IEHOVA ena taunimanima edia histori be idau momokani. Iseda histori be buka dekenai ita duahia sibona lasi, to laulau, revareva, mauri sivaraidia, bona tomadiho bona haroro ai ita gaukaralaia kohudia amo ita dibaia. To, dahaka dainai kohu gunadia ita naria be mai anina bada? Idaunegai, Israela ruma bese kwaradia be edia natudia dekenai Iehova ena taravatu bona ia karaia hoa karadia idia hadibaia, unai amo idia ese ‘Dirava idia abidadama henia’ diba.​—⁠Sal. 78:1-7.

Iehova ena ura ia hagugurua dalana ita diba totona, guna idia vara gaudia edia rekodi ita tahua namonamo be mai anina bada. Hegeregere, Ierusalema ai inai taudia ese dubu haginia gaukarana idia ura koua neganai, king ena ofesa taudia ese Media basileia ena hanua badana Ekebatana dekenai pepa ta idia davaria. Unai pepa ese ia hahedinaraia King Sairasi be gwaumaoro ia henia dubu helaga idia haginia lou totona. (Esr. 6:1-4, 12) Unai amo, Dirava ena ura hegeregerena dubu idia haginia lou diba. Evanelia toretore tauna Luka danu be rekodi gunadia ia gaukaralaia, badina ia ese “matamana amo inai gaudia ibounai [ia] tahua namonamo.”​—⁠Luka 1:1-4.

 Hakaua Oreana be iseda histori idia laloa bada. Hakaua Oreana ena memba ta be kohu gunadia ita naria namonamo, edia sivarai ita torea, bona ma haida dekenai ita hadibaia karana ia herevalaia, ia gwau: “Bema iseda histori ita diba, ita do ia hagoadaia Iehova ita abidadama henia noho totona.” Unai dainai, Brooklyn, New York dekenai, Toretore Komiti henunai idia ese Writing Archives dipatmen matamatana idia haginia.

“OREA ENA ALBUM” BONA “AHUNA”

Lagani idia hanaia lalonai, reana ita momo ita lalohisihisi badina iseda famili ena histori ita diba lasi. Unai dainai, Writing Archives dipatmen be kohu gunadia gogoa, hanamoa, bona naria gaukarana idia karaia. Idia gogoa laulau be “orea ena album” dekenai idia atoa. Kohu haida hegeregere, buka bona magasin ginigunadia, haida edia mauri sivaraidia, bona kohu gunadia ma haida idia haboua danu. Unai kohu be iseda ahuna bamona, ita ibounai ia hagoadaia Iehova ita abidadama henia totona.

Oi ai noia inai kahana matamatana “Orea Ena Histori” oi duahia, bona eda sivarai do oi diba namonamo. Nega ta ta, stadi Gima Kohorona lalonai do ia hedinarai. Hegeregere, hua vaira ena Gima Kohorona ai, laulau momo do ai hahedinaraia bona inai henanadai edia haere do oi diba: Dawn Mobile be dahaka? Daidia ese idia gaukaralaia? Edena nega ai idia gaukaralaia, bona dahaka dainai?

Writing Archives dipatmen ese ia haboua gaudia amo guna Dirava idia hesiai henia tadikaka taihu edia sivarai ita diba. Hegeregere, edia abidadama bona gari lasi karana, hesiai gaukara lalonai idia davaria hekwakwanai bona hahenamo, bona Dirava ese ia hakaudia bona durua dalana edia sivarai idia noho. (Deu. 33:27) Ita diba Iehova ese iseda orea ena histori ita haboua bona torea gaukarana do ia hanamoa. Unai amo ita lalotamona, bona mai goada ida iena ura do ita hagugurua.

[Box/Picture on page 31]

Writing Archives Dipatmen Ena Gaukara

Magasin, DVD bona Baibel bukadia ma haida idia hegaegaelaia totona, toretore taudia, laulau penia taudia, bona tahua gaukara karaia taudia be Writing Archives dipatmen ese ia haboua gaudia idia gaukaralaia. Unai dainai, edia ura badana be iseda orea ena kohu gunadia idia gogoa bona idia naria namonamo. Brens opesi, Betele dipatmen idauidau, kongrigeisen, tadikaka taihu, bona orea ma haida amo Iehova ena Witnes taudia edia sivarai idia tahua bona haboua. Mani Writing Archives dipatmen edia gaukara ita herevalaia:

Kohu Gogoa Bona Stadilaia: Writing Archives dipatmen be kohu gunadia idia do gogoa noho. Famili haida be edia tubudia, vavadia o laladia ese lagani momo ai haroro ai idia gaukaralaia kohudia be Writing Archives dipatmen idia henia. Unai kohu gunadia ita stadilaia karana ese ita do ia durua iseda histori bona guna idia noho abidadama taudia ita diba namonamo totona.

Lista: Writing Archives dipatmen ese kohu tausen momo idia gogoa vadaeni, idia haida be lagani handred gunanai idia gaukaralaia gaudia. Edia toana be idauidau bona idia ta ta be lista dekenai idia torea, gabeai idia gaukaralaia totona.

Hanamoa Bona Naria: Idia dika buka bona kohu gunadia haida be idia hanamoa lou bona kompiuta dekenai idia atodia. Hegeregere, pepa haida, laulau, niuspepa, muvini piksa haida bona idia rekodia tok. Unai kohu be imana amo idia dogoatao lasi, badina idia dika garina. Unai gaudia idia ura gaukaralaia taudia be kompiuta amo idia itaia diba.

Haboua Bona Gaukaralaia: Idia haboua gaudia ibounai be idia makaia bona edia gabu korikori ai idia atoa, unai amo do idia boio lasi o diari o paripari ese do ia hadikaia lasi. Unai gaudia ibounai edia rekodi be kompiuta dekenai idia haboua, bona tahua gaukara idia ura karaia taudia ese unai kohu idia ura gaukaralaia neganai, unai rekodi idia sekea diba.

[Pictures on page 32]

1. “Photo-Drama of Creation” ena pousta. 2. Sabskripsen rekodi. 3. Saun motuka. 4. April 15, 1912, Watch Tower. 5. J. F. Rutherford ena dibura pepana. 6. WBBR maikrofon. 7. Rekodi masini. 8. Buka udaia keis. 9. Ta ena nouti. 10. J. F. Rutherford ese ia abia telegram.