IDAUNEGAI printa masini ginigunana idia karaia neganai taunimanima edia herevahereva karana ia haidaua. Hari inai negai teknoloji matamata hegeregere Intanet be unai bamona. Intanet be tanobada hegegemadai taunimanima ese idia gaukaralaia ta ta dekenai idia herevahereva totona. Search engine oi gaukaralaia diba oi ura dibaia gaudia dekenai hereva ma haida oi tahua totona.

Herevahereva karana be iseda Havaraia Tauna ese ita dekenai ia henia harihari gauna. Unai kara amo iseda lalohadai be ma haida dekenai ita gwauraia hedinarai diba. Iehova be taunimanima ida ia herevahereva tauna ginigunana. Idia dekenai mauri moalelaia totona hakaua herevadia ia hahedinaraia. (Gen. 1:​28-30) To, Eden umana ai ia vara gauna ese ia hahedinaraia bamona, taunimanima ese Dirava ena harihari gauna idia gaukaralaia kerere diba. Satani ese Heva dekenai hereva koikoidia ia gwauraia. Heva ese Satani ena hereva ia abia dae, bona Adamu ia hamaoroa, bena Adamu ese taunimanima dekenai kara dika bona mase ia mailaia.​—⁠Gen. 3:​1-6; Roma 5:⁠12.

Vadaeni, Intanet be edena bamona, ita ia hakaua kerere diba, a? Intanet be heduru gauna, badina ia amo gau namodia momo ita dibaia haraga diba. To, Intanet ese iseda nega bada ia haorea diba, bona ena hereva haida ese ita idia hakaua kerere, o iseda kara maoromaoro idia hadikaia diba. Mani ita tahua edena dala ai Intanet ita gaukaralaia namonamo diba.

Oi Duahia Gaudia be Momokani O Koikoi?

Namo lasi ita laloa Intanet dekenai ita duahia gaudia ibounai be iseda namo totona. Bema ita ura gau ta ita dibaia, Intanet ena search engine be Web sait idauidau amo hereva idauidau ia gogoa bona ia hahedinaraia. Ita gwau diba, search engine be idia gaukara goadagoada au huahua idauidau idia gogoa taudia bamona. Au huahua namodia bona dikadia be nega tamona idia gogoa, bena disi ta dekenai idia atoa ita ania totona. Oi be unai au huahua ibounai do oi ania sibona, a? Lasi, to do oi sekea guna edena be namo oi ania diba totona! Search engine ese hereva namodia bona hereva dikadia ia gogoa. Unai dainai, ita aonega be namo, unai amo au huahua namodia ita abia hidi bona dikadia ita negea. Unai ita karaia neganai, hereva dikadia ese iseda lalohadai do idia hadikaia lasi.

Lagani 1993 ai, magasin ta lalonai sisia rua be kompiuta ta ena vairanai idia helai ena katun ta ia hedinarai. Sisia ta be sisia ma ta dekenai ia gwau: “Oi be Intanet oi gaukaralaia neganai, do idia diba lasi oi be sisia.” Idaunegai, Satani ese gaigai ia gaukaralaia Heva ia hereva henia totona, bona ia hamaoroa ia be Dirava ai ia lao diba.  Unai hegeregere, hari Intanet ia gaukaralaia diba tauna ta be iena ladana korikorina ia hunia diba, bona taunimanima do ia koia ia gwau ia be diba bada profesa tauna. Danu taravatu be lasi, bema ta ia ura ena lalohadai, diba, bona laulau idauidau be Intanet dekenai ia atoa.

Intanet oi gaukaralaia neganai, namo lasi oi be Heva bamona bona haida edia koikoi herevadia oi abia dae sibona. Hereva ibounai oi abia dae haraga lasi, to inai henanadai oi lalodia guna: (1) Daika ese unai hereva ia torea? Dahaka ese ia hamomokania unai tauna be mai ena maoro, unai hereva ia torea totona bona ia torea gaudia be momokani, eiava? (2) Dahaka dainai inai hereva ia halasia? Dahaka ese ena lalona ia veria unai hereva ia torea totona? Ia be lalohadai ta ia dogoatao auka bona ia ura duahia taudia ese iena lalohadai do idia abia dae danu, a? (3) Edeseni amo ena hereva ia abia ia hahedinaraia, a? (4) Ia torea gaudia be diba matamatadia, a? Hari inai negai danu aposetolo Paulo ese Timoteo dekenai ia henia sisiba be mai anina bada. Ia gwau: “Oi abia gauna do oi naria namonamo, helaga gauna idia hadikaia anina lasi herevadia, bona diba koikoina amo idia vara herevadia, hereva momokani idia hakoikoia herevadia unai, oi dadaraia.”​—⁠1 Tim. 6:⁠20.

Emu Nega Ia Habadaia O Haorea?

Bema mai aonega ida Intanet ita gaukaralaia, ita ia durua diba iseda nega, goada, bona moni ita haorea kava lasi totona. Tano momo dekenai, taunimanima be edia ruma ai idia noho bona Intanet idia gaukaralaia kohu idia hoia totona. Kampani idauidau edia kohu davadia idia hahegeregerea bona dava maragi gauna idia hoia diba, unai amo moni bada idia negea lasi. Banika dekenai idia lao lasi, to Intanet amo banika dekenai moni idia atoa bona edia balens idia sekea diba. Bona Intanet amo edia holidei ena palani idia karaia, bona davana maragi peleini tiketi idia hoia diba. Danu, Intanet amo telefon namba, adres, bona idia ura lao henia gabuna ena mapu idia itaia diba. Tanobada hegegemadai idia noho Iehova ena Witnes taudia edia brens opesi be unai bamona heduru gaudia idia gaukaralaia, unai amo nega bada bona moni idia haorea lasi, bona tau tamona ese unai gaukara ia karaia diba.

To, Intanet be mai ena dika danu. Intanet gaukaralaia totona, nega bada ita haorea diba. Haida dekenai ia be gadara gauna ta bamona. Intanet dekenai kompiuta gadara idia karaia, kohu idia hoia, e-mail idia abia bona siaia, search engine idia gaukaralaia, bona Web sait idauidau idia kehoa karana amo nega bada idia haorea. Gabeai, idia ese mai anina bada gaudia, hegeregere ruma bese, turadia, bona kongrigeisen heboudia idia reaia. Intanet idia gaukaralaia momo taudia idia rakatania be auka. Hegeregere, lagani 2010 ripoti ta ese ia hahedinaraia, Korea dekenai matamata taudia 18.4 pesen be Intanet idia gaukaralaia momo. Germany ai, tahua gaukara idia karaia taudia haida idia gwau, “hahine momo herea idia maumau badina edia adavadia be Intanet idia gaukaralaia momo.” Hahine ta ia gwau ena tau be Intanet ia gaukaralaia momo dainai, iena kara ia idau bona edia headava ia dika.

Tau ta be Iehova ena Witnes taudia edia brens opesi ta ia torea henia bona ia gwau, ia be Intanet ia gaukaralaia momo bona ia rakatania be auka. Nega haida dina ta lalonai Intanet dekenai hora ten ia haorea. Ia gwau: “Matamanai lau laloa ia be dika lasi, to gabeai hebou lau reaia matamaia, bona lau guriguri lasi.” Hebou dekenai  ia lao neganai, ia hegaegae lasi, bona ia ura dikadika ena ruma dekenai ia giroa lou haraga Intanet ia gaukaralaia totona. To gabeai, ia laloparara unai be hekwakwanai badana bona iena kara ia haidaua. Namona be ita naria namonamo, bona Intanet do ita gaukaralaia hanaihanai lasi.

Intanet Herevadia ​—⁠Ita Idia Durua o Hadikaia?

Tesalonika Ginigunana 5:​21, 22 ia gwau: “Namona be gau ibounai umui hamomokania bema idia maoro eiava lasi, bona gau namodia do umui dogoatao auka. Dika idauidau ibounai do umui dadaraia.” Namona be Intanet amo ita abia herevadia be Dirava ena lalohadai bona taravatu hegeregerena ia goeva bona Keristani tauna ese ia gaukaralaia diba. Tanobada hegegemadai taunimanima ese ponografi idia itaia momo, bona bema ita naria namonamo lasi, ita danu be unai tarapu lalonai ita moru diba.

Namona be sibona ita nanadaia, ‘Bema egu adavana, tama sina, o Keristani tadikaka taihu be egu daiutu dekenai idia vareai, lau itaia gauna be karaharaga lau hunia, a?’ Bema ita be unai bamona ita karaia, aonega karana be haida idia noho sibona neganai, Intanet do ita gaukaralaia. Hari, Intanet ese taunimanima edia herevahereva bona kohu hoia karana ia haidaua momokani. Danu, Intanet be dala matamata Satani ese ia gaukaralaia, ‘iseda kudouna dekenai heudahanai’ lalohadaina ia havaraia totona.​—⁠Mat. 5:​27, 28.

Ita Siaia O Lasi?

Intanet amo sivarai haida ita abia bona ma haida dekenai ita siaia diba. Ena be ita be mai eda maoro unai ita karaia totona, to do ita laloa danu bema unai hereva be ia momokani bona ia goeva. Ma haida dekenai ita siaia herevadia be momokani, a? Gwaumaoro ita abia unai hereva ita siaia totona, a? a Unai hereva be mai anina bada bona idia do ia durua, eiava? Dahaka dainai unai hereva ita siaia? Ita ura sibona eda ladana ita abia isi totona, a?

Bema dala maorona ai e-mail ita gaukaralaia, ita ia durua diba. To, e-mail amo sivarai momo herea ita abia diba. Ita kamonai sivarai idauidau bona anina lasi gaudia be haida dekenai ita siaia bona edia nega ita haorea kava, a? Ita do siaia lasi neganai, namona be ita siaia ena badina ita laloa namonamo guna. Ita ura unai sivarai idia duahia taudia ese dahaka do idia karaia? Taunimanima be edia bese taudia bona turadia dekenai revareva idia siaia neganai, edia mauri lalonai idia vara gaudia idia herevalaia. Namona be e-mail lalonai unai bamona sivarai ita torea. Namo lasi ita hamomokania diba lasi sivaraidia be ma haida dekenai ita siaia.

Vadaeni, Intanet be edena bamona ita gaukaralaia be namo? Do ita dadaraia momokani, a? Reana, haida be unai bamona idia karaia be aonega karana. Guna ita herevalaia Intanet ia gaukaralaia momo tauna be Intanet ia dadaraia momokani. To, bema mai ‘laloa kehoa bona diba maoro’ ida Intanet ita gaukaralaia, ita ia durua diba.​—⁠Aon. 2:​10, 11.

[Footnote]

[Picture on page 4]

Haida ese oi idia koia lasi totona, dahaka oi karaia be namo?

[Picture on page 5]

Ma haida dekenai e-mail ta oi do siaia lasi neganai, dahaka oi laloa guna be namo?