Emu Maduna Ia Metau Neganai, Pineha Oi Tohotohoa, A?

KONGRIGEISEN lalonai tadikaka ta ese elda maduna ia abia be hahenamo ta. To, Baibel ia hahedinaraia elda gaukara be maduna metauna. Nega ta ta elda taudia be kerere taudia ida idia helai, bona Iehova totona hahemaoro gaukara idia karaia. (2 Siv. 19:⁠6) Eiava elda tauna ta be maduna badana ta idia henia, bona ia mamia ia hegeregere lasi. Reana Mose bamona do ia gwau: “Lau be daika, dohore Farao dekenai lau lao?”​—⁠Eso. 3:⁠11.

Baibel be lauma helaga ena siahu amo idia torea hegeregerena, elda taudia danu be lauma helaga ese ia abia hidi. Baibel lalonai gunalaia taudia haida ese metau gaudia haida idia hanaia dalana edia sivarai idia noho. Pineha be Eleasara ena natuna bona Arona ena tubuna ta, gabeai ia be hahelaga tauna ta ai ia lao danu. Iena mauri lalonai idia vara gaudia toi ese idia hahedinaraia, hari inai negai elda taudia edia maduna ia metau neganai, Iehova dekenai idia tabekau, idia aonega bona idia gari lasi be namo.

Maoromaoro “Ia Toreisi”

Israela taudia be Moaba Taorana ai idia kamepa neganai, Pineha be tau matamata. Baibel ia gwau: “Edia tatau ese Moaba hahine idia sihari henidia. . . . Vadaeni Israela taudia ese unai boubou aniani idia ania, bona Moaba dirava dekenai idia tomadiho.” (Num. 25:​1, 2) Iehova ese mase gorerena amo idia ia panisia. Mani oi laloa, Pineha be unai sivarai dikana ia kamonai neganai, ena hemami be edena bamona?

Baibel ia gwau: “Unai neganai Mose bona Israela taudia be Palai Dubu ena iduara vairanai idia haboua, mai taitai danu. Vadaeni idia edia vairanai, Israela tauna ta ese iena palai ruma dekenai, Midiana hahine ta ia hakaua lao.” (Num. 25:⁠6) Hahelaga tauna Pineha be dahaka do ia karaia? Ia be tau matamata sibona, to Iehova ena taravatu ia utua Israela tauna be iduhu lohia tauna ta bona tomadiho karadia ia gunalaia.​—⁠Num. 25:⁠14.

Pineha be taunimanima ia gari henia lasi, to Iehova ia gari henia. Unai dainai, Israela tauna bona Midiana hahine ia itaia neganai, maoromaoro ia toreisi, io ia abia bona edia palai rumana lalonai idia ruaosi ia gwadaia mase. Pineha be mai gari lasi ida unai kara ia karaia dainai, Iehova be dahaka ia laloa? Iehova ese mase gorerena ia hadokoa bona ia gwauhamata Pineha bona iena tubudia ibounai ese hahelaga gaukarana do idia karaia “ela bona nega ibounai.”​—⁠Num. 25:​7-13.

Momokani, Keristani elda taudia be hekwakwanai ta hamaoromaoroa totona, tau ta do idia hamasea lasi. To, Pineha bamona, namona be mai gari lasi ida hahemaoro idia karaia. Hegeregere, Guilherme be hua haida sibona elda maduna ia abia murinai idia abia hidi hahemaoro komiti gaukara ia karaia totona. Ia kerere tadikakana be elda tauna ta, bona Guilherme ia maragi neganai, unai tadikaka ese ia durua. Guilherme ia gwau: “Egu hemami ia dika bona hanuaboi lau mahuta lasi. Lau laloa momo edena bamona hahemaoro maorona  do lau karaia bona egu hemami do lau badinaia lasi. Dina haida lalonai unai lau gurigurilaia bona heduru totona Baibel bukadia lau duahia.” Unai ese ia durua mai gari lasi ida ena maduna ia huaia, bona ena tadikaka ia durua.​—⁠1 Tim. 4:​11, 12.

Kongrigeisen lalonai elda taudia be mai gari lasi ida abia hidi idia karaia neganai, idia be Iehova abidadama henia bona badinaia karana dekenai haheitalai namona idia hahedinaraia. Momokani, bema Keristani taudia ma haida idia diba edia tadikaka ma ta be kerere ia karaia, namona be mai gari lasi ida elda taudia idia hadibaia. Unai hegeregerena, ita be Iehova ita badinaia dainai, iseda turana namona o ruma bese tauna ta be kongrigeisen amo idia atoa siri neganai, ita bamoa lasi be namo.​—⁠1 Kor. 5:​11-13.

Aonega Karana ese Tuari Ia Koua

Namo lasi ita gwau Pineha be tau matamata sibona bona aonega karana ia hahedinaraia lasi. Mani ita laloa, Pineha be hekwakwanai ma ta hamaoromaoroa totona sivarai ia kamonai guna, ia laloa namonamo, bena abia hidi ia karaia. Unai nega ai Rubena, Gado, bona Manase iduhu be Ioridane Sinavai badinai boubou patana ta idia haginia. Israela taudia haida idia laloa unai be dirava koikoidia edia boubou patana dainai, idia ura idia tuari henidia.​—⁠Ios. 22:​11, 12.

Pineha be dahaka ia karaia? Ia bona Israela ena iduhu gunalaia taudia be mai maino ida unai boubou patana idia haginia taudia ida idia herevahereva. Idia davaria unai boubou patana idia haginia badina idia ura Iehova dekenai “gabua bouboudia idia karaia.” Idia herevahereva namonamo dainai tuari ia vara lasi.​—⁠Ios. 22:​13-34.

Bema Keristani ta ia kamonai ma haida ese ena tadikaka ta idia samania koikoi o ena ladana idia hadikaia, aonega karana be Pineha ia tohotohoa be namo! Aonega karana ese ita ia durua, unai amo ita badu haraga lasi o ma haida dekenai iseda tadikaka edia kara ita maumauraia lasi.​—⁠Aon. 19:⁠11.

Pineha bamona edena dala ai elda taudia be aonega idia hahedinaraia diba? Lagani 10 mai kahana lalonai elda gaukara ia karaia tadikaka ladana, Jaime, ia gwau: “Bema pablisa ta ese lau dekenai ia bona tadikaka ma ta huanai ia vara hekwakwanai ia herevalaia, maoromaoro Iehova lau noia ta do lau hanamoa eiava ma ta lau hadikaia lasi totona, to Baibel ena sisiba amo idia lau durua. Hegeregere, taihu ta be lau ia hamaoroa kongrigeisen ma ta ai tadikaka ta ena kara dainai ia lalohisihisi. Unai tadikaka be egu turana namona dainai, maoromaoro ia lau hereva henia diba, to unai lau karaia lasi. Lau ese Baibel ena hakaua herevadia haida amo unai taihu lau durua, bona ia gwau ia sibona ese unai tadikaka do ia hereva henia. (Mat. 5:​23, 24) To, maino idia karaia haraga lasi dainai, taihu lau hagoadaia Baibel ena hakaua herevadia ma haida ia laloa totona. Ia gwau unai do ia gurigurilaia bona do ia hekwarahi unai tadikaka ena dika ia gwauatao totona.”

 Dahaka ia vara? Jaime ia gwau: “Hua haida murinai unai taihu be lau ia hereva henia ia gwau, unai tadikaka be ena kara dainai sori herevana ia gwauraia. Bona idia haroro hebou bona taihu ena kara dainai ia hanamoa. Edia hekwakwanai idia hamaoromaoroa. Bema lau be edia hekwakwanai lalonai lau vareai, reana lau be tadikaka ena kahanai do lau gini, badina ia be egu turana namona, bona unai ese hekwakwanai do ia habadaia sibona.” Baibel ia gwau: ‘Kara ta oi itaia, to kota dekenai do oi lao haraga lasi.’ (Aon. 25:⁠8) Lo elda taudia be Keristani taudia idia durudia edia hekwakwanai idia hamaoromaoroa neganai, idia hamaorodia Baibel ena hakaua herevadia idia badinaia bona maino idia karaia be namo.

Iehova Ena Lalohadai Ia Tahua

Pineha be Dirava ena abia hidi taudia totona hahelaga gaukara ia karaia be hahenamo ta. Ita diba ena be ia be tau matamata sibona, to ia gari lasi bona ia aonega. Iena maduna ia huaia namonamo totona Iehova dekenai ia tabekau.

Beniamina iduhu ena hanua ladana Gibea ai, tatau haida ese Levi tauna ta ena adavana idia reipia bona hamasea neganai, iduhu ma haida idia ura Beniamina iduhuna idia tuari henia. (Gun. 20:​1-11) Idia do tuari lasi neganai, Iehova idia guriguri henia, to nega rua idia kwalimu lasi bona momo idia mase. (Gun. 20:​14-25) Iehova be edia guriguri ia kamonai lasi, a? Ia ura idia sibona ese Gibea taudia ese idia karaia kara dika do idia hamaoromaoroa, a?

Israela ena hahelaga tauna badana, Pineha be Iehova ia abidadama henia bona ia guriguri lou, ia gwau: “Aiemai varavara taudia ma do ai tuari henia lou, o do ai hadokoa?” Iehova ese ena guriguri ia haerelaia bona Beniamina iduhu idia halusia bona Gibea hanuana idia gabua.​—⁠Gun. 20:​27-48.

Unai sivarai amo dahaka ita dibaia? Ena be elda taudia be hekwakwanai haida idia hamaoromaoroa toho bona idia gurigurilaia loulou, to unai hekwakwanai be idia ore haraga lasi. Bema unai ia vara, elda taudia be Iesu ena hereva idia laloatao be namo, ia gwau: “Umui noinoi noho, bona umui dekenai do idia henia. Umui tahua noho, bona do umui davaria, bona iduara dekenai umui pidipidi noho, bena do idia kehoa.” (Luka 11:⁠9) Ena be Iehova ese elda taudia edia guriguri haida ia haerelaia haraga lasi, to idia diba iena nega korikori ai unai do ia karaia.

Hegeregere, Ireland ena provinsi ta ai kongrigeisen ta ia ura Kingdom Hall ia haginia, to Ruma Haginia Dipatmen ia naria tauna be edia Kingdom Hall ena palani ibounai ia abia dae lasi. Toana be Ireland ena Ruma Haginia Dipatmen ia naria tauna badana dekenai edia palani do idia hahedinaraia. Dirava ese Pineha ena guriguri ia kamonai hegeregerena, edia guriguri do ia kamonai, a?

Unai kongrigeisen ena elda ta ia gwau: “Unai tau badana dekenai ai do lao lasi neganai, Dirava ena heduru ai noia. Ai lao neganai, lau idia hamaoroa reana wiki haida murinai unai tau badana do ai itaia. To, dala ia kehoa bona miniti 5 lalonai ia ida ai herevahereva. Kingdom Hall ena palani ia itaia murinai, gwaumaoro ia henia emai haginia gaukara ai hamatamaia totona. Bona unai nega amo emai provinsi ena Ruma Haginia Dipatmen ia naria tauna be mai moale ida ai ia durua. Unai ekspiriens amo ai dibaia gauna be, guriguri be mai ena siahu.” Oibe, Iehova be ia dekenai idia tabekau elda taudia edia guriguri do ia haerelaia.

Israela ai Pineha be maduna metauna ia huaia, to Dirava dekenai ia tabekau, ia aonega bona ia gari lasi dainai, Israela besena ia naria dalana be Iehova ese ia moalelaia. Lagani 1,000 murinai lauma helaga ena siahu amo, Esera ia gwau: “Unai nega gunadia lalonai, Pineha Eleasara ese idia ia biagua, bona Lohiabada be ia danu ia noho.” (1 Siv. 9:20) Namona be hari inai negai mai abidadama ida Dirava ena taunimanima idia gunalaia taudia, bona Keristani taudia ibounai idia diba Iehova be idia danu ia noho.