Oi Heau Goada, Emu Ahuna Oi Abia Totona

“Namona be unai bamona do umui heau, vadaeni ahuna do umui abia.” ​—⁠1 KOR. 9:​24.

1, 2. (a) Paulo be Heberu Keristani taudia ia hagoadaia totona dahaka ia herevalaia? (b) Paulo ena sisiba ita dekenai be dahaka?

APOSETOLO Paulo be Heberu Keristani taudia ia hagoadaia totona heau helulu ia herevalaia. Ia gwau idia be heau helulu taudia bamona. To, idia be sibodia idia heau lasi, badina idaunegai “witnes orea badana” idia heau danu bona idia kwalimu vadaeni. Bema Heberu Keristani taudia ese unai abidadama taudia edia kara idia tohotohoa, idia danu idia kwalimu diba.

² Vanegai stadi ai, “witnes orea badana” edia haheitalai ita herevalaia. Edia abidadama ia goada dainai, Dirava idia badinaia ela bona idia mase. Oibe, idia heau ela bona dokona. To, edena dala ai idia bamona ita heau noho diba? Paulo ia gwau: “Namona be ita idia hametaua gaudia ibounai bona ita idia guia noho kara dika ita negea, bona namona be iseda vairanai ia noho heau helulu lalonai do ita heau mai haheauka ida.”​—⁠Heb. 12:⁠1.

3. Keristani taudia be Greek taudia edia heau helulu karana amo dahaka idia dibaia?

³ Dahaka dainai Paulo ia gwau “ita idia hametaua gaudia ibounai” ita negea be namo? Buka ta (Backgrounds of Early Christianity) ese Paulo ena nega ai idia noho heau helulu taudia  ia herevalaia. Ia gwau: “Greek taudia be kopina kavakava idia treinini bona heau.” * Hari inai nega ai, ta be kopina kavakava ia heau be hemarai karana, to unai idia karaia badina idia ura lasi gau ta ese edia heau dalana ia koua bona idia kwalimu lasi. Unai dainai, Paulo ena hereva “hametaua gaudia ibounai” do idia negea, anina be mauri hanaihanai ia lao henia dalana idia koua diba gaudia idia negea be namo. Heberu Keristani taudia dekenai unai be sisiba namona, bona ita ese ita badinaia be namo. To, edena bamona gaudia ese ita idia hametaua diba?

‘Hametaua Gaudia Ibounai Negea’

4. Noa ena negai taunimanima be dahaka idia laloa bada?

⁴ Paulo ese ita ia sisiba henia “hametaua gaudia ibounai” do ita negea. Unai be iseda heau helulu dalana idia koua gaudia idauidau. Idia be dahaka? Iesu ese unai gaudia haida ia herevalaia bona abidadama tauna Noa ena nega ia herevalaia danu. Ia gwau: “Noa ena nega ai ia vara hegeregerena, taunimanima ena Natuna ena negai danu, unai bamona do ia vara.” (Luka 17:26) Oibe, inai tanobada be do ia ore, Noa ena negai ia vara bamona. Iesu ese Noa ena negai idia noho taudia edia kara be iseda negai idia noho taudia edia kara ida ia hahegeregerea. (Mataio 24:​37-39 duahia.) Unai taudia idia ura lasi Dirava idia diba bona ena ura idia badinaia. Idia be dahaka gaudia idia laloa bada? Idia aniani, idia inuinu bona idia headava. Vaia, unai be taunimanima edia kara, to idia ese unai gaudia be edia mauri lalonai idia atoa guna. Unai dainai, Iesu ia gwau idia be Noa ena hereva “idia laloa lasi.”

5. Dahaka ese ita do ia durua ita heau namonamo ela bona dokona totona?

⁵ Noa bona ena ruma bese hegeregerena, dina ta ta ita be gaukara momo ita karaia. Moni gaukara ita karaia, ita sibona bona iseda ruma bese naria totona. Unai ese iseda nega bona goada ia haorea diba. Bona bema moni dekenai ita dabu, tauanina durua gaudia abia totona do ita lalohekwarahi momo. Danu, ita be bapatiso Keristani taudia dainai, mai anina bada maduna ma haida ita huaia. Hegeregere, haroro gaukara, hebou totona ita hegaegae bona ita lao, ruma bese ena tomadiho bona sibona eda stadi ita karaia. Noa ena gaukara danu be momo, to “Dirava ena hereva ibounai” ia badinaia. (Gen. 6:22) Ita heau namonamo ela bona dokona totona, gau badana be ‘ita idia hametaua gaudia ita negea.’

6, 7. Edena sisiba ita laloatao be namo?

⁶ Paulo ena sisiba “hametaua gaudia ibounai” do ita negea ena anina be dahaka? Ia gwau lasi iseda maduna ibounai do ita dadaraia. Maduna haida be mai anina bada. To, namona be Iesu ena hereva ita laloatao, ia gwau: “Namo lasi umui lalohekwarahi bona umui gwau, ‘Dahaka do ita ania?’ eiava, ‘Dahaka do ita inua?’ eiava ‘Dahaka dabua do ita hahedokilaia?’ Badina unai gaudia ibounai be tanobada taudia ese idia tahua goadagoada noho. To emui guba Tamana ia diba umui be unai gaudia umui abia be namo.” (Mat. 6:​31, 32) Iesu ena sisiba amo ita dibaia gauna be,  bema mauri durua gaudia hegeregere aniani bona dabua ita laloa bada, unai ese ita idia hametaua bona iseda heau dalana idia hadikaia diba.

⁷ Iesu ena sisiba ita laloatao be namo, ia gwau: “Emui guba Tamana ia diba umui be unai gaudia umui abia be namo.” Unai ese ia hahedinaraia iseda Tamana, Iehova be iseda dabu gaudia ia diba. Unai dainai, Iesu ia gwau ita lalohekwarahi lasi be namo, badina tanobada taudia be unai gaudia idia “tahua goadagoada noho.” To, dahaka dainai iseda dabu gaudia totona ita lalohekwarahi be aonega karana lasi? Iesu ia gwau: “Umui naria namonamo, aniani momo, inuinu momo, bona mauri ena lalohekwarahi amo emui lalohadai maorona umui hadikaia garina, bona karaharaga unai dina be umui latanai do ia ginidae, tarapu ese animal ia abia bamona.”​—⁠Luka 21:​34, 35.

8. Dahaka dainai hari “ita idia hametaua gaudia ibounai” ita negea be namo?

⁸ Ita be heau helulu ena dokona ita itaia diba. Unai dainai, gau ta ese iseda heau dalana ia hadikaia lasi totona, “ita idia hametaua gaudia ibounai” ita negea be namo. Unai be aposetolo Paulo ena sisiba bamona, ia gwau: “Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere.” (1 Tim. 6:⁠6) Bema Paulo ena sisiba ita badinaia do ita heau noho bona kwalimu ahuna do ita abia.

“Ita Idia Guia Noho Kara Dika Ita Negea”

9, 10. (a) “Ita idia guia noho kara dika” be dahaka? (b) Keristani tauna goadana ena abidadama dekenai dahaka ia vara diba?

⁹ Paulo ma ia gwau namona be “ita idia guia noho kara dika ita negea.” Baibel lalonai Greek herevana idia hahanaia “guia” be Heberu 12:1 sibona ai idia gaukaralaia. Baibel ia diba bada tauna, Albert Barnes ia gwau: “Unai nega ai heau helulu taudia be kopina kavakava idia heau, unai amo dabua ese edia aena do ia mogea lasi. Unai hegeregerena, Keristani tauna ese ia idia guia gaudia ibounai do ia negea.” Namona be Keristani tauna ia naria namonamo, dika gau haida ese iena heau dalana idia hadikaia bona ena abidadama ia manoka. Edena dala ai unai ia vara diba?

¹⁰ Keristani tauna ena abidadama be metairametaira ia manoka ia lao diba. Paulo ese Heberu Keristani taudia ia tore henidia neganai, unai ia herevalaia. Ia gwau namona be idia naria namonamo, dika edia abidadama amo idia “hure oho” bona ‘abidadama lasi kudou dikana idia abia.’ (Heb. 2:1; 3:12) Bema dabua ese heau tauna ena aena ia mogea, do ia heau namonamo lasi bona ia moru diba. To, nega haida heau tauna ia laloa ia be hegeregere, eiava gau momo ese ena lalona ia veria dainai, unai sisiba ia badinaia lasi. Paulo ena sisiba amo dahaka ita dibaia?

11. Dahaka ese iseda abidadama ia hadikaia diba?

¹¹ Bema Keristani tauna be abia hidi kereredia ia karaia, ena abidadama ia manoka diba. Diba bada tauna ma ta ese “ita idia guia noho kara dika” ia herevalaia neganai, ia gwau: “Eda noho dalana, ita bamoa taudia, iseda ura dikadia ese ita idia hakaua kerere bona eda abidadama idia hadikaia diba.”​—⁠Mat. 13:​3-9.

12. Iseda abidadama ia goada totona, dahaka sisiba ita badinaia be mai anina bada?

¹² Igui hesiai tauna mai ena kamonai ese ita ia hadibaia TV bona Intanet dekenai ita raraia gaudia bona ita kamonai miusiki do ita abia hidi namonamo, badina unai gaudia ese iseda lalohadai idia hadikaia diba. Danu, ita idia hadibaia kohu momo bona moni ura henia karana be mai ena dika. Bema tanobada ena moale karadia o kohu matamatadia ita ura henia, unai gaudia dekenai nega bada ita haorea diba bona mai anina bada gaudia do ita laloaboio. Namo lasi ita laloa: ‘Unai be sisiba aukana,’ eiava, ‘Egu abidadama be goada dainai unai sisiba be lau totona lasi, ma haida ese idia badinaia be namo.’ Satani be inai tanobada  ena lalohadai bona ura ia gaukaralaia ita ia hakaua kerere totona. Ia ura lasi iseda heau helulu ita haorea. Haida idia laloa idia be hegeregere bona do idia moru lasi, eiava tanobada gaudia idia laloa momo dainai, edia abidadama ia manoka. Bema ita dekenai unai ia vara, mauri hanaihanai ena ahuna ita haboioa diba.​—⁠1 Ioa. 2:​15-17.

13. Tanobada taudia edia lalohadai ita dadaraia totona dahaka ita karaia be namo?

¹³ Dina ta ta ai, tanobada taudia idia ura edia lalohadai, idia laloa bada gaudia ita abia dae bona edia kara ita tohotohoa. (Efeso 2:​1, 2 duahia.) To, ita be abia hidi ita karaia diba. Tanobada taudia edia lalohadai do ita abia dae, eiava lasi. Paulo ia gwau tanobada taudia edia lalohadai be “hodahoda” bamona, to unai “hodahoda” be mai ena poisini. Ita ura lasi hodahoda dikana ita hahodia hegeregerena, ita ura lasi tanobada taudia edia lalohadai ita abia dae. Vadaeni, dahaka ese ita do ia durua ita heau noho totona? Iesu ena haheitalai; ia be ia heau ela bona dokona, unai dainai ia ita tohotohoa be gau badana. (Heb. 12:⁠2) Aposetolo Paulo danu be haheitalai namona. Ia be Keristani heau helulu lalonai ia heau, bona ena tadikaka ia hagoadaia ia idia tohotohoa totona.​—⁠1 Kor. 11:1; Fili. 3:⁠14.

‘Ahuna Ita Abia’ Dalana

14. Keristani heau helulu dekenai Paulo ena lalohadai be dahaka?

¹⁴ Keristani heau helulu dekenai Paulo ena lalohadai be dahaka? Nega ginigabena Efeso elda taudia ia hereva henidia neganai, ia gwau: “Lau laloa egu mauri be gau badana lasi, to namona be egu heau helulu bona Lohiabada Iesu amo lau abia hesiai gaukarana lau haorea.” (Kara 20:24) Paulo be ena heau helulu ia haorea totona, ena ura gaudia haida ia dadaraia bona ena mauri ia halusia danu. Ia gaukara goadagoada sivarai namona ia harorolaia totona. To, ia gwau bema ena heau helulu ia haorea lasi, ia be ia hekwarahi kava bamona. Ia laloa lasi ia be ena heau helulu dekenai ia kwalimu vadaeni, to ia gaukara goadagoada ela bona dokona. (Filipi 3:​12, 13 duahia.) Paulo ia do mase lasi neganai, ia  gwau: “Tuari namona lau tuarilaia vadaeni, heau helulu lau haorea vadaeni, bona Keristani abidadama lau badinaia vadaeni.”​—⁠2 Tim. 4:⁠7.

15. Paulo be iena tadikaka ia hagoadaia dahaka idia karaia totona?

¹⁵ Paulo ia ura ena Keristani tadikaka ese edia heau helulu do idia haorea. Filipi Keristani taudia ia hamaoroa mauri idia abia totona ‘mauri ena hereva idia dogoatao goada’ be namo. Paulo dekenai unai be mai anina bada, badina ia gwau: “Keriso ena dina ai do lau moale, badina lau diba lau heau kava lasi eiava lau hekwarahi kava lasi.” (Fili. 2:16) Korinto Keristani tadikaka ia hagoadaia idia kwalimu totona idia heau noho be namo. Ia gwau: “Namona be unai bamona do umui heau, vadaeni ahuna do umui abia.”​—⁠1 Kor. 9:⁠24.

16. Dahaka dainai iseda ahuna ita laloa noho be namo?

¹⁶ Heau helulu daudauna lalonai ia heau tauna be matamanai heau helulu ena laini dokona do ia itaia lasi. To, ia heau lalonai ia be dokona ia laloa noho, bona ia diba kahirakahira do ia ginidae. Unai dainai, ia heau goadagoada ena heau ia haorea totona. Keristani heau helulu be unai bamona. Dokona ai do ita abia ahuna ita laloa noho be namo. Unai ese ita do ia durua iseda heau helulu ita haorea bona kwalimu ahuna do ita abia.

17. Edena dala ai abidadama ese ita ia durua iseda ahuna ita laloa noho totona?

¹⁷ Paulo ia gwau: “Abidadama ena anina be inai, oi daradara lasi to oi diba oi naria noho gauna be do ia vara. Bona oi diba momokani, oi abia dae gaudia be momokani, ena be unai gaudia oi itaia lasi.” (Heb. 11:⁠1) Aberahamo bona Sara be edia mauri namona idia rakatania bona tano idauidau ai “idau taudia” bamona idia noho. Edena bamona unai idia karaia diba? Dirava ese idia dekenai ia gwauhamatalaia gaudia idia abia dae momokani. “Daudau amo unai gaudia idia itaia” bamona. Mose be “nega sisina do ia noho gauna ia ura henia lasi” bona “Aigupito ena dava bada gaudia” ia dadaraia. Dahaka ese ia durua unai bamona abidadama ia hahedinaraia totona? Ia be “do ia abia davana namona sibona ia laloa.” (Heb. 11:​8-13, 24-26) Paulo ia gwau idia ta ta be mai edia “abidadama dainai” unai idia karaia diba. Edia abidadama be ia goada dainai, ena be nega aukadia idia davaria, to edia ahuna idia laloaboio lasi. Idia diba Dirava be idia ia durua bona ia gwauhamatalaia gaudia be do idia vara momokani.

18. Iseda heau helulu ita haorea totona, dahaka ita karaia be namo?

¹⁸Heberu karoa 11 ese ia herevalaia abidadama tatau bona hahine edia sivarai ita laloa dobu, bona edia haheitalai ita tohotohoa be namo. Unai ese eda abidadama do ia hagoadaia bona “ita idia guia noho kara dika ita negea” diba. (Heb. 12:⁠1) Danu, hebou ai iseda tadikaka taihu ‘ita laloa bona ita hagoadaia, ita lalokau heheni bona kara namodia ita karaia’ badina idia danu idia ura edia abidadama ia goada.​—⁠Heb. 10:⁠24.

19. Dahaka dainai hari ita heau noho be mai anina bada?

¹⁹ Ita be heau helulu ena laini dokona ita itaia diba, bona kahirakahira iseda heau helulu do ita haorea. Bona ita diba Iehova ese ita do ia durua bona ia ita abidadama henia dainai, “ita idia hametaua gaudia ibounai bona ita idia guia noho kara dika ita negea” diba. Vadaeni, bema ita heau noho iseda Tamana Iehova ese ia gwauhamatalaia ahuna ita abia diba.

[Footnote]

Oi Laloatao, A?

• Edena dala ai “ita idia hametaua gaudia ibounai” ita negea diba?

• Dahaka gaudia ese Keristani tauna ena abidadama ia hadikaia diba?

• Dahaka dainai do ita abia kwalimu ahuna ita laloa noho be namo?

[Study Questions]

[Picture on page 23]

“Ita idia guia kara dika” be dahaka? Bona edena dala ai ita idia guia diba?