“Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.”​—⁠AON. 3:⁠5.

1, 2. (a) Dahaka gau haida dainai ita lalohekwarahi diba? (b) Hekwakwanai, abia hidi ta ita ura karaia, o hedibagani ita ura dadaraia neganai, daika ena heduru ita tahua be namo? Bona dahaka dainai?

 TAIHU Sintia a ena bosi ese ena bisinesi haida ia koua bona ena gaukara taudia haida ia hadokoa. Sintia ia lalohekwarahi badina ia laloa reana bosi ese ia danu do ia hadokoa. Bema unai ia vara, edena bamona gau ibounai edia davana do ia karaia? Taihu ma ta, Pamela be ia ura pablisa momo lasi gabuna ta ia lao. Do ia lao be namo, a? Tadikaka Samuel ena hekwakwanai be idau, ia maragi neganai ponografi laulaudia ia itaia. Bona hari ena mauri lagani be 20 bamona bona ia ura ponografi laulaudia ia itaia lou. Unai hedibagani be edena dala ai ia dadaraia diba?

² Hekwakwanai oi davaria, mai anina bada abia hidi oi ura karaia, o hedibagani oi ura dadaraia neganai, daika ena heduru oi tahua? Sibona emu diba dekenai oi tabekau, a? Eiava ‘oiemu laloa hekwarahi be Lohiabada dekenai oi henia’? (Sal. 55:22) Baibel ia gwau: “Lohiabada ese kara maoromaoro taudia ia naria noho. Edia taitai be ia ese ia kamonai henia noho.” (Sal. 34:15) Gau badana be mai eda kudouna ibounai ida Iehova ita abidadama henia bona sibona eda diba dekenai ita tabekau lasi!​—⁠Aon. 3:⁠5.

3. (a) Iehova abidadama henia ena anina be dahaka? (b) Dahaka dainai haida be sibodia edia diba dekenai idia tabekau?

³ Mai eda kudouna ibounai ida Iehova ena ura ita badinaia neganai, ita hahedinaraia ia ita abidadama henia. Nega ibounai ia ita guriguri henia, unai amo ita do ia durua bona hakaua. To, momo idia laloa Iehova idia abidadama henia be auka. Hegeregere, taihu ta ladana Lin ia gwau, “Iehova lau abidadama henia be auka.” Dahaka dainai? Ia gwau: “Egu tamana lau diba lasi bona egu sinana be lau ia laloa bada lasi dainai, lau be sibona lau naria bona unai kara lau manadalaia.” Unai dainai, Lin ese ma haida ia abidadama henia be auka. Bema ta be diba bada tauna bona mai ena gaukara namona, reana do ia laloa ia be hegeregere dainai, Iehova dekenai ia tabekau be anina lasi. Hegeregere, reana lo elda ta do ia laloa ia be hegeregere dainai, kongrigeisen ena gaukara haida dekenai Dirava ena heduru totona ia guriguri lasi. To unai be lalohadai maorona lasi.

4. Inai stadi ai dahaka do ita herevalaia?

⁴ Bema Iehova ita guriguri henia ita ia durua totona, namona be ita hekwarahi iena hakaua dalana ita badinaia. Hekwakwanai badana oi davaria neganai, edena bamona oi diba Iehova oi noia be namo? Eiava edena bamona oi diba oi sibona ese oi hamaoromaoroa diba? Ita ura abia hidi ta ita karaia neganai, edena kara ita dadaraia be namo? Hedibagani ita davaria neganai, dahaka dainai guriguri be gau badana? Inai stadi lalonai Baibel ena sivarai haida amo unai henanadai edia haere do ita tahua.

 Hekwakwanai Negadiai

5, 6. King Senakeriba ia ura Ierusalema ia hadikaia neganai, Hesekaia be dahaka ia karaia?

⁵ Baibel ese Iuda ena King Hesekaia be inai bamona ia herevalaia: “Hesekaia ese Lohiabada ia badinaia namonamo, bona Lohiabada ena murinai raka ena kara dekena amo ia raka siri lasi momokani. Hesekaia ese Lohiabada ena Taravatu ibounai, Mose dekenai ia henia gaudia ibounai, ia badinaia namonamo.” King Hesekaia be Israela ena Dirava, Iehova ia abidadama henia. (2 Kin. 18:​5, 6) Hegeregere, Asuria ena King Senakeriba bona ena tuari orea goadana ese Iuda ena siti badadia haida idia abia, bona idia ura Ierusalema idia tuari henia danu. Unai dainai King Senakeriba ese iena tuari orea, Rabesake bona gwaukau taudia rua ia siaidia Ierusalema taudia idia hagaria totona. Hesekaia be dahaka ia karaia? Dirava ena dubu helaga ia lao bona ia guriguri: “Lohiabada, aiemai Dirava e, oi dekenai lau noinoi, Senakeriba ena siahu dekena amo ai do oi hamauria. Vadaeni tanobada basileia ibounai be do idia diba, oi Lohiabada e, oi sibona be Dirava momokani.”​—⁠2 Kin. 19:​14-19.

⁶ Hesekaia be heduru totona Iehova ia noia bona gau ma ta ia karaia danu. Hegeregere, dubu helaga ia do lao lasi neganai, iena taunimanima ia hamaorodia Rabesake ena hadikaia herevadia do idia haloua lasi. Danu, ena tatau haida ia siaia peroveta tauna Isaia ena sisiba idia abia totona. (2 Kin. 18:36; 19:​1, 2) Oibe, Hesekaia ese Iehova idia hamoalea gaudia sibona ia karaia. Ia be Aigupito o bese ma haida edia heduru ia tahua lasi. Bona sibona ena diba dekenai ia tabekau lasi, to Iehova ia abidadama henia. Iehova ena aneru ese Senakeriba ena tuari taudia 185,000 ia alaia murinai, Senakeriba bona ena tuari taudia be Nineva dekenai idia giroa lou.​—⁠2 Kin. 19:​35, 36.

7. Hana bona Iona edia guriguri ese edena dala ai ita ia durua?

⁷ Haheitalai ma ta be Hana, ia be Levi tauna Elikana ena adavana. Hana ia lalohisihisi badina ia be gabani. To, Iehova dekenai ia tabekau bona ena lalohekwarahi gauna ia gurigurilaia. (1 Sam. 1:​9-11, 18) Haheitalai ma ta be Iona, ia be Iehova ena peroveta tauna ta, to Iehova ia kamonai henia lasi dainai, gwarume badana ta ese ia hadonoa. To Iona ia guriguri, ia gwau: “Lohiabada e, lauegu hisihisi lalonai lau boiboi oi dekenai, bona oi ese lau dekenai oi haere henia. Mase gabuna ena dobu gabuna dekena amo, durua totona oi dekenai lau boiboi, bona oi ese lau oi kamonai henia.” Oibe, Iehova ese Iona ia hamauria. (Iona 2:​1, 2, 10) Ita ia hagoadaia gauna be, herevana hekwakwanai badana o maragina ita davaria, to Iehova ita guriguri henia diba bona ia ese ita do ia durua.​—⁠Salamo 55:​1, 16 duahia.

8, 9. Hesekaia, Hana, bona Iona edia guriguri ai dahaka idia laloa bada? Edia haheitalai amo dahaka ita dibaia?

⁸ Hesekaia, Hana, bona Iona edia guriguri amo gau ta ita dibaia. Ena be idia davaria hekwakwanai dainai idia lalohisihisi, to edia guriguri ese ia hahedinaraia idia be edia hekwakwanai sibona idia laloa lasi. Idia laloa bada gauna be Dirava ena ladana do idia hanamoa, ia do idia tomadiho henia, bona iena ura do idia karaia. Hesekaia ia lalohisihisi badina taunimanima ese Dirava ena ladana idia hadikaia. Hana be Iehova dekenai ia gwauhamata, bema ia dekenai natuna ta ia henia, do ia siaia Silo ena palai dubu ai Dirava ena hesiai gaukara ia karaia totona. Bona Iona be ia gwau: “Lau gwauhamata oi dekenai karadia ibounai, be do lau karaia.”​—⁠Iona 2:⁠9.

⁹ Hekwakwanai ta dainai Dirava ita guriguri henia neganai, namona be iseda guriguri ena badina ita laloa namonamo. Iseda hekwakwanai sibona ita gurigurilaia eiava Iehova bona iena ura ita laloa danu? Nega haida iseda hekwakwanai sibona ita laloa dainai, Iehova ena ura bona ia  tomadiho henia karana ita laloa bada lasi. Iehova ita guriguri henia neganai, namona be ena lohia siahuna bona ena ladana hahelagaia karana ita gwauraia. Unai ita laloatao neganai, ena be Dirava ese iseda ura gauna ia henia lasi, to ia do ita abidadama henia noho. Reana, iseda hekwakwanai do ia ore haraga lasi, to ita dekenai goada do ia henia ita haheauka totona.​—⁠Isaia 40:29; Filipi 4:13 duahia.

Abia Hidi Ita Karaia Neganai

10, 11. Iehosapata be abia hidi badana ta ia ura karaia neganai dahaka ia karaia?

¹⁰ Emu mauri lalonai abia hidi badadia be edena bamona oi karaia? Oiemu ura gauna oi abia hidi guna, bena gabeai Iehova oi noia unai ia hanamoa totona, a? Iuda ena King Iehosapata, be dala maorona ai abia hidi ia karaia. Moaba bona Amono taudia idia ura Iuda besena idia tuari henia, to Iuda taudia be idia hegeregere lasi. Iehosapata be dahaka ia karaia?

¹¹ Baibel ia gwau: “Iehosapata ia gari, bona ia be Lohiabada ese do ia hakaua totona, Dirava dekenai ia guriguri.” Iuda taudia ibounai ia hamaoroa do idia anivaga, bena Iuda bona Ierusalema taudia ia haboudia bona Iehova dekenai ia guriguri, ia gwau: “Oi be aiemai Dirava! Mani edia kerere davana do oi henia. Badina inai tuari orea bada herea, ese ai idia tuari henia noho, bona ai be goada lasi idia do ai koua. Edena bamona do ai karaia be ai diba lasi, to oi dekenai aiemai matana ai negea noho, oi ese ai do oi durua totona.” Dirava momokanina ese Iehosapata ena guriguri ia kamonai bona idia totona ia tuari bona ia hamauridia. (2 Siv. 20:​3-12, 17) Bema ita ura abia hidi badana ta ita karaia, namona be ita tahua bema unai ese iseda hetura karana Iehova ida do ia hanamoa eiava ia hadikaia. Unai bamona negadiai, sibona eda diba dekenai ita tabekau lasi, to Iehova ita abidadama henia be namo.

12, 13. Abia hidi ita karaia neganai, edena dala ai King Davida ena haheitalai ese ita ia durua diba?

¹² Reana hari ita davaria hekwakwanai be guna ita hanaia bona ita laloa sibona ese ita hamaoromaoroa diba. To dahaka ita karaia be namo? Unai bamona negadiai King Davida ena haheitalai ese ita ia durua diba. Amaleka taudia ese Sikilaga siti idia tuari henia neganai, idia ese Davida bona ena tatau edia adavana bona natudia idia abia. Davida ese Iehova ia noia, ia gwau: “Unai Amaleka taudia do lau lulua, a?” Bena Iehova ia gwau: “Do oi luludia, bona idia do umui davaria, bona idia abia mauri taudia be do oi hamauria.” Davida ese Iehova ena hereva ia kamonai bona Amaleka taudia ese idia abia taudia ibounai ia abia lou.​—⁠1 Sam. 30:​7-9, 18-20.

¹³ Daudau lasi murinai, Pilistia taudia ese Israela taudia idia tuari henidia. Davida ese Iehova ia guriguri henia lou, bona Dirava ese ia haere henia, ia gwau: “Oi lao, oi dekenai kwalimu do lau henia momokani.” (2 Sam. 5:​18, 19) Gabeai, Pilistia taudia idia ura Davida idia tuari henia lou. Davida be dahaka do ia karaia? Reana, do ia laloa guna ia halusidia dainai, do ia lao bona tuari henidia sibona. To, ia be sibona ena goada dekenai ia tabekau lasi. Davida ese Iehova ia guriguri henia lou. Bona ia moale unai ia karaia badina unai nega ai Iehova be haere idauna ia henia! (2 Sam. 5:​22, 23) Oibe, namona be Davida bamona nega ibounai Iehova dekenai ita tabekau.​—⁠Ieremia 10:23 duahia.

14. Iosua bona Gibeona taudia edia sivarai amo dahaka ita dibaia?

¹⁴ Ita ibounai be goevadae lasi taudia. Unai dainai ita ibounai​—⁠lo elda taudia danu​—⁠be abia hidi ita ura karaia neganai, Iehova ena heduru totona ita guriguri be gau badana. Hegeregere, Gibeona taudia be Iosua idia noia maino do idia karaia hebou neganai, Iosua bona Israela ena tatau badadia be Iehova idia guriguri henia lasi. Ena be Gibeona taudia edia hanua be kahirakahira, to idia koikoi  bona edia toana be idia be gabu daudau amo idia mai taudia. Iosua bona Israela ena tatau badadia be heduru totona Iehova idia noia lasi, to Gibeona taudia ida maino gwauhamatana idia karaia. Ena be Iehova ese unai gwauhamata ia hadikaia lasi, to Baibel lalonai unai sivarai ia noho badina ia ura ita ia hadibaia, Iosua bona Israela ena tatau badadia be iena heduru idia noia lasi. Unai dainai, abia hidi ta ita do karaia lasi neganai, Iehova ena heduru totona ita guriguri guna be gau badana.​—⁠Ios. 9:​3-6, 14, 15.

Hedibagani Negadiai

15. Hedibagani dadaraia totona, dahaka dainai guriguri karana be mai anina bada?

¹⁵ Ita ibounai be kara dika taudia dainai, namona be ita gaukara goada tauanina ena ura dikadia ita tuari henia totona. (Roma 7:​21-25) To, edena dala ai ita kwalimu diba? Iesu ese iena murinai idia raka taudia ia hamaorodia hedibagani idia dadaraia totona, idia guriguri be gau badana. (Luka 22:40 duahia.) Nega haida, ena be ita guriguri to lalohadai o ura dikadia idia do noho. Bema unai ia vara, namona be ‘Dirava dekenai ita noinoi noho’ aonega do ia henia hedibagani ita dadaraia totona. Baibel ia gwau Dirava be “mai hariharibada ida” taunimanima ibounai dekenai aonega ia henia. (Iam. 1:⁠5) Tauanina ena ura dikadia koua dalana ma ta be Iamesi ese ia gwauraia. Ia gwau ta ese “kongrigeisen ena tau badadia ia boiria, bona ia totona do idia guriguri, bona Iehova ena ladanai dehoro amo ia do idia horoa. Bona guriguri mai abidadama ese gorere tauna do ia hanamoa.”​—⁠Iam. 5:​14, 15.

16, 17. Hedibagani dadaraia totona, edena negai ita guriguri be maoro?

¹⁶ Bema ita guriguri lasi bona hedibagani ita davaria do ita moru. To gau badana be nega maorona ai do ita guriguri. Aonega Herevadia 7:​6-23 ese ia herevalaia eregabe tauna dekenai ia vara gauna mani ita laloa. Adorahi ta ia be ariara hahinena ena ruma kahirakahira ia lao. Unai hahine ese ena ruma dekenai ia boiria. Ia ese hahine ena hegahusi herevadia ia abia dae, bona karaharaga ena murinai ia lao, boromakau be do idia alaia gabuna dekenai ia lao bamona. Dahaka dainai unai mero be ariara hahine ia noho gabuna ia lao? Baibel ia gwau, ia be “laloa kavakava” merona, toana be lalohadai dikadia ese ena lalona idia biagua. (Aon. 7:⁠7) To, edena negai ia guriguri be maoro? Momokani, ariara hahine ese ia hereva henia lalonai ia guriguri be namo. To, nega maorona be ariara hahine ena noho gabuna ia ura lao lalohadaina ia abia neganai, ia guriguri be namo.

¹⁷ Hari inai negai, reana tau ta be ia hekwarahi ponografi laulau itaia karana ia dadaraia totona. To, ia diba ia kehoa Intanet web sait haida be mahuta hebou vidio o laulaudia idia  hahedinaraia. Iena kara be Aonega Herevadia karoa 7 ese ia herevalaia eregabe tauna hegeregerena, ani? Unai tauna be ‘boromakau do idia alaia gabuna dekenai ia lao bamona.’ Bema ita ura Intanet ita gaukaralaia to ita diba matabodaga laulaudia edia web sait idia noho, namona be Iehova ita guriguri henia guna, unai amo ita do ia durua unai gaudia ita itaia lasi totona.

18, 19. (a) Dahaka dainai hedibagani ita dadaraia be auka, to edena dala ai ita hanaia diba? (b) Emu lalona oi hadaia dahaka oi karaia totona?

¹⁸ Hedibagani o eda kara gunadia haida ita dadaraia be mai ena hekwarahi. Aposetolo Paulo ia gwau: “Tauanina ena ura dikadia be lauma helaga ena ura ida ia hegeregere lasi.” Unai dainai ena be ita ura kara namodia ita karaia to ita karaia lasi. (Gal. 5:17) Lalohadai o ura dikadia ita abia matamaia neganai, namona be mai eda kudouna ibounai ida ita guriguri bona gau haida ita karaia unai lalohadai dikadia ita koua totona. Namona be ita laloatao, ita “davaria hedibagani be vaia taunimanima ibounai ese idia davaria hedibagani bamona.” Bona Iehova ena heduru amo ita gini goada diba.​—⁠1 Kor. 10:⁠13.

¹⁹ Hekwakwanai ita davaria, mai anina bada abia hidi ita ura karaia, o hedibagani ita ura dadaraia neganai, guriguri karana ese ita ia durua diba. Unai be harihari gauna hereadaena. Iehova ita guriguri henia neganai, ita hahedinaraia ia ita abidadama henia. Namona be nega ibounai ia ita noia ena lauma helaga amo ita do ia hakaua bona hagoadaia noho. (Luka 11:​9-13) Oibe, namona be nega ibounai Iehova ita abidadama henia bona sibona eda diba dekenai ita tabekau lasi.

[Footnote]

Oi Laloatao A?

• Hesekaia, Hana, bona Iona edia abidadama karana amo dahaka oi dibaia?

• Davida bona Iosua hegeregerena, abia hidi ita ura karaia neganai dahaka ita laloatao be namo?

• Dahaka dainai nega maorona ai ita guriguri be mai anina bada?

[Study Questions]

[Picture on page 9]

Hedibagani dadaraia totona, edena negai ita guriguri be maoro?