Sara Van Der Monde ese ia sivarailaia

Nega momo taunimanima idia gwau, “Sara, emu kiri toana be mai ena hairai. Dahaka dainai nega ibounai oi moale?” Lau hamaorodia lau be mai egu helaro namona, lau gwau: “Ena be egu aena idia dika, to do lau raka lou!”

LAU be lagani 1974 Paris, France dekenai lau vara. Egu sinana ia mara neganai, hekwakwanai haida ia davaria bona gabeai doketa idia gwau lau be cerebral palsy gorerena lau abia. Egu hereva dalana be ia auka bona egu imana bona aena lau hamarerea namonamo lasi bona epilepsy gorere lau abia danu. Unai dainai nega momo lau gorere.

Egu mauri lagani be rua neganai, egu ruma bese ida Melbourne, Australia dekenai ai lao. Lagani rua murinai, egu tamana ese lau bona egu sinana ia rakatania. Unai be nega ginigunana, lau mamia Dirava be lau kahirakahira ia noho. Egu sinana be Iehova ena Witnes hahinena ta, bona hanaihanai Keristani heboudia dekenai lau ia abia lao. Keristani heboudia ai lau dibaia gauna be, Dirava be lau ia lalokau henia bona lau do ia naria. Ena be hekwakwanai ai davaria, to Dirava ena heduru bona egu sinana ena lalokau ese lau ia hagoadaia.

Egu sinana ese Iehova guriguri henia dalana be lau ia hadibaia. Egu guriguri karana lau moalelaia, badina egu lalona ai Iehova lau hereva henia diba. Ena be lau hereva namonamo lasi, to lau diba Iehova be egu guriguri ia kamonai.​—⁠Sal. 65:⁠2.

Gorere Ia Bada, To Lau Haheauka

Egu mauri lagani be faiv neganai, egu gorere ia bada ia lao dainai, lau raka namonamo totona egu aena dekenai auri idia atoa. To, egu mauri lagani be 11 neganai, lau raka diba lasi. Bona lau hekwarahi bada bedi dekenai lau hekure o lau toreisi totona, unai dainai masini ta ese lau ia abia isi bona egu wilsea dekenai lau helai. Egu wilsea be sibona lau taria loaloa diba.

Momokani, nega haida lau lalometau, to lau bona egu sinana emai hereva badana be: “Oi karaia diba lasi gaudia oi laloa momo lasi. To oi karaia diba gaudia sibona oi karaia be namo.” Unai ese lau ia hagoadaia bona inai gaudia lau karaia diba, hegeregere hosi lau guia, bouti dekenai lau loaloa, bona vanagi amo lau kalo loaloa, egu turadia ida gabu ta dekenai ai kamepa, bona motuka momo lasi gabunai motuka lau taria diba! Lau moale badina egu imana amo gau idauidau, hegeregere laulau lau penia, dabua bona ma gau idauidau lau turia, bona raro amo gau idauidau lau karaia diba.

Egu gorere dainai, haida idia gwau lau be hegeregere lasi Dirava lau tomadiho henia totona. Egu mauri lagani be 18 neganai, sikuli tisa  ese lau ia hamaoroa egu sinana ena tomadiho lau dadaraia totona, egu sinana lau rakatania be namo, bona lau totona noho gabuna ta do ia tahua. To, lau hamaoroa egu tomadiho do lau rakatania lasi, bona bema lau hegeregere sibona lau naria, egu sinana do lau rakatania diba.

Unai murinai, lau bapatiso bona Iehova ena Witnes kekeni ai lau lao. Lagani rua murinai ruma maragina ta lau abia. Lau moale badina egu ura gaudia lau karaia diba bona haida ese lau idia durua.

Ta Ia Ura Lau Ia Adavaia

Idia hanai laganidia lalonai, hahetoho momo lau davaria. Dina ta lau hoa dikadika badina egu sikuli turana ta​—⁠ia danu ia raka diba lasi​—⁠ese lau ia noia ia lau adavaia totona. Matamanai, iena hereva dainai lau moale. Kekeni matamatadia momo bamona lau danu lau ura headava. To, lau laloparara ai ruaosi be gorere taudia dainai, emai headava maurina be do ia auka. Danu, ia be Iehova ia diba lasi. Emai tomadiho, ura gaudia, bona tahua gaudia be idau. Unai dainai, edena bamona emai headava ai moalelaia diba? Egu lalona lau hadaia Dirava ena hahegani lau badinaia bona Keristani tauna sibona do lau adavaia. (1 Kor. 7:39) Unai dainai, mai hemataurai ida ia lau hamaoroa do lau adavaia lasi.

Lau diba lau be abia hidi maorona lau karaia. Lau diba momokani Dirava ena tanobada matamatana ai do lau moale. (Sal. 145:16; 2 Pet. 3:13) To hari, egu lalona lau hadaia Iehova lau badinaia noho totona, bona ena be lau be mai egu gorere, to do lau moale noho.

Paradaiso ai egu wilsea amo do lau toreisi bona lai bamona do lau heau, bona do lau gwau: “Guna lau raka diba lasi, to hari lau raka diba bona do lau gorere lou lasi!”