Heberu Toretoredia lalonai Mesia ena peroveta herevadia be hida?

Heberu Toretoredia ita stadilaia namonamo neganai, Iesu Keriso ese ia hagugurua peroveta herevadia momo ita dibaia. Idia ese Mesia ena bese, do ia hedinarai negana, ena kara, ia dekenai do idia vara gaudia, bona Iehova Dirava ese ia dekenai ia henia maduna idia perovetalaia. Unai ibounai ese idia hamomokania Iesu be Mesia. To, Heberu Toretoredia lalonai Mesia ena peroveta herevadia hida idia noho ita diba be gau badana lasi.

Edena siri be Mesia idia perovetalaia bona edena be lasi be taunimanima momo ese idia daradaralaia. Alfred Edersheim ena buka (The Life and Times of Jesus the Messiah) lalonai ia gwau, idaunegai rabi taudia edia toretore ese idia hahedinaraia Heberu Toretoredia lalonai Mesia ena peroveta herevadia 456 idia noho, ena be inai hereva Mesia ia hedinarai lasi. Bema unai peroveta herevadia 456 ita duahia, do ita daradara danu. Haheitalai ta be Edersheim ia gwau, Iuda taudia idia laloa Genese 8:11 be Mesia ia perovetalaia. Idia gwau “pune ese ia mailaia olive rauna be Mesia Ororona amo ia abia.” Danu, Edersheim ia hahedinaraia Iuda taudia be Esodo 12:42 idia lalopararalaia namonamo lasi bona idia gwau: “Mose be tano gagaena amo ia mai hegeregerena, Mesia danu be Roma amo do ia hedinarai.” To, Baibel idia diba bada taudia bona taunimanima ma haida idia gwau, unai siri rua be Iesu Keriso idia herevalaia lasi.

Ena be Iesu Keriso ese ia hagugurua vadaeni peroveta herevadia be momo, to edia namba korikori ita diba lasi. Hegeregere, Isaia karoa 53 ese Mesia ia perovetalaia. Isaia 53:​2-7 ena peroveta herevana ia gwau: “Ia be mai ena hairaina lasi . . . Taunimanima ese ia idia negea, bona ia idia rakatania. . . . Iseda hisihisi dikadia, bona iseda lalohisihisi danu, be ia ese ia huaia. . . . Iseda kara dika dainai, idia haberoa . . . Mamoe ena natuna be, idia alaia gabuna dekenai idia hakaua lao bamona.” Isaia karoa 53 be peroveta herevana tamona eiava peroveta herevadia idauidau?

Mani Isaia 11:1 ena hereva ita laloa danu, ia gwau: “Iese ena bese taudia, be au ena badina, idia utua diho gauna bamona. Inai badina dekena amo, herahera matamata do ia tubu, bona Iese ena ramu dekena amo, Rigi ta do ia tubu, King matamatana ta unai.” Siri 1 ai ia noho peroveta herevana be siri 10 ai ia hedinarai lou. Vadaeni, unai siri ruaosi lalonai idia noho peroveta herevana be idau eiava idia be gau tamona idia herevalaia? Isaia karoa 53 bona Isaia karoa 11 dainai, Mesia ena peroveta herevadia edia namba korikori ita diba lasi.

Unai dainai, namo lasi Heberu Toretoredia ai idia noho Mesia ena peroveta herevadia edia namba korikorina ita laloa momo. Iehova ena orea ese Iesu idia perovetalaia herevadia bona guguru dalana edia lista ia halasia. a Unai lista be sibona iseda stadi, ruma bese ena tomadiho o haroro gaukara lalonai ita gaukaralaia diba. Vadaeni, herevana Mesia ena peroveta herevadia be hida, to gau badana be idia hamomokania Iesu be Keriso o Mesia.

[Footnote]