Baibel Duahia Karana Ese Lau Ia Hagoadaia

Marceau Leroy ese Ia Sivarailaia

EGU tamana amo lau komu bona inai Baibel siri lau duahia: “Matamaia neganai Dirava ese guba bona tanobada ia karaia.” Dahaka dainai lau komu? Badina egu tamana be Dirava bona Baibel ia abia dae lasi tauna.

Unai be nega ginigunana Baibel lau duahia, unai dainai Genese ena hamatamaia herevadia ese lau ia hanogaia bamona. Hari lau diba, ‘Dirava ese guba bona tanobada idia biagua taravatudia ia atoa dainai, gau ibounai idia gaukara hebou namonamo!’ Unai hanuaboi ai, Baibel be eit o-klok lau duahia ela bona daba foa oklok. Unai nega amo Baibel duahia karana lau ura henia. Mani Baibel duahia karana ese lau ia hagoadaia dalana ena sivarai lau herevalaia.

“Dina Ta Ta Do Oi Karaia”

Lagani 1926 ai, France ena not kahanai hanua ladana Vermelles, dekenai lau vara. Unuseniai coal mine ia noho bona Tanobada Tuarina Iharuana lalonai, coal be mai anina bada. Lau be coal mine dekenai lau gaukara dainai, gavamani ese ami lalonai lau idia atoa lasi. To, gaukara namona abia totona, radio-electronics lau stadilaia. Unai nega ai guba bona tanobada gaudia idia gaukara hebou namonamo edia badina lau dibaia. Lau be 21 neganai, egu klas turana ese lau dekenai Baibel ta ia henia, bona ia gwau, “Inai be buka namona, oi duahia be namo.” Baibel ibounai lau duahia murinai, lau abia dae momokani Baibel be Dirava ena Hereva, bona taunimanima dekenai ena ura ia hadibaia.

Lau laloa egu dekena taudia danu do idia ura Baibel idia duahia dainai, idia totona kopi eit lau abia. To, lau hoa badina lau idia hevasehalaia bona gwau henia. Egu varavara haida be meamea bona babalau gaudia idia laloa momo bona idia gwau: “Bema oi be inai buka oi duahia matamaia, dina ta ta do oi karaia!” Egu mauri ibounai lalonai unai lau karaia, bona lau moalelaia bada.

Egu dekena taudia haida idia itaia lau be Baibel lau ura henia dainai, Iehova ena Witnes taudia edia buka bona magasin haida be lau dekenai idia henia. Buklet ta ladana One World, One Government * (French gado gauna) ese ia hahedinaraia Dirava ena Basileia sibona ese taunimanima ia durua diba. (Mat. 6:10) Lau ura dikadika unai helaro be ma haida dekenai lau harorolaia.

 Egu turana Noël be lau amo Baibel ta ia abia tauna ginigunana. Ia be Katolik tauna bona ia ura iena turana ta, pris edia sikuli ia lao tauna, do lau hereva henia. Ena be lau gari, to Salamo 115:​4-8 bona Mataio 23:​9, 10 amo lau diba, Dirava be kaivakuku tomadiho henia bona dagi ladadia gaukaralaia karana ia abia dae lasi. Unai ese lau ia hagoadaia mai gari lasi ida lau haroro totona. Noël be hereva momokani ia abia dae, bona hari ia be Iehova ena Witnes tauna ta.

Egu taihuna bona ena tau lau vadivadi henidia danu. Iena tau be mai ena babalau bukadia dainai, demoni ese idia hagaria. Matamanai lau gari, to Heberu 1:14 lau duahia neganai, lau diba Iehova ena aneru ese lau do idia durua. Egu nakimi ese Baibel ena hakaua herevadia ia badinaia bona babalau kohu ibounai ia negea neganai, demoni ese idia rakatania. Gabeai, egu nakimi bona taihuna be Witnes goadadia ai idia lao.

Lagani 1947 ai, America Witnes tauna ta, Arthur Emiot be egu ruma dekenai ia mai. Lau moale bada, bona Witnes taudia edia hebou gabuna totona lau henanadai. Ia gwau Liévin dekenai grup ta ia noho, bona ena daudau be kilomita 10 bamona. Basikele be momo lasi dainai, hebou totona lau raka lao bona raka mai; hua haida lalonai unai bamona lau karaia. France gavamani ese lagani eit lalonai Iehova ena Witnes taudia gaukara idia taravatua. Unai nega ai, Witnes taudia be 2,380 sibona bona momo be Poland taudia. To, September 1, 1947 ai, gavamani ese emai gaukara dekenai taravatu idia kokia bona Villa Guibert dekenai ia noho brens opesi ai kehoa lou. France dekenai painia taudia be lasi dainai, boiboi herevana ta be December 1947 ena Informant (hari Iseda Basileia Pepana) ai idia halasia. Hua ta ta ai haroro horadia 150 do idia ripotilaia, to lagani 1949 ai idia hadihoa hora 100. Ioane 17:17 ai Iesu ia gwau: “[Dirava ena] hereva be momokani.” Unai lau abia dae dainai lagani 1948 ai lau bapatiso, bona December 1949 ai painia gaukara lau hamatamaia.

Dunkerque Dekenai Lau Giroa Lou

Lau idia siaia gabuna ginigunana be Agen, France ena saut kahana dekenai, to nega daudau lau noho lasi. Coal mine dekenai lau gaukara lasi dainai, gavamani idia ura ami lau vareai. Lau ura lasi dainai, dibura ruma ai lau idia koua. Ena be Baibel ta lau abia kau be taravatu, to Salamo bukana ena rau haida lau abia, bona unai ese lau idia hagoadaia. Dibura amo lau idia ruhaia neganai, abia hidi lau karaia be namo: Ful-taim hesiai gaukara do lau rakatania, moni gaukara lau abia, ruma lau haginia bona do lau headava, eiava? Unai nega ai, Baibel ena hereva ta ese lau ia durua. Paulo ena hereva Filipi 4:​11-13 lau laloa dobu, ia gwau: “Lau dekenai siahu ia henia tauna amo goada lau abia gau ibounai lau karaia totona.” Lauegu lalona lau hadaia painia gaukara do lau karaia noho. Lagani 1950 ai, gabu ma ta dekenai lau idia siaia, unai be Dunkerque taoni, guna lau haroro gabuna.

Lau ginidae neganai, lau be kohu lasi. Tanobada Tuarina Iharuana lalonai unai taoni idia hadikaia momokani, bona noho gabudia be lasi. Egu lou henia ta lau vadivadi henia bona ruma hahinena be mai moale ida, ia gwau: “O, Mr. Leroy, dibura amo oi idia ruhaia vadaeni! Egu tau ia gwau bema tatau momo be oi bamona, tuari do ia vara lasi.” Idia be mai edia turist rumana ta bona lau idia hamaoroa unuseniai lau noho diba ela bona turist taudia idia ginidae. Unai dina tamona ai Arthur Emiot ena kakana, Evans ese lau dekenai gaukara ta ia henia. * Evans be wofu dekenai gado hahanaia gaukarana ia karaia. Sisima ena ofesa ta be hanuaboi ai sisima naria tauna ta ia tahua, bona Evans ese lau ia abia lao. Lau be dibura ruma ai lau noho dainai, lau be turia momokani. Evans  ese ofesa dekenai egu sivarai ia gwauraia neganai, ofesa ese lau ia hamaoroa frisa lalonai idia noho aniani lau ania diba. Unai dina tamona lalonai, noho gabuna, moni gaukara, bona aniani lau davaria! Unai ese egu abidadama Iesu ena hereva Mataio 6:​25-33 dekenai ia hagoadaia.

Turist idia ginidae dainai, lau bona egu painia turana Simon Apolinarski be noho gabuna ma ta ai tahua, to ai ura Dunkerque dekenai do ai noho. Tau ta ia gwau ena hosi ruma gunana dekenai ai noho diba, bona rei kakoro latanai ai mahuta. Dina ai haroro gaukara ai moalelaia; unai ruma biaguna ai haroro henia danu, bona hereva momokani ia abia dae. Gabeai, niuspepa ta ese Dunkerque taudia ia hadibaia “Iehova ena Witnes taudia edia gaukara be ia bada herea noho.” To lau, Simon, bona pablisa haida sibona be unai gabu dekenai ai haroro! Unai nega aukadia ai, emai Keristani helaro bona Iehova ese ai ia naria dalana ai laloa dobu dainai goada ai abia. Lagani 1952 ai, Dunkerque lau rakatania neganai, pablisa taudia edia namba be 30 sibona.

Goada Lau Abia Maduna Matamata Huaia Totona

Amiens dekenai nega sisina lau noho murinai, Boulogne-Billancourt, Paris dekenai lau idia siaia spesel painia gaukara lau karaia totona. Lauegu Baibel stadi be momo, bona idia haida be gabeai painia bona misinari gaukara idia karaia. Tau matamata ta ladana Guy Mabilat ese hereva momokani ia abia dae, bona gabeai sekit bona distrik naria tauna ai ia lao. Gabeai, Louvier Betele dekenai printa masini edia ruma haginia gaukara ia naria. Haroro gaukara ai Baibel lau gaukaralaia momo dainai, siri momo lau lalodiatao, bona unai ese lau ia durua egu hahediba dalana lau hanamoa bona egu gaukara lau moalelaia totona.

Lagani 1953 ai hahenamo ta lau abia, Alsace-Lorraine dekenai lau idia siaia sekit gaukara lau karaia totona. Lagani 1871 bona 1945 huanai Germany ese unai gabu ia biagua. Unai dainai, German gado lau dibaia be namo. Sekit gaukara lau karaia matamaia neganai, motuka, TV, bona taipraita be momo lasi, bona reidio o kompiuta be lasi. Ena be egu kohu be momo lasi to lau moale. Egu ‘matana be gau tamona sibona ia raraia’ dainai, Iehova lau hesiai henia noho diba.​—⁠Mat. 6:​19-22.

Lagani 1955 ai Paris dekenai idia karaia “Triumphant Kingdom” hebouhebouna lau laloaboio diba lasi. Unai hebou ai taihu Irène Kolanski ida lau hedavari, ia be lagani 1948 ai painia gaukara ia matamaia. Ena tama sina be  Poland taudia bona lagani momo lalonai Iehova idia hesiai henia. France dekenai tadikaka Adolf Weber ese ia vadivadi henidia. Tadikaka Weber be Tadikaka Russell ena uma naria tauna bona Europe dekenai ia lao sivarai namona ia harorolaia totona. Lau bona Irène be lagani 1956 ai headava, bona sekit gaukara ai karaia. Ia be hahine namona bona lagani momo lalodiai lau ia durua!

Lagani rua murinai hahenamo ma ta lau abia, lau idia abia hidi distrik naria gaukara lau karaia totona. To, sekit naria taudia be momo lasi dainai, sekit gaukara lau karaia noho. Unai be bisi negana! Hua ta ta ai hora 100 lalonai haroro gaukara lau karaia, wiki ta ta ai tok lau henia, buka stadi grup toi lau vadivadi, edia rekodi kadi lau sekea bona ripoti lau torea. Vadaeni, edena nega ai Dirava ena Hereva lau duahia diba? Dala tamona be, Baibel gunana ta ena rau haida lau kokia bona lau abia loaloa. Tau ta lau naria noho lalonai, rau ta lau duahia. Unai nega sisina lalonai lau duahia Baibel siridia ese lau idia hagoadaia egu hesiai gaukara lau karaia noho totona.

Lagani 1967 ai, lau bona Irène idia boiria Boulogne-Billancourt ena Betele dekenai ai gaukara totona. Lau be Haroro Naria Dipatmen dekenai lau gaukara, bona idia hanaia lagani 40 lalonai unai gaukara lau do karaia noho. Egu gaukara ai lau moalelaia gauna ta be, taunimanima ese idia torea Baibel henanadaidia lau haerelaia. Baibel stadilaia bona “sivarai namona . . . gwauraia hedinarai” karana lau moalelaia! (Fili. 1:⁠7) Danu, Betele ena daba tomadiho negadia ai seamani gaukara lau moalelaia. Lagani 1976 ai, France Brens Komiti ena memba ta ai lau lao.

Mauri Dalana Hereadaena

Ena be hekwakwanai haida ai davaria, to hekwakwanai badana be hari lau bona Irène be ai buruka bona ai gorere dainai, gau momo ai karaia diba lasi. To, Baibel duahia bona stadilaia karana ese ai ia durua emai helaro ai laloa noho totona. PMV amo ai lao emai teritori dekenai emai helaro be ma haida dekenai ai harorolaia totona, bona unai ai moalelaia. Ai ruaosi be lagani 120 lalodiai ful-taim hesiai gaukara ai karaia, unai dainai ai ura ma haida ai hagoadaia unai bamona mauri dalana, mai moalena idia abia hidi totona. Egu hemami be King Davida bamona, Salamo 37:25 ia torea neganai ia be ia buruka vadaeni, ‘to nega ta kara maoromaoro tauna ta be Dirava ese ia rakatania, ia itaia lasi.’

Egu mauri ibounai lalonai, Iehova be ena Hereva amo lau ia hagoadaia. Lagani 60 gunanai, egu varavara ese lau idia hamaoroa Baibel duahiduahi be dina ta ta ai do lau karaia gauna, bona edia hereva be momokani. Egu mauri ibounai lalonai unai lau moalelaia bada!

[Footnotes]

[Picture on page 5]

Lau bona Simon

[Picture on page 5]

Distrik naria gaukara lau karaia

[Picture on page 5]

Egu Baibel ginigunana bamona

[Picture on page 6]

Emai headava dinana

[Picture on page 6]

Lau bona Irène be Baibel duahia bona stadilaia karana ai moalelaia