FILIPI Keristani taudia be tomadiho momokani durua totona, hariharibada karana idia hahedinaraia. Aposetolo Paulo be idia dekenai ia gwau: “Umui lau laloa negadia ibounai lalonai, egu Dirava lau tanikiu henia bona nega ibounai mai moale ida umui ibounai dainai lau guriguri goadagoada, badina dina ginigunana amo ema bona hari, umui ese sivarai namona harorolaia gaukarana umui durua.” (Fili. 1:​3-5) Paulo ia laloatao, Lidia bona iena ruma bese idia bapatiso neganai, Lidia ia ura Paulo bona ena bamodia be iena ruma dekenai idia noho.​—⁠Kara 16:​14, 15.

Daudau lasi murinai, Paulo be Tesalonika ai tadikaka haida ida ia noho neganai, Filipi kongrigeisen taudia be nega rua heduru gaudia idia siaia. Filipi ena daudau Tesalonika amo be kilomita 160 bamona. (Fili. 4:​15, 16) Lagani haida murinai, ena be Filipi bona Makedonia tadikaka be idia “ogogami momokani,” to Ierusalema ai  idia noho Keristani taudia edia sivarai idia kamonai neganai, idia ura durudia. Paulo ia gwau, “idia henia gauna be idia dekenai ia noho gauna ia hereaia.” To ma ia gwau: “Idia be . . . idia noia loulou, edia harihari gauna do idia henia.”​—⁠2 Kor. 8:​1-4; Roma 15:⁠26.

Filipi taudia be Keristani taudia ai idia lao bena lagani 10 murinai, hariharibada karana idia do hahedinaraia noho. Idia kamonai Paulo be Roma ena dibura ruma ai ia noho neganai, edia harihari gaudia idia haboua bona Epafrodito ida idia siaia. Ia lao totona ia raka bona sisima dekenai ia guia danu; ena laolao be kilomita 1,287 bamona. Unai ese ia hahedinaraia Filipi tadikaka idia ura Paulo idia durua, unai amo ena be dibura ruma ai ia noho, to ia ese ena tadikaka ia hagoadaia bona ia haroro noho diba.​—⁠Fili. 1:​12-14; 2:​25-30; 4:⁠18.

Hari inai negai danu, Keristani taudia idia diba Basileia harorolaia bona hahediba taudia halaoa gaukarana idia durua be hahenamo badana. (Mat. 28:​19, 20) Unai dainai edia nega, goada, bona moni idia gaukaralaia Basileia ena gaukara idauidau idia durua totona. Henunai ia noho maua ese ia hahedinaraia dala haida amo kontribusen moni oi henia diba.

[Box on pages 22, 23]

HAIDA ESE HENIA KARANA IDIA HAHEDINARAIA DALADIA

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana Durua Monina” lalonai do idia udaia totona.

Hua ta ta iboudiai, kongrigeisen ese unai moni be Iehova ena Witnes taudia edia hedikwota Brooklyn, New York dekenai, eiava ena brens opesi ta dekenai idia siaia. Taunimanima idia ura neganai kontribusen monina be International Bible Students Association of Papua New Guinea Inc., PO Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.