Lalokau be Lasi​—⁠Inai Nega Ena Toana Ta!

“Namona be Iehova emu Dirava oi lalokau henia mai emu kudouna ibounai, . . . [bona] emu dekena tauna oi lalokau henia, oi sibona oi lalokau henia hegeregerena.”​—⁠MAT. 22:37-39.

INAI POINT BADADIA OI TAHUA:

Delila, Abesaloma, bona Iuda Iskariote edia sivarai amo dahaka ita dibaia?

Edena dala ai Ionatana bona Petero edia haheitalai namona ita tohotohoa diba?

Edena dala ai iseda adavana bona Iehova ita badinaia noho diba?

1-3. (a) Edena bamona kara ese ia hamomokania ita be dina gabediai ita noho? (b) Edena henanadai toi do ita herevalaia?

DELILA, Abesaloma, bona Iuda Iskariote be edena bamona kara idia hahedinaraia? Idia ibounai be lalokau lasi karana idia hahedinaraia. Ena be Diadi Tauna Samson be Delila ia lalokau henia, to Delila ese Samson ia lalokau henia lasi. Abesaloma ia ura iena tamana, King Davida ena dagi ia abia. Bona Iuda ese ena Biaguna, Keriso Iesu ena mase dalana ia karaia. Idia ta ta edia lalokau lasi karana ese dika bada ia havaraia! Dahaka dainai edia sivarai ita stadilaia be namo?

² Toretore hahine ta ia gwau, hari taunimanima momo be lalokau lasi karana idia hahedinaraia. Ita hoa lasi badina Iesu ese “inai nega oromana ena dokona” ia perovetalaia neganai, ia gwau: “Momo be . . . ta ta edia hamasea dalana do idia karaia.” (Mat. 24:3, 10) Ta ese ta ena mase dalana ia karaia eiava ena lalokau tauna ia hahisia be lalokau lasi karana. Paulo ia peroveta “dina gabediai” taunimanima be “ma haida do idia badinaia lasi” bona “ma haida edia mase dalana do idia karaia.” (2 Tim. 3:1, 2, 4) Danu, buka bona muvi momo ese idia hahedinaraia heudahanai karana be dika lasi, bona moale ia havaraia. To, unai kara ese headava lalonai lalohisihisi bona metau idauidau ia havaraia. Oibe, lalokau lasi karana be inai nega ena toana ta!

³ Baibel lalonai, edia turana o lalokau tauna idia hahisia taudia edia sivarai amo dahaka ita dibaia? Ma haida idia lalokau henia taudia edia kara be edena dala ai ita tohotohoa diba? Daika ita badinaia noho be namo? Mani unai henanadai edia haere ita tahua.

 HAHEITALAI DIKADIA

4. Edena dala ai Delila ese Samson ena mase dalana ia karaia? Dahaka dainai unai be dika momokani?

⁴ Mataganigani hahinena Delila ena sivarai do ita herevalaia guna. Ia be Diadi tauna Samson ese ia ura henia hahinena. Samson ia ura Iehova ena taunimanima ia gunalaia bona Pilistia taudia do idia tuari henia. Pilistia lohia taudia faiv idia ura Samson idia hamasea, bona idia diba Delila be Samson ia lalokau henia momokani lasi. Unai dainai, Delila idia hamaoroa moni bada herea do idia henia bema Samson ena goada ia abia dalana ia tahua. Delila be mai mataganigani ida unai moni ia abia dae. Nega toi “Delila ese Samson ena lalona ia veria,” to ia kwalimu lasi. Unai bamona ia karaia ela bona “Samson ia hesiku momokani” bona Delila ia hamaoroa ia be nega ta ena huina ia utua lasi, bona bema ia utua ena goada do ia ore. * Delila be unai ia diba neganai, Samson be ena mamuna dekenai ia mahuta lalonai tau ta ia hamaoroa bona Samson ena huina ia utua. Bena Samson be ena inai taudia dekenai ia henia idia hamasea totona. (Gun. 16:4, 5, 15-21) Delila ese ia karaia karana be dika momokani! Ia mataganigani dainai ia ia lalokau henia tauna ena mase dalana ia karaia.

5. (a) Abesaloma ena kara amo ia hahedinaraia ia be edena bamona tauna? (b) Davida ese Ahitopela ena kara be edena bamona ia laloa?

⁵ Haheitalai iharuana be Abesaloma ena sivarai. Ia ura dikadika ena tamana, Davida, ena king dagina ia abia, bona unai ura be lahi bamona ena kudouna lalonai ia araia noho. Abesaloma ia karaia kara ginigunana be “Israela taudia edia lalona ia veria.” Idia ia rosia bona kisi henidia, to Abesaloma be idia ia laloa bada lasi bona gwauhamata koikoidia ia karaia. (2 Sam. 15:2-6) Danu, Abesaloma ese Davida ena turana namona Ahitopela ena lalona ia veria bona ena gwau-edeede karana ia durua. (2 Sam. 15:31) Davida ese Ahitopela ena kara dainai ia mamia lalohisihisi be Salamo karoa 3 bona karoa 55 ai ia torea. (Sal. 3:1-8; Salamo 55:12-14 duahia.) Abesaloma ia ura ena tamana, Iehova ese ia abia hidi king, ena dagi ia henaoa. Unai ese ia hahedinaraia ia be Dirava ese ia horoa king ia matauraia lasi. (1 Siv. 28:5) To, Abesaloma ia kwalimu lasi bona Davida ia lohia noho.

6. Iuda be edena dala ai Iesu ena mase dalana ia karaia? Gado haida ai inai ladana Iuda be edena bamona idia gaukaralaia?

⁶ Haheitalai ihatoina be, Keriso ena mase dalana ia karaia tauna Iuda Iskariote ena sivarai. Pasova ginigabena ai, Iesu be aposetolo taudia 12 dekenai ia gwau: “Umui lau hamaoroa momokani, umui ta ese egu mase dalana do ia karaia.” (Mat. 26:21) Gabeai, Getesemane umana ai Iesu be Petero, Iamesi, bona Ioane ia hamaoroa: “Lauegu mase dalana ia karaia tauna be ia mai kahirakahira vadaeni.” Iesu ia hereva noho lalonai Iuda be hutuma danu ia mai “bena maoromaoro Iesu dekenai ia lao, ia gwau: ‘Rabi e, namo!’ Bona ia kisi henia.” (Mat. 26:46-50; Luka 22:47, 52) Iuda ese Iesu be ena inai taudia dekenai ia henia neganai, ia be “kara maoromaoro tauna ena mase dalana [ia] karaia.” Mataganigani tauna Iuda be siliva moni 30 abia totona Iesu ena mase dalana ia karaia! (Mat. 27:3-5) Gado haida ai, ta be ena turana namona ena mase dalana ia karaia neganai, ena ladana idia hatoa Iuda. *

7. Abesaloma, Iuda bona Delila edia sivarai amo dahaka ita dibaia?

 ⁷ Unai sivarai ibounai amo dahaka ita dibaia? Abesaloma bona Iuda be hemarai dalanai idia mase, badina Iehova ese ia horoa taudia edia mase dalana idia karaia. (2 Sam. 18:9, 14-17; Kara 1:18-20) Taunimanima be Delila ena ladana idia kamonai neganai, idia laloa gauna be ia be Samson ia lalokau henia lasi bona ia koia. Unai dainai, gau badana be mataganigani o sibona eda ladana abia isi totona dagi bada tahua karana ita dadaraia. Bema unai ita dadaraia Iehova ena hahenamo do ita abia! Unai sivarai idauidau ese ita idia durua ma haida hahisia karadia ita dadaraia totona.

HAHEITALAI NAMODIA TOHOTOHOA

8, 9. (a) Dahaka dainai Ionatana ia gwauhamata Davida do ia badinaia? (b) Edena dala ai Ionatana ita tohotohoa diba?

⁸ Baibel lalonai lalokau karana idia hahedinaraia taudia momo edia sivarai ia noho. Sivarai rua do ita herevalaia. Ginigunana be Ionatana. Ia be King Saulo ena natuna roboana dainai Israela ena king dagina ia abia be maoro. To, Iehova ese Davida ia abia hidi, bona Ionatana be unai ia matauraia bona Davida ia mama henia lasi. “Ionatana ese Davida ia lalokau henia, ia sibona ia lalokau henia hegeregere” bona ia gwauhamata Davida do ia badinaia. Danu, ena kouti badana, tuari dabua bona kaia, bona peva be Davida ia henia, unai amo ia hahedinaraia ia ese king ia matauraia. (1 Sam. 18:1-4) Ionatana ia gaukara goada Davida ia durua totona. Hegeregere Davida be Saulo amo ia gimaia totona kahirakahira ena mauri ia haboioa. Ionatana ese Davida ia hamaoroa: “Oi be Israela ena king do oi lao, bona . . . lau [be] oiemu iharuana do lau lao.” (1 Sam. 20:30-34; 23:16, 17) Unai dainai, Ionatana ia mase neganai Davida ia tai dikadika bona ena lalohisihisi herevadia be ane ta dekenai ia gwauraia.​—⁠2 Sam. 1:17, 26.

⁹ Ionatana ia diba ia be daika do ia badinaia. Ia ese Siahu Ibounai Diravana, Iehova, ia badinaia bona ena abia hidi tauna Davida ia durua. Hari, ita danu unai bamona ita karaia be namo. Herevana kongrigeisen ai maduna ita abia lasi, to namona be mai iseda lalona ibounai ida ita idia hakaua tadikaka ita durudia.​—⁠1 Tes. 5:12, 13; Heb. 13:17, 24.

10, 11. (a) Dahaka dainai Petero be Iesu ia rakatania lasi? (b) Edena dala ai Petero ita tohotohoa diba?

¹⁰ Do ita herevalaia haheitalai namona ma ta be aposetolo Petero. Ia gwauhamata ia be Iesu do ia badinaia. Nega ta Iesu be haheitalai ta ia gaukaralaia ena hahediba taudia ia durua totona. Ia ura ia hadibadia do ia bouboulaia tauanina bona rara idia abidadama henia be mai anina bada. Ia herevalaia  gauna be haheitalai sibona, to idia momo be idia badu bona Iesu idia rakatania. (Ioa. 6:53-60, 66) Iesu ese ena aposetolo taudia 12 ia nanadaia: “Umui danu do umui lao, a?” Petero ia haere: “Lohiabada e, daika dekenai do ai lao? Mauri hanaihanai herevadia be oi dekenai idia noho, bona ai abidadama bona ai diba oi be Dirava ena Helaga Tauna.” (Ioa. 6:67-69) Anina be Petero ese Iesu ena haheitalai ia lalopararalaia, a? Reana lasi. To Petero be ena lalona ia hadaia Dirava ese ia horoa Natuna, Iesu ia badinaia totona.

¹¹ Petero ia gwau lasi Iesu ena hereva be kerere bona reana gabeai do ia haidaua. To, ia manau badina ia diba Iesu dekenai “mauri hanaihanai herevadia” idia noho. Petero ita tohotohoa be namo. Bema igui hesiai tauna ese ia halasia buka bona magasin ai ita duahia herevadia ita lalopararalaia be auka o iseda lalohadai amo ia idau, dahaka do ita karaia? Namo lasi ita laloa edia hereva be kerere bona reana gabeai do idia haidaua. To, namona be ita manau bona edia hereva ita abia dae.​—⁠Luka 12:42 duahia.

EMU ADAVANA OI BADINAIA

12, 13. Dahaka dainai headava lalonai heudahanai ia vara? Ta ese unai ia karaia be maoro, a?

¹² Emu lalokau tauna oi hahisia be kara namona lasi. Badina unai ese Keristani ruma bese bona kongrigeisen lalonai ia noho maino bona lalotamona karana ia hadikaia diba. Emu adavana bona Dirava oi badinaia diba daladia haida mani ita herevalaia.

¹³ Heudahanai be lalohisihisi ia havaraia karana ta. Ia heudahanai tauna be ma ta ia ura henia dainai ena hahine ia dadaraia, bona hahine be sibona ia noho dainai ia lalometau bada. To, dahaka dainai idia lalokau heheni taudia huanai unai ia vara? Nega momo unai ia vara badina ta ta edia hemami idia laloa bada lasi. Taunimanima edia mauri ia stadilaia profesa ta ia gwau, heudahanai ia vara badina edia headava hagoadaia totona idia gaukara hebou lasi. Nega daudau idia headava taudia huanai unai ia vara danu. Hegeregere, tau ta ena mauri lagani be 50, ia bona ena adavana be lagani 25 idia headava vadaeni. To tau ese ena adavana ia rakatania bona hahine ma ta ia adavaia. Haida idia gwau unai be vaia mauri lagani idia bada taudia ese idia karaia karana. To, adavana ia rakatania bona ia heudahanai tauna be lalokau lasi karana ia hahedinaraia. *

14. (a) Adavana ia rakatania tauna dekenai Iehova ena lalohadai be dahaka? (b) Heudahanai karana dekenai Iesu be dahaka ia gwau?

¹⁴ Bema heudahanai karana ia vara lasi, to ta ia ura adavana ia rakatania, Iehova ena lalohadai be dahaka? Iseda Dirava be headava hadokoa karana ia inai henia. Ia ese edia adavana idia dagedage henia bona rakatania taudia ia sisiba auka henidia. (Malaki 2:13-16 duahia.) Iesu be ena Tamana bamona, headava idia hadokoa taudia ia inai henidia. Ia gwau ta ese ena adavana ia dadaraia o ia rakatania be maoro lasi.​—⁠Mataio 19:3-6, 9 duahia.

15. Edena dala ai headava taudia ese edia lalokau bona badinaia heheni karana idia hagoadaia diba?

¹⁵ Edena dala ai headava taudia ese edia lalokau bona badinaia heheni karana idia hagoadaia diba? Baibel ia gwau: “Oiemu eregabe dinadia neganai, oi adavaia hahine [o tau] do oi moalelaia” bona “oiemu adavana, oi ura henia hahine [o tau], danu  do umui moale hebou.” (Aon. 5:18; Had. 9:9) Headava taudia idia buruka neganai, namona be idia gaukara goada ta ta idia naria bona edia hemami idia laloa totona. Anina be do idia hemataurai heheni, idia heduru heheni, bona nega idia atoa gau haida idia moalelaia hebou totona. Namona be idia hekwarahi edia headava, bona edia hetura karana Iehova ida idia gimaia totona. Unai idia karaia totona, namona be Baibel idia stadilaia hebou, idia haroro hebou, bona idia guriguri hebou. Unai amo Iehova ena hahenamo do idia abia.

IEHOVA OI BADINAIA

16, 17. (a) Iseda Dirava badinaia karana be dahaka ese ia tohoa diba? (b) Edena sivarai ese ia hahedinaraia, Dirava badinaia karana be mai ena namo?

¹⁶ Kongrigeisen lalonai haida be kerere badana idia karaia neganai, ‘sisiba aukana’ idia abia unai amo “edia abidadama do ia goada.” (Tito 1:13) To, haida be idia helalo-kerehai lasi dainai, kongrigeisen amo idia atoa siri. “Matahakani amo diba idia abia taudia,” be edia hetura karana Dirava ida idia hanamoa lou. (Heb. 12:11) To edena bamona bema emu varavara o tura namona ta idia atoa siri? Eda kara ese do ia hahedinaraia ita be Dirava o idia atoa siri tauna ita badinaia. Iehova be ita ia raraia bema ita be iena taravatu do ita badinaia eiava lasi. Gau badana be Iehova ita badinaia.​—⁠1 Korinto 5:11-13 duahia.

¹⁷ Ruma bese ta be Iehova idia badinaia bona idia atoa siri varavara ta idia bamoa lasi dainai hahenamo idia davaria mani ita herevalaia. Mero matamata ta be lagani 10 mai kahana kongrigeisen murimurinai ia noho. Unai nega ai ena tamana, sinana, bona tadikaka foa be ia idia “bamoa lasi.” Nega haida ia ura idia ia bamoa, to idia ta ta be Dirava idia badinaia bona idia hereva henia lasi. Kongrigeisen ese idia abia lou murinai, ia gwau hanuaboi ai sibona ia noho neganai, ena ruma bese taudia ia reaia bada. Ia gwau bema iena famili ese nega sisina sibona ia idia bamoa, do ia moale, to idia be ia idia hereva henia lasi. Ia ura dikadika ena ruma bese ia bamodia dainai, ena hetura karana Iehova ida ia hanamoa lou. Bema oi mamia idia atoa siri varavara ta oi ura hereva henia, namona be unai sivarai oi laloa.

18. Haheitalai namodia bona dikadia ita herevalaia murinai, emu lalohadai be dahaka?

¹⁸ Hari inai negai, taunimanima be ta ta idia badinaia lasi bona lalokau henia lasi. To kongrigeisen lalonai, tadikaka taihu momo be ta ta idia badinaia, bona edia kara ita tohotohoa diba. Idia be ‘mai edia kudouna ibounai, mauri ibounai, bona darana ibounai ida,’ Dirava bona ‘edia dekena tauna idia lalokau henia.’ (Mat. 22:37-39) Namona be ita gaukara goada Dirava bona ta ta dekenai lalokau ita hahedinaraia totona.

[Footnotes]

[Study Questions]

[Picture on page 10]

Ena be haida ese Iesu idia rakatania, to Petero be Dirava ese ia horoa Natuna ia badinaia