“Bema emu [adavana] oi durua Keristani tauna ai ia lao totona, oi ese ia oi hamauria unai.”​—⁠1 KOR. 7:16.

HAERE OI DAVARIA DIBA, A?

Tomadiho ai ia parara ruma bese lalonai maino ia noho totona, Keristani tauna be dahaka ia karaia diba?

Keristani tauna be edena dala ai ena ruma bese ia durua diba hereva momokani idia abia dae totona?

Dahaka ita karaia diba tomadiho ai ia parara ruma bese ita durua totona?

1. Ruma bese lalonai ta be hereva momokani ia abia dae neganai, dahaka ia vara?

 IESU be ena aposetolo taudia ia siaia gwauraia neganai, ia gwau: “Umui lao neganai umui haroro, umui gwau: ‘Guba Basileia be ia kahirakahira vadaeni.’” (Mat. 10:1, 7) Unai sivarai namona idia abia dae taudia be maino bona moale idia davaria. To, Iesu ese ena aposetolo taudia ia hadibaia, edia haroro gaukara ai momo ese do idia dagedage henidia. (Mat. 10:16-23) To, ruma bese lalonai dagedage ia vara neganai, unai ese lalohisihisi ia havaraia.​—⁠Mataio 10:34-36 duahia.

2. Ena be ruma bese be hereva momokani idia dadaraia, to edena dala ai ita moale diba?

² Iseda ruma bese taudia ese hereva momokani idia dadaraia dainai, ita moale diba lasi, a? Lasi ita moale diba. To, ruma bese ibounai be unai bamona lasi. Haida be idia dagedage to gabeai edia kara idia haidaua. Unai dainai ena be iseda ruma bese taudia idia dagedage o hereva momokani idia dadaraia, to ita haheauka be namo. Danu, hekwakwanai negadiai Iehova ese ia idia badinaia taudia ia durua. Keristani taudia idia moale diba bema (1) idia gaukara goada ruma bese lalonai maino ia noho totona, bona (2) mai lalona ibounai ida ruma bese taudia idia durua hereva momokani idia abia dae totona.

GAUKARA GOADA MAINO IA NOHO TOTONA

3. Dahaka dainai Keristani tauna ia gaukara goada ruma lalonai maino ia noho totona?

³ Bema ruma bese lalonai maino ia noho, haida be hereva momokani idia abia dae diba. (Iamesi 3:18 duahia.) Ena be ruma bese taudia be Iehova idia tomadiho henia lasi, to namona be Keristani tauna ia gaukara goada ruma lalonai maino ia noho totona. Edena dala ai unai ia karaia diba?

4. Dahaka ese moale bona maino ia havaraia diba?

 ⁴ Maino ita hahedinaraia noho totona, “Dirava ena maino, laloparara ibounai ia hereaia gauna” totona ita guriguri be namo. (Fili. 4:6, 7) Iehova dibaia bona Baibel ena hakaua herevadia badinaia karana ese moale bona maino ia havaraia. (Isa. 54:13) Danu, ita moale diba, bema hebou ai ita haere bona haroro gaukara ita goadalaia. Hegeregere, taihu ta ladana Ensa be ena adavana ese ia dagedage henia bada. a To, ena ruma gaukara ia haorea murinai, ia lao haroro. Ia gwau: “Ma haida dekenai sivarai namona lau harorolaia neganai, Iehova ese lau ia hanamoa bona momo idia ura kamonai.” Unai hahenamo idauidau ese Ensa ia hamoalea bona lalomaino ia henia.

5. Tadikaka taihu haida be dahaka hekwakwanai idia davaria? Edeseniai heduru idia abia diba?

⁵ Namona be ita hekwarahi ruma bese taudia ida maino ai ita noho totona. Nega haida unai be auka, badina reana idia ura ita karaia gauna be Baibel ena hakaua herevana ia utua. Danu, Baibel ena hereva ita badinaia neganai, reana do idia badu. To, kara maoromaoro ita badinaia noho be gau badana. Bema unai ita karaia, reana gabeai ruma bese lalonai maino do ia noho. Momokani, bema idia ura ita karaia gauna be Baibel ena hakaua herevadia ia utua lasi, ita durudia be namo, unai amo hepapahuahu do ia vara lasi. (Aonega Herevadia 16:7 duahia.) Hekwakwanai ta ia vara neganai, namona be igui hesiai tauna mai ena kamonai bona kara maoromaoro oreana ese ia halasia bukadia bona elda taudia amo heduru ita tahua.​—⁠Aon. 11:14.

6, 7. (a) Dahaka dainai haida idia ura lasi edia adavana be Baibel ia stadilaia? (b) Edena dala ai Baibel stiuden o Witnes tauna ese ena adavana ia kara henia be namo?

⁶ Bema Iehova ita abidadama henia bona eda ruma bese taudia edia hemami ita laloa bada, maino ia noho diba. (Aon. 16:20) Baibel stadi matamatadia be unai idia karaia diba danu. Bema tau o hahine ta be Baibel ia stadilaia, reana ena adavana ese do ia koua lasi, badina ia laloa unai ese edia ruma bese maurina ia hanamoa diba. To, haida be edia adavana ese idia dagedage henidia. Hegeregere, guna Esther ena adavana be Witnes taudia ida ia stadi neganai, Esther be ia badu dikadika. Ia gwau: “Iena stadi bukadia lau negea o lau gabudia.” To, hari Esther be Witnes hahinena ta. Ma ta be Howard, ena adavana be Baibel ia stadilaia neganai, ia badu. Ia gwau: “Tatau momo idia gari, badina idia laloa edia adavadia ese idia badinaia tomadiho be idia ia koia. Unai dainai, edia adavana idia dagedage henia bona edia stadi karana idia koua.”

⁷ Namona be ena adavana ese ia dagedage henia Baibel stiuden ita durua ena stadi do ia hadokoa lasi ena badina ia lalopararalaia totona. Bona ita hagoadaia mai manau bona hemataurai ida ena adavana ia kara henia totona, reana unai ese ena adavana ena kara do ia haidaua. (1 Pet. 3:15) Howard ia gwau: “Lau moale badina egu adavana be ia manau bona ia badu haraga lasi!” Ena adavana ia gwau: “Howard ia ura lasi Witnes taudia ida Baibel lau stadilaia, badina ia gwau idia be lau idia koia. Lau gwau reana ena hereva be maoro, to lau diba lasi edena dala ai Witnes taudia be lau idia koia. Unai dainai, lau hamaoroa egu stadi bukana ia duahia totona. Ia duahia herevadia ia moalelaia.” Namona  be ita laloatao, Keristani tauna be hebou o haroro gaukara ia lao neganai, ena adavana be reana do ia lalohisihisi badina sibona ia noho o reana do ia laloa edia headava do ia dika. To, bema Baibel stiuden o Witnes tau o hahine be ena hereva bona kara amo ia hahedinaraia ena adavana ia lalokau henia, unai ese ena adavana do ia durua ia lalohekwarahi lasi totona.

DURUDIA HEREVA MOMOKANI IDIA ABIA DAE TOTONA

8. Aposetolo Paulo be Keristani taudia dekenai dahaka sisiba ia henia?

⁸ Ena be Keristani taudia edia adavana be Witnes lasi, to aposetolo Paulo ia gwau edia headava idia hadokoa lasi be namo. b (1 Korinto 7:12-16 duahia.) Bema Keristani tauna ia laloa reana gabeai ena adavana be hereva momokani do ia abia dae, ia moale diba. To, namona be hemataurai dalanai ena adavana ia durua hereva momokani ia lalopararalaia totona. Do ita herevalaia sivarai haida ese unai idia hahedinaraia.

9. Keristani tauna be ena Witnes lasi adavana ia haroro henia neganai, dahaka ia laloatao be namo?

⁹ Jason be hereva momokani ia diba neganai, ia moale bada. Ia gwau: “Lau ura lau dibaia gaudia be taunimanima lau hadibaia!” Baibel stiuden tauna be hereva momokani ia dibaia neganai, ia moale bada bona reana nega ibounai do ia herevalaia. Reana ia laloa ena bese taudia be maoromaoro hereva momokani do idia abia dae, to reana do idia ura lasi kamonai. Jason ena kara dekenai ena adavana be dahaka ia laloa? Ia gwau: “Jason be nega ibounai Baibel ia herevalaia dainai lau hesiku.” Tadikaka ta ena adavana be lagani 18 murinai hereva momokani ia abia dae. Hari ia be taihu ta, to ia gwau: “Lau stadi neganai, lau ura metairametaira Baibel lau dibaia.” Reana oi stadi henia tauna ena adavana ia ura lasi hereva momokani ia abia dae. To, namona be emu Baibel stiuden ida ena adavana do ia haroro henia dalana umui tohoa loulou. Peroveta tauna Mose ia gwau: “Lauegu hereva be medu bamona do ia diho. Lauegu hadibaia hereva, be hanuaboi ena paripari bamona do ia hedinarai, medu maragina rei matamata ena latanai bamona.” (Deu. 32:2) Hereva momokani ita herevalaia totona, namona be nega maorona ai hereva kwadogina sibona ita gwauraia.

10-12. (a) Aposetolo Petero be Keristani hahine dekenai dahaka sisiba ia henia? (b) Edena dala ai Selma ese 1 Petero 3:1, 2 ia badinaia?

¹⁰ Aposetolo Petero be tomadiho ai  idia parara ruma bese lalonai idia noho Keristani taihu dekenai inai sisiba ia henia: “Emui adavadia henunai do umui noho. Bona bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba, badina emui kara goeva bona hemataurai bada karana idia itaia.” (1 Pet. 3:1, 2) Ena be ena tau ese ia dagedage henia, to bema taihu be ia manau bona ena tau ia matauraia, reana hereva momokani do ia abia dae. Bona ena be Keristani tauna be ena tomadiho dainai ena hahine ese ia dagedage henia, to namona be Dirava ena sisiba ia badinaia bona mai lalokau ida ena ruma bese ia naria.​—⁠1 Pet. 3:7-9.

¹¹ Hari Keristani taudia momo be Petero ena sisiba idia badinaia dainai, hahenamo idia davaria. Hegeregere, Selma be Baibel ia stadilaia matamaia neganai, ena adavana Steve ia moale lasi. Steve ia gwau: “Egu adavana lau badu henia bona lau mama, badina lau laloa emai headava do ia dika.” Selma ia gwau: “Hereva momokani lau do dibaia lasi neganai, egu tau lau gari henia bona lau ura lasi egu kara o hereva amo ia lau habadua, badina ia be badu haraga tauna. To lau stadi neganai, ena dagedage karana ia habadaia.” Dahaka ese Selma ia durua?

¹² Selma be ena stadi hahinena ese ia hadibaia gauna ia laloatao. Ia gwau: “Dina ta, lau ura lasi lau stadi, badina hanuaboi ai Steve ida lau hepapahuahu bona lau ia botaia dainai lau lalohisihisi. Taihu lau hamaoroa murinai, lau ia noia 1 Korinto 13:4-7 lau duahia totona. Lau duahia bona lau laloa, ‘Steve be lau dekenai unai kara namodia ia karaia lasi.’ Taihu ese lau ia nanadaia, ‘Unai siri hegeregerena emu adavana dekenai unai kara namodia oi hahedinaraia, a?’ Lau gwau, ‘Lasi, badina ia be dagedage tauna.’ Taihu ia gwau, ‘Selma e, daika be Baibel ia stadilaia, oi o Steve?’” Selma ia diba ena kara ia haidaua be namo. Ia gwau: “Iehova lau noia lau do ia durua Steve lau lalokau henia bona matauraia totona. Metairametaira Steve ese ena kara ia haidaua.” Lagani 17 murinai, Steve be hereva momokani ia abia dae.

HAIDA IDIA HEDURU DIBA DALANA

13, 14. Tomadiho ai idia parara ruma besedia be edena bamona ita durudia diba?

¹³ Medu ese tano ia haparia bona tubutubu gaudia ia hatubua hegeregerena, kongrigeisen ai ita ta ta ese tomadiho ai idia parara ruma bese ita durudia diba. Brazil ai, taihu Elvina ia gwau: “Tadikaka taihu edia lalokau karana ese lau ia durua hereva momokani lalonai lau gini goada noho totona.”

 ¹⁴ Kongrigeisen ai tadikaka taihu edia kara namodia ese Witnes lasi tauna ena kara ia haidaua diba. Nigeria ai, taihu ta ena adavana be lagani 13 murinai hereva momokani ia abia dae. Tadikaka ia gwau: “Witnes tauna ta ena motuka ai lau guia bona dala ai motuka ia dika. Witnes tauna ese kahirakahira ia noho hanuana ai Witnes taudia ia tahua, bona hanuaboi ai edia ruma dekenai ai mahuta. Ai idia naria namo herea, toana be lagani momo ai diba heheni. Unai nega ai, egu adavana ese ia herevalaia Keristani lalokauna lau mamia.” England ai, tadikaka ta ena adavana be lagani 18 murinai hereva momokani ia abia dae. Taihu ia gwau: “Witnes taudia ese ai ruaosi idia boiria ai aniani hebou totona. Bona edia heabidae karana lau moalelaia.” c Gabeai Witnes tauna ai ia lao tauna ma ta ia gwau: “Tadikaka taihu ese ai idia vadivadi henia, bona edia ruma dekenai ai idia boiria. Lau itaia idia be taunimanima idia laloa bada, badina hospital ai lau noho neganai, Witnes taudia momo ese lau idia vadivadi henia.” Tomadiho ai idia parara ruma besedia be unai bamona oi durua diba, a?

15, 16. Ena be ruma bese lalonai ta sibona be Witnes tauna, to edena dala ai ia moale noho diba?

¹⁵ Momokani, ena be lagani momo lalonai eda ruma bese taudia dekenai kara namodia ita hahedinaraia bona hemataurai dalanai ita haroro henidia, to ibounai ese hereva momokani do idia abia dae lasi, bona ma haida be do idia dagedage noho. (Mat. 10:35-37) To, Keristani kara namodia ita hahedinaraia neganai, anina namona ia havaraia diba. Taihu ta ena adavana, gabeai Witnes tauna ai ia lao, ia gwau: “Keristani kara namodia ita hahedinaraia noho neganai, reana gabeai Witnes lasi tau o hahine ese ena kara ia haidaua diba. Unai dainai oi hesiku haraga lasi.”

¹⁶ Edia ruma bese ese hereva momokani idia abia dae lasi taudia be idia moale diba. Taihu ta be lagani 21 lalonai ena adavana ia haroro henia, to hereva momokani ia abia dae lasi. Taihu ia gwau: “Iehova lau badinaia bona ia ida egu hetura karana ia goada dainai lau moale. Danu, sibona egu stadi, hebou lao henia karana, haroro, bona kongrigeisen ai ma haida durua karana ese lau ia hagoadaia, Iehova kahirakahira lau noho bona ia lau abidadama henia totona.”​—⁠Aon. 4:23.

HESIKU HARAGA LASI!

17, 18. Bema ruma bese lalonai oi sibona be Witnes tauna, dahaka dainai oi hesiku haraga lasi be namo?

¹⁷ Bema oi be Keristani tauna ta bona emu ruma bese taudia be hereva momokani idia dadaraia, oi hesiku haraga lasi. Laloatao, Iehova ese ena taunimanima do ia rakatania lasi. (1 Sam. 12:22) Bema ia oi badinaia noho, ia be oi kahirakahira do ia noho. (2 Sivarai 15:2 duahia.) Unai dainai Iehova oi dibaia noho, bona ‘ia oi abidadama’ henia noho. (Sal. 37:4, 5) ‘Guriguri oi hadokoa lasi,’ bona oi abia dae momokani iseda lalokau guba Tamana ese oi do ia durua, hekwakwanai idauidau oi haheaukalaia totona.​—⁠Roma 12:12.

¹⁸ Iehova oi noia ena lauma helaga amo oi do ia durua emu ruma bese lalonai maino ia noho totona. (Heb. 12:14) Bema unai oi karaia, emu ruma bese taudia be reana gabeai edia kara idia haidaua diba. Bema ‘gau ibounai oi karaia Dirava oi hanamoa totona,’ do oi moale bona emu lalona ai maino do ia noho. (1 Kor. 10:31) Danu, namona be oi laloatao emu tadikaka taihu be oi idia lalokau henia bona oi do idia durua.

[Footnotes]

[Study Questions]

[Picture on page 28]

Nega maorona ai Baibel oi herevalaia

[Picture on page 29]

Witnes lasi adavadia ita laloa bada