena laga-ani lalonai idia vareai lasi? Badina Iehova idia kamonai henia lasi. Mose ena Taravatu be ia guguru vadaeni, unai dainai Iehova ia ura dala idauna ai iena taunimanima ese ia do idia tomadiho henia, to unai idia abia dae lasi.
Dirava Ena Laga-Ani Lalonai Ita Vareai Dalana
16, 17. (a) Hari, Keristani taudia be edena dala ai Dirava ena laga-ani lalonai idia vareai diba? (b) Stadi gabena ai dahaka do ita herevalaia?
16 Hari, ita diba Keristani taudia be hahemauri idia abia totona Mose ena Taravatu idia badinaia be anina lasi. Paulo be Efeso taudia ia hamaoroa: “Momokani, unai hebogahisi hereadaena dainai, umui be abidadama amo hahemauri umui abia, bona unai be umui emui hekwarahi dainai lasi. To inai be Dirava ena harihari gauna. Oibe, unai hahemauri be emui gaukara dainai umui abia lasi.” (Efe. 2:8, 9) Vadaeni hari, Keristani taudia be edena dala ai Dirava ena laga-ani lalonai idia vareai diba? Laloatao: Iehova ese ena laga-ani dinana ia abia hidi, unai amo ena ura tanobada bona kara maoromaoro taudia totona ia hagugurua diba. Iehova ese ena ura bona do ita karaia gaudia be ena orea amo ita ia hadibaia. Iehova ena laga-ani lalonai ita vareai diba, bema ena hereva ita kamonai bona ena orea ida ita gaukara hebou.
17 Bema igui hesiai tauna mai ena kamonai bona kara maoromaoro ita kamonai henia lasi, bona sibona eda lalohadai ita badinaia, ita be Iehova ena ura ita dadaraia unai. Bema Iehova ena ura ita dadaraia, iena turana ai do ita lao diba lasi. Stadi gabena ai, kamonai karana ita hahedinaraia daladia do ita herevalaia. Bona ita karaia abia hidi ese do idia hahedinaraia ita be Dirava ena laga-ani lalonai ita vareai eiava lasi.
[Footnotes]
^ par. 3 Sabati dinana ai, hahelaga taudia bona Levi taudia be dubu helaga ai edia gaukara idia karaia, to unai ese Mose ena Taravatu ia utua lasi. Dirava ese Iesu be iseda hahelaga tauna badana ai ia halaoa. Unai dainai, Sabati dinana ai Iehova ese ia henia gaukarana ia karaia be kerere lasi.—Mat. 12:5, 6.
^ par. 13 Ita diba lasi bema Pentekoste 33 C.E. murinai, Heberu Keristani taudia haida be Kara Dika Ena Davana Karaia Dinana ai boubou gaudia idia do henia noho. Bema unai idia karaia, ia hahedinaraia idia be Iesu ena boubou gauna idia matauraia lasi. To, Baibel ia gwau Heberu Keristani taudia haida be Mose ena Taravatu ena kahana haida idia badinaia noho.—Gal. 4:9-11.
Ita Laloa Dobu Henanadai
• Dina namba 7 ai Iehova be dahaka ia ura karaia?
• Edena bamona ita diba ita be dina namba 7 ai ita do noho?
• Dahaka dainai Israela taudia haida bona Keristani ginigunadia haida be Dirava ena laga-ani lalonai idia vareai lasi?
• Hari, edena dala ai Dirava ena laga-ani lalonai ita vareai diba?
[Study Questions]
[Blurb on page 27]
Iehova ena laga-ani lalonai ita vareai diba, bema ena hereva ita kamonai bona ena orea ida ita gaukara hebou
[Pictures on page 26, 27]
Hari, Keristani taudia be Dirava ena laga-ani lalonai idia vareai totona, dahaka idia karaia be namo?
