Ful-taim haroro gaukara ia karaia taihu Charlotte White be Louisville, Kentucky, U.S.A. dekenai ia ginidae neganai, ia be sutkeisi ta mai ena wili ia veria, bona momo ese ia idia raraia.

UNAI be lagani 1908 ai, bona unai gau matamatana ena ladana be Dawn-Mobile. Taihu White ia gwau: “Taunimanima momo be unai gauna idia herevalaia bona lau idia raraia.”

Bible Student taudia a idia ura edia Baibel stadi karana amo idia dibaia gaudia be ma haida dekenai idia harorolaia. Idia momo be buka ladana Millennial Dawn (gabeai idia gwauraia Studies in the Scriptures) amo Baibel ena hereva idia dibaia. Unai buka idia hariharilaia totona taoni, hanua bona uda gabudia ai kamonai taudia idia tahua.

Lagani 1908 ai, Taihu White bona Basileia harorolaia goadagoada taudia ma haida be Dawn bukana ena volium ibounai 6 idia hariharilaia, bona edia davana be US$1.65. Dawn bukadia be maoromaoro ruma tauna idia henia lasi, to edia oda idia abia bona pei dinana ai buka idia abidia lao. Dagedage tauna ta ia maumau badina unai buka idia abia taudia be moni sisina sibona idia henia!

Pura ta lalonai taihu Malinda Keefer be buka 200 o 300 edia oda ia abia. To, unai buka ibounai huaia totona be mai ena hekwarahi. Badina volium namba 6 ena rau ibounai be 740! The Watch Tower ia gwau: “Buka 50 edia metau be  kilogram 18” bona taihu dekenai unai be “metau bada herea.”

Unai dainai Tadikaka James Cole be lokua diba auri gauna ta mai ena wili rua ia karaia, bona sutkeisi be unai auri gauna latanai ia atoa kau. Tadikaka Cole be buka amo idia hahonua maua metaudia ia huaia lou lasi dainai, ia gwau: “Hari egu pagana idia hisihisi lasi.” Lagani 1908 Cincinnati, Ohio ena hebouhebou badana ai Tadikaka Cole ese unai gau matamatana be hebou taudia dekenai ia hahedinaraia. Sutkeisi ena auri kahana kahana dekenai inai ladana Dawn-Mobile idia torea, badina Dawn bukadia be unai sutkeisi lalonai idia udaia. Ibounai ese unai sutkeisi gaukaralaia dalana idia manadalaia haraga, bona imana tamona amo idia veria loaloa. Pablisa ta be ena lata hegeregerena sutkeisi ena auri ia hadaea o hadihoa diba. Haroro murinai, ruma dekenai idia giroa totona, wili be sutkeisi ena saidi dekenai idia lokua daekau bona idia huaia.

Dawn-Mobile tamona ena davana be US$2.50. To, ful-taim hesiai gaukara idia karaia taihu be ta idia abia diba davana lasi. Laulau ai ia hedinarai Taihu Keefer, be unai sutkeisi gaukaralaia dalana ia manadalaia dainai ena imana ta be unai ia veria bona imana ma ta be ena baege ia dogoatao. Pennsylvania, U.S.A., ena maini taoni ta ai kamonai taudia momo ia davaria, unai dainai pei dinadia ai nega toi o hani nese amo ia hanaia lao edia buka ia henidia totona.

Lagani 1987 ai, pailot ta ese sutkeisi mai edia wili ia karaia bona hari peleini gabudiai o siti badadia dekenai taunimanima momo ese idia gaukaralaidia. To, lagani 100 gunanai Bible Student taudia be edia sutkeisi mai edia wili idia gaukaralaia neganai, taunimanima momo ese idia raraia. To idia moale badina unai dala amo idia ese hereva momokani ena uhe idia hadoa loaloa.

[Footnote]

[Blurb on page 32]

Dina ta lalonai Taihu Keefer be nega toi o hani ia lao buka ia hariharilaia totona

[Blurb on page 32]

Ai ia durua Dawn bukadia momo ai hariharilaia