Hesiai lagani ena ripoti oi lalopararalaia, a?

Lagani ta ta ai tanobada hegegemadai Iehova ena taunimanima ese idia karaia haroro bona hahediba gaukarana ena ripoti be Yearbook dekenai ita duahia neganai ita moale. To, ripoti ena hereva kwaradia bona idia torea namba oi lalopararalaia, a? Mani idia haida ita herevalaia.

Hesiai lagani. Inai be September ia lao August edia hua lalonai idia gogoa ripoti ia hahedinaraia. Yearbook be lagani gunana ena ripoti ia hahedinaraia. Hegeregere, lagani 2011 Yearbook dekenai lagani 2010 ena hesiai lagani, unai be September 1, 2009 ia lao August 31, 2010, ena ripoti ia noho.

Pablisa edia averes bona lagani gunana amo ia daekau namba. “Pablisa” anina be idia bapatiso vadaeni Iehova ena Witnes taudia, bona idia bapatiso lasi pablisa taudia. “Lagani gunana amo ia daekau namba” ese ia hahedinaraia hesiai laganina ena hua ta ta ai pablisa taudia edia namba ia daekau. Unai namba ese ripoti idia henia haraga lasi taudia edia namba ia hahedinaraia danu. Nega haida pablisa haida edia ripoti be nega rua idia duahia. To, lagani gunana amo ia daekau namba lalonai ripoti idia henia lasi pablisa edia hora ia hedinarai lasi. Unai dainai, pablisa ibounai ese hua ta ta ai ripoti idia henia haraga be gau badana. “Pablisa edia averes” be huahua ta ta ai nega ibounai ripoti idia henia taudia edia namba.

Hora iboudiai. Lagani 2011 Yearbook ese ia hahedinaraia, Iehova ena Witnes taudia be edia haroro gaukara ai hora 1.6 bilioni idia hagugurua. To, mamoe vadivadi, hebou, sibona iseda Baibel stadi bona laloa dobu karadia ai ita gaukaralaia horadia idia hahedinaraia lasi.

Ita gaukaralaia monina. Lagani 2010 ena hesiai lagani lalonai Iehova ena Witnes taudia ese dola milioni 155 mai kahana idia gaukaralaia, spesel painia, misinari bona loaloa naria taudia edia haroro gaukara idia durua totona. To, idia printaia Baibel buka bona magasin, bona tanobada hegegemadai Betele taudia 20,000 naria totona idia gaukaralaia moni be unai ripoti dekenai ia hedinarai lasi.

Paraoa bona wain abia taudia. Idia be bapatiso Witnes taudia bona tanobada hegegemadai Memorial idia karaia neganai, paraoa bona wain idia abia taudia edia namba. Unai namba be tanobada ai idia noho horoa taudia ibounai edia namba ia hahedinaraia, a? Lasi. Reana, haida be edia tomadiho gunana ena hahediba hereva koikoi, o kwara gorere idia abia dainai idia laloa namonamo lasi bona paraoa bona wain idia abia kava. Unai dainai, tanobada ai idia do noho horoa taudia edia namba korikorina ita diba lasi. Hakaua Oreana be Memorial ai paraoa bona wain idia abia taudia ibounai edia ladana be lista ta dekena idia torea lasi. a

To, ita diba hisihisi badana ia matamaia neganai, Dirava ese ia horoa “igui hesiai taudia” haida be tanobada ai do idia noho. (Apok. 7:​1-3) To, unai ia do vara lasi lalonai, hesiai lagani ena ripoti ese ia hahedinaraia horoa taudia be haroro bona hahediba gaukarana idia gunalaia noho.

[Footnote]