Dagedage negadiai, ita gari lasi be mai anina bada. Keristani taudia momokanidia ese unai kara idia hahedinaraia. “Bearing Thorough Witness” About God’s Kingdom bona Jehovah’s Witnesses​—⁠Proclaimers of God’s Kingdom bukana ese unai idia hahedinaraia. Aposetolo taudia bamona, namona be lauma helaga totona ita guriguri, unai amo mai gari lasi ida do ita haroro.​—⁠Kara 4:23-31.

Tadikaka ta be Tanobada Tuarina Ginigunana ai idia karaia haroro gaukara ia herevalaia, ia gwau: “Dirava ena hesiai taudia be idia gaukara goada Studies in the Scriptures ena volium namba seven, ladana The Finished Mystery idia hariharilaia totona. Bona buka momo herea idia hariharilaia. Lagani 1918 ai, Basileia Sivarai Namba 1 idia halasia. Gabeai, Basileia Sivarai Namba 2 idia halasia; unai pepa ese gavamani ia ura The Finished Mystery bukana hariharilaia karana ia koua ena badina ia herevalaia. Unai murinai, Basileia Sivarai Namba 3 idia halasia. Abidadama horoa taudia be mai gari lasi ida Basileia Sivarai pepa hariharilaia gaukarana idia karaia.”

Guna pablisa matamatadia dekenai haroro daladia idia hadibaia lasi, hari idia karaia bamona. United States ai ia noho Poland tadikaka ta be lagani 1922 ai ia vara gauna ia herevalaia. Ia gwau: “Ena be buka o magasin hariharilaia dalana bona nao gado lau diba lasi, to doketa ta ena iduara dekenai lau pidipidi bona nesi ta ese iduara ia kehoa. Lau gari dainai egu baege lau kehoa noho lalonai, buka ibounai idia moru. Lau gwauraia herevana lau laloatao diba lasi, to lau diba nesi ese magasin ta ia abia. Unai gabu lau rakatania murinai, lau mamia Iehova be lau ia hagoadaia bona hanamoa. Unai dina ai buklet momo lau hariharilaia.”

Taihu ta ia gwau: “Lagani 1933 bamona ai, tadikaka momo be saun motuka idia gaukaralaia haroro totona.” Nega ta ia, tadikaka ta bona ena adavana be California, U.S.A., ena ororo gabudiai idia haroro. Ia gwau: “Tadikaka be saun motuka amo ororo dekenai ia daekau, bona ai be taoni dekenai ai noho. Tadikaka ese rekodi ia gadaralaia neganai, ena regena be hegeregere gado ta be guba amo ia hereva. Taoni taudia ese tadikaka idia tahua, to idia davaria diba lasi. Rekodi ia ore neganai, taunimanima ai haroro henia matamaia. Lau be saun motuka rua idia taria tadikaka ida lau gaukara. Herevana momo idia ura lasi kamonai, to edia ruma amo rekodi idia kamonai diba. Ai diba Iehova be unai dala ia gaukaralaia taunimanima ese ena hereva idia dibaia totona. Unai haroro dalana ai gaukaralaia totona ai gari lasi be mai anina bada, to nega momo taunimanima  idia kamonai bona unai ese Iehova ena ladana ia hanamoa.”

Lagani 1930 bona 1940 ena matamana kahanai, rekodi masini bona idia rekodia Baibel tok be haroro gaukara lalonai idia gaukaralaia. Keristani hahine ta ia gwau: “Taihu matamata ta be ruma-ta-ruma-ta gaukara ai rekodi masini ia gaukaralaia. Ruma ta dekenai rekodi ia gaukaralaia murinai, ruma biaguna be ia badu dikadika bona varenda amo rekodi masini ia kikia diho. To rekodi ta ia makohi lasi. Tatau toi be edia motuka lalonai edia dina tubua aniani idia abia noho lalonai unai idia itaia, bona taihu idia boiria idia dekenai unai rekodi do ia gadaralaia. Unai murinai, magasin haida idia abia. Idia kamonai namonamo dainai taihu ia moale bona ia badu tauna ia laloaboio.” Momokani, unai idia haheaukalaia totona, idia gari lasi be namo.

Taihu ma ia gwau: “Lagani 1940 ai, dala dekenai magasin hariharilaia gaukarana ai matamaia. Guna ai be laini dekenai ai raka bona saini ai huaia loaloa. Unai saini ia gwau, ‘Tomadiho be Idoa Bona Kara Koikoi Gauna’ bona ‘Dirava Bona King Keriso Hesiai Henia.’ Danu, davana lasi pepapepa ai hariharilaia. Ta be unai bamona haroro dalana ia badinaia totona ia gari lasi be namo, badina unai dala amo momo be Iehova ena ladana bona ena taunimanima idia diba.”

Taihu ma ta ia gwau: “Taoni maragidia ai magasin gaukara ai karaia be auka. Unai nega ai Witnes taudia be dagedage bada idia davaria. . . . To, mai gari lasi ida magasin ai dogoatao bona kona ta dekenai ai gini, bona tadikaka idia ura ai gwauraia herevadia ai boiboilaia. Saturday ibounai unai bamona ai karaia. Nega haida taunimanima be ai idia matauraia. To nega haida badu taudia be ai idia hagegea neganai, metairametaira ai raka siri.”

Ena be Tanobada Tuarina Iharuana ai Iehova ena Witnes taudia be dagedage idia davaria, to mai gari lasi ida idia haroro. Dina 43 lalonai​—⁠December 1, 1940 ia lao January 12, 1941​—⁠United States ai pablisa 50,000 bamona be kahirakahira buklet eit milioni idia hariharilaia. Unai nega idia gwauraia, “Gari Lasi” Bona Haroro Negana.

Dirava ena orea lalonai idia noho buruka tadikaka taihu momo be mai gari lasi ida idia haroro, bona idia haheaukalaia hahetoho idia lalodiatao. Idia be inai hereva, Namona be haroro gaukara ita goadalaia noho ela bona dokona, idia laloaboio lasi! Inai tanobada dikana ia do ore lasi neganai, ita diba lasi edena haroro dalana do ita gaukaralaia. To, Dirava ena heduru amo mai abidadama bona gari lasi ida do ita haroro noho.

[Blurb on page 9]

Basileia harorolaia totona, ita gari lasi be gau badana