Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

• Dahaka gau toi ese ita idia durua koikoi karana ita dadaraia totona?

Idia be: (1) Dirava gari henia karana. (1 Pet. 3:12) (2) Baibel amo iseda lalomamina ita hadibaia. (3) Ita dekenai ia noho moni o kohu be hegeregere lalohadaina.​—⁠4/15, rau 6-7.

• Edena dala ai ita diba Dirava ita hesiai henia, bona moale karadia ita karaia bona ita kiri be taravatu lasi?

Iesu ena haheitalai ita laloa. Ia be ma haida ida ia aniani hebou. Ena be Iesu be mai anina bada gaudia ia laloa to ia be vaira auka tauna lasi. Taunimanima badadia bona natudia danu be Iesu idia tura henia diba.​—⁠4/15, rau 10.

• Roma karoa 11 ese ia herevalaia olive auna be dahaka ia laulaulaia?

Olive auna be Aberahamo ena garana ena kahana iharuana ia laulaulaia, idia be lauma Israela taudia. Iehova be au ena ramuna bona Iesu be au ena gabana. Iuda taudia momo ese Iesu idia dadaraia neganai, Keristani taudia ai idia lao Idau Bese taudia be olive auna ai idia atoa vareai, unai amo idia ese Aberahamo ena garana ena namba idia hagugurua.​—⁠5/15, rau 22-25.

• Bema Iesu ese goevadae natudia ia havaraia, idia be mauri davana idia henia diba danu, a?

Lasi. Ena be Iesu ese goevadae natudia bilioni momo ia havaraia diba, to idia be mauri davana idia henia diba lasi. Iesu sibona ena mauri goevadaena be Adamu ena mauri goevadaena ida ia hegeregere. (1 Tim. 2:⁠6)​—⁠6/15, rau 13.

• Edena dala ai Keristani taudia ese Kara 20:​29, 30 ese ia herevalaia hahediba koikoi taudia idia dadaraia diba?

Keristani taudia ese aposteit taudia be edia ruma dekenai idia abidia dae lasi o idia hereva henidia lasi. (Roma 16:17; 2 Ioa. 9-11) Danu, idia ese aposteit taudia edia buka bona Intanet ai edia hahediba herevadia idia duahia lasi, bona TV dekenai edia program idia itaia lasi.​—⁠7/15, rau 15-16.