“Lohiabada Dirava ese lau Isaia dekenai iena Lauma ia henia, bona ia ese lau ia siaia.”​—⁠ISA. 48:⁠16.

1, 2. Abidadama ita hahedinaraia totona dahaka be mai anina bada? Idaunegai abidadama taudia edia sivarai ese edena dala ai ita ia hagoadaia?

 ABELA ena nega amo ema bona hari abidadama taudia be momo. To, Baibel ia gwau: “Abidadama be taunimanima ibounai ese idia abia gauna lasi.” (2 Tes. 3:⁠2) Dahaka dainai ta ese abidadama ia hahedinaraia be namo, bona dahaka ese ia durua diba? Abidadama ita hahedinaraia totona Dirava ena Hereva amo diba ita abia be gau badana. Baibel ia gwau: “Taunimanima be hereva idia kamonai murinai, idia abidadama.” (Roma 10:17) Abidadama be lauma helaga ena huahua ta. Unai dainai, iseda abidadama ia goada totona lauma helaga ena heduru ita abia be namo.​—⁠Gal. 5:​22, 23.

² Ita be abidadama ida ita vara lasi. Idaunegai abidadama idia hahedinaraia tatau bona hahine be ita bamona. (Iam. 5:17) Idia be mai edia daradara gaudia, manoka gaudia bona nega haida idia laloa idia be hegeregere lasi. To, lauma helaga ese idia ia durua nega aukadia idia haheaukalaia totona. (Heb. 11:34) Lauma helaga ese idia ia durua dalana ita dibaia neganai, ita do ia hagoadaia Dirava ita hesiai henia noho totona. Unai be mai anina bada badina hari inai negai gau momo ese iseda abidadama idia hadikaia diba.

Lauma Helaga ese Mose Ia Hasiahua

3-5. (a) Edena bamona ita diba lauma helaga ese Mose ia durua? (b) Iehova ese Mose dekenai lauma helaga ia henia dalana amo dahaka ita dibaia?

³ Lagani 1513 B.C.E. ai idia noho taudia ibounai huanai Mose “sibona be manau herea.” (Num. 12:⁠3) Unai manau tauna dekenai Iehova ese gaukara badana ta ia henia. Ia ese Israela besena do ia naria. Lauma helaga ena heduru amo Mose be peroveta herevadia ia gwauraia, hahemaoro gaukara ia karaia, Taravatu ia torea, Israela taudia ia hakaua, bona hoa karadia ia karaia. (Isaia 63:​11-14 duahia.) To nega ta, Mose ia gwau Israela taudia ia gunalaia gaukarana be mai ena metau. (Num. 11:​14, 15) Unai dainai, Iehova ese ‘Mose dekenai ia henia vadaeni siahuna ena kahana be ia abia lou’ bona gunalaia taudia 70 dekenai ia henia bona Mose idia durua.​—⁠Num. 11:​16, 17.

⁴ Ena be Iehova ese tatau 70 dekenai lauma helaga ia henia, to Mose dekenai ia henia lauma helaga be hegeregere ena maduna ia huaia totona. Namo lasi ita gwau Iehova ese Mose dekenai lauma helaga sisina sibona ia henia eiava unai tatau 70 dekenai lauma helaga bada herea ia henia. Oibe, Dirava ese Mose bona tatau 70 dekenai ia henia lauma helaga be hegeregere edia maduna idia huaia totona. Unai ese ia hamomokania, herevana dahaka hekwakwanai ita davaria, to Iehova ese ena lauma helaga amo ita ia durua diba. Oibe, “Dirava ese lauma helaga be sisina sisina sibona ia henia lasi” to ibounai ia henia.​—⁠Ioa. 1:16; 3:⁠34.

⁵ Oi be hekwakwanai ta oi haheaukalaia noho, a? Oi mamia emu maduna be momo bona emu nega bada ia haorea, a? Ena be moni ena siahu ia maragi ia lao o reana oi gorere, to oi hekwarahi emu famili dekenai ruma namona bona aniani oi henia o famili  stadi oi karaia totona, a? Eiava kongrigeisen lalonai maduna metaudia oi huaia, a? Herevana dahaka oi lalohekwarahilaia, namona be oi diba Iehova ese lauma helaga amo oi ia durua diba.​—⁠Roma 15:⁠13.

Lauma Helaga ese Besalele Ia Durua

6-8. (a) Lauma helaga ese Besalele bona Oholiba ia durua dahaka idia karaia totona? (b) Edena bamona ita diba lauma helaga ese edia gaukara ia biagua? (c) Dahaka dainai Besalele be haheitalai namona?

⁶ Besalele be Mose ena negai ia noho tauna ta, bona ia danu be lauma helaga ese ia durua. Iena sivarai amo lauma helaga ese ita ia hakaua diba dalana do ita dibaia. (Esodo 35:​30-35 duahia.) Iehova ese Besalele ia abia hidi palai dubu ena kohu karaia gaukarana ia naria totona. Unai gaukara ia karaia diba, a? Reana, to ia be Aigupito dekenai biriki gaukara sibona ia karaia. (Eso. 1:​13, 14) Unai dainai, edena dala ai palai dubu ena gaukara do ia naria? Iehova “ese iena Lauma ena siahu be Besalele dekenai ia henia vadaeni, laloa goada bona aonega danu. Gaukara namodia, herahera karaia gaukara idauidau ena diba danu Lohiabada ese ia henia.” Iehova amo diba ia abia dainai, herahera gaudia idauidau ia karaia diba. Dirava ese Besalele bona Oholiba dekenai lauma helaga ia henia bona edia diba ia habadaia. Unai gaukara idia diba namonamo dainai, ma haida idia hadibaia diba.

⁷ Ita diba lauma helaga ese Besalele bona Oholiba edia gaukara ia biagua. Unai dainai, idia karaia kohu be namo herea bona Israela taudia ese lagani 500 lalonai idia gaukaralaidia. (2 Siv. 1:​2-6) Hari inai negai, taunimanima be gau ta idia karaia neganai, idia ura ma haida ese edia ladana idia abia isi. To, Besalele bona Oholiba be unai bamona lasi, idia ura hanamoa ibounai be Iehova dekenai idia henia.​—⁠Eso. 36:​1, 2.

⁸ Hari inai negai, namona be ta be mai ena diba inai bamona gaukara ia karaia totona: Konstraksen, printa gaukara, hebouhebou hegaegaelaia o dika idia vara gabudiai heduru henia gaukarana, doketa bona hospital taudia dekenai rara ita dadaraia ena badina ia herevalaia. To nega momo, unai gaukara be volantia taudia ese idia karaia, bona edia diba be bada lasi. Oibe, lauma helaga ese idia ia durua dainai, unai gaukara idia karaia namonamo diba. Reana oi laloa emu diba be bada lasi dainai, oi gari hesiai gaukara ta oi abia dae totona, a? Namona be oi laloatao, herevana dahaka maduna oi abia, Iehova ese emu diba do ia habadaia.

Lauma Helaga ese Iosua Ia Durua

9. Israela taudia be Aigupito idia rakatania murinai, dahaka ia vara? Bona edena henanadai ia vara?

⁹ Mose bona Besalele edia negai ia noho tauna ta danu be lauma helaga ese ia hakaua. Israela taudia ese Aigupito idia rakatania murinai, Amaleka taudia idia ura do idia tuari henidia. Unai be Israela taudia edia tuari ginigunana. (Eso. 13:17; 17:⁠8) To, daika ese tuari dekenai idia do ia gunalaia? Iehova ese Iosua ia abia hidi.

10. Dahaka dainai Iosua bona Israela taudia be tuari lalonai idia kwalimu?

¹⁰ Guna Iosua be igui hesiai tauna neganai, biriki sibona ia karaia bona tano gagaena ai mana ia gogoa. Ena be Iosua ena tubuna Elisama be Eparaima iduhu ena tuari taudia 108,100 ia gunalaia, to Iehova ese Elisama, o iena natuna Nunu ia abia hidi lasi. (Num. 2:​18, 24; 1 Siv. 7:​26, 27) To, Iehova ia gwau Iosua ese tuari oreana do ia gunalaia bona edia inai taudia do idia halusia. Dina ta ibounai lalonai idia tuari bona idia kwalimu, badina Iosua be Dirava ia kamonai henia bona lauma helaga ena hakaua dalana ia abia dae.​—⁠Eso. 17:​9-13.

11. Edena dala ai Iosua bamona eda hesiai gaukara ita karaia namonamo diba?

¹¹ Mose ia mase murinai, Iosua ese Israela taudia ia gunalaia. Ia be “aonega ena lauma  ese ia hahonua.” (Deu. 34:⁠9) Ena be Mose bamona peroveta gaukara o hoa karadia ia karaia lasi, to lauma helaga ena heduru dainai Israela taudia ia hakaua, tuari lalonai idia kwalimu bona Kanana tanona idia abia. Hari inai negai, Dirava ita hesiai henia noho lalonai, reana do ita laloa iseda diba be bada lasi maduna ta ita huaia totona. To, bema Dirava ita kamonai henia bona lauma helaga ena hakaua dalana ita abia dae, Iosua ia durua bamona ita do ia durua danu.​—⁠Ios. 1:​7-9.

‘Lohiabada Ena Lauma ese Gideona Ia Hasiahua’

12-14. (a) Israela taudia ese Midiana taudia idia halusia sivaraina amo dahaka ita dibaia? (b) Edena dala ai Iehova ese Gideona ena abidadama ia hagoadaia? (c) Hari Iehova be edena dala ai ita ia hagoadaia diba?

¹² Iosua ia mase murinai, Iehova ese ena lauma helaga amo abidadama taudia ma haida ia hagoadaia. Gunalaia Taudia bukana ese “idia manoka to ma idia goada” lou taudia momo ia herevalaia. (Heb. 11:34) Lauma helaga ese Gideona ia durua dainai, Israela taudia totona ia tuari. (Gun. 6:34) Midiana tuari taudia be momo herea, to Gideona ena tuari taudia be momo lasi. Israela tuari taudia ta ta ese Midiana tuari taudia foa do ia tuari henia. To, Iehova ia laloa Israela tuari taudia edia namba ia hamaragia be namo. Nega rua Gideona ia hamaoroa tuari taudia haida do ia siaia lou. Unai murinai, Israela tuari taudia ta ta ese Midiana tuari taudia 450 do ia tuari henidia. (Gun. 7:​2-8; 8:10) Iehova ia laloa unai namba be hegeregere. Unai amo ta do ia gwau lasi idia be sibona edia goada amo idia kwalimu.

¹³ Gideona bona ena tatau be tuari totona idia hegaegae. Mani oi laloa: Bema idia gari lasi bona idia gima tuari taudia huanai oi noho do oi gari, a? Eiava umui be momo lasi dainai do oi gari? Ita diba Gideona be Dirava ia abidadama henia dainai, ia hamaoroa gaudia ibounai ia karaia! (Gunalaia Taudia 7:​9-14 duahia.) Gideona ese Iehova ia noia toa ta amo do ia hamomokania idia do ia gimaia neganai, Iehova be ia badu lasi, to Gideona ena abidadama ia hagoadaia.​—⁠Gun. 6:​36-40.

¹⁴ Iehova ena siahu be bada bona nega aukadia ai ena taunimanima ia durua diba. Ia ese goada lasi taudia ia gaukaralaia diba, iena taunimanima be dika gaudia amo ia hamauridia totona. Reana ita mamia iseda inai taudia be momo herea bona iseda hekwakwanai ita hanaia diba lasi. Iehova be hoa karana ta do ia karaia lasi, Gideona dekenai ia karaia bamona. To, Baibel bona kongrigeisen ai ita kamonai herevadia amo ita ia hakaua bona hagoadaia diba. (Roma 8:​31, 32) Iehova ena gwauhamata idauidau ese iseda abidadama ia hagoadaia bona ia dekenai ita tabekau diba.

‘Lohiabada Ena Lauma ese Iepeta Ia Hasiahua’

15, 16. Dahaka dainai Iepeta ena natuna kekeni ia ura Iehova ia hesiai henia? Edena dala ai unai ese tama sina ia hagoadaia?

¹⁵ Lauma helaga ese ia hakaua tauna ma ta ena sivarai ia noho. Israela taudia be Amono taudia idia tuari henia neganai, lauma helaga be “Iepeta ena latanai ia mai.” Iepeta ia ura unai tuari lalonai do ia kwalimu bona Iehova ena ladana ia hanamoa, unai dainai gwauhamata ta ia karaia. Ia gwauhamata bema Iehova ese ia durua, tuari amo ia giroa lou neganai, iena ruma amo do ia raka-lasi tauna ginigunana be Iehova do ia henia. Ia kwalimu bona Iapeta be ruma dekenai ia giroa lou neganai, ena natuna kekeni ia raka-lasi guna ia hedavari henia totona. (Gun. 11:​29-31, 34) Iepeta ia hoa, a? Lasi, badina ia diba vadaeni iena natuna kekeni tamona be unai bamona do ia karaia. Ena gwauhamata ia hamomokania totona, ena natuna ia siaia Silo dekenai ia noho dubu helaga dekenai ia gaukara totona. Ia be Iehova ia badinaia kekenina dainai, ia  diba ena tamana ese ena gwauhamata do ia hagugurua. (Gunalaia Taudia 11:36 duahia.) Lauma helaga ese idia dekenai goada ia henia.

¹⁶ Dahaka dainai Iepeta ena natuna kekeni ia ura Iehova ia hesiai henia? Iena tamana be mai ena kudouna ibounai ida Iehova ia hesiai henia dainai, unai ese ena abidadama ia hagoadaia. Tama sina e, emui natudia be umui idia itaia noho. Umui abia hidi gaudia ese idia hahedinaraia umui herevalaia gaudia umui laloa bada, a? Natudia be emui guriguri idia kamonai, emui hahediba herevadia idia abia dae, bona emui kudouna ibounai ida Iehova umui hesiai henia karana idia itaia noho. Unai ese idia do ia durua mai edia lalonai ibounai ida, Iehova idia hesiai henia totona. Bona unai ese umui do ia hamoalea bada.

“Lohiabada Ena Lauma ese Samson Ia Hasiahua”

17. Lauma helaga ena heduru amo Samson be dahaka ia karaia?

¹⁷ Lauma helaga ese ia hakaua tauna ma ta be Samson. Baibel ia gwau “Lohiabada ena Lauma ese Samson ia hagoadaia hamatamaia” Israela taudia be Pilistia taudia amo ia hamauria totona. (Gun. 13:​24, 25) Dirava ese Samson dekenai goada bada ia henia. Pilistia taudia ese Israela taudia ma haida idia doria Samson idia dogoatao gwauraia neganai, “Lohiabada ena Lauma ese Samson ia hasiahua bada, bona iena imana idia guia varo be Samson ese ia makohia, dabua turia varo do ia makohia bamona.” (Gun. 15:14) Gabeai, Samson be abia hidi kererena ia karaia dainai, ena goada ia ore. Dokonai ena be ia be goada lasi, to iena “abidadama dainai” Dirava ese goada ia henia lou. (Heb. 11:​32-34; Gun. 16:​18-21, 28-30) Lauma helaga ese Samson ia durua dainai, Pilistia taudia momo herea ia hamasea. Ena be Iehova ese ita dekenai unai bamona goada do ia henia lasi, to Samson ena sivarai ese ita ia hagoadaia. Edena dala ai?

18, 19. (a) Edena dala ai Samson ena sivarai ese ita ia hagoadaia? (b) Inai stadi ai ita herevalaia taudia ese edena dala ai oi idia hagoadaia?

¹⁸ Samson bamona, ita danu be lauma helaga ena heduru dekenai ita tabekau.  Ita diba momokani ita do ia durua Iesu ese ita ia henia “haroro” gaukarana ita karaia totona. (Kara 10:42) Nega haida unai gaukara be ia auka. To, ita moale badina Iehova ese lauma helaga ia henia iena hesiai gaukara idauidau ita hagugurua totona! Peroveta tauna Isaia ena hereva ita abia dae, ia gwau: “Lohiabada Dirava ese lau Isaia dekenai iena Lauma ia henia, bona ia ese lau ia siaia.” (Isa. 48:16) Momokani, lauma helaga ese ita ia siaia danu! Oibe, Iehova ese Mose, Besalele, bona Iosua ia durua bamona, iseda diba do ia habadaia iena hesiai gaukara ita karaia noho totona. Ita ese “lauma helaga ena tuari kaia, Dirava ena hereva unai” ita gaukaralaia dainai, ita abia dae ita dekenai goada do ia henia, Gideona, Iepeta, bona Samson dekenai ia karaia bamona. (Efe. 6:​17, 18) Bema ita abia dae Iehova be ita do ia durua, Samson dekenai goada ia henia bamona, ita dekenai unai ia karaia diba.

¹⁹ Momokani, mai gari lasi ida Iehova idia hesiai henia taudia be do ia hanamodia. Bema lauma helaga ena hakaua dalana ita abia dae, iseda abidadama be do ia goada. Keristani Grik Toretoredia lalonai lauma helaga ese ia hakaua taudia haida edia sivarai idia noho danu. Pura vaira ena stadi ai, Iehova ese lauma helaga amo Keristani taudia ginigunadia bona hari inai negai idia noho Keristani taudia ia durua dalana do ita herevalaia.

Inai taudia edia sivarai ese edena dala ai oi idia hagoadaia:

• Mose?

• Besalele?

• Iosua?

• Gideona?

• Iepeta?

• Samson?

[Study Questions]

[Blurb on page 22]

Lauma helaga ese Samson ia hagoadaia bamona ita do ia hagoadaia

[Picture on page 21]

Tama sina e, emui haheitalai namona ese emui natudia ia durua diba