Iesu Keriso be au dekenai idia kokoa kau ena hora korikorina ita diba, a?

Unai henanadai ia vara badina Mareko ese ia torea horana be Ioane ese ia torea horana amo ia idau. Mareko ia gwau: “Daba 9 oklok [“hora namba 3,” futnout] ai, au dekenai ia idia kokoa kau.” (Mar. 15:25) To Ioane ia gwau, “hora namba 6” ai Pilato ese Iuda taudia dekenai Iesu ia henia hanai, au dekenai idia kokoa kau totona. (Ioa. 19:​14-16, futnout) Unai siri edia idau ena badina hamaoromaoroa totona, Baibel ena anina idia tahua taudia be lalohadai idauidau idia gwauraia. To, Baibel ese unai siri edia idau ena badina korikori ia hahedinaraia lasi. Mani aposetolo edia negai idia noho taudia ese hora idia duahia dalana ita herevalaia.

Iuda taudia idia gwau dina be hora 12 lalonai ia diari, unai be dina ia daekau negana amo hora idia duahia matamaia. (Ioa. 11:⁠9) “Hora namba 3” be daba 8 ia lao 9 oklok bamona bona “hora namba 6” be 11 ia lao 12 oklok bamona. Lagani ta lalonai dina ia daekau bona ia diho negadia be idauidau. Badina siahu negana eiava keru negana ai, dina ia diari ena lata be idauidau. Unai dainai, taunimanima ese dina idia itaia bona unai hegeregerena hora idia gwauraia. Keristani Grik Toretoredia lalonai gau ta ia vara ena hora idia herevalaia neganai, hora korikorina idia gwauraia lasi to idia gwau hora namba 3, 6 eiava 9 bamona. (Mat. 20:​3, 5, futnout; Kara 10:​3, 9, 30, futnout) To, Ioane 4:52 ese ia gwauraia sivaraina ai hora korikorina idia torea. Badina unai hora ai Iesu ese tama ta ia hamaoroa ena natuna be gorere amo ia hanamoa vadaeni.

Evanelia bukadia foa ese Iesu ena dina oredia lalonai idia vara gaudia idia herevalaia neganai, edia sivarai be hegeregere. Idia hahedinaraia daba ia rere neganai, hahelaga taudia bona tau badadia idia hebou bona Iesu be Roma ena Gavana Pontio Pilato dekenai idia abia lao. (Mat. 27:1; Mar. 15:1; Luka 22:66; Ioa. 18:28) Mataio, Mareko, bona Luka idia gwau “hora namba 6” ai, Iesu be au dekenai idia kokoa kau vadaeni bona gabu ia dibura “ela bona hora namba 9.”​—⁠Mat. 27:​45, 46, futnout; Mar. 15:​33, 34, futnout; Luka 23:⁠44.

Iesu ena mase negana ita diba totona mai anina bada gauna be inai: Au dekenai tau ta idia ura kokoa kau neganai, idia kwadia guna. Nega haida tau ta be idia kwadia dikadika dainai, ia mase diba. Reana Iesu danu be idia kwadia dikadika dainai ia be goada lasi ena au ia huaia noho totona, unai dainai tau ma ta ese ena au ia huaia. (Luka 23:26; Ioa. 19:17) Bema Iesu be au dekenai idia kokoa kau totona idia kwadia guna, ita diba lasi hora hida lalonai unai idia karaia. Reana, Ioane be Iesu idia kwadia horana ia torea bona Mareko be au dekenai Iesu idia kokoa kau horana ia torea. Unai dainai, idia torea hora be idauidau.

Mataio, Mareko, bona Luka edia Evanelia bukadia be idia torea guna, bona aposetolo Ioane be lagani momo murinai ena Evanelia bukana ia torea. Unai dainai ia ese edia toretore ia duahia diba. Momokani, Ioane ese ia torea horana be Mareko ese ia torea horana amo ia idau. Unai ese ia hamomokania Ioane be Mareko ena hereva ia kopi lasi. Ioane bona Mareko be lauma helaga ena siahu amo Baibel idia torea. Bona ena be Baibel ese ia hahedinaraia lasi dahaka dainai idia torea horana be idauidau, to ita diba edia hereva be momokani.