LAGANI 2009 ena matamanai, Iehova ena Witnes taudia tanobada hegegemadai ese edia hebou daladia idia haidaua. Kongrigeisen Baibel Stadi be Haroro Sikuli bona Hesiai Hebou ida idia hatamonaia. Unai amo ibounai ese wiki lalonai dina ta idia abia hidi diba edia ruma bese ena tomadiho eiava sibona edia stadi idia karaia totona. Oi be unai dala matamatana oi badinaia, a? Unai sediual amo namo oi davaria, a?

Ruma bese haida idia daradara edena buka be edia tomadiho negana ai do idia gaukaralaia. Hakaua Oreana be dala tamona idia abia hidi lasi ruma bese ibounai ese idia badinaia totona. Noho daladia be idauidau dainai, unai nega gaukaralaia dalana be ruma bese kwarana eiava tadikaka taihu sibodia ese do idia abia hidi.

Ruma bese haida be edia tomadiho negana ai hebou gaudia idia hegaegaelaia, to unai sibona idia karaia lasi. Hegeregere, haida be Baibel bona Baibel bukadia idia duahia, idia herevalaia hebou, bona Baibel drama idia karaia natudia idia durua totona. Nega ta ta ai henanadai bona haere dalana amo Baibel stadi idia karaia diba. Herevahereva, kiri bona gadara dalanai ruma bese stadi umui karaia neganai, natudia be mai moale ida edia lalohadai do idia gwauraia hedinarai. Unai bamona stadi negadia ese umui idia durua gau idauidau umui lalohadailaia bona karaia hebou totona. Unai umui karaia neganai, stadi do umui moalelaia hebou.

Tama ta mai ena natuna toi ia gwau: “Emai ruma bese tomadiho lalonai, ai be Baibel duahiduahi ai karaia. Ai ta ta emai Baibel duahiduahi ai karaia guna, bena natudia ese point ta idia abia hidi edia tahua karana idia karaia totona, bena emai tomadiho negana ai unai idia hahedinaraia. Michael [mauri lagani seven] be nega momo laulau ia torea o ia duahia gauna ena sivarai kwadogina ia torea. David bona Kaitlyn [mauri lagani 13 bona 15] be idia duahia Baibel sivaraina idia torea. Idia torea sivaraina be hegeregere idia be unai nega ai idia noho. Haheitalai ta be, Kaitlyn ese Iosepa ena sivarai ia duahia neganai, ia be Farao ena paraoa gabua tauna bona wain bubua tauna dekenai ia vara gauna ia torea. Ena sivarai ia torea dalana be hegeregere ia be unai nega ai ia noho dibura tauna ta.”​—⁠Gen., karoa 40.

Momokani, ruma bese ena tomadiho karaia daladia be idauidau. Reana ruma bese kwarana eiava tadikaka taihu ese idia abia hidi dalana be ma haida edia amo ia idau. Rau 7 dekenai ia noho maua ese ruma bese ena tomadiho bona sibona emu stadi karaia daladia haida ia hahedinaraia. Reana oi ese dala ma haida oi laloa danu.

[Box/​Picture on pages 6, 7]

 Mai edia natu badadia ruma bese totona:

• Memero Kekeni Edia Henanadai​—⁠Haere Maorodia bukana duahia bona herevalaia.

• Baibel umui duahia neganai, namona be umui laloa umui be unai nega ai umui noho (Gima Kohorona, May 15, 1996, rau 14, paragraf 17-18 itaia.)

• Nega daudau bona nega kwadogi lalonai umui hagugurua diba tahua gaudia herevalaia.

• Nega ta ta ai Baibel vidio ta itaia bona herevalaia.

• Gima Kohorona ena kahana ladana “Matamata Taudia Totona” herevalaia.

Natudia lasi headava taudia totona:

• Ruma Bese Ena Moale Havaraia Dalana bukana ena karoa 1, 3, 11-16 herevalaia.

• Baibel duahiduahi amo umui davaria point namona dekenai tahua karana karaia bona herevalaia.

• Kongrigeisen Baibel Stadi bona Gima Kohorona Stadi hegaegaelaia.

• Emui haroro habadaia daladia herevalaia hebou.

Ruma bese lalonai ia sibona be Witnes eiava headava lasi taudia totona:

• Distrik hebouhebou dekenai idia halasia gaudia stadilaia.

• Yearbook matamata bona gunadia duahia.

• Haroro ai taunimanima ese idia henia henanadai dekenai tahua gaukarana karaia.

• Hamatamaia herevadia hegaegaelaia.

Mai edia natu maragidia ruma bese totona:

• Baibel sivarai ta be drama ta bamona karaia.

• Baibel tanona ta ena mapu torea, eiava Baibel gadara haida karaia.

• Baibel negadiai ia noho tauna ta ena laulau torea (Gima Kohorona, February 15, 2011, rau 11 ai ia noho kahana ladana “Anina Namona Ia Havaraia!” itaia.)

• Gima Kohorona ena kahana ladana “Emui Natudia Hadibaia” herevalaia.