Fred Rusk ese ia sivarailaia

Salamo 27:10 ia gwau: “Egu tamana bona sinana, ese lau idia rakatania, to Lohiabada ese lau do ia abia dae.” Egu mauri dekenai unai lau mamia momokani. Mani egu sivarai lau gwauraia.

LAGANI 1930 lalodiai, Great Depression ia vara neganai, lau be egu tubuna ida lau noho, Georgia, U.S.A. dekenai, bona ia be mai ena kotini uma gabuna. Egu sinana bona tadina merona idia mase neganai, egu tamana ia lalometau bada. Lau be egu tubuna ida ia rakatania bona siti ma ta dekenai ia lao moni gaukara ia tahua totona. Gabeai, egu tamana ia ura ia ida lau noho, to unai ia vara lasi.

Egu laladia ese ruma idia hagoevaia bona naria. Egu tubuna be tomadiho ia laloa bada lasi, to egu laladia be Baptis dubu taudia. Lau idia hagaria idia gwau, bema Sunday ta ta dubu lau lao lasi, lau do idia kwadia. Unai dainai lau maragi negana amo, tomadiho lau laloa lasi, to sikuli bona spot gadara lau moalelaia.

Egu Mauri Ia Haidaua Vadivadina

Lagani 1941 ai, egu mauri lagani be 15 neganai, tau ta bona ena adavana be ai idia vadivadi henia. Ruma taudia idia gwau ia be egu vavana Talmadge Rusk. Ia lau diba lasi, to gabeai lau laloparara ia bona ena adavana be Iehova ena Witnes taudia. Ia gwau Dirava ena ura be tanobada dekenai taunimanima do idia mauri hanaihanai. To, unai be egu dubu ai lau kamonai gaudia amo ia idau. Idia herevalaia gaudia be egu ruma bese taudia ese idia dadaraia bona idia hamaorodia ai do idia vadivadi henia lou lasi. To, egu lalana Mary, ena mauri lagani be 18, ese idia amo Baibel bona magasin haida ia abia.

Mary ia laloparara haraga unai be Baibel ena hereva momokani bona lagani 1942 ai ia bapatiso. Iesu ese ia perovetalaia gauna be ia dekenai ia guguru danu, ia gwau: “Tau ta ena inai taudia be ena ruma bese taudia.” (Mat. 10:​34-36) Emai ruma bese taudia ese idia dagedage henia. Mary ena kakana be gavamani taudia ida ia gaukara, bona hehuni dalanai ia bona taoni naria tauna ese egu vavana Talmadge idia samania idia gwau, ia be laiseni lasi to buka bona magasin ia hoihoilaia kava. Unai dainai dibura ruma dekenai idia atoa.

Taoni naria tauna be diadi tauna danu. Kota dekenai ia gwauraia herevadia be niuspepa ai idia halasia, idia gwau: “Inai tauna ese ia hariharilaia buka bona magasin . . . be poisini dikana ta bamona.” Ena be egu vavana ia  apil bona keis ia wini, to dina ten dibura ruma ai idia koua.

Egu Lalana ese Lau Ia Durua

Mary ese Baibel amo ia dibaia gaudia be lau bona dekena taudia dekenai ia harorolaia. Nega ta, Mary lau bamoa ena Baibel stadi ta ai itaia totona. Unai stadi tauna be buka ta ladana The New World a ia abia. Iena adavana ia gwau, ena tau be hanuaboi ai ia mahuta lasi, to unai buka ia duahia. Ena be lau ura lasi tomadiho oreana ta lau bamoa, to lau dibaia gaudia lau ura henia. Baibel ena hahediba herevadia sibona ese egu lalona ia veria lasi, to Witnes taudia ese idia davaria dagedage amo lau diba momokani idia be Dirava ena taunimanima.

Hegeregere, dina ta lau bona Mary be uma gabu amo ai giroa neganai, ai davaria Mary ena kakana toi ese ena buka, magasin, phonograph masini, bona Baibel rekodi idia gabudia. Lau badu dikadika, to idia ta ia gwau: “Gabeai, ai karaia gauna dainai, ai do oi tanikiu henia.”

Lagani 1943 ai, Mary idia lulua badina ia ura lasi haroro gaukara ia hadokoa. To, lau moale badina unai nega ai lau diba Dirava ena ladana be Iehova, ia be lalokau bona hebogahisi Diravana bona hel lahina dekenai taunimanima ia hahisia lasi. Danu, lau dibaia gauna ma ta be Iehova be mai ena orea, ena be hebou ta dekenai lau do lao lasi.

Dina ta rei lau utua noho lalonai, tatau rua be motuka ta amo idia mai bona idia henanadai bema lau be Fred. Lau laloparara idia be Witnes taudia neganai, lau gwau: “Namona be lau guia bona gabu namona ta dekenai ita lao bona ita herevahereva.” Mary ese idia ia siaia lau idia haroro henia totona. Shield Toutjian be sekit naria tauna ta, bona ia ese lau ia durua lau goada totona. Iehova ena Witnes taudia ese idia abia dae gaudia be mai gari lasi ida lau herevalaia dainai, egu ruma bese ese lau idia dagedage henia.

Mary be Virginia amo lau ia tore henia bona ia gwau bema lau ura Iehova lau hesiai henia, namona be ia ida lau noho. Egu lalona lau hadaia do lau lao. Friday hanuaboi ta October 1943 ai, maua ta lalonai egu kohu lau udaia bona au ataiai lau kwatua. Daba ia rere neganai, unai maua lau abia, dekena taudia edia ruma murina lau raka lao, motuka ta dekenai lau guia bona taoni dekenai lau lao. Roanoke siti dekenai lau ginidae bona Edna Fowlkes ena ruma dekenai Mary lau davaria.

Lau Goada, Bapatiso, Bona Betele

Edna be horoa taihu ta bona ia be heabidae hahinena. Ia be aposetolo Paulo ena negai ia  noho taihu Lidia bamona. Edna be mai ena ruma badana bona ma haida ia naria hegeregere ena nakimi mai ena natuna kekeni rua, Gladys bona Grace Gregory, bona egu lalana Mary. Gabeai unai kekeni rua be misinari taudia ai idia lao. Hari Gladys ena mauri lagani be 90 bamona bona ia be Japan brens opesi ai ia gaukara noho.

Edna ena ruma ai lau noho neganai, hanaihanai hebou lau lao bona haroro hanamoa daladia lau dibaia. Dirava ena Hereva lau stadilaia bona Keristani heboudia lau lao karana be ta ese ia koua lasi dainai, unai ese lau ia durua hereva momokani lau diba namonamo totona. June 14, 1944 ai bapatiso lau abia. Daudau lasi murinai, Mary, Gladys bona Grace be Virginia ena not kahana dekenai painia gaukara idia hamatamaia. Leesburg kongrigeisen be idia ese idia hamatamaia. Lagani 1946 ai, Leesburg kahirakahira ia noho provinsi ta ai painia gaukara lau hamatamaia. Gabeai, ai ibounai be August 4-11 ai Cleveland, Ohio dekenai idia karaia intanesinol hebouhebou dekenai ai lao.

Unai hebouhebou dekenai tadikaka Nathan Knorr, orea ia hakaua tauna, ese Brooklyn Betele do idia habadaia gaukarana ia herevalaia. Ia gwau Betele taudia edia noho gabuna bona printa ruma matamatana ma ta do idia haginia. Unai dainai, tadikaka matamatadia momo idia boiria unai gaukara idia karaia totona. Egu lalona lau hadaia unai dala ai Iehova lau hesiai henia totona. Unai murinai egu aplikeisen lau atoa, bona December 1, 1946 ai, Betele dekenai lau vareai.

Lagani ta murinai printa dipatmen ia naria tadikakana, Max Larson be lau ia vadivadi henia Mailing Department dekenai. Lau ia hamaoroa Haroro Naria Dipatmen dekenai do lau gaukara. Unai dipatmen ia naria tadikaka T. J. (Bud) Sullivan ida lau gaukara, bona ia amo Iehova ena hakaua herevadia bona ena orea haheaua daladia idauidau lau dibaia.

Egu tamana ia buruka neganai, Dirava ia laloa matamaia bona nega haida Betele dekenai lau ia vadivadi henia. Lagani 1965 ai ena vadivadi ginigabena ai ia gwau, “Mani lau do oi vadivadi henia, badina oi do lau vadivadi henia lou lasi.” Ia do mase lasi neganai, nega ta ta lau lao ia lau itaia totona. Iena lalohadai be ia be guba dekenai do ia lao. To, egu ura be ia be Iehova ese do ia laloatao bona toreisi lou negana ai, tanobada Paradaisona ai ia noho diba.

Hebouhebou Bona Konstraksen Edia Memori

Hebou badadia ese lau idia durua egu hesiai gaukara lau habadaia totona. Lagani 1950  lalodiai New York ena Yankee Stadium dekenai idia karaia intanesinol hebouhebou ese lau ia durua bada. Dina ta lagani 1958 ai, Yankee Stadium bona Polo Grounds dekenai tano 123 amo idia mai taudia be 253,922. Unai hebou dekenai ia vara gauna ta be lau laloaboio diba lasi. Hebouhebou naria dipatmen lau durua noho lalonai Tadikaka Knorr be lau dekenai ia raka mai haraga bona ia gwau: “Fred, lau laloaboio dainai painia taudia do ia hereva henia tadikaka ta lau abia hidi lasi. Idia ibounai be ai rentaia gabuna dekenai idia naria noho. Mani oi lao haraga, bona oi raka lao lalonai do oi herevalaia gauna oi laloa bona tok namona ta oi henia.” Lau raka lao lalonai, Iehova lau guriguri henia loulou, bona do lau herevalaia gauna lau laloa. Lau ginidae neganai lau laga tuna momokani.

Lagani 1950 bona 1960 lalodiai, New York City dekenai pablisa edia namba ia bada ia lao dainai, ai rentaia gabudia be idia hegeregere lasi ibounai idia hebou totona. Unai dainai lagani 1970 ia lao 1990 ai, Manhattan dekenai ruma badadia toi ai hoia bona Kingdom Hall ai ai halaodia. Unai ruma hanamoa gaukarana lau naria dainai, Iehova ese unai kongrigeisen idauidau ia hanamoa dalana lau itaia. Tadikaka edia kontribusen moni amo unai ruma hanamoa gaukarana ai haorea. Hari, unai Kingdom Hall idia do gaukaralaia noho.

Egu Mauri Ia Idau

Dina ta lagani 1957 ai, lau be Betele rumana bona printa rumana huanai lau raka lao noho lalonai medu ia diho. Betele taihu hairaina ta be damaru lasi bona medu lalonai ia raka. Lau be mai egu damaru dainai lau hamaoroa lau ida do ia raka. Unai taihu ena ladana be Marjorie bona lagani 1960 ai, ai headava. Unai nega amo ai raka hebou Iehova ai hesiai henia totona, nega dikadia bona nega namodia ai danu. September 2010 ai emai headava lagani 50 ai moalelaia.

Ai headava bona emai holidei amo ai giroa lou neganai, Tadikaka Knorr ese lau ia hamaoroa Gilead Sikuli ai gaukara do lau karaia. Unai be hahenamo badana! Lagani 1961 ia lao 1965, unai kosi be hua eit lalonai ai karaia, bona brens idauidau amo idia mai tadikaka dekenai brens haheaua dalana ai hadibaia. To lagani 1965 dokonai, kosi ai hakwadogia bona hua faiv lalonai misinari taudia ai hadibaia.

Lagani 1972 ai, Gilead Sikuli lau rakatania bona Writing Correspondence Department lau naria. Henanadai idauidau edia haere tahua karana ese lau ia durua Baibel ena hahediba herevadia lau lalopararalaia totona. Danu,  hekwakwanai hamaoromaoroa daladia tahua gaukarana ese lau ia durua Baibel ena hakaua herevadia amo ma haida lau durua diba.

Bena lagani 1987 ai, Hospital Information Services dipatmen ai lau gaukara matamaia. Hospital Liesen Komiti ena kosi ta ai karaia bona elda taudia ai hadibaia edena bamona doketa taudia, diadi taudia bona welfea taudia dekenai Baibel ena lalohadai rara dekenai idia herevalaia totona. Unai nega ai hekwakwanai badana ta be, doketa taudia ese gwaumaoro idia abia lasi, to Witnes natudia dekenai rara idia henia kava. Nega momo kota amo oda pepana idia abia unai idia karaia totona.

Doketa dekenai medikol heduru ma haida ai gwauraia neganai, nega momo idia gwau unai bamona gaudia be lasi o edia davana be bada herea. Unai bamona ia hereva doketa ta dekenai lau gwau, “Mani emu imana lau itaia.” Ena imana ia hahedinaraia neganai, lau gwau, “Oi itaia, oiemu imana be harihari gauna namo hereana, ia be rara henia karana ia hereaia.” Unai hereva namona amo ia laloparara, opereisen negadiai ivaia kaia ia gaukaralaia namonamo neganai, gorere tauna ese rara bada do ia halusia lasi.

Idia hanaia lagani 20 lalodiai, Iehova ese Hospital Liesen Komiti edia gaukara ia hanamoa dainai, doketa bona diadi taudia idia durua. Idia be rara ita dadaraia ena badina idia lalopararalaia neganai, edia lalohadai idia haidaua. Doketa bona diadi taudia idia laloparara medikol heduru daladia ma haida idia noho, bona rara lasi opereisen idia karaia doketa bona hospital be momo, bona gorere tauna be unuseniai idia siaia diba.

Lagani 1996 amo ema bona hari, lau bona Margorie be Watchtower Educational Center, Patterson, New York dekenai Iehova ai hesiai henia noho. Lau be nega sisina lalonai Haroro Naria Dipatmen dekenai lau gaukara, bona nega haida brens naria taudia bona loaloa naria taudia lau hadibaia. Bona idia hanaia lagani 12 lalodiai, Writing Correspondence Department naria gaukarana lau karaia lou.

Buruka Negana Ena Hekwakwanai

Hari egu mauri lagani be 80 mai kahana dainai, Betele ena maduna haida lau huaia be mai ena hekwarahi. Lagani 10 idia hanaia vadaeni, lau be kensa gorere lau haheaukalaia. Lau mamia lau be Hesekaia bamona, Iehova ese egu mauri ia halataia. (Isa. 38:⁠5) Egu adavana danu be Alzheimer gorere ia abia, bona ena gorere haheaukalaia totona ai heduru heheni. Margorie be Iehova ia hesiai henia hahine namona, matamata taudia ia durua, bona ia be egu turana namona. Ia be Baibel ia stadilaia hanaihanai bona ma haida dekenai ia hadibaia namonamo. Emai Baibel stiuden momo be emai natudia bamona, bona ai idia laloaboio lasi.

Egu lalana Mary be March 2010 ai ia mase, ena mauri lagani be 87. Ia be ma haida dekenai Baibel ia hadibaia namonamo bona ia durudia tomadiho momokani idia badinaia noho totona. Lagani momo lalonai ful-taim hesiai gaukara ia karaia. Lau moale badina ia ese lau ia durua Baibel ena hereva momokani lau dibaia bona iseda lalokau Diravana, Iehova, lau hesiai henia diba. Mary be ena adavana badinai idia guria. Ena adavana be guna Israel dekenai misinari gaukara ia karaia. Lau diba momokani, toreisi lou neganai Iehova ese idia do ia laloatao.

Idia hanaia lagani 67 lalodiai, egu hesiai gaukara lau laloa lou neganai, Iehova lau tanikiu henia badina lau ia hanamoa bada. Lau moale badina Iehova ena ura lau karaia! Iehova ena hebogahisi hereadaena lau abidadama henia dainai, ena Natuna ena gwauhamata ena guguru negana lau naria noho, ia gwau: “Egu ladana dainai ruma, tadikaka, taihu, tamana, sinana, natudia, eiava tano idia rakatania taudia ibounai, ese unai gaudia momo do idia abia bona mauri hanaihanai do idia abia.”​—⁠Mat. 19:⁠29.

[Footnote]

[Picture on page 19]

1928, egu tubuna ena kotini uma gabu ai, Georgia, U.S.A.

[Picture on page 19]

Egu lalana Mary bona vavana Talmadge

[Picture on page 20]

Mary, Gladys, bona Grace

[Picture on page 20]

Egu bapatiso dinana, June 14, 1944

[Picture on page 20]

Haroro Naria Dipatmen

[Picture on page 21]

Egu lalana Mary ida, 1958 ena intanesinol hebouhebou, Yankee Stadium

[Picture on page 21]

Emai headava dinana

[Picture on page 21]

Lau bona Marjorie, 2008