“Tauanina ena ura hegeregerena ita raka lasi, to lauma helaga ena ura hegeregerena ita raka.”​—⁠ROMA 8:⁠4.

1, 2. (a) Bema motuka taria tauna be mobael fon ai ia herevahereva, dahaka ia vara diba? (b) Bema ita naria namonamo lasi, dahaka ia vara diba?

 UNITED STATES ena gavamani tauna ta ia gwau: “Motuka taria taudia be dala idia itaia lasi dainai, aksiden momo idia vara, bona lagani ta ta ai unai hekwakwanai ia bada ia lao.” Tahua karana ta lalonai idia intaviu taudia haida idia gwau aksiden idia davaria, bona haida idia gwau kahirakahira aksiden idia davaria, badina motuka ma ta ia taria tauna be mobael fon ia gaukaralaia. Reana, motuka taria taudia idia laloa mobael fon idia gaukaralaia neganai idia be nega idia gaukaralaia namonamo, to unai ese aksiden momo ia havaraia noho.

 ² Unai hegeregerena, bema gau haida ese iseda lalona idia biagua, eda hesiai gaukara bona kara namodia idia hadikaia bona eda hetura karana Iehova ida ia hadikaia diba danu. Aposetolo Paulo ia gwau iseda abidadama ia dika diba, bouti be nadi ia botaia bamona. (1 Tim. 1:​18, 19) Roma tadikaka ia tore henidia, ia gwau: “Tauanina ena ura gaudia laloa karana ese mase ia mailaia, to lauma helaga ena gaudia laloa karana ese mauri bona maino ia mailaia.” (Roma 8:⁠6) Paulo ena hereva ena anina be dahaka? Edena dala ai “tauanina ena ura gaudia laloa karana” ita dadaraia? Bona edena dala ai ita hahedinaraia ita be “lauma helaga ena gaudia” ita laloa bada?

“Idia Kerere Lasi”

3, 4. (a) Paulo be dahaka ia lalohekwarahilaia? (b) Dahaka dainai Paulo ena sivarai ita laloa be namo?

³ Paulo ese Roma tadikaka dekenai ena lalohekwarahi ia herevalaia. Ia mamia ena tauanina bona ena lalona be idia tuari heheni. (Roma 7:​21-23 duahia.) Namo lasi ita gwau, Paulo be ena kara dika dainai ekskius ia tahua o sibona ia bogaiahisi, eiava kara maorona ia karaia diba lasi. Ita diba Paulo be lo tauna bona horoa Keristani tauna ta. Danu, ia be Iesu ese “idau bese taudia edia aposetolo tauna” ai ia halaoa. (Roma 1:1; 11:13) To, dahaka dainai Paulo ia gwau, ena tauanina bona lalona idia tuari heheni?

⁴ Paulo ia gwau ena be ia ura Dirava ena ura ia karaia, to ia hekwarahi bada. Dahaka dainai? Ia gwau: “Taunimanima ibounai be idia kara dika vadaeni bona Dirava ena hairai idia reaia.” (Roma 3:23) Paulo be Adamu ena natuna ta dainai, ia be goevadae lasi tauna bona ia hekwarahi ura dikadia ia dadaraia totona. Iena hemami ita lalopararalaia, badina ita danu be goevadae lasi bona dina ta ta ai ita hekwarahi ura dikadia ita dadaraia totona. Kara haida ese iseda tomadiho karana idia hadikaia bona mauri ia lao henia dala maragina amo ita idia hakaua siri diba. (Mat. 7:14) To, Paulo be iena hekwakwanai ia hanaia bona ita danu unai ita karaia diba.

5. Daika ese Paulo ia durua?

⁵ Paulo ia henanadai: “Daika ese lau ia hamauria diba?” Bena ma ia gwau: “Iesu Keriso, iseda Lohiabada amo Dirava lau tanikiu henia!” (Roma 7:​24, 25) Gabeai, ia ese horoa Keristani taudia, “Keriso Iesu ida idia hakapua taudia,” ia hereva henidia. (Roma 8:​1, 2 duahia.) Iehova ese ena lauma helaga amo idia be ena natuna ai ia halaodia bona “Keriso ida ahuna do [idia] abia hebou.” (Roma 8:​14-17) Lauma helaga bona Iesu ena mauri davalaia boubouna idia abidadama henia dainai, Paulo ese ia herevalaia tuarina ai idia kwalimu. Unai dainai, Dirava ia gwau idia be kerere lasi badina ‘kara dika bona mase edia taravatu amo idia ia ruhaia’ vadaeni.

6. Dahaka dainai ita ibounai ese Paulo ena hereva ita lalopararalaia be namo?

⁶ Ena be Paulo ese horoa Keristani taudia ia hereva henidia, to ia gwauraia herevadia ese ita ibounai ia durua diba, herevana guba ai o tanobada ai do ita noho. Lauma helaga ena siahu amo Paulo be unai sisiba ia torea dainai, ita ibounai ese iena hereva ita lalopararalaia bona badinaia be namo.

“Tauanina ai Ia Noho Kara Dika Ia Gwauraia Dika”

7, 8. (a) Mose ena Taravatu be dahaka ia karaia diba lasi? (b) Dirava be lauma helaga bona mauri davalaia boubouna amo dahaka ia karaia?

⁷ Paulo be Roma karoa 7 ai kara dika ese goevadae lasi taudia ia guia karana ia herevalaia. Karoa 8 ai ia gwau lauma helaga be mai ena siahu, bona kara dika ena taravatu ena siahu amo Keristani taudia ia ruhaia diba. Danu, idia ia durua Iehova ena ura idia karaia bona ena lalonamo idia abia totona. Paulo ia gwau ena be Mose ena Taravatu ese unai ia karaia diba lasi, to lauma helaga bona Iesu  ena mauri davalaia boubouna ese kara dika ena siahu amo ita ia ruhaia diba.

⁸ Mose ena Taravatu ese ia hahedinaraia taunimanima be kara dika taudia, badina Taravatu ibounai idia badinaia diba lasi. Israela ena hahelaga taudia danu be goevadae lasi taudia, unai dainai idia henia boubou gaudia ese kara dika ia kokia diba lasi. Unai ese ia hahedinaraia “Taravatu ese idia ia hamauria diba lasi.” To, Dirava ese ena Natuna be “kara dika taudia edia toana hegeregerena ai” ia siaia bona ena mauri ia bouboulaia, unai amo “tauanina ai ia noho kara dika ia gwauraia dika.” Momokani, Iesu ena boubou gauna ese taunimanima be kara dika amo ia ruhaia. Horoa Keristani taudia be unai boubou gauna idia abidadama henia dainai, Iehova ia gwau idia be kerere lasi. Paulo ese horoa Keristani taudia ia hagoadaia “tauanina ena ura hegeregerena [idia] raka lasi, to lauma helaga ena ura hegeregerena [idia] raka” be namo. (Roma 8:​3, 4 duahia.) Oibe, bema Iehova idia badinaia noho edia guba ahuna, “mauri ena korona” do idia abia.​—⁠Apok. 2:⁠10.

9. Roma 8:2 ese ia herevalaia “taravatu” be dahaka?

⁹ Paulo ese “lauma helaga ena taravatu” bona “kara dika bona mase edia taravatu” ia herevalaia danu. (Roma 8:⁠2) Unai “taravatu” be dahaka? Idia be Mose ena Taravatu amo idia idau. Buka ta ia gwau, unai siri ai Greek herevana idia hahanaia “taravatu” ese kara namona o kara dikana ia herevalaia. Ena anina ma ta be, tau ta be sibona ena ura gaudia ia badinaia bona unai gaudia be taravatu ta bamona ena mauri idia biagua.

10. Edena dala ai kara dika bona mase edia taravatu ese ita idia guia?

¹⁰ Aposetolo Paulo ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Ita ibounai be Adamu ena natudia dainai, kara dika bona mase edia taravatu ese ita idia guia bona Dirava ia moalelaia lasi karadia ita karaia. To, unai bamona kara ese mase ia havaraia. Paulo ia gwau unai bamona kara be “tauanina ena kara dikadia,” bona unai kara idia karaia taudia be “Dirava ena basileia do idia abia lasi.” (Gal. 5:​19-21) Unai taudia be ‘tauanina ena ura hegeregerena idia raka’ bona edia ura dikadia sibona idia badinaia. (Roma 8:⁠4) To, matabodaga karadia, kaivakuku tomadiho henia karana, meamea karadia bona kara dika ma haida idia karaia taudia sibona  ese edia tauanina edia ura idia badinaia, a? Lasi. To, Galatia bukana ese ia hahedinaraia “tauanina ena kara dikadia” haida be mama, badu momo, bona heiriheiri. Namona be nega ibounai ita hekwarahi unai kara dikadia ibounai ita dadaraia totona.

11, 12. (a) Iehova be dahaka ia karaia kara dika bona mase edia taravatu amo ita ia ruhaia totona? (b) Dirava ena lalonamo ita abia totona dahaka ita karaia be namo?

¹¹ Ita moale badina Iehova ese Iesu ena boubou gauna amo kara dika bona mase edia taravatu amo ita ia ruhaia! Iesu ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” Oibe, bema Dirava ita lalokau henia bona Iesu ena mauri davalaia boubouna ita abidadama henia, kara dika bona mase ese ita do idia guia lasi. (Ioa. 3:​16-18) Paulo bamona do ita gwau: “Iesu Keriso, iseda Lohiabada amo Dirava lau tanikiu henia!”

¹² Iesu ena mauri davalaia boubouna be hegeregere ita be gorere badana ta amo ia hanamoa lou. Iseda gorere ia ore momokani totona, namona be doketa ese ia gwauraia gaudia ibounai ita badinaia. Ena be ita be do goevadae lasi taudia, to bema mauri davalaia boubouna ita abidadama henia, kara dika bona mase edia taravatu amo Dirava ese ita do ia ruhaia. Bona eda hetura karana Iehova ida ia goada noho bona iena lalonamo ita abia totona, gau ta ita karaia be namo. Paulo ia gwau namona be lauma helaga ena ura hegeregerena ita raka noho, unai amo ita abia goevadae lasi gorerena amo ita namo diba.

Lauma Helaga Ena Ura Badinaia Dalana

13. Lauma helaga ena ura hegeregerena ita raka noho anina be dahaka?

¹³ Bema ita ura gabu ta ita lao, do ita raka noho ela bona unai gabu dekenai ita ginidae. Unai hegeregerena, lauma helaga ena ura hegeregerena ita raka noho totona, namona be hereva momokani lalonai ita goada ita lao. (1 Tim. 4:15) Ena be do ita hekwarahi, to ita gaukara goada dina ta ta ai lauma helaga ena hakaua dalana ita badinaia totona. Bona Dirava be do ia moale bema “lauma helaga ena dala hegeregerena [ita] raka noho.”​—⁠Gal. 5:⁠16.

14. “Tauanina ena ura hegeregerena idia kara” taudia edia lalohadai bona kara be edena bamona?

¹⁴ Paulo be Roma tadikaka ia tore henidia neganai, tauanina gaudia bona lauma helaga  ena gaudia sibona idia laloa taudia ia herevalaia. (Roma 8:5 duahia.) Inai hereva “tauanina” be tauanina korikori ia herevalaia lasi. To nega haida iseda kara bona lalohadai kereredia idia herevalaia neganai, Baibel ai unai hereva idia gaukaralaia. Paulo ena hereva bamona iseda tauanina bona lalona be idia tuari heheni. To hari, taunimanima momo be “tauanina gaudia sibona idia laloa noho” dainai, sibodia edia ura ese ia biagudia. Danu, Dirava ena heduru idia tahua lasi, o ena ura idia laloa bada lasi. To, “lauma helaga ena ura hegeregerena idia kara taudia” be idau, idia be Iehova ena hakaua dalana idia badinaia.

15, 16. (a) Taunimanima edia kara be dahaka ese ia biagua? (b) Hari momo be dahaka idia laloa bada?

¹⁵ Roma 8:6 duahia. Taunimanima momo be kara namo o dikana idia do karaia lasi neganai, edia lalona ai idia lalohadailaia guna. Hegeregere, bema ta be tauanina ena ura gaudia sibona ia laloa, ena kara ai unai do ia hedinarai.

¹⁶ Hari inai negai taunimanima be dahaka idia laloa bada? Aposetolo Ioane ia gwau: “Tanobada ena gaudia ibounai be inai, tauanina ena ura, matana ese idia ura henia gaudia bona ta ese ena kohu ia heagilaia karana, unai gaudia be Tamana amo idia mai lasi, to tanobada amo idia mai.” (1 Ioa. 2:16) Ioane ese ia herevalaia gaudia haida be, matabodaga karadia, dagi bada ura henia karana, bona kohu momo tahua karana. Nega momo buka, magasin, muvi, TV, bona Intanet dekenai unai gaudia idia hedinarai. Taunimanima momo be unai gaudia idia ura henia dainai, unai sibona idia laloa bada. Paulo ia gwau, “tauanina ena ura gaudia laloa karana ese mase ia mailaia.” Unai sibona lasi to iseda hetura karana Dirava ida ia hadikaia diba. Dahaka dainai? “Badina tauanina ena ura gaudia laloa noho karana ese ta be Dirava ena inai tauna ai ia halaoa. Tauanina ena ura be Dirava ena taravatu henunai ia noho lasi, lasi bona lasi momokani. Unai dainai tauanina ena ura hegeregerena idia kara taudia ese Dirava idia hamoalea diba lasi.”​—⁠Roma 8:​7, 8.

17, 18. Edena dala ai Dirava ena lauma helaga ese ita ia hakaua diba? Bona dahaka hahenamo do ita abia?

¹⁷ “Lauma helaga ena gaudia laloa karana ese mauri bona maino ia mailaia.” Unai ena anina be hari inai negai lalomaino ita abia, Dirava ida maino ai ita noho, bona nega vaira ai mauri hanaihanai do ita abia. To, edena dala ai ita hahedinaraia ita be lauma helaga ena gaudia ita laloa? Bema nega ibounai Dirava bona lauma helaga ena hakaua dalana ita badinaia, iseda laloa dalana be Dirava ena hegeregerena. Badina ita ura iseda lalohadai be “Dirava ena taravatu henunai ia noho.” Unai dainai, bema hahetoho ita davaria, ita diba vadaeni dahaka do ita karaia bona lauma helaga ena heduru amo abia hidi maorona ita karaia diba.

¹⁸ Namona be iseda lalona ita hadaia, bona Dirava ese ia ura henia gaudia sibona ita karaia. Danu, namona be mai anina bada gaudia ita atoa guna, hegeregere guriguri, Baibel duahiduahi, sibona eda stadi, hebou lao henia karana bona haroro gaukara. (1 Pet. 1:13) Namo lasi tauanina ena ura dikadia ese ita idia biagua, to Dirava ena lalohadai ita badinaia bona ena lauma helaga ese ita ia hakaua be namo. Bema unai bamona ita karaia, mauri hanaihanai bona maino do ita abia bona hahenamo ma haida danu.​—⁠Gal. 6:​7, 8.

Anina Oi Gwauraia Diba, A?

• Mose ena Taravatu be dahaka ia karaia diba lasi? To, Dirava be dahaka ia karaia?

• “Kara dika bona mase edia taravatu” be dahaka? Bona dahaka ese ita ia ruhaia?

• “Lauma helaga ena gaudia” ita laloa totona, dahaka ita karaia be namo?

[Study Questions]

[Pictures on pages 12, 13]

Oi be tauanina ena ura hegeregerena o lauma helaga ena ura hegeregerena oi raka?