TADIKAKA Stephen Lett, Iehova ena Witnes taudia edia Hakaua Oreana ena memba ta, ese inai hereva amo helai taudia edia lalona ia veria, ia gwau: “Inai hebou ia ore neganai, do oi gwau, ‘Inai lagani ena tiokratik hebou be hebou idauna ta!’ ” October 2, 2010 ai, Watch Tower Bible and Tract Society of Pennsylvania ena hebou namba 126 be Jersey City ena Assembly Hall, New Jersey, U.S.A. dekenai idia karaia. Hebou dekenai idia herevalaia gaudia haida be dahaka?

Tok ginigunana be Tadikaka Lett ese ia henia, bona ia be Iehova ena guba kariota, Esekiela Bukana ese ia herevalaia gauna ia kikilaia. Dirava ena orea be unai kariota ese ia laulaulaia, bona Iehova sibona ese ia haheaua. Ena orea be mai ena kahana rua, guba oreana bona tanobada oreana. Tadikaka Lett ia gwau, guba oreana lalonai lauma taudia idia noho, bona Iehova ena lalohadai idia badinaia totona idia heau haraga, kevaru ia heau haraga bamona. Iehova Dirava ena tanobada oreana be unai bamona danu. Tadikaka Lett ese vanegai lagani lalonai idia vara senisi haida ia herevalaia.

Hegeregere, brens opesi haida edia gaukara idia koua bona brens opesi ta ena henari henunai idia atoa. Unai amo guna Betele dekenai idia gaukara taudia momo be haroro gaukara idia karaia diba. Tadikaka Lett ese helai taudia ia hagoadaia Hakaua Oreana totona do idia guriguri, mai kamonai bona aonega ida edia gaukara idia karaia totona.​—⁠Mat. 24:​45-47.

Ripoti Bona Intaviu

Haiti ena Brens Komiti ta, Tab Honsberger, ese January 12, 2010, ai ia vara tano mareremarere ena ripoti ia henia, bona ia hahedinaraia taunimanima 300,000 bamona idia mase. Ia gwau dubu gunalaia taudia be taunimanima idia hamaoroa idia mase taudia be Dirava ese ia panisidia bona kara namo taudia ia gimaia. To, tano mareremarere lalonai dibura ruma ena magu ia moru neganai, dibura taudia tausen momo idia heau boio. Haiti taudia momo be hereva momokani idia kamonai neganai, idia vara hisihisi ena badina idia lalopararalaia, bona unai ese edia lalona ia hagoadaia. Tadikaka Honsberger ese Haiti tadikaka ta ena sivarai ia gwauraia. Ena adavana be tano mareremarere ai ia mase bona ia gwau: “Unai nega amo ema bona hari lau do taitai noho, bona lau diba lasi edena negai egu taitai do lau hadokoa. To, lau moale badina Iehova ena orea ena lalokau lau mamia. Lau be mai egu helaro, bona lau ura ma haida dekenai lau harorolaia.”

 Mark Sanderson be guna Philippines ena Brens Komiti ta bona hari ia be Brooklyn Betele ena memba ta, ese Philippines ena ripoti ia henia. Mai moale ida ia gwau hua 32 lalonai pablisa edia namba ia bada daekau, bona Baibel stadi edia namba ese pablisa taudia edia namba ia hanaia. Ia ese tadikaka ta ladana Miguel ena tubuna mero be tau ta ese ia alaia ena sivarai ia gwauraia. Miguel ia hekwarahi unai tauna be kota dekenai ia laohaia bona dibura ruma dekenai idia atoa. Gabeai, dibura ruma lalonai idia haroro neganai, Miguel ese unai tauna ia davaria. Miguel ia gari sisina, to mai manau bona hebogahisi ida ia haroro henia. Unai murinai, stadi ia matamaia, ena kara ia haidaua bona Iehova ia lalokau henia. Hari ia be bapatiso tadikaka ta, bona Miguel ena turana namona ai ia lao. Hari, Miguel ia ura ena tadikaka matamata ia durua dibura ruma amo ia raka-lasi haraga totona. a

Hebou lao taudia be tadikaka haida idia diba namonamo totona, Tadikaka Mark Noumair, Tiokratik Sikuli Dipatmen ena tisa ta, ese headava taudia siks ia intaviu henia. Idia be Alex bona Sarah Reinmueller, David bona Krista Schafer, bona Robert bona Ketra Ciranko. Tadikaka Reinmueller be Buka Karaia Komiti ena durua tauna ta. Ena matamata neganai, Iehova hesiai henia karana ia goadalaia, bona ena mauri lagani be 15 neganai Canada dekenai ia painia, bona nega momo sibona ia haroro. Tadikaka Reinmueller idia nanadaia Betele dekenai daika ese ia hagoadaia neganai, ia be tadikaka goadadia toi ia gwauraia. Ia gwau idia ta ta ese ia idia durua Iehova hesiai henia karana ia goadalaia totona. Taihu Sarah Reinmueller be ena turana namona ta ena sivarai ia herevalaia. Ena turana be ena abidadama dainai, lagani momo lalonai China ena dibura ruma momo dekenai idia koua. Taihu Sarah ese ia dibaia gauna be guriguri amo Iehova ia tabekau henia be gau badana.

Tadikaka David Schafer, be Hadibaia Komiti ena durua tauna ta. Iena sinana ia hanamoa badina ia be abidadama goada hahinena. Ia be mero matamata neganai, au idia utua Keristani tadikakadia ese ia idia durua heduru painia gaukara ia karaia totona. Iena adavana Krista be Betele dekenai idia noho buruka tadikaka taihu edia haheitalai namona ia herevalaia. Iesu ena hereva bamona, idia be ‘gau maragina dekenai kamonai karana idia hahedinaraia.’​—⁠Luka 16:⁠10.

Tadikaka Robert Ciranko be Toretore Komiti ena durua tauna ta. Ia gwau iena tubudia be Hungary tanona amo idia mai. Idia be horoa Keristani taudia bona idia be haheitalai namona. Ia maragi neganai, lagani 1950 lalodiai  idia karaia hebou badadia ia moalelaia bona ia laloparara Iehova ena orea be orea badana. Iena adavana Ketra be ia painia neganai idia vara gaudia ia herevalaia. Ia gwau ena kongrigeisen lalonai aposteit taudia idia noho bona hekwakwanai momo idia vara, to ia ese Iehova ia badinaia noho. Ia haheauka dainai, gabeai kongrigeisen ma ta dekenai spesel painia gaukara ia karaia, bona unai kongrigeisen ena lalotamona karana ia moalelaia bada.

Gabeai, Tadikaka Manfred Tonak ese Etiopia ena ripoti ia henia. Baibel ese Etiopia ia herevalaia danu, bona hari sivarai namona harorolaia taudia ibounai be 9,000 mai kahana. Momo be Etiopia ena taoni badana Addis Ababa kahirakahira idia noho. Daudau hanuadia dekenai haroro taudia be lasi. Unai dainai, tano ma haida dekenai idia noho Etiopia Witnes taudia idia boiria unai daudau hanuadia dekenai idia haroro totona. Momo idia lao bona unuseniai idia noho Witnes taudia idia hagoadaia bona kamonai taudia momo idia davaria.

Program lalonai idia herevalaia gauna badana ta be Russia gavamani ese tadikaka taihu idia kota henia ena sivarai. Tadikaka Aulis Bergdahl be Russia ena Brens Komiti ta, bona ia ese Iehova ena Witnes taudia ese idia davaria dagedage ena sivarai ia gwauraia. Tadikaka Philip Brumley be United States brens ena Legal Department dekenai ia gaukara. Moscow ena gavamani ese idia gwauraia samani herevadia nain be European Court of Human Rights (ECHR) ese idia kamonai, bona idia vara gaudia be Tadikaka Brumley ese ia herevalaia. Ia gwau ECHR ia davaria unai samani herevadia nain be taravatu idia utua lasi, bona Iehova ena Witnes taudia be kerere ta idia karaia lasi. Unai nega ai ena be kota ena hahemaoro herevana idia do diba lasi, to Tadikaka Brumley ia laloa ECHR ena hahemaoro herevana ese tano ma haida dekenai idia noho Witnes taudia do ia durua bada.

Unai sivarai namona idia kamonai murinai, Tadikaka Lett ia gwau France gavamani ese Iehova ena Witnes taudia amo takisi moni idia gwauraia ena samani herevana be ECHR ese do ia kamonai danu. Nega haida, ECHR be keis haida ia dadaraia. Unai Kota be Iehova ena Witnes taudia edia keis 39 ia kamonai vadaeni, bona keis 37 lalonai hahemaoro namodia ia karaia. Tadikaka Lett ese tadikaka taihu ibounai ia hagoadaia France dekenai idia noho tadikaka taihu totona do idia guriguri.

Tadikaka Richard Morlan, Kongrigeisen Elda Taudia Edia Sikuli ia naria tadikaka ta, ese ripoti dokona ia henia. Mai moale ida unai  sikuli ia herevalaia, bona unai sikuli dekenai idia lao elda taudia edia hereva namodia ia gwauraia danu.

Hakaua Oreana ese Idia Henia Tok Ma Haida

Tadikaka Guy Pierce, Hakaua Oreana ena memba ta, ese lagani 2011 ena siri badana, “Iehova ena ladana be iseda roho mauri gabuna” ia herevalaia. (Sep. 3:​12, NW ) Ia gwau ena be inai nega ai gau momo dainai Iehova ena taunimanima idia moale, to mai anina bada gaudia haida danu idia vara noho. Iehova ena dina badana be ia kahirakahira, to taunimanima be tomadiho koikoi, politikol oreadia, kohu, bona moale karadia be edia roho mauri gabudia ai idia halaoa. To, roho mauri gabuna korikori ita davaria totona, Iehova ena ladana dekenai ita boiboi be namo. Anina be Iehova Dirava do ita dibaia, matauraia, abidadama henia, bona lalokau henia.

Tadikaka David Splane, Hakaua Oreana ena memba ta, ese lalona veria tok ia henia. Ena ladana be “Dirava Ena Laga-Ani Lalonai Oi Vareai Vadaeni, A?” Ia hamaorodia do idia helai kava lasi, badina unai laga-ani dinana lalonai Iehova bona ena Natuna be idia “gaukara noho,” Dirava ena ura tanobada dekenai idia hagugurua totona. (Ioa. 5:17) To, edena dala ai Dirava ena laga-ani lalonai ita vareai diba? Kara dika ita rakatania bona Keriso bona ena boubou gauna do ita abidadama henia. Danu, Dirava ena ura do ita laloatao, bona ita gaukara goada unai ura ita hagugurua totona. Nega haida unai ita karaia be auka, to namona be Iehova ena orea ese ia henia sisiba bona hakaua dalana ita badinaia. Tadikaka Splane ese helai taudia ibounai ia hagoadaia Dirava ena laga-ani lalonai idia vareai totona.

Tok ginigabena be Tadikaka Anthony Morris, Hakaua Oreana ena memba ta, ese ia henia. Ena hereva kwarana be “Ita be Dahaka Ita Naria Noho?” Tadikaka Morris be tama ta bamona helai taudia ia hagoadaia, nega vairai do idia guguru peroveta herevadia idia laloa totona. Abidadama taudia ibounai be inai peroveta herevadia rua edia guguru negana idia naria noho: “Maino bona noho namo!” ena boiboi negana, bona tomadiho koikoi ibounai edia moru negana. (1 Tes. 5:​2, 3; Apok. 17:​15-17) To, Tadikaka Morris ia gwau, bema niusi lalonai sivarai dikadia ita kamonai, namo lasi ita gwau, “Aramagedono ia mai inai.” To, Mika 7:7 ena hereva bamona, namona be mai moale ida ita naria sibona. Danu, ita ibounai ia hagoadaia Hakaua Oreana ida do ita raka hebou, tuari lalonai tuari taudia idia raka hebou bamona. Tadikaka Morris ia gwau, “Lohiabada ena nega namona umui naria noho taudia ibounai e, . . . do umui boga auka.”​—⁠Sal. 31:⁠24.

Program ena dokonai, sivarai namodia haida idia halasia. Tadikaka Geoffrey Jackson, Hakaua Oreana ena memba ta, ese English idia diba namonamo lasi taudia totona idia halasia simplified Watchtower ia herevalaia. Bena, Tadikaka Stephen Lett, ia gwau Hakaua Oreana ese United States dekenai distrik naria taudia bona edia adavadia hagoadaia gaukarana do idia hamatamaia. Bona Hesiai Gaukara Hadibaia Sikulina ena ladana do idia haidaua Singul Tadikaka Edia Baibel Sikuli. Danu, sikuli matamata ladana Keristani Headava Taudia Edia Baibel Sikuli do idia hamatamaia. Unai sikuli ese headava taudia do ia durua Iehova ena orea lalonai maduna idauidau idia huaia totona. Patterson dekenai Loaloa Naria Taudia Bona Edia Adavadia Edia Sikuli bona Brens Komiti Bona Edia Adavadia Edia Sikuli be lagani ta lalonai nega rua do idia karaia. Bona guna idia lao taudia be nega iharuana idia lao diba.

Tadikaka John E. Barr, ena mauri lagani be 97 bona nega daudau lalonai Hakaua Oreana ena memba ta, be mai manau ida guriguri dokona ia gwauraia. b Ibounai be unai hebou idia rakatania neganai, idia gwau ia be hebou idauna ta.

[Footnotes]

[Blurb on page 19]

Helai taudia ese inai intaviu idia moalelaia

[Blurb on page 20]

Iehova ese Ethiopia dekenai haroro gaukara ia hanamoa