“Oi be lauegu Dirava. . . . Lau ura oiemu Lauma ese lau do ia hakaua.”​—⁠SAL. 143:⁠10.

1. Ita itaia diba lasi siahuna ese ta ia hakaua dalana mani oi herevalaia.

 NEGA ta kampasi oi gaukaralaia, a? Kampasi be taunimanima ese idia gaukaralaia tulu ta bona ia durudia idia lao gabuna idia davaria totona. Ia be mai ena nila bona hanaihanai not kahana ia poinia. Ita itaia diba lasi magneti siahuna ese unai nila ia hamarerea. Lagani momo lalodiai, taunimanima be gabu daudauna idia raka eiava sisima o peleini ai idia loaloa neganai, kampasi idia gaukaralaia.

2, 3. (a) Matamanai Iehova ese ia gaukaralaia siahuna be dahaka? (b) Edena bamona ita diba lauma helaga ese ita ia hakaua diba?

² To, iseda mauri lalonai ita itaia diba lasi siahuna ma ta be mai anina bada. Unai be dahaka? Genese bukana ese Dirava ese idaunegai ia karaia gaudia ia herevalaia bona unai siahu ia gwauraia danu. Ia gwau: “Matamaia neganai Dirava ese guba bona tanobada ia karaia.” Ita diba Dirava ese siahu ta ia gaukaralaia gau ibounai ia havaraia totona. Unai siahu be dahaka? Ia be lauma helaga, badina Baibel ia gwau: “Dirava ena Lauma be davara ena kopina latanai ia marere noho.” (Gen. 1:​1, 2) Ita moale badina Iehova ese ena lauma helaga ia gaukaralaia ita bona mauri gaudia ma haida ia havaraia totona.​—⁠Iobu 33:⁠4.

³ To, lauma helaga be dala ma haida ai ita ia durua, a? Oibe, badina Dirava ena Natuna ese ena hahediba taudia ia hamaorodia, lauma helaga ese ‘hereva momokani ibounai dekenai idia do ia hakaua lao.’ (Ioa. 16:13) Lauma helaga be dahaka? Bona dahaka dainai ita ia hakaua be namo?

Lauma Helaga be Dahaka?

4, 5. (a) Toi Tamona idia abia dae taudia edia lalohadai lauma helaga dekenai be dahaka? (b) Lauma helaga be dahaka?

⁴ Haroro gaukara ai ita hereva henia taudia haida edia lalohadai lauma helaga dekenai be Baibel ena hereva hegeregerena lasi. Toi Tamona idia abia dae taudia idia gwau, lauma helaga be lauma tauna ta bona Dirava ida ia hegeregere. (1 Kor. 8:⁠6) To, Toi Tamona ena hahediba herevana be Baibel lalonai ia noho lasi.

⁵ Vadaeni, lauma helaga be dahaka? Genese 1:2 ai, Heberu gado herevana idia hahanaia “lauma” ena anina ma ta be “lai.” Ena be lai ita itaia diba lasi, to au raurau idia marere ita itaia diba. Unai hegeregerena, lauma helaga be ita itaia diba lasi, to ia havaraia gaudia ita itaia diba. Lauma helaga be taunimanima ta lasi, to ia be siahu ta. Iehova ese taunimanima o gau ta latanai ia gaukaralaia ena ura ia hagugurua totona. Ita abia dae  momokani, lauma helaga be Siahu Ibounai Diravana amo ia mai.​—⁠Isaia 40:​12, 13 duahia.

6. Davida be Iehova amo dahaka ia noia?

⁶ Iehova be ena lauma helaga amo eda mauri lalonai ita do ia hakaua noho, a? Iehova ese Davida ia gwauhamata henia, ia gwau: “Lau ese oiemu raka dalana oi dekenai do lau hadibaia.” (Sal. 32:⁠8) Davida ia ura Dirava ese ia hakaua, a? Oibe, badina Iehova ia guriguri henia neganai, ia gwau: “Oi be lauegu Dirava. Unai dainai oiemu ura ena kara, be lau dekenai mani do oi hadibaia. Lau ura oiemu Lauma ese lau do ia hakaua.” (Sal. 143:10) Oibe, lauma helaga ese ita ia hakaua danu be namo. Dahaka dainai? Badina foa do ita herevalaia.

Eda Mauri Ita Biagua Diba Lasi

7, 8. (a) Dahaka dainai Dirava ese ita ia hakaua be namo? (b) Dahaka dainai Dirava ena heduru ita tahua be namo? Haheitalai gwauraia.

⁷ Lauma helaga ese ita ia hakaua be namo ena badina ginigunana be, ita be hegeregere lasi eda mauri ita biagua namonamo totona. Ta ita “hakaua” ena anina be ia dekenai dala maorona ita hadibaia. To, ita sibona eda mauri ita biagua namonamo lasi, badina Iehova ese ita dekenai unai diba ia henia lasi. Ita be goevadae lasi, bona sibona eda ura ita badinaia neganai, kerere momo ita karaia. Peroveta tauna Ieremia ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ier. 10:23) Dahaka dainai taunimanima be sibodia edia mauri idia biagua diba lasi? Iehova ia gwau: “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba?”​—⁠Ier. 17:9; Mat. 15:⁠19.

⁸ Mani oi laloa: Bema ta be nega ginigunana uda dekenai ia loaloa. To, ia be uda maurina ia manadalaia lasi, bona dala ia diba lasi, dika do ia davaria, ani? Unai dainai aonega karana be unai gabu ia diba namonamo tauna ta ia bamoa, o kampasi ia abia kau. Unai hegeregerena, bema ta be inai tanobada dikana ai Dirava ena heduru ia tahua lasi, to sibona ena mauri ia biagua, dika do ia davaria. Davida bamona, namona be Iehova ena heduru ita noia. Ia gwau: “Lau be nega ibounai, oiemu dala dekenai lau raka, bona nega ta inai dala dekena amo, lau raka siri lasi.” (Sal. 17:5; 23:⁠3) Edena dala ai Iehova ena heduru ita abia diba?

9. Rau 17 ena laulau bamona, edena dala ai lauma helaga ese ita ia hakaua diba?

⁹ Bema ita manau bona Iehova dekenai ita tabekau, iena lauma helaga amo ita do ia hakaua. Edena dala ai unai ia karaia? Iesu ese iena hahediba taudia ia hamaoroa: “Tamana ese egu ladanai durua tauna, lauma helaga do ia siaia, ia ese umui dekenai gau ibounai  do ia hadibaia bona lau ese umui dekenai lau gwauraia gaudia ibounai do umui laloa lou.” (Ioa. 14:26) Baibel bona Keriso ena hahediba herevadia stadilaia totona ita guriguri guna neganai, lauma helaga ese ita do ia durua Iehova ena aonega herevadia ita lalopararalaia bona ita badinaia totona. (1 Kor. 2:10) Danu, iseda mauri lalonai hekwakwanai ita davaria neganai, lauma helaga ese ita do ia durua unai ita hanaia totona. Bona ita do ia durua Baibel ena hakaua herevadia ita laloatao, bona abia hidi maorodia ita karaia totona.

Lauma Helaga ese Iesu Ia Hakaua

10, 11. Iesu ia diba lauma helaga be dahaka do ia karaia? Bona edena dala ai ia durua?

¹⁰ Lauma helaga ese ita ia hakaua be namo ena badina iharuana be, lauma helaga ese Dirava ena Natuna ia hakaua danu. Iesu ia diba tanobada ai ia noho neganai, lauma helaga ese do ia durua. Ia be inai peroveta herevana ia diba: “Lohiabada ena Lauma ese, ia dekenai do ia kamokau. Bona inai bamona do ia hanamoa: Aonega bona laloa kehoa ena Lauma do ia henia. Sisiba namona henia dalana, bona siahu ena Lauma do ia henia, Diba maorona, bona Lohiabada gari henia kara, ena Lauma be do ia henia.” (Isa. 11:⁠2) Tanobada ai Iesu be hekwakwanai momo ia davaria, unai dainai ia ura bada lauma helaga ese ia durua!

¹¹ Iesu ia bapatiso murinai, Isaia ena peroveta herevana ia guguru. Luka ena Evanelia bukana ia gwau: “Iesu be Ioridane ia rakatania neganai, ia be lauma helaga amo ia honu. Bona lauma helaga ese tano gagaena dekenai ia hakaua lao.” (Luka 4:⁠1) Unuseniai ia anivaga, ia guriguri, bona do idia vara gaudia ia laloa dobu lalonai, Iehova ese iena ura do ia hagugurua dalana ia hadibaia, bona Iesu ia hagoadaia gabeai do idia vara gaudia ia haheaukalaia totona. Lauma helaga ese Iesu ena lalohadai bona kudouna ia gimaia, unai amo abia hidi namodia ia karaia diba. Unai dainai, Iesu be ena Tamana ena ura ia karaia.

12. Dahaka dainai lauma helaga totona ita guriguri be namo?

¹² Iesu ena mauri lalonai lauma helaga ese ia durua bada, unai dainai ena hahediba taudia ia hagoadaia, lauma helaga totona do idia guriguri bona ena hakaua dalana do idia abia dae. (Luka 11:​9-13 duahia.) Dahaka dainai lauma helaga totona ita guriguri be namo? Badina ena heduru amo eda kara bona lalohadai ita haidaua bona “Keriso ena lalohadai” ita abia diba. (1 Kor. 2:16; Roma 12:⁠2) Anina be lauma helaga ena hakaua dalana ita abia dae neganai, Keriso bamona do ita laloa, bona ena kara do ita tohotohoa.​—⁠1 Pet. 2:⁠21.

Tanobada ese Ita Ia Hakaua Kerere Diba

13. Tanobada ena laloa dalana be dahaka? Bona edena dala ai taunimanima ia hakaua kerere?

¹³ Lauma helaga ese ita ia hakaua be namo ena badina ihatoina be, bema ita naria namonamo lasi tanobada ena laloa dalana ese ita ia hakaua kerere diba. Hari  taunimanima momo be tanobada ena laloa dalana ese ia biagua. Unai dainai lauma helaga ena hakaua dalana idia dadaraia. Idia ese Keriso ena lalohadai idia dadaraia, bona inai tanobada ena dirava, Satani, ena kara bona lalohadai idia badinaia. (Efeso 2:​1-3; Tito 3:3 duahia.) Bema ta be inai tanobada ena laloa dalana bona “tauanina ena kara dikadia” ese ia biagua, dika idauidau do ia davaria, bona ‘Dirava ena basileia do ia abia lasi.’​—⁠Gal. 5:​19-21.

14, 15. Edena dala ai tanobada ena laloa dalana ita dadaraia diba?

¹⁴ Inai tanobada ena laloa dalana ita dadaraia totona, Iehova be ita dekenai heduru gauna ta ia henia. Aposetolo Paulo ia gwau: “Lohiabada amo bona ena goada badana amo siahu do umui abia noho . . . unai amo nega dikana ai do umui gini goada.” (Efe. 6:​10, 13) Iehova be ena lauma helaga amo ita dekenai goada ia henia Satani ena hedibagani ita dadaraia totona. (Apok. 12:⁠9) Tanobada ena laloa dalana be mai ena siahu, unai dainai ita dadaraia vaitani be auka. To, ita dadaraia diba badina lauma helaga ena siahu be bada, bona ita do ia durua!

¹⁵ Aposetolo Petero ese iena nega ai hereva momokani idia rakatania taudia ia herevalaia, ia gwau: “Dala maorona idia rakatania, bona dala kererena idia badinaia.” (2 Pet. 2:15) Ita moale badina “ita be tanobada ena laloa dalana ita abia lasi, to Dirava amo ia mai laumana ita abia.” (1 Kor. 2:12) Kara maoromaoro ita badinaia bona tanobada ena laloa dalana ita dadaraia totona, namona be lauma helaga ese ita ia hakaua bona Iehova ese ita ia henia heduru gaudia ibounai ita gaukaralaia.​—⁠Gal. 5:⁠16.

Lauma Helaga Ena Huahua Namodia

16. Lauma helaga ena heduru amo dahaka huahua namodia ita hahedinaraia diba?

¹⁶ Lauma helaga ese ita ia hakaua ena badina ihahanina be, ita ia durua eda mauri lalonai huahua namodia ita hahedinaraia totona. (Galatia 5:​22, 23 duahia.) Oibe, ita ibounai ita ura lalokau, moale, maino, boga-auka, hebogahisi, kara namo, abidadama, manau, bona sibona biagua karadia ita hahedinaraia. Unai kara namodia ese iseda ruma bese bona kongrigeisen ia hagoadaia diba. Namona be ita hekwarahi unai huahua namodia ita hahedinaraia noho totona. Oibe, “unai gaudia dekenai taravatu be lasi.”

17. Lauma helaga ena huahua ita hahedinaraia totona, dahaka ita karaia diba?

¹⁷ Mani inai ita laloa: Iseda hereva bona kara amo ita hahedinaraia ita be lauma helaga ese ia hakaua bona ena huahua ita hahedinaraia, a? (2 Kor. 13:5a; Gal. 5:25) Bema ita diba ita be lauma helaga ena huahua haida ita hahedinaraia lasi, dahaka ita karaia be namo? Namona be lauma helaga ena hakaua dalana ita badinaia, bona Baibel bona Keristani bukadia ma haida lalonai unai huahua ta ta ita stadilaia. Danu, dina ta ta ai unai huahua ita hahedinaraia daladia ita lalohadailaia bona ita hekwarahi ita hahedinaraia totona. a Ita itaia lauma helaga ese ita bona tadikaka taihu ia durua dainai, ita diba lauma helaga ena heduru ita abia be gau badana.

Lauma Helaga ese Oi Ia Hakaua, A?

18. Iesu be lauma helaga ia laloa bada dainai dahaka ita dibaia?

¹⁸ Dirava be guba bona tanobada ia karaia neganai, Iesu be iena “gaukara karaia tauna.” Unai dainai, Iesu ia diba tanobada be mai ena magneti siahuna. Taunimanima ese kampasi idia gaukaralaia neganai, unai magneti siahu ese idia ia durua idia lao henia gabuna idia davaria totona. (Aon. 8:30; Ioa.  1:⁠3) Iesu be tanobada ai ia noho neganai, ita diba lasi bema ia be kampasi ia gaukaralaia o lasi. To, Baibel ia hahedinaraia Iesu ena mauri lalonai lauma helaga ia laloa bada, bona ia ura lauma helaga ese do ia hakaua. Lauma helaga ese Iesu ia hadibaia gaukara ta do ia karaia neganai, ia karaia sibona. (Mar. 1:​12, 13; Luka 4:14) Iesu bamona, oi ura lauma helaga ese oi ia hakaua, a?

19. Lauma helaga ese ita ia hakaua totona, dahaka ita karaia be namo?

¹⁹ Hari inai negai, lauma helaga idia laloa bada taudia be lauma helaga ese ia hakaua noho. To, edena dala ai lauma helaga ese dala maorona ai oi ia hakaua diba? Namona be hanaihanai lauma helaga totona oi guriguri, bona ena hakaua dalana oi abia dae. (Efeso 3:​14-16 duahia.) Baibel stadilaia karana amo oi hahedinaraia oi ura lauma helaga ese oi ia hakaua. Baibel be lauma helaga ena siahu amo idia torea, unai dainai ena aonega herevadia oi abia dae bona badinaia be namo. (2 Tim. 3:​16, 17) Unai ese do ia hahedinaraia Iehova ena hakaua dalana oi abidadama henia bona oi diba inai tanobada dikana lalonai dala maorona ai oi ia hakaua diba.

[Footnote]

Hereva Badadia Oi Laloatao, A?

• Edena dala ai lauma helaga ese ita ia durua diba?

• Lauma helaga ese ita ia hakaua be namo ena badina badadia foa be dahaka?

• Lauma helaga ese dala maorona ai ita ia hakaua totona, dahaka ita karaia be namo?

[Study Questions]

[Picture on page 15]

Lauma helaga ese Iesu ia hakaua

[Picture on page 17]

Lauma helaga ese taunimanima edia lalona bona kudouna ia kehoa bona ia hakaudia