“Hari nega amo oi be taunimanima do oi haoda henia.”​—⁠LUKA 5:⁠10.

1, 2. (a) Iesu ia haroro neganai, tatau momo be dahaka idia karaia? (b) Inai stadi lalonai dahaka do ita herevalaia?

 IESU bona ena hahediba taudia be Galilea ai idia haroro murinai, bouti idia guia bona taunimanima lasi gabuna idia lao idia laga-ani totona. To, “tatau 5,000 bamona, hahine bona natudia” be kone amo idia dekenai idia raka lao. (Mat. 14:21) Ma nega ta, “tatau 4,000, hahine bona natudia” be Iesu dekenai idia mai, badina idia ura edia gorere do ia hanamoa bona ena hahediba herevadia do idia kamonai. (Mat. 15:38) Iena hahediba herevadia idia ura kamonai taudia huanai tatau momo idia noho danu. Iesu ia diba momo be hereva momokani do idia abia dae, badina hahediba taudia be hoa dalanai gwarume momo herea idia veria neganai, ia gwau: “Hari nega amo oi be taunimanima do oi haoda henia.” (Luka 5:10) Anina be laulau dalanai iena hahediba taudia be ‘taunimanima do idia haoda henia’ bona edia reke dekenai taunimanima idauidau, tatau momo danu do idia veria.

² Iseda negai danu, tatau momo be ita harorolaia sivaraina idia kamonai bona idia ura Baibel idia stadilaia. (Mat. 5:⁠3) Tatau haida be idia stadi to idia goada lasi. Edena dala ai idia ita durua diba? Iesu be dala idauna ma ta ai tatau ia haroro henidia lasi, to tatau ese idia lalohekwarahilaia gaudia ia herevalaia. Inai stadi lalonai unai do ita herevalaia, bona do ita itaia edena dala ai Iesu ita tohotohoa diba. Danu, tatau edia lalohekwarahi gaudia toi do ita herevalaia: (1) moni ena lalohekwarahi, (2) haida ese idia kirikirilaia dainai idia gari, bona (3) idia laloa idia be hegeregere lasi maduna huaia totona.

Bema Moni Dainai Ia Lalohekwarahi

3, 4. (a) Tatau be dahaka gaudia idia laloa momo? (b) Dahaka dainai tatau momo be Baibel idia stadilaia lasi?

³ Mose ena Taravatu ia diba namonamo tauna ese Iesu ia hamaoroa: “Hadibaia Tauna e, do oi lao gabudia ibounai dekenai oi do lau badinaia.” Bena Iesu ia haere, “taunimanima ena Natuna ena kwarana ia atoa gabuna be lasi.” Baibel ia gwau lasi unai tauna be Iesu ena murinai ia raka o lasi. To reana, edeseni do ia mahuta bona edeseni ena aniani do ia abia dainai ia lalohekwarahi.​—⁠Mat. 8:​19, 20.

⁴ Tatau momo idia laloa edia gaukara bona moni be gau badana, unai dainai Baibel stadilaia bona badinaia karana idia laloa bada lasi. Danu, idia laloa dina ta ta ena mauri totona, iunivesiti digri bona pei badana be mai anina bada. Unai dainai, Dirava tura henia karana idia laloa maragi. Reana, haida be Baibel ena hahediba herevadia idia ura henia, to “inai nega oromana ena lalohekwarahi gaudia” bona “taga ena koikoi siahuna” ese edia lalona ia koua dainai, Dirava bona iena hereva idia laloa lasi. (Mar. 4:​18, 19) To, Iesu ese iena hahediba taudia dekenai mai anina bada gaudia abia hidi karana ia hadibaia. Ita ese iena kara ita tohotohoa diba.

5, 6. Dahaka ese Andrea, Petero, Iamesi bona Ioane ia durua ful-taim haroro gaukara idia abia hidi totona?

⁵ Simona Petero bona ena tadikaka Andrea be haoda taudia, bona idia be Ioane, bona ena tadikaka Iamesi bona edia tamana Sebedeo ida haoda bisinesi idia karaia. Edia bisinesi ia bada dainai, tatau ma haida be idia totona idia gaukara. (Mar. 1:​16-20) Andrea bona Ioane be  Ioane Bapatiso amo Iesu ena sivarai idia kamonai neganai, idia diba ia be Mesia. Andrea ese Iesu ena sivarai be iena kakana Simona Petero ia hamaoroa bona reana Ioane ese ena kakana Iamesi ia hamaoroa. (Ioa. 1:​29, 35-41) Hua haida murinai, Iesu be Galilea, Iudea, bona Samaria dekenai ia haroro neganai, unai taudia foa ese ia idia bamoa. Iesu ena hahediba herevadia idia ura henia, to unai nega ai idia ese haroro gaukara idia laloa bada lasi. Unai dainai edia haoda bisinesi dekenai idia giroa lou.

⁶ Gabeai, Iesu ese Petero bona Andrea ia boiridia “taunimanima haoda henia” gaukarana idia karaia totona. Petero bona Andrea be dahaka idia karaia? “Maoromaoro edia reke idia rakatania, bena ia murinai idia raka.” Iamesi bona Ioane danu be “maoromaoro bouti bona edia tamana idia rakatania bena [Iesu] murinai idia raka.” (Mat. 4:​18-22) Dahaka ese unai tatau foa ia durua ful-taim haroro gaukara idia hamatamaia totona? Unai abia hidi idia karaia totona, gau haida idia laloa namonamo guna. Hegeregere hua haida gunanai, Iesu idia bamoa bona ena hadibaia herevadia idia kamonai. Idia itaia Iesu ese hoa karadia momo ia karaia bona kara maoromaoro ia ura henia. Danu idia itaia, taunimanima be Iesu ena hereva idia ura henia, bona idia dibaia gaudia ese edia abidadama ia hagoadaia.

7. Edena dala ai Baibel stiuden ita durua Iehova ia abidadama henia totona?

⁷ Edena dala ai Iesu bamona iseda Baibel stiuden ita durua Iehova ia abidadama henia totona? (Aon. 3:​5, 6) Eda hahediba dalana amo idia ita durua diba. Hegeregere, namona be ita hadibaia bema Basileia ia atoa guna, Iehova ese do ia naria. (Malaki 3:10; Mataio 6:33 duahia.) Baibel amo ita hahedinaraia Iehova be hanaihanai ena taunimanima ia naria. To, namona be ita laloaboio lasi, iseda haheitalai namona ese do ia durua danu. Iehova ese ita ia durua dalana be ia dekenai ita herevalaia neganai, unai ese do ia hagoadaia Iehova ia abidadama henia totona. Iseda buka bona magasin amo mauri sivaraidia be ia dekenai ita hahedinaraia diba. a

8. (a) Edena dala ai Baibel stiuden ena abidadama ia goada diba? (b) Edena dala ai stiuden ita durua, unai amo do ia diba Iehova be ia “namo momokani”?

⁸ Baibel stiuden ena abidadama ia goada totona, Iehova ese haida ia hanamoa sivaraidia ia duahia bona kamonai sibona be hegeregere lasi. To, sibona ena mauri lalonai idia vara gaudia amo do ia diba Iehova be ia “namo momokani.” Salamo 34:8 ia gwau: “Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani. Lohiabada dekenai idia abidadama taudia ese, moale do idia davaria.” To, bema stiuden tauna be moni ena hekwakwanai ia davaria, eiava ia hekwarahi kuku, kasi gadara o inuinu karana ia rakatania totona, edena dala ai ia ita durua diba? (Aon. 23:​20, 21; 2 Kor. 7:1; 1 Tim. 6:10) Namona be ita hagoadaia Dirava do ia guriguri henia unai kara ia rakatania totona. Iena mauri ia namo ia lao neganai, do ia itaia Iehova be ia “namo momokani.” Bena ia ita hagoadaia Iehova tomadiho henia karana  do ia atoa guna. Hegeregere, wiki ta ta ibounai Baibel do ia stadilaia, hebou totona do ia hegaegae, bona hebou dekenai ia lao. Bema stiuden tauna ia itaia Iehova be iena hekwarahi ia hanamoa, ena abidadama do ia goada, bona gau ma haida hegeregere moni dainai do ia lalohekwarahi momo lasi.

Bema Idia Kirikirilaia Dainai Ia Gari

9, 10. (a) Ena be Nikodemo bona Arimatea tauna Iosepa be Iesu ena hahediba taudia, to dahaka dainai unai idia hunia? (b) Hari, dahaka dainai tatau haida be idia gari Iesu ena hahediba taudia ai idia lao totona?

⁹ Tatau haida be ma haida edia lalohadai idia laloa momo dainai, ia auka Iesu ena hahediba taudia ai idia lao totona. Hegeregere, Nikodemo bona Arimatea tauna Iosepa be Iuda taudia idia gari henia dainai, taunimanima idia hamaoroa lasi idia be Iesu ena hahediba taudia. (Ioa. 3:​1, 2; 19:38) To, idia gari ena badina ma ta be, dubu gunalaia taudia ese Iesu idia abidadama henia taudia be sinagoga amo idia luludia.​—⁠Ioa. 9:⁠22.

¹⁰ Hari, tano haida dekenai bema tau ta be Dirava, Baibel bona tomadiho karana ia laloa bada, ma haida dekenai unai ia gwauraia be auka. Badina ena turadia bona famili taudia ese do idia kirikirilaia bona badu henia. Gabu ma haida dekenai, bema tau ta ia ura ena tomadiho ia haidaua, do idia dagedage henia. Hegeregere, ami tauna, gavamani tauna o dagi bada tauna ta be tomadiho ia herevalaia neganai, momo ese do idia dadaraia. German tauna ta ia gwau: “Umui Witnes taudia ese Baibel amo umui herevalaia gauna be momokani. To bema lau be hari dina ai Witnes tauna ai lau lao, kerukeru taunimanima ibounai do idia diba. Egu gaukara turadia, dekena taudia, bona lau bona egu famili idia diba taudia be dahaka do idia laloa? Lau hegeregere lasi unai ibounai lau haheaukalaia totona.”

11. Iesu ese edena dala ai ena hahediba taudia ia durua taunimanima do idia gari henidia lasi totona?

¹¹ Ena be Iesu ena aposetolo taudia be lalogoada taudia, to nega haida taunimanima dekenai idia gari. (Mar. 14:​50, 66-72) To, edena dala ai Iesu ese ena hahediba taudia ia durua hereva momokani lalonai idia goada totona? Iesu ese idia ia durua do idia davaria dagedage idia haheaukalaia totona. Ia gwau: “Taunimanima ena Natuna dainai umui idia inai henia, idia lulua, idia gwauraia dika bona emui ladana idia hadikaia neganai, do umui moale.” (Luka 6:22) To, idia ia hamaoroa bema heduru bona goada totona Dirava idia noia, ia be hanaihanai idia do ia durua bona naria. (Luka 12:​4-12) Danu, Iesu ese ia murinai idia raka matamaia taudia ia boiria ena hahediba taudia edia turadia ai do idia lao.​—⁠Mar. 10:​29, 30.

12. Edena dala ai iseda Baibel stiuden ita durua ma haida ia gari henia lasi totona?

¹² Ita danu be iseda Baibel stiuden taudia do ita durua ma haida idia gari henia lasi totona. Ia ita durua ena inai taudia be dala maorona ai ia haere henidia totona. (Ioa. 15:19) Hegeregere, reana ena gaukara turadia bona ma haida ese ena tomadiho matamatana idia kirikirilaia, o henanadai momo idia henia. Ita durua Baibel  amo haere kwadogidia ia hegaegaelaia totona. Namona be ita tura henia bona tadikaka taihu ma haida ia hedavari henidia danu. Reana ia davaria hekwakwanai be tadikaka taihu haida ese guna idia davaria dainai, ia idia durua bona ena turana ai idia lao diba. Gau badana be do ita hadibaia mai ena kudouna ibounai ida do ia guriguri hanaihanai. Unai ese do ia durua Iehova ena turana ai ia lao totona. Bona Iehova be iena Nadi Goadana bona Hunia Gabuna ai ia halaoa neganai, taunimanima do ia gari henia lasi.​—⁠Salamo 94:​21-23; Iamesi 4:8 duahia.

Bema Ia Laloa Ia be Hegeregere Lasi

13. Hegeregere lasi lalohadaina ese edena dala ai tadikaka ta ia koua diba?

¹³ Tatau haida idia laloa idia be hegeregere lasi kongrigeisen ena maduna idia huaia totona. Reana idia duahiduahi namonamo lasi, eiava idia gari edia lalohadai idia gwauraia hedinarai totona. Reana idia hemarai taunimanima momo vairanai edia tomadiho idia herevalaia totona. Unai dainai, ia auka sibodia edia stadi idia karaia, hebou dekenai idia haere, o ma haida idia haroro henia totona. Tadikaka ta ia gwau: “Lau be mero maragi neganai, lau gari lau haroro totona. Karaharaga iduara ta dekenai lau raka lao, lau pidipidi bona lau raka oho haraga, badina lau ura lasi ruma taudia ese lau idia kamonai o lau idia itaia. Lau bada neganai unai kara lau hadokoa, to ruma-ta-ruma-ta haroro gaukarana lau laloa neganai, lau gorere bamona.”

14. Dahaka dainai Iesu ena hahediba taudia be mero amo demoni idia lulua diba lasi?

¹⁴ Iesu ena hahediba taudia be mero ta amo demoni idia lulua diba lasi neganai, edia hemami be edena bamona? Reana idia mamia idia be hegeregere lasi Iesu ese ia henia gaukarana idia karaia totona. Mero ena tamana be Iesu dekenai ia gwau: “Lohiabada e, egu natuna mero oi hebogahisi henia, badina ia be mai ena epilepsi gorerena bona hisihisi bada ia mamia, nega momo lahi bona ranu lalonai ia moru, bona emu hahediba taudia dekenai lau mailaia, to idia hegeregere lasi ia idia hanamoa totona.” Iesu ese mero amo demoni ia lulua bona ia namo lou. Gabeai, ena hahediba taudia ese idia nanadaia: “Dahaka dainai demoni ai lulua diba lasi?” Iesu ia gwau: “Badina emui abidadama be ia maragi. Vadaeni umui lau hamaoroa momokani, bema emui abidadama be mastadi uhena bamona, inai ororo dekenai do umui gwau, ‘Inai gabu amo oi lao unuseniai,’ bena do ia lao, bona do umui hegeregere gau ibounai umui karaia totona.” (Mat. 17:​14-20) Abidadama tauna be ia karaia diba lasi gaudia ia karaia diba. To, bema sibona ena diba dekenai ia tabekau, do ia kwalimu lasi, bena do ia mamia ia be hegeregere lasi Iehova ia hesiai henia totona.

15, 16. Bema Baibel stiuden ia laloa ia hegeregere lasi, edena bamona ita durua diba?

¹⁵ Bema Baibel stiuden ia laloa haida ese ia idia hereaia, bona ia be Iehova ia hesiai henia diba lasi, namona be ita hamaoroa Iehova ese do ia durua. Petero ia gwau: “Unai dainai, Dirava ena imana goadana henunai umui sibona umui hamanaua, vadaeni nega korikorina ai ia ese umui do ia abia isi. Bona emui lalohekwarahi ibounai be ia dekenai umui negea.” (1 Pet. 5:​6, 7) Namona be stiuden tauna ita durua Iehova do ia lalokau henia bona iena hakaua dalana do ia badinaia. Anina be Baibel amo ia dibaia gaudia do ia ura henia bona ena mauri lalonai “lauma helaga ena huahua” do ia hahedinaraia. (Gal. 5:​22, 23) Guriguri karana ia laloa bada be namo. (Fili. 4:​6, 7) Bona do ia abia  dae Dirava ese ia dekenai diba bona goada do ia henia ena hesiai gaukara ia karaia totona.​—⁠2 Timoteo 1:​7, 8 duahia.

¹⁶ Stiuden haida ita durudia diba edia duahiduahi bona herevahereva dalana idia hanamoa totona. Haida be Iehova idia diba lasi neganai, kara dikadia haida idia karaia, unai dainai idia laloa idia be hegeregere lasi Iehova idia hesiai henia totona. Iesu ia gwau: “Idia gorere lasi taudia be doketa idia tahua lasi, to idia gorere taudia sibona ese idia tahua.” (Mataio 9:12) Oibe, unai bamona taudia be mai lalokau bona haheauka ida ita durudia be namo.

Tatau Momo Durua Iehova Idia Diba Totona

17, 18. (a) Edena dala ai tatau momo ita haroro henia diba? (b) Vaira wiki ai dahaka do ita herevalaia?

¹⁷ Baibel ena hereva sibona ese taunimanima momo ia hamoalea diba, bona ita ura tatau momo ese unai idia dibaia. (2 Timoteo 3:​16, 17) Edena dala ai tatau momo ita haroro henia diba? Adorahi ai, wikeni o holidei negadiai ita haroro diba, badina unai negadiai tatau momo be ruma ai idia noho. Tadikaka be ruma tauna totona idia henanadai diba. Bona bema dala ia kehoa, iseda gaukara gabuna dekenai tatau ita haroro henidia diba. Kongrigeisen taihu haida edia adavadia be Witnes lasi taudia, bona ita durudia diba hereva momokani idia abia dae totona.

¹⁸ Ita ura taunimanima ita durua hereva momokani idia diba totona. Bona hereva momokani idia tahua taudia be ita harorolaia sivarai namona do idia ura kamonai. Unai dainai, namona be mai haheauka ida ita durudia noho. To, kongrigeisen lalonai idia bapatiso vadaeni tadikaka be edena dala ai idia ita durudia diba maduna idia huaia totona? Vaira wiki ena stadi ese unai do ia haerelaia.

[Footnote]

Edena Bamona Do Oi Haere?

• Edena dala ai tatau ita durua diba mai anina bada gaudia idia tahua totona?

• Edena dala ai stiuden ita durua diba taunimanima ia gari henia lasi totona?

• Bema ta ia laloa ia hegeregere lasi kongrigeisen maduna ia huaia totona, edena bamona ita durua diba?

[Study Questions]

[Picture on page 25]

Tatau dekenai sivarai namona oi harorolaia, a?

[Picture on page 26]

Edena dala ai Baibel stiuden oi durua hahetoho ia hanaia totona?