“Gaukara ibounai be unai lauma helaga tamona sibona ese ia karaia.”​—⁠1 KOR. 12:⁠11.

1. Inai stadi ai dahaka do ita herevalaia?

 PENTEKOSTE 33 C.E. ai, moale gaudia haida idia vara. Unai dina ai Dirava ese ena lauma helaga be iena hesiai taudia latanai ia bubua! (Kara 2:​1-4) Unai nega amo Dirava ese ena lauma helaga be dala matamatana ai ia gaukaralaia ena taunimanima ia hakaua totona. Vanegai stadi ai ita dibaia gauna be, idaunegai abidadama hesiai taudia be lauma helaga ese ia durua maduna metaudia idia huaia totona. To, Pentekoste 33 C.E. do lasi neganai, lauma helaga be edena dala ai Dirava ena hesiai taudia ia hakaua? Bona Pentekoste 33 C.E. murinai, edena dala ai unai ia karaia? Bona hari iseda negai, lauma helaga be edena dala ai Keristani taudia ia hakaua noho? Inai stadi ai unai do ita herevalaia.

 “Lau be Iehova Ena Igui Hesiai Kekenina!”

2. Maria ia diba lauma helaga be dahaka ia karaia diba?

² Ierusalema ai atai daiutuna ta lalonai Dirava ese lauma helaga ia bubua neganai, Maria ia noho danu. (Kara 1:​13, 14) Unai ia do vara lasi neganai, Maria ia diba Iehova be ena lauma helaga amo hoa karadia ia karaia diba. Lagani 30 gunanai Iehova ese iena Natuna ena mauri be guba amo ia abia bona tanobada ai rami-hebou kekenina Maria ena bogana lalonai ia atoa. Lauma helaga ena siahu amo Maria ia rogorogo, ena be ia do headava lasi.​—⁠Mat. 1:⁠20.

3, 4. Maria ese Dirava ena ura be edena bamona ia laloa? Bona edena dala ai ia ita tohotohoa diba?

³ Dahaka dainai Iehova ese Maria ia abia hidi? Aneru ese Maria ia hamaoroa ia be Dirava ena Natuna do ia havaraia neganai, Maria ia gwau: “Lau be Iehova ena igui hesiai kekenina! Namona be emu hereva hegeregerena lau dekenai do ia vara.” (Luka 1:38) Ena hereva amo ia hahedinaraia ia ura mai ena kudouna ibounai ida Iehova ena ura ia karaia. Maria be ia headava lasi dainai, bema ia rogorogo taunimanima be dahaka do idia laloa, eiava Iosepa be do ia ura ia ia adavaia, a? Maria ese unai gaudia be aneru ia hamaoroa lasi. To, ia be sibona ia gwauraia Iehova ena igui hesiai kekenina neganai, ia hahedinaraia Iehova ia abidadama henia.

⁴ Nega haida oi mamia Dirava ena hesiai gaukara lalonai emu maduna be metau, a? Namona be sibona ita nanadaia: ‘Lau abia dae momokani Iehova be lau do ia durua iena ura hegeregerena gau ibounai lau karaia totona, a? Iehova ese ia henia gaukarana be mai egu lalona ibounai ida lau karaia, a?’ Laloatao: Dirava be ia idia abidadama henia bona kamonai henia taudia dekenai iena lauma helaga do ia henia.​—⁠Kara 5:⁠32.

Lauma Helaga ese Petero Ia Durua

5. Pentekoste 33 C.E. do lasi neganai, lauma helaga ese edena dala ai Petero ia durua?

⁵ Pentekoste 33 C.E. do lasi neganai, Petero danu be lauma helaga ena siahu ese ia karaia gaudia ia itaia. Iesu ese ia bona aposetolo taudia ma haida dekenai siahu ia henia demoni idia lulua totona. (Mar. 3:​14-16) Ena be Baibel ese unai ia herevalaia momo lasi, to ita diba lauma helaga ena siahu amo Petero be gau momo ia karaia. Hegeregere, Galilea Gohuna ai, Iesu ese Petero ia hamaoroa ia do ia raka henia neganai, lauma helaga ese ia durua bona Petero be ranu latanai ia raka. (Mataio 14:​25-29 duahia.) Unai ese ia hahedinaraia, Petero ia diba lauma helaga ena heduru amo hoa karadia idauidau ia karaia diba. To gabeai Petero bona aposetolo taudia ma haida be lauma helaga ena siahu amo kara ma haida do idia karaia.

6. Pentekoste 33 C.E. ai, lauma helaga ena heduru amo Petero be dahaka ia karaia diba?

⁶ Pentekoste 33 C.E. ai, lauma helaga ese Petero bona ma haida ia hasiahua dainai, idia be Ierusalema idia vadivadi henia taudia edia gado ai idia hereva. Unai murinai, Petero ia gini tore bona hutuma ia hereva henia. (Kara 2:​14-36) Nega haida Petero ia gari eiava ia karaia gaudia be ia laloa namonamo lasi. To, lauma helaga ia abia murinai, mai gari lasi ida ia haroro, ena be idia dagedage henia bona idia hamaoroa do ia haroro lou lasi. (Kara 4:​18-20, 31) Danu, lauma helaga ena heduru amo Petero be taunimanima edia koikoi karadia ia gwauraia hedinarai. (Kara 5:​8, 9) Ia ese mase tauna ta ia hatorea isi lou danu.​—⁠Kara 9:⁠40.

7. Dirava ese Petero ia horoa murinai, edena hahediba herevadia ia lalopararalaia?

⁷ Pentekoste 33 C.E. do lasi neganai, Petero be Iesu ena hahediba hereva haida ia lalopararalaia. (Mat. 16:​16, 17; Ioa. 6:68) To, Pentekoste 33 C.E. murinai, hahediba hereva ma haida hegeregere, Keriso be dina toi murinai lauma tauna bamona ia toreisi lou, eiava Keriso ena Basileia be guba gavamanina ia lalopararalaia. (Ioa. 20:​6-10; Kara 1:⁠6) Danu, taunimanima be lauma taudia ai idia lao bona guba Basileia ai do idia lohia herevana ia lalopararalaia lasi.  To, Pentekoste ai lauma helaga ese ia horoa bona guba helarona ia abia murinai, Petero be unai hahediba herevana ia lalopararalaia.

8. Horoa taudia bona mamoe ma haida be dahaka hahediba herevadia idia lalopararalaia?

⁸ Iesu ena hahediba taudia be lauma helaga idia abia murinai, guna idia laloparara lasi hahediba herevadia idia lalopararalaia. Keristani Grik Toretoredia torea taudia be lauma helaga ese ia hasiahudia dainai, hunia hereva helagadia idia hahedinaraia diba. (Efe. 3:​8-11, 18) Hari inai negai, horoa taudia bona mamoe ma haida be unai hahediba herevadia idia stadilaia bona lalopararalaia diba. (Ioa. 10:16) Lauma helaga ena heduru amo Baibel ena hereva ita lalopararalaia dainai, ia ita tanikiu henia be namo, ani?

“Paulo, be Lauma Helaga amo Ia Honu”

9. Lauma helaga ena heduru amo Paulo be dahaka ia karaia?

⁹ Pentekoste 33 C.E. ia ore bena lagani ta ia hanaia murinai, lauma helaga ese Paulo ia horoa. Lauma helaga ena heduru amo Paulo ese ia karaia gaudia be hari ita idia durua danu. Hegeregere, lauma helaga ese ia hasiahua dainai, Baibel bukadia 14 ia torea. Lauma helaga ese Petero ia durua bamona, Paulo ia durua guba dekenai ia mase diba lasi bona ia bodaga diba lasi tauanina ena helaro ia lalopararalaia totona. Danu, lauma dikadia ia lulua, gorere taudia ia hanamoa, bona mase tauna ta ia hatorea isi lou! To, Paulo be mai anina bada gaukarana ma ta ia karaia danu. Bona hari inai negai, ita danu be lauma helaga ena siahu amo unai mai anina bada gaukarana ita karaia.

10. Edena dala ai lauma helaga ese Paulo ia durua?

¹⁰ Paulo be “lauma helaga amo ia honu” bona mai gari lasi ida meamea tauna ta ia gwau henia. Kupro ena gavana be Paulo ena hereva ibounai ia kamonai bona ia abia dae, badina “Iehova ena hadibaia hereva dekenai ia hoa.” (Kara 13:​8-12) Oibe, Paulo ia diba lauma helaga ena heduru sibona amo mai gari lasi ida hereva momokani ia gwauraia hedinarai diba. (Mat. 10:20) Gabeai, Efeso kongrigeisen taudia ia noidia ia totona do idia guriguri, unai amo ‘mai gari lasi ida do ia hereva’ noho.​—⁠Efe. 6:​18-20.

11. Edena dala ai lauma helaga ese Paulo ia hakaua?

¹¹ Paulo be ena misinari laolao lalonai, lauma helaga ese ia durua taunimanima ia haroro henia totona, to nega haida Paulo ia koua gabu haida dekenai ia haroro lasi totona. (Kara 13:2; Kara 16:​6-10 duahia.) Hari inai negai danu, Iehova be ena lauma helaga amo haroro gaukara ia hakaua noho. Paulo hegeregerena, Iehova ena hesiai taudia ibounai be idia hekwarahi noho mai gari lasi bona ura bada ida hereva momokani idia harorolaia totona. Ena be Dirava ese Paulo ia hakaua dalana be ita ia hakaua dalana amo ia idau, to ita diba momokani Iehova ese ena lauma helaga amo kudou-maoro taudia be hereva momokani dekenai ia “veria mai” noho.​—⁠Ioa. 6:⁠44.

“Gaukara be Idauidau”

12-14. Lauma helaga ese ta ia hakaua bona ta ia horoa ena idau mani oi gwauraia.

¹² Iehova ese horoa Keristani taudia ginigunadia ia hanamoa sivaraina ita duahia neganai, goada ita abia, ani? Unai nega ai Keristani  taudia be “harihari gaudia” idia abia. Paulo ese Korinto kongrigeisen ia tore henia neganai, ia gwau: “Vadaeni harihari gaudia be idauidau, to lauma helaga be tamona sibona. Bona hesiai gaukara be idauidau, to Lohiabada be tamona sibona. Bona gaukara be idauidau, to inai Dirava tamona be dala idauidau ai taunimanima ibounai lalonai ia gaukara.” (1 Kor. 12:​4-6, 11) Paulo ia gwau lauma helaga ese dala idauidau ai Dirava ena hesiai taudia ta ta ia durua, gaukara idauidau idia karaia totona. “Seri maragi” bona “mamoe ma haida” be lauma helaga ese ia hakaudia. (Luka 12:32; Ioa. 10:16) To, lauma helaga be dala tamona sibona ai kongrigeisen taudia ta ta ia durua lasi.

¹³ Hegeregere, lauma helaga ese elda taudia ia abia hidi. (Kara 20:28) To, horoa Keristani taudia ibounai be kongrigeisen lalonai elda gaukara idia karaia lasi. Unai ese ia hahedinaraia, lauma helaga be dala idauidau ai kongrigeisen taudia ta ta latanai ia gaukara.

¹⁴ Dirava ese iena lauma helaga ia gaukaralaia gaukara idauidau ia karaia totona. Lauma helaga ese horoa taudia ia hadibaia idia be Dirava ena natudia ai idia lao. Bona Iehova ese lauma helaga ia gaukaralaia Iesu ia hatorea isi lou bona guba dekenai ia daekau. (Roma 8:​11, 15 duahia.) Danu, lauma helaga ia gaukaralaia guba bona tanobada ia karaia totona. (Gen. 1:​1-3) Ma danu, lauma helaga ese Besalele dekenai diba ia henia palai dubu ena kohu ia karaia totona. Bona Samson dekenai goada ia henia, bona Petero ia durua ranu latanai ia raka totona. Unai sivarai idauidau ese idia hahedinaraia, lauma helaga ese ta ia hakaua karana be idau, bona ta ia horoa karana be idau. Dirava ese ia abia hidi taudia sibona be lauma helaga amo ia horoa.

15. Dirava ese lauma helaga amo taunimanima ia horoa gaukarana be do ia karaia hanaihanai, a?

¹⁵ Lagani tausen momo lalonai, Dirava ese lauma helaga amo ena hesiai taudia be dala idauidau ai ia durudia. To, Pentekoste 33 C.E. ai, taunimanima be lauma helaga amo ia horoa matamaia. Unai horoa gaukarana be do ia doko, to lauma helaga ese Dirava ena taunimanima do ia hakaudia bona durudia ela bona hanaihanai.

16. Hari lauma helaga ena heduru amo Iehova ena hesiai taudia be dahaka gaukara idia karaia?

¹⁶ Hari inai negai, lauma helaga ena heduru amo Iehova ena hesiai taudia be dahaka gaukara idia karaia noho? Apokalupo 22:17 ia gwau: “Lauma helaga bona headava matamata hahine idia hereva noho, idia gwau: ‘Mai!’ Bona namona be inai hereva idia kamonai taudia idia gwau: ‘Mai!’ Bona namona be idia ranu mase taudia do idia mai, bona mauri ranuna idia ura taudia ibounai ese mauri ranu idia inua be namo, ia be davana lasi.” Hari, lauma helaga ena heduru amo Keristani taudia ese “mauri ranuna idia ura taudia ibounai” idia boiria, mauri ranuna idia inua totona. Horoa Keristani taudia ese unai gaukara idia gunalaia, bona mamoe ma haida ese idia durudia noho. Unai orea rua be lauma helaga ese ia hakaudia. Bona “Tamana, Natuna, bona lauma helaga ladanai” idia bapatiso karana amo Iehova dekenai edia gwauhamata idia hamomokania. (Mat. 28:19) Bona idia ibounai ese edia mauri lalonai lauma helaga ena huahua idia hahedinaraia. (Gal. 5:​22, 23) Danu, lauma helaga ena heduru amo, Dirava ese ia moalelaia mauri dala goevana idia badinaia.​—⁠2 Kor. 7:1; Apok. 7:​9, 14.

Lauma Helaga Totona Noinoi Noho

17. Edena dala ai oi hahedinaraia diba lauma helaga be oi latanai ia noho?

¹⁷ Unai dainai, herevana oiemu helaro be guba o tanobada ai do oi noho, to Iehova ese oi dekenai “taunimanima edia siahu ia hereaia” siahuna do ia henia ia oi badinaia noho totona. (2 Kor. 4:⁠7) Reana haroro gaukara dainai, taunimanima ese oi do idia hereva dika henia eiava kirikirilaia. To, bema mai gari lasi ida oi haroro noho, unai ese ia hahedinaraia  lauma helaga be oi latanai ia noho. Namona be oi laloatao, ‘bema Keriso ena ladana dainai oi idia gwauraia dika, oi moale, badina hairai laumana, Dirava ena lauma unai, be oi latanai ia noho.’​—⁠1 Pet. 4:⁠14.

18, 19. Edena dala ai Iehova be ena lauma helaga amo oi ia durua diba? Bona dahaka oi karaia noho be namo?

¹⁸ Dirava ese lauma helaga be idia noinoi taudia dekenai ia henia. Lauma helaga ese emu diba bona ura do ia habadaia, unai amo Dirava ena hesiai gaukara oi karaia noho diba. “Dirava ia karaia gaudia be ia moalelaia dalana hegeregerena, bona unai ia karaia dalana be ia ese emui ura ia hagoadaia, ia ura henia gaudia ibounai umui karaia totona.” Oi hekwarahi bona lauma helaga ena heduru amo ‘mauri ena hereva oi dogoatao goada’ neganai, unai ese oi do ia durua ‘mai gari bona mai heudeheude ida do oi noho, unai amo Dirava ese oi do ia hamauria.’​—⁠Fili. 2:​12, 13, 16.

¹⁹ Namona be lauma helaga oi abidadama henia, ena heduru oi noia, bona oi hekwarahi Iehova ena hesiai gaukara oi karaia namonamo totona. (Iam. 1:⁠5) Oi do ia durua ena Hereva oi lalopararalaia, mauri ena hekwakwanai oi haheaukalaia, bona sivarai namona oi harorolaia noho totona. Iesu ia gwauhamata: “Umui noinoi noho, bona umui dekenai do idia henia. Umui tahua noho, bona do umui davaria, bona iduara dekenai umui pidipidi noho, bena do idia kehoa.” (Luka 11:​9, 13) Anina be lauma helaga totona Dirava oi guriguri henia. Namona be hanaihanai Iehova ena heduru totona oi noinoi, unai amo lauma helaga ese oi do ia hakaua, idaunegai abidadama taudia ia hakaua bamona.

Anina Oi Gwauraia Diba, A?

• Edena dala ai Maria ita tohotohoa diba bona Dirava ese ita do ia hanamoa?

• Edena dala ai lauma helaga ese Paulo ia hakaua?

• Edena dala ai lauma helaga ese Dirava ena hesiai taudia ia hakaua noho?

[Study Questions]

[Picture on page 24]

Lauma helaga ena heduru amo Paulo ese meamea tauna ta ia gwau henia

[Picture on page 26]

Herevana eda helaro be guba o tanobada ai, to lauma helaga ese ita ibounai ia durua