DABA ai mahuta amo oi noga, to oi ura unai dina do ia ore bona hanuaboi ia mai haraga be namo. Reana, oi gorere dainai unai bamona oi laloa. Bona Iobu bamona oi gwau: “Lau ura lasi inai hisihisi lau mamia, lau mase be namo.” (Iobu 7:​15, The New English Bible) To, bema oi be lagani momo lalonai oi gorere, edena bamona oi moale noho diba?

Mepiboseta be nega daudau lalonai ia gorere tauna ta. Ia be King Davida ena turana Ionatana ena natuna. Ena mauri lagani be faiv neganai, ‘ia moru bona ena aena idia dika.’ (2 Sam. 4:⁠4) Unai sibona lasi, to ia dainai samania koikoi herevadia idia gwauraia bona ena kohu be ma ta ese ia abia dainai, ia lalohisihisi bada. Herevana unai hekwakwanai ia davaria, to ia haheauka bona ia moale.​—⁠2 Sam. 9:​6-10; 16:​1-4; 19:​24-30.

Haheitalai ma ta be aposetolo Paulo. Baibel ia gwau “ginigini ta ese [iena] tauanina ia gwadaia” bamona, to unai ia haheaukalaia. (2 Kor. 12:⁠7) Reana, unai ginigini be nega daudau lalonai ia haheaukalaia gorerena ta, eiava haida idia gwau ia be aposetolo tauna lasi dainai ia lalohisihisi. Ita diba lasi dahaka hekwakwanai ia davaria, to ena lalohisihisi ia haheaukalaia.​—⁠2 Kor. 12:​9, 10.

Hari inai negai, Dirava ena hesiai taudia haida be gorere bada idia davaria dainai edia tauanina ia manoka. Hegeregere, Magdalena be 18 neganai, lupus gorerena ia abia. Lupus be tauanina lalonai idia noho gorere koua sel idia gaukara namonamo lasi neganai, tauanina ena kahana haida hegeregere baragi o kidni idia hadikaia. Magdalena ia gwau: “Lau gari bada badina egu gorere be ia bada ia lao. Egu bogana ese aniani ia hamakohia namonamo lasi, egu uduna lalonai toto idia vara, bona tairoid gorere lau davaria danu.” To. Izabela ena gorere be ma haida ese idia itaia diba lasi. Ia gwau: “Lau maragi negana amo daradoko gorere (o depression) lau abia. Unai dainai, lau gari kava, lau hahodi namonamo lasi, egu bogana ia hisihisi, bona egu tauanina ia manoka.”

Goada be Ia Hegeregere Lasi

Gorere badana oi davaria bona oi hekure sibona neganai, oi daradoko diba. Unai ia vara neganai, namona be oi karaia diba gaudia bona oi karaia diba lasi gaudia oi laloa. Reana emu goada be ia hegeregere lasi dainai, gau haida oi karaia diba lasi bona do oi lalohisihisi. Magdalena ia gwau: “Egu gorere ia bada ia lao bona nega momo egu  tauanina ia manoka dainai bedi amo lau toreisi diba lasi. Palani lau karaia lasi badina lau diba lasi bema do lau hegeregere egu ura gaudia lau karaia totona. Lau lalohekwarahilaia gauna be, guna Iehova lau hesiai henia goadagoada, to hari unai lau karaia diba lasi.”

Zbigniew ia gwau: “Lagani idia hanaia lalonai, roki gorere ese egu joini momo ia hadikaia bona lau goada lasi. Nega haida egu joini idia gudu bada herea bona idia hisihisi dainai, gaukara maragidia lau karaia diba lasi bona lau lalohisihisi.”

Barbara be lagani haida gunanai ena harana lalonai tiuma ta idia davaria. Ia gwau: “Lau goada lasi bona nega momo egu kwarana ia hisihisi dainai, gaukara ta lau karaia namonamo diba lasi. Egu goada be ia hegeregere lasi dainai, lau karaia diba gaudia bona lau karaia diba lasi gaudia lau laloa namonamo.”

Ataiai ita herevalaia taudia ibounai be Iehova ena hesiai taudia, bona iena hesiai gaukara idia laloa bada. Oibe, idia be Dirava idia abidadama henia bona ia ese ia durudia.​—⁠Aon. 3:​5, 6.

Iehova ese Ita Ia Durua Dalana

Gorere ta ita davaria neganai, namo lasi ita laloa Dirava be ita ia panisia. (Lal. 3:33) Ena be Iobu be “kerere ta lasi, bona kara maoromaoro tauna” to ia dekenai dika gaudia idia vara. (Iobu 1:⁠8) To, Dirava ese dika gaudia amo tau ta ia tohoa lasi. (Iam. 1:13) Gorere ibounai be Adamu bona Heva edia kara dika dainai ita davaria.​—⁠Roma 5:⁠12.

To, Iehova bona Iesu be hanaihanai kara maoromaoro taudia do idia durua. (Sal. 34:15) Iseda mauri lalonai hekwakwanai badadia ita davaria neganai, ita moale badina Dirava be ‘iseda naria Tauna.’ (Sal. 91:⁠2) To, emu gorere oi haheaukalaia totona, edena bamona oi moale noho diba?

 Guriguri: Idaunegai Dirava ena abidadama hesiai taudia bamona, guriguri amo emu lalohekwarahi be iseda guba Tamana dekenai oi gwauraia. (Sal. 55:22) Unai oi karaia neganai, “Dirava ena maino, laloparara ibounai ia hereaia gauna” do oi mamia. Unai maino ese emu “kudouna bona lalona do ia gimaia.” (Fili. 4:​6, 7) Magdalena be guriguri amo Dirava dekenai ia tabekau dainai, iena gorere ia haheaukalaia diba. Ia gwau: “Egu kudouna ai idia noho gaudia be Iehova dekenai lau gwauraia bona lau ia hagoadaia bona lau moale. Hari, dina ta ta Dirava tabekau henia karana ena anina lau diba.”​—⁠2 Kor. 1:​3, 4.

Emu guriguri haerelaia totona, Iehova be ena lauma helaga, Baibel, bona tadikaka taihu amo oi ia hagoadaia diba. Namo lasi oi laloa Dirava ese hoa dalanai emu gorere do ia hanamoa. To, oi dekenai aonega bona goada do ia henia emu gorere oi haheaukalaia totona. (Aon. 2:⁠7) Oi do ia hagoadaia bona “taunimanima edia siahu ia hereaia gauna” do ia henia.​—⁠2 Kor. 4:⁠7.

Famili: Famili lalonai lalokau bona hebogahisi ia noho neganai, emu gorere oi haheaukalaia diba. To namona be oi laloatao, emu famili idia lalohisihisi danu badina emu gorere idia hanamoa diba lasi. To idia be emu badibadinai idia noho bona oi idia durua. Emu famili ida guriguri hebou karana ese oi dekenai lalomaino ia henia diba.​—⁠Aon. 14:⁠30.

Barbara ese ena natuna kekeni bona kongrigeisen taihu matamatadia ia herevalaia, ia gwau: “Haroro gaukara ai idia ese lau idia durua. Iehova idia hesiai henia goadagoada karana ese egu lalona ia hamoalea.” Zbigniew be ena adavana ese ia naria namonamo, ia gwau: “Ruma gaukara ibounai be ia ese ia karaia. Danu, lau ia durua egu dabua lau hahedokilaia bona Keristani heboudia bona haroro negadiai egu baege ia huaia.”

 Tadikaka taihu: Eda tadikaka taihu ita bamodia neganai, goada ita abia. To, edena bamona bema gorere dainai hebou dekenai oi lao diba lasi? Magdalena ia gwau: “Hebou lau reaia lasi totona, kongrigeisen taudia be lau totona tok idia rekodia. Nega momo tadikaka taihu be lau idia durua totona lau idia rini henia bona revareva amo lau idia hagoadaia. Unai bamona karadia ese lau ia durua egu gorere lau haheaukalaia totona.”

Izabela, daradoko gorere ia abia taihu, ia gwau: “Kongrigeisen lalonai, egu ‘tama’ bona ‘sina’ be momo, idia be egu lalohekwarahi idia kamonai bona egu hemami idia lalopararalaia. Kongrigeisen taudia be egu ruma bese bamona, bona idia ida lau noho neganai lau moale.”

Namo lasi gorere taudia be ‘sibodia idia noho.’ Namona be kongrigeisen taudia idia bamoa. (Aon. 18:⁠1) Idia ese ma haida idia hagoadaia diba danu. Reana matamanai do oi ura lasi tadikaka taihu dekenai emu gorere bona dabu gaudia oi gwauraia. To, do idia moale bema oi hereva hedinarai, badina unai amo ‘mai momokani ida tadikaka lalokau henia karana idia hahedinaraia’ diba. (1 Pet. 1:22) Oi noidia bema hegeregere edia motuka amo hebou totona oi idia udaia, o haroro gaukara ai idia oi bamoa, eiava idia ida emu lalohisihisi gauna oi herevalaia. Momokani, ita ura lasi gau momo totona ita noinoi, to herevana dahaka heduru idia henia, mai moale ida ita abia dae be namo.

Gau namodia laloa: Emu gorere oi haheaukalaia totona, gau badana be emu lalona oi hadaia gau namodia sibona do oi laloa. Bema emu gorere sibona oi laloa momo, do oi moale lasi bona lalohadai kereredia do oi abia. Baibel ia gwau: “Tau ta do ia gorere neganai, do ia haheauka diba, to iena lauma ena goada ia ore neganai, tau be edena bamona do ia haheauka diba?”​—⁠Aon. 18:⁠14.

Magdalena ia gwau: “Lau hekwarahi egu gorere lau laloa momo lasi totona. Egu mamina ia namo dinadiai, lau moalelaia gaudia lau karaia. Danu, magasin amo gorere tadikaka taihu edia sivarai lau duahia neganai, lau ia hagoadaia.” Izabela ia hagoadaia  gauna be, ia diba Iehova ese ia lalokau henia. Ia gwau: “Iehova ena ura lau karaia, bona lau moale badina ia lau hesiai henia diba. Danu, nega vaira ena helaro namona lau laloa bada.”

Zbigniew ia gwau: “Egu gorere dainai manau bona kamonai karana lau dibaia. Mai aonega ida abia hidi namodia lau karaia, bona mai kudouna ibounai ida haida edia dika lau gwauatao. Iehova hesiai henia karana lau moalelaia bona sibona lau laloa momo lasi. Ena be lau gorere, to lau gaukara goada egu hetura karana Iehova ida lau hagoadaia totona.”

Namona be oi laloatao, Iehova be emu haheauka karana ia itaia, oi ia hebogahisi henia bona ia laloa bada. Emu “gaukara bona iena ladana totona [oi] hahedinaraia lalokauna, do ia laloaboio lasi.” (Heb. 6:10) Ia idia gari henia taudia ibounai dekenai ia gwauhamata: “Lau ese umui do lau negea lasi, bona umui do lau rakatania lasi momokani.”​—⁠Heb. 13:⁠5.

Bema nega haida oi lalometau, tanobada matamata ai do oi mauri hanaihanai helarona oi laloa be namo. Kahirakahira tanobada ai Dirava ena Basileia ena hahenamo idauidau do oi itaia!

[Box/​Pictures on page 28]

Idia Gorere To Idia Haroro Noho

“Lau be sibona lau raka diba lasi dainai, haroro negadiai egu adavana o tadikaka taihu haida ese lau idia bamoa. Hamatamaia herevadia bona Baibel siridia be lau laloatao bona lau gaukaralaia.”​—⁠Jerzy, matakepulu tauna.

“Telefon amo lau haroro sibona lasi, to nega momo revareva amo kamonai taudia lau haroro henidia. Hospital ai lau noho neganai, egu Baibel, buka bona magasin be egu bedi badinai lau atoa. Unai ese dala ia kehoa ma haida lau haroro henia totona.”​—⁠Magdalena, mai ena lupus gorere.

“Ruma-ta-ruma-ta haroro gaukara lau ura henia, to lau gorere negadiai telefon amo taunimanima lau haroro henidia.”​—⁠Izabela, daradoko gorerena ia abia.

“Lou henia bona Baibel stadi karaia negadia lau moalelaia. Dina haida lau goada neganai, ruma-ta-ruma-ta ai lau haroro.”​—⁠Barbara, harana ai tiuma ia tubu.

“Haroro negadiai baege metauna lau huaia lasi. Ena be egu joini idia hisihisi, to lau haroro noho.”​—⁠Zbigniew, mai ena roki gorerena.

[Picture on page 30]

Maragidia bona badadia ese gorere taudia idia hagoadaia diba