“Idia hadibaia namonamo taudia ta ta ibounai be ena hadibaia tauna bamona do ia lao.”​—⁠LUKA 6:⁠40.

1. Iesu be ma haida ia hadibaia totona dahaka ia karaia?

 IOANE ena buka dokona ai Iesu ia herevalaia ia gwau: “Oibe, Iesu ese ma gau momo ia karaia danu, to bema unai ibounai edia sivarai idia torea, lau laloa tanobada do ia hegeregere lasi unai lokua toretore ibounai ia haboua totona.” (Ioa. 21:25) Ena be Iesu be nega kwadogina sibona tanobada ai ia noho, to ena haroro gaukara ia karaia goadagoada. Tatau haida ia abia hidi bona ia hadibadia, unai amo guba dekenai ia giroa lou neganai, haroro gaukara do idia gunalaia. Lagani 33 C.E. ai, idia be orea maragina sibona ia hadibaia, to gabeai orea badana ai ia lao.​—⁠Kara 2:​41, 42; 4:4; 6:⁠7.

2, 3. (a) Dahaka dainai tadikaka momo idia noho be namo? (b) Hari dahaka do ita stadilaia?

² Hari, tanobada hegegemadai kongrigeisen 100,000 lalonai taunimanima seven milioni mai kahana be sivarai namona idia harorolaia noho. To, elda taudia be momo lasi. Unai dainai, unai kongrigeisen ibounai naria totona tadikaka momo ese elda maduna idia huaia be namo. Bema tadikaka ‘idia ura naria tauna ena maduna idia abia, idia be gaukara namona idia ura henia unai.”​—⁠1 Tim. 3:⁠1.

 ³ Tadikaka ta be kongrigeisen lalonai maduna ia huaia totona, gau haida do ia karaia guna. Namo lasi ia laloa unai maduna ia huaia totona tanobada ena sikuli badana ta dekena ia lao be namo. To gau badana be, ia ese Baibel ena taravatu maduna idia ura abia taudia totona ia badinaia be namo. Edena dala ai tadikaka do ita durua idia goada idia lao bona kongrigeisen maduna idauidau idia huaia diba? Iesu ia gwau: “Idia hadibaia namonamo taudia ta ta ibounai be ena hadibaia tauna bamona do ia lao.” (Luka 6:40) Inai stadi lalonai, Iesu ese iena hahediba taudia ia hadibaia dalana do ita itaia, bona ia amo ita dibaia gaudia haida do ita herevalaia.

‘Umui Lau Boiria Egu Turadia’

4. Edena dala ai Iesu ese ena hahediba taudia ia tura henidia?

⁴ Iesu ena hahediba taudia be iena turadia, bona ia laloa lasi ia ese idia ia hereaia. Ia ura idia ia bamoa bona ia abidadama henidia danu. Ia hamaorodia: “Egu Tamana amo lau kamonai gaudia ibounai be umui dekenai lau gwauraia hedinarai vadaeni.” (Ioane 15:15 duahia.) Ena hahediba taudia ese Iesu idia nanadaia danu, hegeregere idia gwau: “Do oi noho negana bona inai nega oromana ena dokona ena toana be dahaka?” (Mat. 24:​3, 4) Idia moale badina Iesu ese edia henanadai ia haerelaia. Ma danu idia dekenai ena lalohadai bona hemami ia gwauraia hedinarai. Hegeregere, idia dogoatao gwauraia hanuaboina ai, Getesemane umana ai ia guriguri totona, ia ese Petero, Iamesi bona Ioane ia hakaudia lao. Unai aposetolo toi be reana iena guriguri herevadia idia kamonai lasi, to idia diba Iesu be ia lalometau bada. (Mar. 14:​33-38) Ma nega ta, Iesu be “idia vairanai ena toana ia idau.” (Mar. 9:​2-8; 2 Pet. 1:​16-18) Oibe, Iesu bona ena hahediba taudia be idia tura heheni namonamo dainai, ia henidia gaukara badana idia karaia totona.

5. Edena dala ai elda taudia ese ma haida idia durua?

⁵ Iesu bamona, elda taudia idia ura edia tadikaka taihu idia tura henidia, durudia, bona lalokau henidia. Ena be elda taudia be edia tadikaka dekenai hunia gaudia idia herevalaia lasi, to Baibel amo idia dibaia gaudia idia kikilaia diba. Elda taudia be edia tadikaka idia abidadama henia danu. Idia laloa lasi idia be ia matamata hesiai tauna idia hereaia. Badina idia diba ena be ia be mero matamata, to do ia goada bona lo tadikaka ai ia lao diba. Idia diba unai bamona mero matamatadia be Iehova idia lalokau henia bona elda taudia idia durua diba kongrigeisen idia naria totona.

“Umui Dekenai Dala Lau Hahedinaraia”

6, 7. Edena dala ai Iesu be haheitalai namona? Bona edena dala ai unai ese iena hahediba taudia ia durua?

⁶ Ena be Iesu ena hahediba taudia be Dirava ena Hereva idia lalokau henia, to edia noho dalana bona kastom dainai, nega haida edia lalohadai be ia kerere. (Mat. 19:​9, 10; Luka 9:​46-48; Ioa. 4:27) To Iesu ese ia gwau henidia o badu henidia lasi. Bona idia dekenai gaukara aukana ia henidia lasi bona ia fosidia lasi ia karaia lasi gauna idia karaia totona. Oibe, Iesu be ena kara namodia amo ena hahediba taudia ia hadibaia.​—⁠Ioane 13:15 duahia.

⁷ Edena dala ai Iesu be haheitalai namona iena hahediba taudia dekenai? (1 Pet. 2:21) Ia be moni o kohu momo maurina ia noholaia lasi, unai amo iena nega ia gaukaralaia diba ma haida ia hesiai henia totona. (Luka 9:58) Iehova amo ia dibaia gaudia be ma haida dekenai ia hadibaia, bona sibona ena lalohadai ia gwauraia lasi. (Ioa. 5:19; 17:​14, 17) Ia be hebogahisi tauna bona taunimanima be idia gari lasi ia idia hereva henia totona. Ena kara amo ia hahedinaraia taunimanima ia lalokau henidia. (Mat. 19:​13-15; Ioa. 15:12) Iesu ena haheitalai namona ese ena hahediba taudia ia durudia. Hegeregere, Iamesi ia hagoadaia dainai mai gari lasi ida Dirava ia hesiai henia ela bona idia hamasea. (Kara 12:​1, 2) Bona Ioane be mai abidadama ida lagani 60 mai kahana lalonai Iesu murinai ia raka.​—⁠Apok. 1:​1, 2, 9.

8. Edena dala ai elda taudia be haheitalai namona idia hahedinaraia diba?

 ⁸ Elda taudia idia manau, lalokau idia hahedinaraia, edia nega bona goada be mai haida idia durua neganai, tatau matamatadia dekenai idia be haheitalai namona. (1 Pet. 5:​2, 3) Danu, elda taudia idia moale badina edia hahediba dalana, edia Keristani mauri dalana, bona edia haroro dalana amo haheitalai namona idia hahedinaraia. Oibe, unai ese tadikaka ia durudia edia kara idia tohotohoa totona.​—⁠Heb. 13:⁠7.

‘Oda Ia Henidia Bena Ia Siaidia’

9. Iesu be edena dala ai ena hahediba taudia ia hadibaia haroro gaukara idia karaia totona?

⁹ Iesu be lagani rua ia haroro murinai, iena hahediba taudia 12 ia siaidia idia haroro totona. To, idia ia hadibaia guna. (Mat. 10:​5-14) Nega ta Iesu be aniani sisina amo taunimanima tausen ia ubua gwauraia neganai, ena hahediba taudia ia hamaorodia taunimanima be orea ta ta ai 50 50 do idia haboudia. (Luka 9:​12-17) Gaukara ia henidia bona karaia dalana ia hadibaia. Iesu ena hahediba dalana bona lauma helaga ena heduru dainai, aposetolo taudia ese lagani 33 C.E. ai haroro gaukara badana idia hamatamaia.

10, 11. Elda taudia ese edena dala ai tadikaka idia durua maduna idia huaia totona?

¹⁰ Hari inai negai, Baibel amo tau ta ita stadi henia neganai, hadibaia karana ia matamaia. Reana do ita durua ia duahiduahi namonamo totona. Ita stadi henia lalonai dala ma haida ai ita durua diba. Keristani heboudia ia mai matamaia neganai, ia goada ia lao bona Tiokratik Haroro Sikuli lalonai ia vareai bona bapatiso lasi pablisa ai ia lao diba. Ia bapatiso murinai tadikaka ese ia dekenai gau ma haida hegeregere, Kingdom Hall hanamoa dalana do idia hadibaia. Danu, elda taudia ese do idia durua hesiai tauna ai ia lao totona.

¹¹ Elda taudia ese bapatiso tadikaka dekenai gaukara ta idia henia neganai, namona be idia durua. Kongrigeisen lalonai idia karaia gaukara do idia gwauraia hedinarai bona karaia dalana idia hadibaia namonamo. Bema elda idia itaia ia dekenai idia henia gaukara karaia totona ia hekwarahi, namo lasi idia laloa ia be hegeregere lasi. To, mai manau ida do idia durua. Elda taudia idia moale tadikaka ma ta dekenai kongrigeisen ena maduna idia hadibaia totona, badina idia diba ma haida hesiai henia gaukarana amo moale do ia davaria.​—⁠Kara 20:35.

“Aonega Tauna ese Sisiba Do Ia Kamonai”

12. Dahaka dainai Iesu ena sisiba be mai ena namo?

¹² Iesu ese ena hahediba taudia ia hadibaia dalana ta be, nega korikori ai sisiba ia henidia. Hegeregere, Samaria taudia haida be Iesu idia abia dae lasi dainai, Iamesi bona Ioane idia ura guba amo lahi do ia diho idia ia hadikaia totona, to Iesu ese ia sisiba henidia. (Luka 9:​52-55) Ma nega ta ai, Iamesi bona Ioane edia sinana ese Iesu ia noia ena natudia be guba Basileia lalonai dagi badadia do ia henidia. To, Iesu ia diba unai be Iamesi bona Ioane edia lalohadai dainai, ia hamaorodia: “Lau ese gwaumaoro do lau henia lasi, daika be egu idibana eiava laurina kahanai do ia helai, to egu Tamana ese do ia abia hidi, daidia be unuseniai do idia helai.” (Mat. 20:​20-23) Iesu be nega ibounai Dirava ena hakaua herevadia hegeregerena sisiba ia henia. Iena hahediba taudia ia durua unai idia laloa dobu bona badinaia totona. (Mat. 17:​24-27) Ia diba ena hahediba taudia be goevadae lasi bona gau haida do idia karaia diba lasi, to ia lalokau henidia dainai ia sisiba henidia.​—⁠Ioa. 13:⁠1.

13, 14. (a) Daidia danu be sisiba idia abia? (b) Elda taudia be tadikaka dekenai edena bamona sisiba idia henia diba?

¹³ Maduna idia huaia taudia be nega ta ta ai sisiba do idia abia. Aonega Herevadia 12:15 ia gwau: “Aonega tauna ese sisiba do ia kamonai henia.” Matamata tadikaka ta ia gwau: “Lau ia koua gauna badana be lau be goevadae lasi tauna dainai lau mamia, lau be hegeregere lasi ma haida lau hesiai henia totona. To elda ta ese lau  ia durua unai lalohadai kererena lau hanaia totona.”

¹⁴ Bema elda taudia idia itaia tadikaka ta be ena kara haida dainai Keristani tauna goadana ai ia lao lasi, namona be “mai manau ida” idia durua haraga. Elda taudia idia ura ia ese kongrigeisen lalonai ma haida do ia hesiai henia. (Gal. 6:⁠1) Nega haida elda taudia ese tadikaka ta do idia sisiba henia iena kara o lalohadai ia hamaoromaoroa totona. Hegeregere, reana idia itaia tadikaka ta be gaukara momo ia karaia diba to unai ia karaia lasi. Idia durua diba Iesu ena haheitalai ia laloa totona. Iesu be haroro goadagoada tauna bona iena hahediba taudia ia hamaoroa iena haheitalai do idia tohotohoa. (Mat. 28:​19, 20; Luka 8:⁠1) Eiava, reana tadikaka ta ia laloa ia be ma haida ia hereaia. To, Iesu ese iena hahediba taudia ia hadibaia namo lasi idia laloa idia be lohia taudia bamona bona haida idia hereaia. Elda taudia ese unai tadikaka do idia durua Iesu ena sisiba ia laloa totona. (Luka 22:​24-27) Eiava reana elda taudia idia itaia tadikaka ta be ia ura lasi ma haida edia dika ia gwauatao. Elda taudia ese tadikaka idia durua totona hesiai tauna dikana ena parabole idia gaukaralaia diba. Hesiai tauna dika be ma haida edia dika ia gwauatao lasi, ena be idia ese iena dika idia gwauatao. (Mat. 18:​21-35) Bema elda taudia idia itaia tadikaka ta be ataiai ia noho karana ta dekenai ia hekwarahi, idia sisiba henia haraga be namo.​—⁠Aonega Herevadia 27:9 duahia.

“Sibona Do Oi Treinia”

15. Edena dala ai tadikaka ena ruma bese taudia ese ia idia durua diba?

¹⁵ Namona be elda taudia ese tadikaka ma haida idia durua kongrigeisen lalonai maduna idia huaia totona. To haida ese idia durudia diba danu. Hegeregere, ena ruma bese taudia ese idia durua diba. Bema tadikaka be elda tauna, ena adavana bona natudia ese idia durua diba. Badina idia laloparara ia ese ena nega bona goada do ia gaukaralaia ma haida ia durua totona. Unai dainai elda tauna ia itaia iena ruma bese taudia be ia idia durua neganai, ia be mai moale ida iena maduna ia huaia namonamo diba. Oibe, elda taudia edia ruma bese ita hanamodia be namo.​—⁠Aon. 15:20; 31:​10, 23.

16. Bema tadikaka ta ia ura hesiai tauna o elda maduna ia abia, dahaka ia karaia be namo?

¹⁶ Ena be haida ese idia durua, to namona be tadikaka sibona ese ia hahedinaraia ia ura ma haida ia hesiai henia. (Galatia 6:5 duahia.) Ena be ia be hesiai tauna o elda tauna lasi, to ma haida ia durua bona ena haroro gaukara ia hanamoa be namo. Bema tadikaka ta ia ura hesiai tauna o elda ena maduna ia abia, namona be ia hekwarahi Baibel lalonai idia noho taravatu ia badinaia totona. (1 Tim. 3:​1-13; Tito 1:​5-9; 1 Pet. 5:​1-3) Bona gau haida ia karaia be namo, unai amo do ia hegeregere unai maduna ia abia totona. Dahaka ia karaia be namo?  Namona be hanaihanai Baibel ia duahia, ia stadilaia, ia laloa dobu, ia guriguri bona haroro. Unai ia karaia neganai, ia be aposetolo Paulo ese Timoteo dekenai ia henia sisiba ia badinaia: “Oi sibona do oi treinia, emu tahua gauna be Dirava badinaia karana oi hahedinaraia totona.”​—⁠1 Tim. 4:⁠7.

17, 18. Bema bapatiso tadikaka ta be ia ura lasi ma haida ia hesiai henia o ia laloa ia hegeregere lasi, dahaka ia karaia be namo?

¹⁷ To, bema tadikaka ta ia laloa ia be hegeregere lasi hesiai tauna o elda maduna ia abia, be edena bamona? Namona be ia laloatao Iehova bona Iesu ese ita idia durua. Badina Iehova ia gwauhamata iseda maduna metaudia do ia huaia. (Sal. 68:19) Unai dainai, Iehova ese tadikaka ia durua diba kongrigeisen maduna ia huaia totona. Bema tadikaka ta be hesiai tauna o elda tauna ai ia do lao lasi, namona be ia laloatao kongrigeisen momo dekenai elda bona hesiai taudia be momo lasi. Namona be lauma helaga totona ia guriguri, unai amo maino bona sibona biagua karana do ia hahedinaraia, bona ia hegeregere lasi lalohadaina ia hanaia diba. (Luka 11:13; Gal. 5:​22, 23) Ita diba idia ura ma haida idia hesiai henia tadikaka be Iehova ese do ia hanamodia.

¹⁸ Reana bapatiso tadikaka ta be ia ura lasi ma haida ia hesiai henia. Dahaka ese ia durua diba? Aposetolo Paulo ia gwau: “Dirava ia karaia gaudia be ia moalelaia dalana hegeregerena, bona unai ia karaia dalana be ia ese emui ura ia hagoadaia, ia ura henia gaudia ibounai umui karaia totona.” (Fili. 2:13) Ma haida hesiai henia urana be Dirava ese tadikaka ta ena lalona dekenai ia atoa diba, bona lauma helaga ese do ia hagoadaia Dirava ena ura ia karaia totona. (Fili. 4:13) Bona Keristani tauna ese abia hidi maorona ia karaia totona, namona be Dirava ena heduru totona do ia guriguri.​—⁠Sal. 25:​4, 5.

19. Iehova ese “mamoe naria taudia 7” bona “gunalaia taudia 8” do ia haginidia ena anina be dahaka?

¹⁹ Ma haida idia durua elda taudia be Iehova ese do ia hanamodia. Bona Kongrigeisen lalonai ma haida idia ura hesiai henia taudia do ia hanamodia danu. Baibel ena gwauhamata dainai ita diba Dirava ena taunimanima huanai tadikaka momo be gunalaia gaukara do idia karaia. Baibel ia gwau, Iehova ese “mamoe naria taudia 7” bona “gunalaia taudia 8” do ia haginidia kongrigeisen idia naria totona. (Mika 5:⁠5) Hari, manau tadikakadia momo idia ura kongrigeisen lalonai hesiai gaukara idia karaia dainai, elda taudia ese idia hadibaia noho. Unai ese Iehova ena ladana ia hanamoa bona hahenamo momo ita davaria.

Edena Bamona Do Oi Haere?

• Iesu ese edena dala ai iena hahediba taudia ia hadibaia?

• Edena dala ai elda taudia ese Iesu idia tohotohoa bona tadikaka idia durua maduna idia huaia totona?

• Edena dala ai tadikaka ta ena ruma bese ese idia durua diba maduna ia huaia totona?

• Tadikaka be edena dala ai ia hahedinaraia ia ura maduna ia huaia?

[Study Questions]

[Pictures on page 31]

Emu Baibel stiuden ia goada totona, edena dala ai oi durua diba?

[Picture on page 32]

Tadikaka be edena dala ai idia hahedinaraia idia ura maduna idia huaia?