Ita Heau mai Haheauka ida

“Namona be iseda vairanai ia noho heau helulu lalonai do ita heau mai haheauka ida.”​—⁠HEB. 12:⁠1.

1, 2. Baibel ese Keristani mauri dalana be dahaka ida ia hahegeregerea?

LAGANI ta ta gabu momo dekenai taunimanima momo be heau helulu daudauna lalonai idia heau. Haida be gabu daudauna idia heau diba taudia bona idia ura idia kwalimu. Ma haida be idia diba do idia kwalimu lasi, to edia ura badana be unai heau do idia haorea.

² Baibel ia gwau Keristani mauri dalana be heau helulu ta bamona mai ena ahuna. Iehova idia badinaia taudia be unai heau helulu lalonai idia vareai bona idia ura edia heau idia haorea. Aposetolo Paulo ese Korinto Keristani taudia ia tore henidia neganai, unai ia herevalaia: “Umui diba lasi, a? Heau helulu dekenai idia heau taudia ibounai be idia heau, to tamona sibona ese ahuna do ia abia. Namona be unai bamona do umui heau, vadaeni ahuna do umui abia.”​—⁠1 Kor. 9:⁠24.

3. Paulo ia gwau tamona sibona ese ahuna do ia abia, ena anina be dahaka?

³ Paulo ia gwau tamona sibona ese ahuna do ia abia​—⁠anina be Keristani tauna tamona sibona ese mauri ahuna do ia abia, a? Lasi. To, ia be heau helulu taudia idia heau ena badina ia herevalaia. Korinto Keristani taudia idia diba heau helulu taudia ibounai be idia ura idia kwalimu, to tau tamona sibona ese kwalimu ahuna do ia abia. Unai dainai idia treinini goadagoada heau helulu lalonai idia heau namonamo totona. Unai hegeregerena Paulo ia ura ena tadikaka be idia gaukara goada Iehova idia badinaia noho totona, unai amo mauri hanaihanai ahuna idia abia diba.

4. Keristani taudia edia heau helulu be edena bamona?

⁴ Paulo ena hereva ese ita ia hagoadaia bona ita ia durua iseda kara ita tahua namonamo totona. Bema iseda kara amo Iehova ita hamoalea, nega vaira ai guba o tanobada Paradaisona ai mauri hanaihanai do ita abia. To, Keristani tauna be heau helulu daudauna ai ia heau bamona, bona dala huanai hekwakwanai idauidau ese ena hesiai gaukara idia hadikaia diba. (Mat. 7:​13, 14) Keristani taudia haida dekenai unai ia vara vadaeni. Mauri ena heau helulu lalonai dahaka tarapu bona hekwakwanai oi davaria diba? Edena dala ai oi hanaidia diba? Bona dahaka oi karaia diba oi kwalimu totona?

Ita Kwalimu Totona Ita Haheauka be Namo

5. Heberu 12:1 ai Paulo be dahaka ia herevalaia?

⁵ Paulo ese Ierusalema bona Iudea ai idia noho Heberu Keristani taudia ia tore henidia neganai, ia ese heau helulu taudia ia herevalaia lou. (Heberu 12:1 duahia.) Keristani taudia idia heau noho ena badina bona edia heau helulu idia haorea totona do idia karaia gaudia ia herevalaia danu. Inai stadi lalonai (1) Paulo ese Heberu Keristani taudia ia tore henia ena badina, (2) do idia karaia gaudia, bona (3) ena revareva amo ita dibaia gaudia do ita herevalaia.

6. Tomadiho gunalaia taudia be Keristani taudia dekenai dahaka idia karaia?

⁶ Aposetolo edia negai, Ierusalema bona Iuda ai idia noho Heberu Keristani taudia be hekwakwanai momo idia davaria. Badina Iuda tomadiho gunalaia taudia be taunimanima idia doria edia hereva idia badinaia totona. Idia gwau Iesu Keriso be gavamani ia inai henia tauna bona ia mase be maoro. Idia ese Iesu Keriso idia hamasea bona idia ura Keristani taudia edia haroro gaukara idia koua. Pentekoste  33 C.E. murinai, tomadiho gunalaia taudia ese Keristani taudia idia dagedage henidia ena sivarai be Kara bukana ai ita duahia diba.​—⁠Kara 4:​1-3; 5:​17, 18; 6:​8-12; 7:59; 8:​1, 3.

7. Dahaka dainai Keristani ginigunadia be nega dikana ai idia noho?

⁷ Keristani ginigunadia be nega dikana ai idia noho, badina Ierusalema do idia hadikaia negana be ia kahirakahira. Iesu ese idia ia hamaoroa Ierusalema be do idia hadikaia. Do idia vara gaudia ia herevalaia, bona idia roho mauri dalana ia gwauraia danu. (Luka 21:​20-22 duahia.) Iesu ia gwau: “Do umui naria namonamo, aniani momo, inuinu momo, bona mauri ena lalohekwarahi amo emui lalohadai maorona umui hadikaia garina, bona karaharaga unai dina be umui latanai do ia ginidae.”​—⁠Luka 21:⁠34.

8. Dahaka dainai Keristani taudia haida be Iehova idia rakatania?

⁸ Iesu ese unai hereva ia gwauraia, bena lagani 30 murinai Paulo ese Heberu Keristani taudia ia tore henidia. Unai lagani 30 lalodiai Keristani taudia dekenai dahaka ia vara? Haida be dina ta ta ena lalohekwarahi gaudia dainai, Dirava dibaia karana idia dadaraia bona edia hetura karana Iehova ida ia dika. (Heb. 5:​11-14) Keristani taudia haida idia laloa Iuda taudia edia kara idia tohotohoa be namo. Reana idia laloa unai be kerere lasi, badina Iuda taudia be Dirava idia abidadama henia bona Mose ena Taravatu momo idia badinaia. Danu, kongrigeisen lalonai tadikaka haida ese ma haida idia doria Mose ena Taravatu bona Iuda taudia edia kastom idia badinaia totona. Keristani taudia haida be idia gari dainai, unai idia abia dae sibona. Paulo ese ena tadikaka ia durua Keristani mauri dalana idia goadalaia, bona Iehova idia badinaia noho totona dahaka hagoadaia herevana ia gwauraia?

9, 10. (a) Heberu karoa 10 ena dokonai Paulo be dahaka hagoadaia herevana ia gwauraia? (b) Dahaka dainai Paulo be idaunegai idia noho abidadama taudia edia sivarai ia torea?

⁹ Lauma helaga ena siahu amo Paulo ese unai revareva ia torea Heberu Keristani taudia hagoadaia totona. Karoa 10 ai, ia gwau Mose ena “Taravatu be do idia mai gau namodia edia laulau sibona” bona Iesu ena boubou gauna sibona amo Dirava ese edia dika ia gwauatao diba. Unai karoa ena dokona ai, Paulo ia gwau unai boubou gauna amo namo idia abia totona, idia haheauka be gau badana. Ia gwau: “Umui haheauka noho be namo, unai amo Dirava ese ia gwauhamatalaia gauna do umui abia. To Dirava ena ura umui karaia guna be namo. Badina ‘nega daudau lasi,’ bona ‘do ia mai tauna be do ia ginidae bona do ia leiti lasi.’ ”​—⁠Heb. 10:​1, 36, 37.

¹⁰Heberu karoa 11 ai, Paulo ese Dirava abidadama henia ena anina ia hahedinaraia totona, ia ese abidadama idia hahedinaraia taudia edia kara ia herevalaia. Karoa 12 ai, ia ese Keristani taudia ia hagoadaia ‘edia vairanai ia noho heau helulu lalonai do idia heau mai haheauka ida.’ To dahaka dainai abidadama karana ia herevalaia guna, bena gabeai haheauka karana ia herevalaia? Badina unai Keristani taudia idia diba Iehova idia abidadama henia totona, idia haheauka bona gari lasi be mai anina bada. Idaunegai idia noho abidadama taudia momo edia sivarai be Paulo ese ia torea. Idia be nega aukadia ai Iehova idia badinaia, bona edia haheitalai ese Heberu Keristani taudia ia durua diba. Paulo ia gwau: “Vadaeni, witnes orea badana be ita idia hagegea dainai, namona be ita idia hametaua gaudia ibounai bona ita idia guia noho kara dika ita negea, bona namona be iseda vairanai ia noho heau helulu lalonai do ita heau mai haheauka ida.”​—⁠Heb. 12:⁠1.

“Witnes Orea Badana”

11. “Witnes orea badana” edia haheitalai ita laloa neganai, dahaka ita laloatao be namo?

¹¹ Paulo ia gwau idaunegai idia noho abidadama taudia be ita idia hagegea “witnes orea badana.” Idia be Iehova idia badinaia ela bona idia mase bona edia haheitalai ese ia hahedinaraia ena be Keristani taudia ese  hekwakwanai idia davaria, to Iehova idia badinaia noho diba. “Witnes orea badana” be edia heau helulu idia haorea vadaeni bona edia haheitalai ese ma haida ia hagoadaia diba. Mani oi laloa, bema ita be heau helulu ta lalonai, bona idia kwalimu vadaeni taudia be ita idia raraia bona hagoadaia, vadaeni mai goada ida do ita heau ela bona dokona, ani? Vadaeni bema Heberu Keristani taudia ese “witnes orea badana” edia haheitalai idia laloa, unai ese idia do ia durua mai haheauka ida idia heau noho totona. Edia haheitalai ese ita do ia durua danu.

12. Paulo ese ia herevalaia abidadama taudia amo dahaka ita dibaia?

¹² Paulo ese ia herevalaia abidadama taudia edia nega oromana be hari iseda nega bamona. Hegeregere, Noa ena nega ai, Iehova ia gwau kahirakahira abata amo tanobada do ia hadikaia. Hari ita noho negana danu, kahirakahira Iehova ese Satani ena tanobada do ia hadikaia. Ma danu, Iehova ese Aberahamo bona Sara ia hamaorodia Uru hanuana do idia rakatania, tomadiho momokani do idia badinaia bona iena gwauhamata ia hagugurua negana do idia naria. Oibe, bema iseda mauri ibounai lalonai Iehova ita badinaia, ia be iseda turana ai do ia lao bona ita dekenai ahuna namona do ia henia. Mose be Gwauhamata Tanona ia lao totona, dala daudauna ia raka bona hekwakwanai momo ia davaria. Unai hegeregerena, ita be tanobada dikana ai ita noho bona hekwakwanai momo ita davaria danu, to Iehova ia gwauhamatalaia tanobada matamatana ita naria noho. Unai dainai, namona be unai abidadama taudia edia kara namodia ita tohotohoa, to edia kara kereredia ita dadaraia. Unai amo Iehova ita hamoalea diba.​—⁠Roma 15:4; 1 Kor. 10:⁠11.

Edena Dala ai Idia Kwalimu?

13. Noa be dahaka hekwakwanai ia davaria, bona edena dala ai ia hanaia?

¹³ Dahaka ese idia ia durua edia heau helulu idia haorea totona? Mani Noa ena sivarai ita laloa. (Heberu 11:7 duahia.) Ena be Noa be nega ta taunimanima bona animal ibounai ia hamasea ore abata ia itaia lasi, to ia diba momokani abata be do ia vara. (Gen. 6:17) Dahaka dainai? Badina ia diba Iehova be ia gwauraia gaudia ibounai do ia hagugurua. Unai dainai, Noa ese Iehova ia kamonai henia. Baibel ia gwau: “Noa ese unai bamona ia karaia, Dirava ena hereva hegeregerena.” (Gen. 6:22) Noa be ia bisi bada herea. Lagatoi ia haginia, animal ia haboua, ena ruma bese bona animal totona aniani ia haboua, taunimanima ia hadibaia Abata do ia mai, bona iena ruma bese ia hagoadaia Iehova idia abidadama henia noho totona. Unai ia karaia be mai ena hekwarahi. To Noa bona ena ruma bese be Iehova idia abidadama henia bona idia haheauka dainai, ia ese ia hamauridia bona hahenamo momo ia henidia.

14. Aberahamo bona Sara be edena dala ai edia abidadama idia hahedinaraia, bona dahaka ita dibaia?

¹⁴ Paulo ese ia herevalaia “witnes orea badana” taudia haida be Aberahamo bona Sara. Dirava ese ia hamaorodia Uru hanuana do idia rakatania neganai edia mauri ia idau, bona idia diba lasi nega vaira ai dahaka do ia vara. To, Iehova idia abidadama henia bona nega aukadia ai ia idia kamonai henia danu. Aberahamo be Iehova dekenai boubou gaudia momo ia henia, unai dainai Baibel ia gwau ia be “abidadama taudia ibounai edia tamana.” (Roma 4:11) Heberu Keristani taudia be Aberahamo bona ena ruma bese edia sivarai idia diba, unai dainai Paulo ese edia kara haida sibona ia gwauraia. Ia gwau: “Idia ibounai be edia abidadama idia dogoatao ela bona idia mase, ena be Dirava ese idia dekenai ia gwauhamatalaia gaudia idia abia lasi. To idia ese daudau amo unai gaudia idia itaia bona mai moale ida idia abia dae, bona taunimanima vairanai idia gwau idia be idau taudia bona unai tano dekenai do idia noho daudau lasi.” (Heb. 11:13) Oibe, edia abidadama bona Dirava tura henia karana ese idia ia durua mai haheauka  ida edia heau helulu idia haorea totona.

15. Dahaka dainai Mose be taga maurina ia dadaraia?

¹⁵ Mose be unai “witnes orea badana” tauna ma ta. Ia be king ena ruma ai ia noho bona ia be taga tauna. To, Aberahamo bamona unai gaudia ia rakatania, badina ia ura “Dirava ena taunimanima ida hisihisi ia abia hebou.” Dahaka dainai unai bamona ia karaia? Paulo ia gwau: “Do ia abia davana namona sibona ia laloa . . . ia gini goada noho, ita itaia diba lasi Tauna ia itaia bamona.” (Heberu 11:​24-27 duahia.) Mose be “kara dika ena moale, nega sisina do ia noho gauna ia ura henia lasi,” to mai anina bada gaudia ia atoa guna. Ia diba Dirava ena gwauhamata be do idia vara momokani. Unai ese ia durua ia gari lasi bona nega aukadia ia haheaukalaia totona. Unai dainai, ia hekwarahi Israela taudia be Aigupito amo ia hakaudia lao Gwauhamata Tanona dekenai.

16. Ena be Mose be Gwauhamata Tanona do ia vareai lasi, to dahaka ia karaia?

¹⁶ Aberahamo bona Mose be idia mase bona Dirava ese ia gwauhamatalaia gaudia edia guguru idia itaia lasi. Israela taudia be Gwauhamatana Tanona idia do vareai lasi neganai, Dirava ese Mose ia hamaoroa: “Unai tano be daudau dekena amo sibona do oi itaia. To Israela taudia dekenai lau henia tano be do oi ginidae lasi, bona unai tano lalonai do oi raka vareai lasi.” Mose bona Arona be Meribata ena ranu gabuna ai Dirava idia matauraia lasi dainai, Gwauhamata Tanona idia vareai lasi. Israela taudia idia gwau-edeede dainai, idia badu bona edia hereva amo Dirava idia hanamoa lasi. (Deu. 32:​51, 32) Ena be Mose ia diba Gwauhamata Tanona do ia vareai lasi, to Dirava ia hesiai henia goadagoada. Dirava ena hahemaoro karana ia gwauraia dika lasi. Israela besena totona ia moale bona Iehova ia noia idia do ia hanamoa: “Israela taudia e, umui  emui noho be namo. Edena taudia ese umui idia hereaia? Lohiabada ese umui emui bese ia hamauria vadaeni. Lohiabada be emui kesi, bona emui durua Tauna, bona ia be emui kwalimu tuari kaia.”​—⁠Deu. 33:⁠29.

Ita Dibaia Gaudia

17, 18. (a) “Witnes orea badana” taudia amo dahaka ita dibaia? (b) Pura vaira ena stadi ai dahaka do ita herevalaia?

¹⁷ “Witnes orea badana” taudia amo ita dibaia gauna be iseda heau helulu ita haorea totona, namona be Dirava bona ena gwauhamata ita abidadama henia. (Heb. 11:⁠6) Oibe, iseda mauri lalonai abidadama ita hahedinaraia be gau badana. Ita diba Dirava ia gwauhamata nega vaira ai mauri namona do ita moalelaia. Ita be ‘ita itaia diba lasi Tauna ita itaia bamona.’ Bona ita abia dae Dirava be ia noho momokani, unai dainai mai haheauka ida ita heau noho.​—⁠2 Kor. 5:⁠7.

¹⁸ Keristani taudia edia heau helulu be mai ena hekwarahi, to idia kwalimu diba. Pura vaira ena stadi ai, iseda heau helulu ita haorea totona, ita idia durua gaudia haida do ita herevalaia.

Anina Oi Gwauraia Diba, A?

• Dahaka dainai Paulo ese idaunega witnes taudia edia sivarai ia torea?

• Ita idia hagegea “witnes orea badana” edia haheitalai ese edena dala ai ita ia durua mai haheauka ida ita heau totona?

• Noa, Aberahamo, Sara, bona Mose edia haheitalai amo dahaka oi dibaia?

[Study Questions]

[Picture on page 19]

Aberahamo bona Sara be mai ura ida Uru hanua ena mauri namona idia rakatania