Reana do oi gari, dagi bada tauna ta ena kerere oi gwauraia hedinarai bona oi hamaoroa iena kara ia haidaua totona. To, bema oi diba king ta be ena kerere ia hunia totona tau ta ia hamasea, be edena bamona? Do oi gari ia oi hereva henia totona, a?

King Davida be Bataseba ida ia heudahanai, bona Bataseba ia rogorogo. Edia kerere ia hunia totona, Davida ese Bataseba ena adavana ia hamasea bena Bataseba ia adavaia. Davida be hua momo lalonai ena kerere ia hunia bona king gaukara ia karaia. To, Iehova ese ena kara dika ia laloaboio lasi. Unai dainai, peroveta tauna Natana ia siaia Davida ia durua totona.

Bema oi be Natana bona Iehova ese oi dekenai unai gaukara aukana ia henia, do oi karaia, a? Natana be Iehova bona ena oda herevadia ia badinaia dainai, ia lao Davida ia hereva henia totona. To, edena dala ai Davida do ia durua ia helalo-kerehai totona?

MAI HEMATAURAI IDA IA DURUA

Miniti haida lalonai mani 2 Samuela 12:1-25 oi duahia. Oi be Natana bona Davida dekenai inai sivarai oi gwauraia: “Hanua ta lalonai tau rua idia noho, ta be kohu momo tauna, ma ta be ogogami tauna. Kohu momo tauna ena mamoe bona nani be momo herea. To ogogami tauna ena kohu be tamona sibona, mamoe natuna hahine ta, ia hoia gauna. Ogogami tauna ese mamoe ia ubua, iena natuna ia ubua bamona, sibona ena aniani dekenai ia ubua, bona sibona ena kapusi dekena amo mamoe ese ia inua, bona unai tau ena mamuna dekenai mamoe be ia hekure, iena natuna  kekeni bamona. Nega ta vadivadi tauna ese kohu momo tauna ena ruma dekenai ia ginidae. Kohu momo tauna ia ura lasi iena mamoe ta ia alaia, unai dainai, ogogami tauna ena mamoe natuna ia abia, ia nadua, iena vadivadi tauna dekenai ia henia.”​—⁠2 Sam. 12:1-4.

Davida be unai sivarai ia kamonai neganai, ia badu dikadika bona ia gwau: “Mauri Lohiabada dekenai lau gwauhamata, unai bamona ia karaia tauna harihari do ia mase be namo.” Bena Natana gwau: “Unai kohu momo tauna be oi!” (2 Sam. 12:5-7) Guna Davida be mamoe ia naria dainai, Natana ena sivarai ia hamomokania. Baibel herevalaia tauna ta ia gwau: “Reana Davida be Natana ena sivarai ia hamomokania, badina ma haida ese idia hahisia taudia edia sivarai be nega momo Davida dekenai ia gwauraia.” Herevana unai sivarai be momokani o lasi, to Natana be Dirava ia badinaia bona mai gari lasi ida Davida ia hereva henia.

Reana ita henanadai, ‘Dahaka dainai Natana ese unai sivarai ia gaukaralaia Davida ena kerere ia hahedinaraia totona?’ Ta be ma ta ura henia karana ia biagua lasi neganai, ia laloa namonamo lasi bona kerere badana ta ia karaia diba. Vaia, kerere ita karaia neganai, reana ekskius idauidau ita gwauraia eda kerere hunia totona. Natana ena sivarai dainai, Davida ese kohu momo tauna ena kara ia gwauraia dika, to ia laloparara lasi unai kohu momo tauna be ia. Natana ena sivarai amo Davida ia laloparara Bataseba ida ia heudahanai be kerere badana, bona ia be Iehova ia “negea” bamona. Unai dainai ia helalo-kerehai bona matahakani ia abia dae.​—⁠2 Sam. 12:9-14; Salamo 51 ena hereva kwarana.

Natana ena kara amo dahaka ita dibaia? Baibel ia hadibaia tauna ena tahua gauna be, ena stiuden do ia durua unai amo ia sibona do ia laloa namonamo bona dala maorona ia abia hidi. Natana be mai hemataurai ida Davida ia hereva henia. Ia diba Davida be kara maoromaoro bona kota maoromaoro ia ura henia tauna. Unai dainai, Davida do ia durua sivaraina ta ia gwauraia. Ita danu, namona be taunimanima ita durua Iehova ena lalohadai idia lalopararalaia totona. Edena bamona unai ita karaia diba? Taunimanima idia diba dahaka be maoro bona dahaka be kerere. Unai dainai ita ura lasi ita hamaoroa dahaka do idia karaia, to ita durudia idia sibona ese dala maorona idia abia hidi totona. Eiava namo lasi eda kara ta amo ita hahedinaraia idia be gau ta idia diba lasi, o idia ita hereaia. Baibel amo ita diba dahaka be maoro bona dahaka be kerere.

Natana be Dirava ia abidadama henia dainai, King Davida ia sisiba henia diba. (2 Sam. 12:1) Unai hegeregerena, bema Dirava ita abidadama henia, ita do ia durua iena kara maoromaoro taravatudia ita badinaia totona.

TOMADIHO MOMOKANI IA BADINAIA

Toana be Natana bona Davida be tura namodia. Gabeai Davida ese ena natuna ta ena ladana ia hatoa Natana. (1 Siv. 3:1, 5) Nega ginigunana Baibel ese Natana ia herevalaia neganai, ia be Davida ida ia herevahereva. Idia ruaosi be Iehova idia lalokau henia. Ita diba Davida be Natana ena lalohadai ia laloa bada, badina Iehova ena dubu helaga do ia haginia lalohadaina be Natana ia hamaoroa. Ia gwau: “‘Lau be sida ruma lalonai lau noho, to Dirava ena Taravatu Maua be Palai Ruma lalonai ia noho.’ Natana ese king dekenai ia haere, ia gwau, ‘Oi lao, oiemu ura do oi karaia, badina be Lohiabada be oi danu ia noho.’”​—⁠2 Sam. 7:2, 3.

Natana be Iehova ia tomadiho henia dainai, ia noho hegaegae Davida do ia durua dubu helaga ginigunana ia haginia totona. To unai nega ai, Natana be sibona ena lalohadai ia gwauraia. Hanuaboi ai, Dirava ese Natana ia hamaoroa king dekenai inai do ia gwauraia: Davida be Iehova ena dubu helaga do ia haginia lasi, to ena natuna ta ese do ia haginia. To, Dirava be Davida ida kontraka ta do ia karaia, unai amo king dagina be iena bese lalonai do ia “noho hanaihanai.”​—⁠2 Sam. 7:4-16.

Natana ia laloa Davida ese dubu helaga do ia haginia, to unai be Dirava ena ura hegeregerena lasi. To, Natana be ia manau bona ia maumau  lasi. Iehova ena hereva ia abia dae bona ia badinaia. Bema Dirava ese eda kara ta ia hamaoromaoroa, namona be Natana ena haheitalai ita tohotohoa. Dirava ese Natana ia lalonamo henia, badina gabeai Iehova ese ia abia hidi peroveta gaukara ia karaia totona. Toana be Iehova be lauma helaga amo Natana bona Gadi ia hasiahua dainai, Davida idia hamaoroa miusiki gadara taudia 4,000 do ia abia hidi dubu helaga lalonai idia gaukara totona.​—⁠1 Siv. 23:1-5; 2 Siv. 29:25.

SOLOMONA IA DURUA

Natana ia diba Davida ena king dagina be ena natuna Solomona ese do ia abia. Davida ia buruka neganai, Adonaisa ia ura sibona king ai ia halaoa, to Natana be gau haida ia karaia unai ia koua totona. Matamanai, ia ese Bataseba ia hamaoroa, namona be Davida do ia hadibaia ena gwauhamata hegeregerena Solomona be king ai do ia halaoa. Unai murinai, Davida dekenai ia lao bona ia nanadaia bema Adonaisa be king ai ia halaoa vadaeni o lasi. Davida ia laloparara gau ta ia karaia be namo, unai dainai Natana bona ena hesiai taudia ia hamaorodia Solomona do idia horoa bona king ai do idia halaoa. Natana ena hemataurai bona aonega karana dainai, Adonaisa ena palani ia kwalimu lasi.​—⁠1 Kin. 1:5-53.

MANAU TAUNA

Taunimanima momo idia gwau Natana bona Gadi ese 1 Samuela karoa 25 ia lao 31 bona 2 Samuela ibounai idia torea. Sivarai Ginigunana 29:29 ia gwau: “King Davida ena kara edia sivarai ibounai, edia matamana dekena amo ela bona edia dokona, be peroveta taudia toiosi, Samuela, Natana, bona Gadi edia Sivarai Bukadia edia lalonai idia torea vadaeni.” Danu, Baibel ia gwau Natana ese “Solomona ena kara” ia sivarailaia danu. (2 Siv. 9:29) Anina be Davida ia mase murinai, Natana be king ena ruma dekenai ia gaukara.

Natana ena sivarai be momo lasi, to ia torea sivaraidia bona toretore ma haida amo ita diba ia be edena bamona tauna. Unai sivarai amo ita diba ia be manau tauna. Baibel diksenari ta ia gwau Baibel lalonai ena ruma bese edia sivarai ia noho lasi. Unai dainai iena histori ita diba lasi.

IEHOVA IA BADINAIA

Baibel ese Natana ia herevalaia dalana amo ita diba ia be manau tauna bona Dirava ena hereva ia badinaia goadagoada. Iehova Dirava ese ia dekenai maduna badana ia henia. Natana be Dirava ia badinaia bona ena taravatu ia laloa bada. Unai dainai namona be ita hekwarahi ena kara ita tohotohoa totona.

Reana heudahanai king ta do oi sisiba henia lasi o king ai ia ura sibona ia halaoa tauna oi koua diba lasi. To, Dirava ese oi ia durua diba, ia oi badinaia noho bona kara maoromaoro oi badinaia totona. Danu, oi do ia durua mai gari lasi bona hemataurai ida tomadiho momokani oi badinaia totona.

[Picture on page 25]

Natana be mai hemataurai bona aonega ida Bataseba ia hereva henia