Ita Roho Mauri Totona Iehova be Ita Ia Gimaia

“Umui be Dirava ese ena siahu amo ia gimaia, badina umui be mai emui abidadama. Oibe, Dirava ese umui ia gimaia noho hahemauri umui abia totona, unai hahemauri be nega dokona ai do ia hedinarai.”​—⁠1 PET. 1:4, 5.

EMU HAERE BE DAHAKA?

Edena dala ai Iehova ese tomadiho momokani dekenai ita ia veria mai?

Edena dala ai Iehova ena hakaua dalana ita abia dae diba?

Edena dala ai Iehova ese ita ia hagoadaia?

1, 2. (a) Edena bamona ita diba momokani Iehova ese ita do ia durua? (b) Iehova be ita ta ta ia diba namonamo, a?

“IA HAHEAUKA ela bona dokona tauna be do ia mauri.” (Mat. 24:13) Iesu ena hereva amo ita diba Satani ena tanobada amo ita roho mauri totona, namona be Iehova ita abidadama henia ela bona dokona. To, namo lasi ita laloa sibona eda goada o aonega amo unai ita karaia diba. Baibel ia gwau: “Dirava be ena hereva ia badinaia, ia ese dala do ia kehoa lasi emui goada ia hereaia hedibagani umui davaria totona, to hedibagani idia vara neganai, ia ese dala do ia kehoa, unai hedibagani umui haheaukalaia totona.” (1 Kor. 10:13) Unai siri amo dahaka ita dibaia?

² Iehova be ita ta ta ia diba namonamo. Hegeregere eda hekwakwanai, eda kara, bona eda haheauka ena hetoana ia diba. Unai dainai, ita ia durua diba iseda goada ia hereaia hedibagani ita hanaia totona. To, Dirava be momokani ita ta ta ia diba, a? Oibe. Baibel ia gwau Iehova be dina ta ta ai ita karaia gaudia, iseda lalohadai bona hemami ia diba.​—⁠Salamo 139:1-6 duahia.

3, 4. (a) Iehova be edena dala ai ia hahedinaraia Davida ia laloa bada? (b) Edena bamona ita diba Iehova be ita ta ta ia laloa bada?

³ To, Siahu Ibounai Diravana be taunimanima ia laloa bada, a? Salamo torea tauna, Davida ia gwau: “Guba lau itaia, oi ese oiemu imana dekenai oi karaia. Hua bona hisiu danu be oi ese oi atoa. Taunimanima be dahaka, oi ese idia oi laloa noho?” (Sal. 8:3, 4) Reana, Davida be unai bamona ia laloa badina ena be ia be mamoe naria merona ta sibona, to Iehova “ese ia ura henia” bona ia abia hidi Israela taudia ia gunalaia totona. (1 Sam. 13:14; 2 Sam.  7:8) Davida ia hoa badina guba bona tanobada ia Havaraia Tauna be ena lalohadai ia diba!

⁴ Iehova be ita ta ta ia laloa bada danu. Hari, ia be “bese ibounai” amo taunimanima ia haboudia noho ena hesiai taudia ai idia lao totona. Ia dekenai idia be “kohu namodia” bamona. (Hag. 2:7) Danu, ia idia hesiai henia taudia ia durudia ia idia badinaia noho totona. Iehova be edena dala ai unai ia karaia? Unai henanadai ita do haerelaia lasi neganai, namona be Iehova ese tomadiho momokani dekenai taunimanima ia veria mai dalana ita herevalaia guna.

DIRAVA ESE ITA IA VERIA MAI

5. Dirava be edena dala ai iena Natuna dekenai taunimanima ia veria lao? Haheitalai gwauraia.

⁵ Iesu ia gwau: “Tau ta be lau dekenai do ia mai diba lasi, bema Tamana, lau ia siaia tauna ese ia veria mai lasi.” (Ioa. 6:44) Unai siri ese ia hahedinaraia Iesu ena hahediba tauna ai ita lao totona, Dirava ese ita ia durua be namo. Dirava ese ena Natuna dekenai ita ia veria lao diba. Edena dala ai unai ia karaia? Haroro gaukara bona lauma helaga amo unai ia karaia. Hegeregere Filipi ai, Paulo bona ena misinari turadia be hahine ta ladana Lidia idia davaria. Baibel ia gwau Lidia dekenai sivarai namona idia harorolaia neganai, “Iehova ese ena lalona ia kehoa bona Paulo ia gwauraia herevadia ia abia dae.” Dirava ese lauma helaga amo Lidia ia durua, ia kamonai herevadia ia lalopararalaia bona abia dae totona. Unai dainai, Lidia bona ena ruma bese idia bapatiso.​—⁠Kara 16:13-15.

6. Dirava be edena dala ai tomadiho momokani dekenai ita ia veria mai?

⁶ Lidia sibona dekenai unai ia vara, a? Lasi. Bema oi bapatiso vadaeni, oi danu be Dirava ese tomadiho momokani dekenai ia veria mai. Iseda guba Tamana ese Lidia ena kudouna ai gau namona ta ia itaia hegeregerena, oi dekenai gau namona ta ia itaia danu. Sivarai namona oi kamonai matamaia neganai, Iehova ese ena lauma helaga amo oi ia durua oi kamonai herevadia oi lalopararalaia bona abia dae totona. (1 Kor. 2:11, 12) Emu mauri lalonai Baibel amo oi dibaia gaudia oi badinaia neganai, ia ese oi ia hanamoa. Bona emu mauri oi gwauhamatalaia neganai, Iehova ia moale bada. Oibe, hereva momokani oi dibaia negana amo ema bona hari, Iehova be oi ia durua noho.

7. Edena bamona ita diba Dirava be ita do ia durua ia ita badinaia noho totona?

⁷ Iehova be ita ia durua ia ita hesiai henia noho totona, unai dainai ita diba ita do ia durua ia ita badinaia totona. Dirava ia diba ita be sibona eda goada amo hereva momokani ita dibaia lasi, bona sibona eda goada amo ia ita badinaia diba lasi. Aposetolo Petero be horoa taudia ia tore henidia, ia gwau: “Umui be Dirava ese ena siahu amo ia gimaia, badina umui be mai emui abidadama. Oibe, Dirava ese umui ia gimaia noho  hahemauri umui abia totona, unai hahemauri be nega dokona ai do ia hedinarai.” (1 Pet. 1:4, 5) Keristani taudia ibounai dekenai Petero ena hereva be mai anina bada. Hari, Iehova be edena dala ai ita ia gimaia? Unai henanadai ena haere ita diba be mai anina bada, badina ita ibounai ita ura Dirava ese ita ia durua ia ita abidadama henia noho totona.

ITA IA DURUA DALA KERERENA ITA DADARAIA TOTONA

8. Dahaka ese iseda laloa maoromaoro karana ia hadikaia diba?

⁸ Nega haida mauri ena hekwakwanai bona iseda manoka gaudia dainai, ita laloa maoromaoro lasi. Bema ita naria namonamo lasi, ita karaia gauna ta ese eda hetura karana Dirava ida ia hadikaia diba. (Galatia 6:1 duahia.) Nega ta Davida dekenai unai bamona ia vara.

9, 10. Davida be kerere badana ta ia karaia gwauraia neganai, edena dala ai Iehova ese ia koua? Hari, edena dala ai Iehova be ita ia durua noho?

⁹ King Saulo be Davida hamasea totona ia tahua neganai, Davida be sibona biagua karana ia hahedinaraia. Hegeregere, nega ta Davida be Saulo ia hamasea diba, to unai ia karaia lasi. (1 Sam. 24:2-7) To gabeai, Davida be ena badu ia biagua lasi bona ia ura ma haida ia hamasea. Unai nega ai, ia bona ena tatau totona aniani bona ranu be lasi dainai, mai hemataurai ida Nabala ia noia. To, Nabala ia ura lasi Davida ia durua bona ena ladana ia hadikaia. Davida ia badu bona ia ura Nabala bona ena ruma taudia ibounai do ia hamasedia. To, Davida ia laloa lasi gauna be, bema unai ia karaia Iehova ese ia hahemaoro henia diba. Nabala ena adavana Abigaila ese ia koua dainai, unai kerere badana ia karaia lasi. Davida be unai ia laloparara neganai, Abigaila ia hamaoroa: “Lohiabada, Israela ena Dirava lau hanamoa noho inai! Badina be hari dina ia ese oi ia siaia vadaeni, bona ita ruaosi ita hedavari inai. Oiemu laloa maoro dainai Dirava lau tanikiu henia! Bona oi danu lau tanikiu henia, badina hari dina lau ese ala-ala do lau karaia, bona lau sibona ese Nabala ena kerere davana do lau henia, to oi ese inai bamona laloa oi hadokoa.”​—⁠1 Sam. 25:9-13, 21, 22, 32, 33.

¹⁰ Unai sivarai amo dahaka ita dibaia? Kerere badana ta ia vara gwauraia neganai, Iehova ese ia koua diba. To, namo lasi ita laloa Iehova be hanaihanai unai bamona do ia karaia. Badina unai bamona negadia ai, ita diba lasi Iehova be dahaka do ia karaia ena ura ia hagugurua totona. (Had. 11:5) To, ita abia dae ia be eda kudouna ia diba, bona ita do ia durua ia ita badinaia noho totona. Iehova ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” (Sal. 32:8) Iehova be edena dala ai ita ia sisiba henia? Edena dala ai ena sisiba ese ita idia durua diba? Bona Iehova be edena dala ai ita ia hakaua noho? Apokalupo bukana amo unai henanadai edia haere mani ita tahua.

SISIBA AMO ITA IA GIMAIA

11. Edena bamona ita diba Iehova be kongrigeisen lalonai idia vara gaudia ibounai ia itaia?

¹¹ Apokalupo karoa 2 bona 3 ai ia noho matahanai ese ia hahedinaraia, King Iesu Keriso be Asia Minor dekenai idia noho kongrigeisen seven lalonai idia vara gaudia ia itaia. Unai sibona lasi, to idia vara hekwakwanai bona  taunimanima haida edia ladana ia gwauraia danu. Bona ia ese unai kongrigeisen ia hanamodia bona idia ta ta dekenai sisiba ia henia. Unai matahanai ena anina be dahaka? Unai kongrigeisen seven be lagani 1914 murinai idia noho horoa taudia idia laulaulaia. Ena be horoa taudia sibona dekenai unai sisiba ia henia, to hari idia noho kongrigeisen ibounai dekenai unai sisiba be mai anina bada. Unai dainai, ita gwau diba Iehova be ena Natuna ia gaukaralaia ena taunimanima ia hakaua totona. Edena dala ai Iehova ena hakaua dalana ita abia dae?

12. Edena dala ai Iehova ena hakaua dalana ita abia dae diba?

¹² Iehova ena hakaua dalana ita abia dae dalana ta be, sibona eda stadi ita karaia. Igui hesiai tauna mai ena kamonai ese ia halasia buka bona magasin amo Iehova ese sisiba namodia momo ia henia. (Mat. 24:45) To, ena sisiba ese ita idia durua totona, namona be nega ita atoa unai gaudia ita stadilaia bona badinaia totona. Sibona eda stadi karana amo Iehova be ita ia gimaia, unai amo dala kererena ita badinaia lasi. (Iuda 24) Iseda buka o magasin ta oi stadilaia murinai reana oi gwau, ‘Inai be lau totona idia torea.’ Namona be unai heduru herevana oi abia dae, badina ia be Iehova amo. Unai be hegeregere, Iehova be emu turana ta bamona, bona ia itaia emu kara ta be ia maoro lasi dainai, lauma helaga amo oi ia durua unai kara oi hanamoa totona. Oibe, lauma helaga ena hakaua dalana ita abia dae neganai, Iehova ese ita ia hakaua unai. (Salamo 139:23, 24 duahia.) Namona be iseda stadi karaia dalana bona negana ita herevalaia.

13. Dahaka dainai sibona eda stadi karaia dalana bona negana ita laloa be namo?

¹³ Bema ita moalelaia karana ta dekenai nega bada ita halusia, sibona eda stadi do ita karaia lasi. Tadikaka ta ia gwau: “Sibona eda stadi karana ita reaia diba badina TV, kompiuta, bona mobael fon dekenai nega bada ita haorea. Hari, iseda nega haorea kava gaudia be momo.” Bema ita naria namonamo lasi, unai gaudia dekenai iseda nega bada ita haorea diba. (Efe. 5:15-17) Namona be sibona ita nanadaia: ‘Hora hida lau atoa Baibel ena hereva dobudia lau stadilaia namonamo totona? Tok o hebou ena kahana ta lau hegaegaelaia negana sibona ai Baibel lau stadilaia, a?’ Sibona eda stadi o Ruma Bese Ena Tomadiho negana ita gaukaralaia diba, Iehova ena aonega herevadia ita tahua totona. Baibel ena hereva ese ita do idia gimaia bona durua Iehova ita abidadama henia noho totona.​—⁠Aon. 2:1-5.

HEDURU HEREVADIA AMO ITA IA HAGOADAIA

14. Baibel ese edena bamona ia hahedinaraia Iehova be iseda hemami ia diba?

¹⁴ Davida ena mauri lalonai lalohisihisi gaudia momo idia vara. (1 Sam. 30:3-6) To, Baibel ia gwau Iehova be Davida ena hemami ia diba. (Salamo 34:18;  56:8 duahia.) Dirava be iseda hemami ia diba bona ita “lalohisihisi” neganai, ia be ita kahirakahira ia noho. Davida be unai ia diba dainai ia gwau: “Do lau moale bada, oiemu noho hanaihanai lalokauna dainai do lau moale, badina oi ese egu laloa hekwarahi oi itaia, bona egu lauma ena hisihisi oi diba.” (Sal. 31:7) Iehova be iseda lalohisihisi ia itaia bona ita ia durua bona hagoadaia. Edena dala ai unai ia karaia?

15. Asapa ena sivarai amo dahaka ita dibaia?

¹⁵ Iehova ese ita ia hagoadaia dalana ma ta be kongrigeisen heboudia amo. Asapa ena sivarai ese unai ia hahedinaraia. Asapa ia lalomanoka badina ia itaia kara maoromaoro taudia be hisihisi idia davaria, to kara dika taudia be mauri namona idia moalelaia. Ia laloa ena hesiai gaukara be anina lasi dainai ia lalohisihisi bada, bona kahirakahira ena hesiai gaukara ia rakatania. To, dahaka ese Asapa ia durua? Ia gwau: “Dirava ena Dubu Helaga dekenai lau vareai lao.” Iehova idia tomadiho henia taudia ia bamoa dainai ena lalohadai ia haidaua. Ia laloparara kara dika taudia ese idia moalelaia maurina be do ia noho daudau lasi, bona nega korikori ai Iehova ese do ia hahemaoro henidia. (Sal. 73:2, 13-22) Reana nega haida iseda hemami be Asapa bamona. Satani ena tanobada ai idia vara kara gagevadia ita itaia neganai, ita lalohisihisi bona ita lalomanoka. To, tadikaka taihu ita bamoa neganai, goada ita abia bona mai moale ida Iehova ita hesiai henia diba.

16. Hana ena sivarai ese edena dala ai ita ia durua diba?

¹⁶ To, dahaka do oi karaia bema kongrigeisen lalonai hekwakwanai ta ia vara? Hegeregere, emu hesiai o elda maduna idia kokia dainai oi hemarai, eiava tadikaka o taihu ta ida oi hepapahuahu dainai, oi ura lasi hebou oi lao. Bema unai bamona hekwakwanai ta be oi dekenai ia vara, namona be Hana ena sivarai oi laloa. (1 Samuela 1:4-8 duahia.) Elikana ena adavana ma ta, Penina, be nega momo Hana ia kirikirilaia. Lagani ta ta Silo dekenai boubou gaudia henia totona idia lao neganai, Penina be nega momo unai ia karaia, bona Hana ena lalona ia hahisia. Unai dainai “ia taitai, bona aniani ia ania lasi.” To, Hana be Iehova tomadiho henia totona hanaihanai dubu helaga dekenai ia lao. Iena abidadama karana dainai, Iehova ese ia hanamoa.​—⁠1 Sam. 1:11, 20.

17, 18. (a) Kongrigeisen heboudia ai edena dala ai goada ita abia? (b) Iehova ese mai lalokau ida ita ia gimaia dainai, dahaka oi laloa?

¹⁷ Hana bamona, namona be hanaihanai Keristani hebou dekenai ita lao, badina unuseniai goada ita abia diba. (Heb. 10:24, 25) Hebou ai tadikaka taihu edia lalokau karana ese ita ia hagoadaia. Reana ta ena haere eiava tok ta ese ita ia hagoadaia. Eiava tadikaka o taihu ta ese eda lalohisihisi herevana ia kamonai, o ia gwauraia herevana ese ita  ia durua. (Aon. 15:23; 17:17) Danu, Iehova hanamoa anedia ita abia neganai, unai ese eda lalona ia hagoadaia bona ita moale. Ita lalohekwarahi neganai, hebou ai ita kamonai herevadia ese ita idia durua diba. Oibe, kongrigeisen heboudia ai Iehova ese ita ia durua bona “hagoadaia” ia ita badinaia noho totona.​—⁠Sal. 94:18, 19.

¹⁸ Dirava be mai lalokau ida ita ia naria dainai, Asapa bamona, Iehova dekenai ita gwau: “Oi ese egu imana oi dogoatao noho. Oi ese oiemu sisiba dekena amo lau oi hakaua noho.” (Sal. 73:23, 24) Ita moale bada badina Iehova be ita ia gimaia bona durua noho, unai amo do ita haheauka ela bona dokona!

[Study Questions]

[Picture on page 28]

Oi danu be Iehova ese ia veria mai

[Picture on page 30]

Iehova ena sisiba badinaia karana ese ita ia gimaia

[Picture on page 31]

Heduru herevadia amo goada ita abia