Elva Gjerde ese ia sivarailaia

Lagani 70 gunanai, vadivadi tauna ta be emai ruma dekenai ia mai, bona egu tamana dekenai ia gwauraia herevana ese egu mauri ia haidaua momokani. Unai nega amo tura momo ese lau idia durua, bona tura hereadaena ta lau davaria danu. Mani egu sivarai lau gwauraia.

LAU be lagani 1932 ai, Sydney, Australia dekenai lau vara. Lauegu tama sina be Dirava idia abia dae, to dubu ta dekenai idia lao lasi. Egu sinana ia gwau Dirava be lau ia itaia noho, bona bema kerere ta lau karaia lau do ia panisia, unai dainai Dirava dekenai lau gari. To, Baibel ena hereva lau ura henia. Egu anti be wikeni ai ia vadivadi neganai, lau dekenai Baibel ena sivarai namodia momo ia gwauraia. Ena vadivadi negadia lau moalelaia.

Hahine burukana ta ese egu sinana dekenai buka haida ia henia, bona egu tamana ese lau dekenai unai buka ia duahidia. Unai hahine burukana be Iehova ena Witnes hahinena ta. Egu tamana be ia duahia gaudia ia ura henia bada dainai, Witnes taudia ida Baibel ia stadilaia matamaia. Hanuaboi ta, ena Baibel stadi idia karaia lalonai, ia itaia lau komu bona lau kamonai noho. Ia ura egu daiutu dekenai lau ia siaia, to ena stadi tauna ia henanadai bema namo edia stadi lalonai lau helai. Unai nega amo Dirava momokanina, Iehova lau tura henia matamaia.

Nega sisina murinai, lau bona egu tamana be Keristani heboudia dekenai ai lao matamaia. Egu tamana be gau momo ia dibaia dainai, iena mauri ia haidaua bona ena badu karana ia biagua. Unai ese egu sinana bona kakana, Frank, ia veria hebou dekenai idia mai totona. a Ai ibounai ai goada ai lao, ai bapatiso, bona Iehova ena Witnes taudia ai ai lao. Unai nega amo buruka taudia momo lau tura henidia, bona hekwakwanai negadiai lau idia durua.

EDENA GAUKARA DO LAU ABIA HIDI?

Egu matamata neganai, buruka taudia lau tura henidia. Ta be taihu Alice Place, ia be emai famili ia haroro henia Witnes hahine ginigunana. Ia be egu tubuna bamona lau kara henia. Taihu Alice ese lau dekenai haroro dalana ia hadibaia, bona lau ia hagoadaia lau bapatiso totona. Egu mauri lagani be 15 neganai, lau bapatiso.

Lau idia durua bada tura namodia haida be Percy bona Madge Dunham. Lau be matematik lau ura henia bada, bona egu ura be sikuli ai matematik do lau hadibaia. Tuari iharuana ia do vara lasi neganai, idia be Latvia dekenai misinari gaukara idia karaia. To, tuari dainai Australia idia giroa mai bona Sydney Betele dekenai idia gaukara. Idia be lau idia laloa bada, bona edia misinari  sivaraidia momo be lau dekenai idia gwauraia. Edia sivarai amo lau laloparara ma haida dekenai Baibel hadibaia gaukarana ena moale ese matematik hadibaia gaukarana ena moale ia hereaia. Unai dainai, egu lalona lau hadaia misinari gaukarana lau karaia totona.

Percy bona Madge ese lau idia hagoadaia painia gaukara lau karaia guna, unai amo misinari gaukara do lau karaia diba. Lagani 1948 ai, egu mauri lagani be 16 neganai, painia gaukara lau hamatamaia. Egu kongrigeisen Hurstville, Sydney dekenai, painia taudia 10 lau bamoa.

Lagani foa lalonai, New South Wales bona Queensland edia taoni foa dekenai lau painia. Egu Baibel stiuden ginigunana be Betty Law (hari idia gwauraia Betty Remnant). Betty be taihu namona ta bona ena mauri lagani be bada. Gabeai, ai ruaosi be Syndey ena west kahana, Cowra taoni dekenai ai painia. Ena be ai painia hebou daudau lasi, to unai nega amo ema bona hari ai be tura namodia.

Lau idia abia hidi spesel painia gaukara do lau karaia bona Narrandera taoni dekenai lau idia siaia. Egu painia turana matamata be Joy Lennox (hari idia gwauraia Joy Hunter). Ena mauri lagani be bada bona ia be haroro goadagoada taihuna. Unai taoni dekenai ai ruaosi sibona be Witnes taudia. Lau bona Joy be heabidae taudia, Ray bona Esther Irons ida ai noho. Edia natudia be foa; mero tamona bona kekeni toi, bona idia ibounai be hereva momokani idia ura henia. Ray bona ena natuna mero be mamoe bona witi umana naria gaukara idia karaia. To, Esther bona ena natuna kekenidia be edia daiutu idia rentaia taudia edia daiutu idia hagoevaia bona edia aniani idia nadua. Sunday ibounai, lau bona Joy ese Irons famili bona unuseniai idia noho tatau 12 totona aniani badana ai hegaegaelaia. Unai tatau be trein ena dala idia karaia bona nega ibounai idia hitolo bada! Edia aniani ai nadua karana amo ai hahedinaraia Irons famili edia heabidae karana ai laloa bada​—unai be emai renta ena davana bamona. Ai aniani bona mereki ai huria murinai, Irons famili ida Gima Kohorona ai stadilaia. Ray, Esther, bona edia natudia foa be hereva momokani idia abia dae, bona idia be Narrandera Kongrigeisen taudia ginigunadia.

Lagani 1951 ai, Sydney ena hebouhebou ta dekenai lau lao bona misinari gaukara totona idia karaia hebou dekenai lau vareai. Unai hebou be palai rumana badana henunai idia karaia, bona taunimanima 300 idia lao. Tadikaka Nathan Knorr be Brooklyn Betele amo ia mai, bona ai ura dikadika iena hereva do ai kamonai. Ia gwau tanobada ena kahana ibounai dekenai sivarai namona ai harorolaia goadagoada be namo. Unai hebou dekenai idia mai painia taudia momo be gabeai South Pacific motumotu bona gabu ma haida dekenai haroro gaukara idia karaia. Lagani 1952 ai, lau moale bada badina lau bona Australia tadikaka taihu 16 idia boiria Gilead Sikuli ena klas namba 19 dekenai do ai lao. Egu mauri lagani be 20 sibona, bona egu ura misinari gaukara karaia totona be ia momokani inai!

EGU KARA HAIDA LAU HAIDAUA

Gilead Sikuli ese egu diba Baibel dekenai ia habadaia bona egu abidadama ia hagoadaia. Danu, lau ia durua egu kara bona lalohadai lau haidaua totona. Lau be matamata bona lau ura egu kara ibounai be maoro sibona, bona lau ura ma haida be unai bamona idia karaia danu. Nega haida egu kara bona lalohadai be auka bona lau laloa kara haida be kerere. Hegeregere, lau itaia Tadikaka Knorr be Betele taudia ida softball ia gadara neganai, lau hoa, badina lau laloa unai be kerere.

 Gilead tisa taudia idia itaia lau be unai kara dekenai lau hekwarahi, bona lau idia durua egu kara lau haidaua totona. Metairametaira, lau laloparara Iehova be lalokau Diravana bona ita karaia gaudia ia laloa bada. Ia be ita ia doria o biagua auka lasi. Egu sikuli turadia haida danu ese lau idia durua. Idia ta ena hereva lau laloatao, ia gwau: “Elva, Iehova be kwadia auna amo ita ia biagua lasi. Unai dainai namo lasi oi sibona dekenai taravatu aukadia oi atoa!” Unai hereva ese egu kudouna ia pidia momokani.

Gilead Sikuli murinai, ai ibounai faiv be Africa tanona, Namibia dekenai idia siaia. Daudau lasi emai Baibel stadi ibounai be 80. Namibia tanona bona misinari gaukara lau ura henia, to danu Switzerland dekenai ia noho misinari tadikaka ta lau ura henia. Unai dainai lagani tamona murinai, Switzerland dekenai lau lao. Ai headava bona sekit gaukara ai karaia.

LALOHISIHISI GAUNA TA IA VARA

Lagani faiv sekit gaukara ai karaia murinai, Switzerland Betele dekenai ai idia boiria. Betele gaukara lau ura henia bona nega daudau hereva momokani lalonai idia noho buruka taudia bamoa karana lau moalelaia.

Daudau lasi murinai, lalohisihisi gauna ta ia vara. Egu adavana be lau bona Iehova ia rakatania neganai, lau lalohisihisi bada. To, Betele famili edia lalokau karana ese lau ia durua bada. Bema unai buruka taudia idia noho lasi, lau diba lasi dahaka do lau karaia. Egu lalohisihisi herevadia idia kamonai, bona nega haida lau ura sibona lau noho neganai, unai idia matauraia. Edia hereva bona hebogahisi karadia ese lau ia hagoadaia dainai, lau haheauka bona Iehova kahirakahira lau noho.

Egu buruka turadia be guna hekwakwanai idia davaria danu, bona edia hahegoada herevadia lau laloa bada. Guna Madge Dunham ese lau ia hamaoroa: “Elva, Iehova ena hesiai gaukara oi karaia lalonai, hahetoho momo do oi davaria. To, hekwakwanai badadia be emu lalokau taudia amo do idia mai. Unai negadiai, namona be Iehova kahirakahira oi noho. Bona laloatao, oi be goevadae lasi taudia oi hesiai henia lasi, to Iehova oi hesiai henia!” Taihu Madge ena heduru herevadia ese lau idia durua hahetoho idauidau lau haheaukalaia totona. Egu lalona lau hadaia, egu adavana ena kerere ese egu hetura karana Iehova ida do ia hadikaia lasi.

Gabeai, Australia dekenai lau giroa bona egu famili idia noho gabuna ai painia gaukara lau karaia. Sisima dekenai lau lao noho lalonai, pasendia haida lau haroro henidia. Unai taudia huanai, Norway tauna ladana Arne Gjerde ia noho. Ia be hereva momo lasi tauna, to ia kamonai gaudia ia ura henia. Gabeai, Arne ese lau bona egu famili ia vadivadi henia. Ia dibaia gaudia ia abia dae bona ia bapatiso. Lagani 1963 ai, lau bona Arne ai headava bona lagani rua murinai, emai natuna Gary ia vara.

LALOHISIHISI GAUNA MA TA

Lau, Arne bona Gary be emai ruma bese maurina ai moalelaia. Arne ese emai ruma ia habadaia, unai amo egu buruka tama sina be ai danu idia noho diba. To, lagani 6 murinai, doketa idia gwau Arne be kensa gorerena ia abia. Unai sivarai  ai kamonai neganai, ai lalohisihisi bada. Arne be radiation treatment ia abia dainai, nega daudau hospital dekenai ia noho. Dina ibounai ia lau vadivadi henia, bona toana be do ia namo, to ma strouk gorere ia abia. Doketa idia gwau ia be wiki haida sibona do ia mauri, to ia goada lou dainai ruma dekenai ai giroa. Lau naria ela bona ia raka lou diba bona kongrigeisen lalonai elda gaukara ia karaia. Arne be hevaseha bona kiri momo tauna dainai, ia namo haraga bona lau naria be hekwarahi lasi.

Lagani 1986 ai Arne ia gorere lou. Unai nega ai, egu tama sina be idia mase vadaeni, unai dainai Sydney ai rakatania bona Blue Mountains, egu turadia idia noho gabuna dekenai ai lao. Gabeai, Gary be taihu namona ta ladana Karin ia adavaia bona ai idia boiria idia ida ruma tamona dekenai do ai noho. Hua haida murinai, ruma matamata ai abia bona ai foa be unuseniai ai noho.

Arne ena gorere ia bada dainai, hua 18 bedi ai ia hekure sibona bona dina ibounai lau ese lau naria. Ruma sibona ai lau noho dainai, dina ta ta ai hora rua be Baibel bona buka ma haida lau stadilaia diba. Lau dibaia gaudia momo ese lau idia durua lau haheauka totona. Kongrigeisen lalonai idia noho buruka taudia edia vadivadi karana lau moalelaia. Idia haida be unai bamona hekwakwanai idia davaria dainai, lau idia hagoadaia bada! April 2003 ai Arne ia mase, to ia diba do ia toreisi lou.

LAU IA DURUA BADA GAUNA

Lau matamata neganai, lau ura lau karaia gaudia ibounai be maoro sibona. To, lau laloparara mauri be unai bamona lasi. Hahenamo momo lau davaria, bona hekwakwanai badadia lau davaria danu. Egu adavana ginigunana ese lau ia rakatania bona egu adavana iharuana ia gorere bona ia mase. Egu hekwakwanai negadia iboudiai, dala idauidau amo haida ese lau idia hagoadaia. To lau ia durua bada tauna be “Noho Hanaihanai” Diravana, Iehova. (Dan. 7:9) Iena sisiba ese lau ia durua egu kara lau haidaua totona, bona misinari gaukara lalonai ekspiriens namodia lau davaria. Hekwakwanai negadiai, Iehova ena lalokau bona hebogahisi ese lau ia hagoadaia dainai lau haheauka diba. (Sal. 94:18, 19) Danu, egu famili bona turadia ese lau idia laloa bada. (Aon. 17:17) Bona lau idia durua taudia momo be buruka taudia.

Abidadama tauna Iobu, ia gwau: “Aonega be taunimanima burukadia dekenai ia noho, bona edia lagani be momo taudia ese, diba bada idia davaria noho.” (Iobu 12:12) Unai siri ena hereva be momokani. Buruka taudia edia heduru herevadia ese lau idia hagoadaia, bona edia hetura karana lau laloa bada.

Hari, egu mauri lagani be 80 bona lau danu lau buruka vadaeni. Lau davaria hekwakwanai dainai lau ese buruka taudia edia hemami lau laloa bada. Idia haida lau vadivadi henia bona durudia. To matamata taudia edia hebamo karana lau moalelaia danu. Edia goada ese lau ia durua bona hagoadaia, bona heduru totona lau dekenai idia mai neganai, mai moale ida lau durudia.

[Footnote]

[Picture on page 14]

Narrandera ai Joy Lennox ida lau painia

[Picture on page 15]

1960, Switzerland Betele famili ida

[Picture on page 16]

Lau bona Arne, ia gorere neganai